Apulilo Valingiwa Lavakuakutanga

Elivulu Liolosapo 24:27 li tu longisa nye?

Usonehi welivulu Liolosapo, poku eca elungulo kumalẽhe umue ukuenje, wa popia hati: “Pongiya ovina vi sukiliwa. Angiliya epia liove, oco o tunga noke onjo.” Etosi lipi lia tukuiwa volondaka evi? Osimbu ulume ka kuelele, loku sokiya epata, o sukila oku pongiya ovina vi sukiliwa kuenda oku kũlĩhĩsa ovikele viyilila kohuminyo a linga.

Kosimbu, olondaka evi via lomboluiwile okuti, alume vosi va kuele ka va sukila lika oku sakalala lupange woku sanda eteku. Pole, va sukilavo oku pamisa epata liavo, kuenda oku lilongisa ovina viespiritu. Ndaño olondaka viaco viocili, kuenda vi sangiwa Vovisonehua, pole, halioko etosi lia velapo vocinimbu caco. Momo lie? Tu konomuisi atosi avali a lekisa esunga liaco.

Liatete, ocinimbu caco, ka ci tiamisiwila koku pamisa epata limue lia sokiyiwa ale. Pole, ocisimĩlo caco, catiamẽla koku tunga onjo. Ondaka ya pongoluiwa hati, “tunga,” yi kuete elomboloko liupopi wocindekaise. Momo yi tiamisiwila koku sokiya epata ndeci: Oku kuela, kuenda oku cita omãla.

Liavali, ocinimbu caco ci vetiya oku sokiya ndomo ovina vi lingiwa ndeci: “Oku tẽlisa upange umue, noke, oku linga ukuavo.” Anga hẽ, ocinimbu eci, ci lekisa okuti, tu sukila oku pitisa kovaso upange woku sanda eteku, noke, oco tu tẽlisa ovikele vietu kespiritu? Sio, hacoko!

Kosimbu, nda ulume o yongola oku ‘sokiya epata liaye’ poku kuela, wa sukilile oku lipula ndoco: ‘Anga hẽ, ndi pondola oku kuatisa ciwa ukãi wange, kuenda oku tata omãla tuka cita kovaso yoloneke?’ Osimbu ka kuelele, wa sukilile oku talavaya oco a kuatise epata liaye. Embimbiliya li Kola li popia hati: “Pongiya ovina vi sukiliwa. Angiliya epia liove, oco o tunga noke onjo.” Anga hẽ, olondaka evi, vi kuete esilivilo koloneke vilo?

Vi kuete esilivilo. Ulume wosi o yongola oku kuela, o sukila oku li pongiya oco a tẽlise ocikele caco. Nda o kuete uhayele, o sukila oku talavaya. Ulume ka sukila lika oku talavaya oco a tekule epata liaye. Embimbiliya li lekisa okuti, ulume wosi ka kuatisa epata liaye ketimba kuenda kespiritu, una ka kũlĩhĩle Suku wo velapo. (1 Tim. 5:⁠8) Nda umalẽhe o yongola oku kuela oco a sokiye epata, o sukila oku lipula ndoco: ‘Anga hẽ, ndi pondola oku eca kepata liange ovina va sukila ketimba? Ndi pondola hẽ, oku songuila ciwa epata liange kovina viespiritu? Ndika tẽlisa hẽ, ocikele coku songola elilongiso Liembimbiliya lepata liange?’ Ondaka ya Suku yi lekisa esilivilo lioku tẽlisa ovikele viaco.​—⁠Esin. 6:​6-8; Va Efe. 6:⁠4.

Nda ukuenje o sandiliya ufeko a yongola oku kuela, o sukila oku kapako elungulo li sangiwa kelivulu Liolosapo 24:27. Ufeko o sukilavo oku kũlĩhĩsa nda oka tẽlisa ovikele viaye vepata noke yoku kuela. Amalẽhe vana va kuela ndopo, va sukila oku konomuisa ocikele catiamẽla koku tata omãla. (Luka 14:​28) Oku pokola kolonumbi viaco, ci kuatisa afendeli va Suku oku yuvula ovitangi, oco va kuate esanju vepata.

[Elitalatu kemẽla 12]

Apulilo api ukuenje o yongola oku kuela a sukila oku kũlĩhĩsa?