‘Tu Kuati Owuya Wespiritu’

‘Kombili ko ka lendi. Kuati owuya wespiritu. Vumbi Yehova.’ ​—⁠VA ROM. 12:⁠11.

1. Momo lie va Isareli va endela oku eca ovilumba viovinyama kuenda vikuavo?

YEHOVA wa kapako alikolisilo afendeli vaye va siata oku linga oco va lekise ocisola kokuaye, lepokolo poku tẽlisa ocipango caye. Kosimbu, eye wa tavele ovilumba viovinyama, kuenda olombanjaile vikuavo. Poku eca ovilumba viaco, va Isareli va enda oku kuama Ocihandeleko Suku a ecele ku Mose, oco va tambule ongecelo yakandu, loku eca olopandu ku Suku. Koloneke vilo, Yehova ka tu kisika vali oku eca ovilumba viovinyama. Pole, ocipama 12 cukanda upostolo Paulu a sonehela Akristão vo ko Roma, wa lekisa okuti, tu sukila oku eca ovilumba vikuavo. Tu konomuisi ndomo tu pondola oku ci linga.

Ocilumba ci Kasi Lomuenyo

2. Etu Tuakristão, ovituwa vipi tu sukila oku lekisa komuenyo wetu, kuenda nye ca kongelamo?

² Tanga Va Roma 12:​1, 2. Paulu kefetikilo liukanda waye, wa lekisa okuti, Akristão olombuavekua, cikale va Yudea ale Vakualofeka, ka va tendiwa nda vakuesunga kovaso a Suku omo liovilinga viavo. Pole, va tendiwa ndavakuesunga omo liekolelo liavo. (Va Rom. 1:16; 3:​20-​24) Kocipama 12, Paulu wa lombolola okuti, Akristão va sukila oku eca olopandu, loku likolisilako oku linga ocipango ca Suku. Oco tu ci linge, tu sukila oku kuata utima wa sunguluka. Omo okuti ka tua lipuile, tua siata oku pokola “kovihandeleko viekandu haivio viokufa.” (Va Rom. 8:⁠2) Oco tu ‘linge omanu vokaliye,’ tu sukila oku pongolola ovitima vietu, lovisimĩlo vietu. (Va Efe. 4:​23) Tu pondola lika oku linga apongoloko aco, lekuatiso lia Suku kuenda espiritu liaye. Tu sukila oku likolisilako oku ‘lekisa olondunge.’ Pole, tu ci linga lika, nda tua yuvula oku ‘lisetahãisa loluali lulo’ lueyuka ovitalukilo via vĩha, kuenda ovisimĩlo ka via sungulukile.​—⁠Va Efe. 2:​1-3.

3. Momo lie tu sukilila oku kunda olondaka viwa viusoma?

³ Paulu, o tu vetiyavo oku ‘lekisa olondunge,’ oco tu limbuke ‘ocipango ca Suku, okuti ciwa, ca sunguluka, kuenda ca pua eko.’ Momo lie tu sukilila oku tanga Embimbiliya eteke leteke, oku sokolola ovina tua tanga, oku likutilila ku Suku, loku endaenda kolohongele, kuenda oku kunda olondaka viwa Viusoma? Anga hẽ, tu linga upange waco omo lievetiyo liakulu vekongelo? Tua sanjuka calua omo liekuatiso liavo. Pole, tua litumbika kupange waco, momo espiritu lia Yehova Suku, lia tu vetiya oku lekisa ocisola cocili kokuaye. Tua kũlĩha okuti, Yehova o yongola okuti, tu linga upange waco, oco tu tẽlise ocipango caye. (Sak. 4:6; Va Efe. 5:​10) Nda tua ci linga, tu kuata esanju, poku limbuka okuti, tuambata omuenyo wa sunguluka, kuenda tu taviwa la Suku.

Olongavelo Via Litepa

4, 5. Akulu vekongelo, va pondola ndati oku kuatisa vamanji lolongavelo va tambula?

⁴ Tanga Va Roma 12:​6-8, 11. Paulu wa lombolola okuti, ‘omunu lomunu pokati ketu, wa tambula olongavelo via litepa.’ Vimue pokati kolongavelo Paulu a tukula, ndeci oku lungula, kuenda oku songola, wa vi tiamisila kakulu vekongelo va vetiyiwa oku lekisa ‘ombili yoku tẽlisa ovikele viavo.’

⁵ Paulu wa popia hati, akulu vekongelo va lekisa ombili yaco, poku longisa, kuenda oku tẽlisa ‘upange wavo woku kunda.’ Ulandu waco u lekisa okuti, Paulu wa kala oku tukula ‘upange’ u lingiwa la vamanji va kasi vekongelo okuti, ‘va likuete omunga.’ (Va Rom. 12:​4, 5) Upange waco, u sokisiwa la una ovapostolo va tukula kelivulu Liovilinga 6:​4, li popia hati: “Etu puãi, tu pandakaisa koku likutilila kuenda koku kunda ondaka.” Nye ca kongela vupange woku kunda? Akulu vekongelo, va siata oku pamisa vamanji lolongavelo viavo. Va ci linga poku likutilila eci va lilongisa Ondaka ya Suku oco va kuatise ekongelo. Va ci lingavo poku kũlĩhĩsa ovina va yongola oku longisa, kuenda oku nyula vamanji. Omo liaco, akulu vekongelo, va sukila oku ‘lekisa esanju’ poku linga upange waco.​—⁠Va Rom. 12:​7, 8; 1 Pet. 5:​1-3.

6. Tu kapako ndati elungulo li sangiwa kelivulu lia Va Roma 12:​11, kuopiwa osapi yocipama cilo?

⁶ Paulu wamisako loku popia hati: ‘Kombili ko ka lendi. Kuati owuya wespiritu. Vumbi Yehova.’ Nda tua limbuka okuti, tu kuete owesi kupange woku kunda, tu sukila oku lekisa onjongole kelilongiso lio pokolika. Tu ci linga poku likutilila loku pinga espiritu lia Yehova, oco li tu kuatise oku yula ocitangi caco, kuenda oku lekisa ombili kupange waco. (Luka 11:​9, 13; Esit. 2:4; 3:​14, 15, 19) Espiritu sandu, lia kuatisa Akristão vatete oku kundila omanu catiamẽla ‘kovilinga vinene via Suku.’ (Ovil. 2:​4, 11) Koloneke vilo, espiritu liaco, lia siatavo oku tu kuatisa oku ‘lekisa ombili kupange woku kunda.’

Tu Lekisi Umbombe Lesunguluko

7. Momo lie tu sukilila oku lekisa umbombe kuenda esunguluko kovina tu linga?

⁷ Tanga Va Roma 12:​3, 16. Olongavelo vietu, tua vi tambula ‘locali ca Yehova.’ Paulu wa popia hati: “Okutẽla kuetu ku tunda ku Suku.” (2 Va Kor. 3:⁠5) Omo liaco, tu sukila oku yuvula oku li pandiya etu muẽle, poku lekisa umbombe, loku limbuka okuti, Suku eye wa siata oku tu kuatisa oku tẽlisa upange waco. Pole, ka tu tẽlisa upange waco longusu yetu. (1 Va Kor. 3:​6, 7) Omo liaco, Paulu wa popia hati: “Ndu lunguli omunu omunu, siti, Ko ka lisokololi ene muẽle loku lituna ka kua sungulukile.” Tu sukila oku lekisa esunguluko, loku kuata esanju kupange woku kunda Usoma. Oku lekisa esunguluko, loku limbuka ekalo lietu, ci tu kuatisa oku kapako ovina vi lingiwa la vakuetu. Omo liaco, tu sukila oku ‘li kũlĩhĩsa lolondunge.’

8. Tu yuvula ndati ‘oku lipanda’?

⁸ Oku li pandiya omo liovopange tua siata oku linga, uveke. Momo, ‘Suku eye wa siata oku kulisa ovina.’ (1 Va Kor. 3:⁠7) Paulu wa popia hati, omunu lomunu vekongelo, wa tambula ‘ekolelo li tunda ku Suku.’ Tu sukila oku yuvula ocituwa coku livelisapo, pole, tu likolisilako oku kapako ovopange a lingiwa la vakuetu, lekuatiso liekolelo liavo. Paulu wa popia hati: “Lisimili cimuamue.” Vukanda ukuavo, wa popiavo hati: “Cosi vu linga, ko ka ci lingili omo vu yongola oku limuisa pamue oku lipanda, puãi, loku liketisa, tendi [vakuẽle] hoti, Ovo va velapo, etu tu sule.” (Va Fil. 2:⁠3) Tu sukila oku lekisa umbombe loku limbuka okuti, vakuetu va tu velapo. Umbombe, u tu kuatisa oku yuvula ‘oku lipanda.’ Ndaño tua tambula ‘upange umue’ okuti, ka u letiwe lomanu vosi vekongelo, tu kuata lika esanju nda tua yuvula oku lipanda poku u linga.​—⁠1 Pet. 5:⁠5.

Ocisola tu Kuetele Vamanji

9. Momo lie Paulu a sokisila Akristão olombuavekua ndovimatamata vietimba?

⁹ Tanga Va Roma 12:​4, 5, 9, 10. Paulu wa sokisa Akristão olombuavekua ndovimatamata vietimba, vi talavaya kumosi loku kuama olonumbi Viusongui wavo Kristu. (Va Kol. 1:​18) Eye, wa ivaluisa Akristão va citiwa lespiritu hati, “ndaño tu va lua, haimo tutimba limuamue vu Kristu.” Paulu, wa vetiyavo Akristão olombuavekua va kala ko Efeso hati: “Tu kulili ku Kristu [momo] eye utue. Eci etimba liosi li tokekisua loku sokekisua lasokoluilo alio, leci ovimatamata vialio vi lingila pamosi ovopange avio locisola, oco kokuaye ku tunda eci ci kulisa etimba loku li amisako locisola.”​—⁠Va Efe. 4:​15, 16.

10. Nye “olomeme vikuavo” vi sukila oku limbuka?

¹⁰ Ndaño “olomeme vikuavo” ka vi pangi onepa kocimunga ca Kristu colombuavekua, pole, vi pondola oku lilongisa ovina vialua kokuavo. (Yoa. 10:​16) Paulu wa popia hati, Yehova “wa kapa ovina viosi vemehi [liolomãhi] via Kristu, kuenje wo linga utue wovina viosi viekongelo.” (Va Efe. 1:​22) Koloneke vilo, olomeme vikuavo, vi panga onepa ‘kovina viosi’ Yehova a kundika peka Liomõlaye. Ovio, vi pangavo onepa ‘kovina viosi’ Kristu a kundika peka ‘liukuenje wa kolelua, haeye wa lunguka.’ (Mat. 24:​45-​47) Omanu vosi va kuete elavoko lioku kala palo posi, va tava okuti Kristu eye Utue wavo, kuenda, va pokola kukuenje wa kolelua haeye wa lunguka. Va pokolavo Kosungu Yakulu Yolombangi Via Yehova, kuenda kakulu vekongelo. (Va Hev. 13:​7, 17) Eliangiliyo liaco, li kuatisa Akristão oku likuata omunga.

11. Nye ci tu vetiya oku kuata elitokeko, kuenda elungulo lipi Paulu a eca?

¹¹ Ukamba wavo u vetiyiwa locisola, watiamẽla ‘kelitokeko li kasi pokati kavo.’ (Va Kol. 3:​14) Kelivulu lia Va Roma kocipama 12, Paulu wa popia hati, tu sukila oku lekisa ‘ocisola cocili’ ku vakuetu, kuenda oku ‘lisola pokati ndomunu la manjaye.’ Nda tua ci linga, tu lekisa esumbilo ku vakuetu. Upostolo Paulu, wamisako hati: “Koku sumbila, velisipo [vakuene].” Pole, tu sukila oku yuvula ocisola coku likembisa. Tu sukilavo oku kuatisa ekongelo, oco liamameko loku yela. Paulu poku eca elungulo liatiamẽla koku lekisa ocisola, wamisako hati: “Nyehuli eci cĩvi. Kakateli eci ciwa.”

Tu Lekisi Ocituwa Coku Yekisa Akombe

12. Ulandu Wakristão ko Makedonia, u tu longisa nye catiamẽla koku kuatisa vakuetu?

¹² Tanga Va Roma 12:13. Ocisola tu kuetele vamanji, ci tu vetiya oku ‘lumba vombango yoku kuatisa olosandu.’ Ndaño tulohukũi, tu pondola oku kuatisa vakuetu lovina tu kuete. Paulu poku sonehela Akristão va kala ko Makedonia, wa popia hati: “Ndaño va nyikiwa ca lua lohali, haimo esanju liavo lia piãla lusuke wavo wa lua wa koka okulumba kuna kuocili. Momo ndi va imbila uvangi okuti, ocipango cavo muẽle va lumba ndeci va tẽla. Oku popia ocili, va lumba eci ca pitahãla eci va tẽla. Va tu pinga lolupili lua lua okuti tu tava lavovo va eca kocilumba coku kuatisa olosandu [ko Yudea].” (2 Va Kor. 8:​2-4) Ndaño Akristão ko Makedonia va kala olohukũi, pole, va kuata ocituwa coku kuatisa vakuavo. Ovo va kũlĩhĩle okuti, oku kuatisa vamanjavo va kala ko Yudea, ci nena asumũlũho.

13. Oku ‘poka akombe,’ ci lomboloka nye?

¹³ Olondaka viokuti, “poki akombe,” via tunda kupopi wo Helasi. Ovio vi lomboloka oku lekisa ocituwa coku kuatisa vakuetu. Embimbiliya li tukula ondaka yaco hati, ‘tu sukila oku sanda epuluvi lioku yekisa akombe.’ Tu lekisa ocituwa caco, poku laleka vamanji vamue okuiya konjo yetu, oco tulile kumosi lavo. Nda tua ci linga, tu limbuka olonjila vikuavo vioku yekisa akombe. Ndaño ka tu kuete okulia, tu pondola oku laleka vamanji oco veye konjo yetu oku nyua ocisangua.

14. (a) Vondaka yo Helasi ya pongoluiwa hati, “oku poka,” mua kongela olondaka vipi? (b) Kupange woku kunda tu kuatisa ndati vana va tunda kolofeka vikuavo?

¹⁴ Voku poka akombe, mua kongela oku kuatisa vakuetu. Vondaka yo Helasi ya pongoluiwa hati, “oku poka,” mua kongela olondaka vivali ndeci: “Ocisola,” kuenda “oku kapako vana va tunda kolofeka vikuavo.” Ovisimĩlo vipi tu sukila oku kuatela omanu vaco? Tu pondola oku ci linga, poku lilongisa elimi likuavo oco tu kundile vana va tunda kolofeka vikuavo okuti, va kasi vocikanjo cekongelo lietu. Nda tua ci linga, tu lekisavo ocituwa coku yekisa akombe. Ndaño valua pokati ketu, ka va pondola oku lilongisa elimi likuavo, pole, vosi yetu tu pondola oku kuatisa ovingendeleyi lokalivulu losapi hati: Boas Novas para Pessoas de Todas as Nações. Vokalivulu kaco, mu sangiwa esapulo Liembimbiliya lia pongoluiwa valimi alua. Ove hẽ, wa siata oku kuata onima yiwa poku kunda lokalivulu kaco?

Tu Lekisi Ocikembe ku Vakuetu

15. Yesu wa kapako ndati elungulo li sangiwa kelivulu lia Va Roma 12:⁠15?

¹⁵ Tanga Va Roma 12:15. Elungulo Paulu a eca vocinimbu eci, li lombolola esilivilo lioku lekisa ohenda. Tu sukila oku lilongisa ndomo tu limbuka ekalo lia vakuetu, ndeci, nda va sanjuka, ale va sumua. Nda tua kuata owuya wespiritu, tu lekisa esanju, ale ohenda. Eci 70 kolondonge via Kristu via tiuka kupange woku kunda, via lombolola ovolandu awa upange wavo. Kuenje, Yesu ‘wa kuata esanju lialua.’ (Luka 10:​17-​21) Yesu wa sanjukila kumue lavo. Vepuluvi likuavo, ‘wa lilila kumosi lomanu,’ eci ekamba liaye Lasaru a fa.​—⁠Yoa. 11:​32-35.

16. Tu lekisa ndati ohenda ku vamanji, kuenda helie o kuete ocikele ca velapo coku yi lekisa?

¹⁶ Tu sukila oku kuama ongangu ya Yesu yoku lekisa ohenda. Nda manji umue wa sanjuka, tu lekisavo esanju. Pole, nda wa sumua, tu sumuavo. Tu pondola oku kuatisa vamanji va sumua, poku yevelela lutate ovina va tu sapuila. Pamue, noke lioku yevelela ombangulo yavo, tu sumua, kuenje, tu fetika oku lila. (1 Pet. 1:​22) Akulu vekongelo, va sukila oku kapako elungulo lia Paulu, lioku lekisa ohenda.

17. Nye tua lilongisa kelivulu lia Va Roma kocipama 12, kuenda nye tuka konomuisa vocipama cikuãimo?

¹⁷ Ovinimbu Viembimbiliya tua konomuisa kelivulu lia Va Roma kocipama 12, via eca elungulo tu sukila oku kapako komuenyo wetu. Kuenda vi tu kuatisa oku kala ciwa la vamanji. Vocipama cikuãimo, tuka konomuisa ovinimbu via sulako viocipama caco. Ovio, vi lombolola ndomo tu pondola oku tenda vana ka va lilongisa Embimbiliya, oku kongelamo ovanyãli vetu, kuenda vana va siata oku tu lambalala.

Oku Pitulula

• Tu lekisa ndati okuti, tu kuete ‘owuya wespiritu’?

• Momo lie tu sukilila oku lekisa umbombe lesunguluko poku vumba Suku?

• Vapuluvi api tu sukila oku lekisa ohenda locikembe ku vamanji?

[Elitalatu kemẽla 4]

Momo lie tu pangela onepa kupange Akristão va siata oku linga?

[Elitalatu kemẽla 6]

Tu pondola ndati oku kuatisa vana va tunda kolofeka vikuavo oco va lilongise ovina viatiamẽla Kusoma wa Suku?