Lekisa Okuti Wundonge Yocili Ya Kristu
“Oviti viosi viwa vima apako awa, puãi uti ũvi wima apako ha-awako.”—MAT. 7:17.
1, 2. Koloneke vilo via sulako, etepiso lipi li kasi pokati Kakristão vocili lava vesanda?
YESU wa popia hati, akristão vesanda kuenda olondonge viocili, va limbukiwila kapako avo, okuti alongiso kuenda ovituwa viavo. (Mat. 7:15-17, 20) Olonjanja vialua, ovituwa viomanu via siata oku vetiyiwa lovina va longisiwa. (Mat. 15:18, 19) Vana va siata oku tekuiwa lovina viesanda, ka va imi “apako awa,” puãi vana va longisiwa ovina viwa viespiritu, va “ima apako awa.”
2 Koloneke vilo via sulako, tua siata oku limbuka ciwa etepiso li kasi pokati kapako aco. (Tanga Daniele 12:3, 10.) Ocili okuti, Akristão vesanda va siata oku pengisa alongiso a Suku loku lekisa efendelo liombambe. Pole, Akristão vocili, va fendela Suku “lespiritu locili.” (Yoa. 4:24; 2 Tim. 3:1-5) Ovo, va likolisilako oku lekisa ovituwa ndevi via Kristu. Oco hẽ, nye ci popiwa komunu lomunu? Osimbu o konomuisa olondimbukiso vitãlo Viakristão vocili, lipula ove muẽle ndoco: ‘Anga hẽ ovituwa lalongiso ange a litava Londaka ya Suku? Ovilinga viange hẽ vi vetiya omanu oku tava kocili?
Kuata Ovituwa vi Litava Londaka ya Suku
3. Nye ci sanjuisa Yehova, kuenda nye ca kongela voku kala Ukristão wocili?
3 Yesu wa popia hati: “Havosiko va popia lame vati, A Ñala, a Ñala, va iñila vusoma wokilu, te u o linga ocipango ca Tate o kasi kilu.” (Mat. 7:21) Eci ci sanjuisa Yehova, ha ku popiako lika okuti Ndukristão, pole, oku kuata ovituwa vi litava Londaka ya Suku. Voku kala ondonge yocili ya Kristu, mua kongela ekalo liosi liomuenyo wetu ndeci, oku kuata ovisimĩlo via sunguluka viatiamẽla kolombongo, kupange, kolomapalo, kovituwa lovipito violuali, kolohuela kuenda koku linga ukamba lomanu vakuavo. Akristão vesanda, va kuãi ovisimĩlo lovituwa violuali vina via siata calua koloneke vilo via sulako.—Osa. 92:7.
4, 5. Tu pondola oku kapako ndati olondaka via Yehova vi sangiwa kelivulu lia Malakiya 3:18?
4 Uprofeto Malakiya wa soneha hati: “Vu kũlĩha vali oku tepisa pokati keci ciwa leci cĩvi, loku tepisavo pokati ku o vumba Suku lu ko vumbi.” (Mal. 3:18) Osimbu o sokolola olondaka evi, li pula ove muẽle ndoco: ‘Nda tuwa hẽ ndavakualuali ale nda litepa lavo? Poku kala kumue lakamba vange vo kosikola lava vo kupange, ndi setukula hẽ ovituwa viavo, ale ndi kakatela kolonumbi Viembimbiliya loku vangula ovina via sunguluka?’ (Tanga 1 Petulu 3:16.) Ocili okuti, etu ka tu li molehisa ño ndavakuesunga lombambe, momo tu yongola oku litepa la vana ka va sole Yehova haivo ka vo vumbi.
5 Nda wa limbuka okuti o sukila oku linga apongoloko amue, momo lie ku likutililila catiamẽla kocitangi caco, loku sandiliya oku pamisa ekalo liove kespiritu poku tanga Embimbiliya loku endaenda kolohongele? Ondaka ya Suku yi ku kuatisa oku ima ‘apako awa’ ndeci, “epako liovimela via tava konduko ya . . . Suku.”— Va Hev. 13:15.
Kunda Usoma wa Suku
6, 7. Catiamẽla kesapulo Liusoma, oku litepa kupi ku kasi pokati Kakristão vocili lava vesanda?
6 Yesu wa popia hati: “Ñuete ocikundi coku kundila ondaka yiwa yusoma wa Suku vovaimbo akuavo, momo eci oco nda tumilua.” (Luka 4:43) Momo lie Yesu a tukowaila Usoma wa Suku ndosapi yupange waye woku kunda? Momo Yesu wa kũlĩhile okuti, eye Soma Yuviali wa Suku, kuenje kumue la vamanjaye va pinduiwa letimba liespiritu, va ka imũlako ekandu kuenda Eliapu okuti olio ono yolohali viosi via siata oku pita lomanu. (Va Rom. 5:12; Esit. 20:10) Omo liaco, wa eca kolondonge viaye ocikundi coku kunda Usoma, toke kesulilo lioluali lulo. (Mat. 24:14) Akristão vesanda, ka va tẽla oku linga upange waco kuenda lalimue eteke va ka u linga. Momo lie? Kuli ovina vitatu vi va tateka: Catete, ovo ka va pondola oku kunda ondaka yina okuti ka va kuete elomboloko liayo. Cavali, ka va kuete umbombe woku kundila omanu, lutõi woku tamãlala lalambalalo eyilila koku kunda esapulo Liusoma. (Mat. 24:9; 1 Pet. 2:23) Catatu, Akristão vesanda ka va kuete espiritu lia Suku.—Yoa. 14:16, 17.
7 Olondonge viocili via Kristu, vi kuete elomboloko Liusoma wa Suku kuenda eci owo u ka tẽlisa. Ovo va pitisa kovaso oku sapula Usoma wa Suku koluali luosi, lekuatiso liespiritu lia Yehova. (Sak. 4:6) Anga hẽ wa siata oku linga upange waco? O kasi hẽ oku likolisilako oku loñoloha ndohundi Yusoma, poku pesela otembo yalua kupange woku kunda loku u tẽlisa ciwa? Vamue va likolisilako oku loñoloha kupange woku kunda loku tangela omanu Embimbiliya. Paulu, omo wa kuatele ocituwa coku tangela omanu Ovisonehua, wa soneha ndoco: “Ondaka ya Suku yi kasi lomuenyo, haiyo yi kasi loku talavaya.” —Va Hev. 4:12; Ovil. 17:2, 3.
8, 9. (a) Ovolandu api a lekisa esilivilo lioku tangela omanu Embimbiliya kupange woku kunda? (b) Tu pondola oku loñolõha ndati koku talavaya Londaka ya Suku?
8 Manji umue poku kundila konjo lanjo, wa tangela ulume umue ukuetavo lio Katolika ocisonehua ca Daniele 2:44, kuenda wo lomboluila okuti Usoma wa Suku u ka nena ombembua loku kolapo. Ulume waco, wa popia hati: “Nda sola calua ndomo wa nangela Embimbiliya loku ndi lekisa eci olio li popia.” Eci manji ukuavo a tangela ocisonehua ukãi umue ukuetavo lio Ortodoxa Grega, ukãi waco wa linga apulilo alua. Kuenje manji yaco kumue lukãi waye, va tambulula apulilo osi poku u tangela Embimbiliya. Noke ukãi wa popia hati: “Wa kũlĩhi esunga lieci nda tavela oku sapela lene? Momo ene weyi puvelo wonjo yange oku ndi tangela Embimbiliya.”
9 Ocili okuti alivulu etu a kuete esilivilo lialua, okuti tu pondola oku a eca komanu kupange woku kunda. Pole, Embimbiliya olio elivulu lia velapo tu talavaya lalio. Nda okuti ku kuete ocituwa coku tanga Embimbiliya kupange woku kunda, momo lie ku kuatela ocimãho caco? Citava okuti o sokiya oku tangela omanu vo posongo yove ovisonehua vimue via velapo loku lombolola ndomo Usoma wa Suku u ka tetulula ovitangi viomanu. Omo liaco, eci ove enda kupange woku kundila konjo lanjo, li pongiya ciwa.
Sanjukila Oku Ambata Onduko ya Suku
10, 11. Catiamẽla koku tukula onduko ya Suku, etepiso lipi li kasi pokati ka Yesu lakristão vesanda?
10 “Vulombangi viange. Oco ca popia Yehova.” (Isa. 43:12) Yesu Kristu, Ombangi ya velapo ya Yehova, wa tendele okuti oku ambata onduko ya Suku loku yi situluila komanu, esumũlũho linene. (Tanga Etundilo 3:15; Yoano 17:6; Va Heveru 2:12.) Omo okuti Yesu wa sapula onduko ya Isiaye, o tukuiwa okuti “Ombangi Yocili.”—Esit. 1:5; Mat. 6:9.
11 Vana va li tukula okuti olonumiwa via Suku Lomõlaye, va siata oku lekisa ovituwa vi kutisa osõi, momo vopa onduko ya Suku Vambimbiliya avo. Kohongele yimue ya lingiwa lasongui vetavo lio Katolika, kua tumbikiwa ocihandeleko cokuti, “ka citava oku tukula onduko ya Suku vokuenda kuefendelo ndeci ya siata oku molẽha vo Tetragrama YHWH.”a Olondaka evi, vi sumuisa calua!
12. Oku upisa kunyamo wo 1931, afendeli va Yehova veya oku tukuiwa ndati?
12 Akristão vocili va kuãi ongangu ya Kristu kuenda ‘yelende linene liolombangi’ yoku sapula onduko ya Suku. (Va Hev. 12:1) Oku upisa kunyamo wo 1931, Akristão vocili veya oku kũlĩhiwa ciwa londuko ya Suku eci va tambula onduko yokuti Olombangi via Yehova. (Tanga Isaya 43:10-12.) Omo liaco, olondonge viocili via Kristu ovio lika vi “tukuiwa londuko [ya Suku,]” Yehova.—Ovil. 15:14, 17.
13. Ndamupi tu pondola oku ambata omuenyo umue u litava londuko Suku a tu ĩha?
13 Tu lekisa ndati okuti tu kasi oku linga ovina vi litava londuko Suku a tu ĩha? Tu ci lekisila koku eca uvangi wa Suku lekolelo. Upostolo Paulu wa soneha hati: “Vosi va vilikiya loku tukula onduko ya Yehova va popeliwa. Puãi va vilikiya ndati u ka vo kolelele? Va kolela ndati u ka va la yeva? Va yeva ndati nda lu o kunda sio? Va kunda ndati nda ka va tumiwile?” (Va Rom. 10:13-15, NW) Lutate walua, tu pondola oku situlula ovohembi atavo esanda atiamẽla Kululiki wetu, ndeci elongiso lifelu viondalu, lina li tiamisila ovilinga vĩvi Vieliapu ku Suku yocisola.—Yer. 7:31; 1 Yoa. 4:8; ci sokisa la Marko 9:17-27.
14. Omanu vamue va li yeva ndati eci va va lekisa onduko ya Suku onjanja yatete?
14 Ove hẽ wa sanjukila oku ambata onduko ya Isietu wo kilu? Wa siata hẽ oku kuatisa omanu oku kũlĩha onduko yaco yi kola? Ukãi umue volupale luo Paris, ko França, wa yeva okuti Olombangi via Yehova via kũlĩha onduko ya Suku kuenje wa pinga Kombangi yimue oco yu lekise apa pa sangiwa onduko yaco Vembimbiliya. Eci a tanga Osamo 83:18, wa komõha calua. Noke wa fetika oku lilongisa Embimbiliya kuenje wa linga manjetu kuenda cilo o kasi oku vumba lekolelo kofeka yikuavo. Eci ukãi umue wetavo lio Katolika ko Australia a mola onjanja yatete onduko ya Suku Vembimbiliya liaye muẽle, wa kaluka lesanju. Kaliye o kasi ale oku talavaya kupange wakundi votembo yosi vokuenda kuanyamo alua. Eci Olombangi via Yehova ko Jamaika via lekisa kukãi umue onduko ya Suku Vembimbiliya liaye muẽle, wa lolula asuẽlela omo liesanju. Omo liaco, kuama ongangu ya Yesu yoku sanjukila oku ambata onduko ya Suku kuenda oku yi sapuila komanu vosi.
“Ko ka Soli Oluali”
15, 16. Akristão vocili va tenda ndati oluali, kuenda apulilo api omunu lomunu a sukila oku li linga?
15 “Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye.” (1 Yoa. 2:15) Oluali kumue loloñei vialuo vietimba, ka vi litava locipango ca Yehova kuenda espiritu sandu liaye. Omo liaco, olondonge viocili via Kristu, vi yuvula oku panga onepa koluali. Ovio vi yuvula oluali omo via kũlĩha ciwa elungulo lia ndonge Tiago wa soneha hati, ‘ekamba lioluali li lilingisa unyali wa Suku.’ —Tia. 4:4.
16 Oku kapako olondaka via Tiago ka ca lelukile, momo voluali mue yuka ayonjo alua. (2 Tim. 4:10) Eli olio esunga lieci Yesu a likutilililako olondonge viaye hati: “Si pingi okuti o vopa voluali, te okuti o va teyuila kevĩho. Ovo havakualualiko ndeci ame siukualualiko.” (Yoa. 17:15, 16) Li pula ove muẽle ndoco: ‘Ñasi hẽ oku likolisilako oku yuvula oluali? Vakuetu va kũlĩha okuti si pangi onepa kovituwa lo kovipito violuali viatiamẽla kefendelo liesanda haivio vi lekisa espiritu lioluali lulo?—2 Va Kor. 6:17; 1 Pet. 4:3, 4.
17. Nye ca siata oku vetiya vakuavitima via sunguluka oku tiamẽla ku Yehova?
17 Ocili okuti, poku kuama olonumbi Viembimbiliya tu ka suvukiwa loluali, pole oku ci linga, ci pondola oku kuatisa vakuavitima via sunguluka oku kũlĩha ocili. Eci omanu vaco va mola ndomo tua kakatela Kovisonehua lekolelo lietu liosi, va pondola oku vangula vati: “Tuenda love, momo tua yeva okuti Suku o kasi lene.”—Sak. 8:23.
Lekisa Ocisola Cakristão Vocili
18. Nye ca kongela voku sola Yehova kuenda ava tu lisungue lavo?
18 Yesu wa popia hati: “Sola Yehova, Suku yove lutima wove wosi lomuenyo wove wosi lolondunge viove viosi.” Kuenda “sola u o lisungue love ndeci o lisole ove muẽle.” (Mat. 22:37, 39, NW) Ocisola caco (okuti kelimi lio Helasi, a·gaʹpe) ci tunda vutima, ci songuiwa lolonumbi via Suku kuenda ci vetiyiwa ovituwa via sunguluka. Ocisola caco, ca kanguka haico ci kuete unene wa piãla. (1 Pet. 1:22) Ocisola ca litepa locipululu, momo ka ci li sandela ovina viaco muẽle.—Tanga 1 Va Korindo 13:4-7.
19, 20. Lombolola ulandu umue u lekisa ndomo ocisola Cakristão ci kuete unene.
19 Omo okuti ocisola onepa yepako liespiritu sandu, ci vetiya Akristão vocili oku yuvula ovina vĩvi ndeci, olonepele viakova, viapata, kuenda oku litenga vopulitika. (Tanga Yoano 13:34, 35; Va Gal. 5:22) Omanu va soka ndolomeme va vetiyiwa locisola calua. Kofeka yo Isareli eci umalẽhe umue u Yudea a endele onjanja yatete kohongele Yolombangi via Yehova, wa komoha calua ocisola ci kasi pokati ka vamanji va Yudea la va Arabia. Eye wa amamako oku endaenda kolohongele kuenda wa tava oku lilongisa Embimbiliya. Ove o kuete hẽ ocituwa coku lekisa ocisola caco ku vamanji? Wa siata hẽ oku yolela omanu veya onjanja yatete Vonjango Yusoma, ndaño va tunda kolofeka vikuavo, vakuekova liñi haivo va kuete ekalo lia litepa?
20 Omo etu Tuakristão vocili, tu sukila oku kuatela ocisola omanu vosi. Kofeka yo El Salvador, kafeko umue ukundi, wa kala oku lilongisa Embimbiliya lukãi umue wa kuka, okuti o kuete 87 kalima, wa kala vetavo lio Katolika otembo yalua. Eteke limue, ukãi waco wa kuatiwa luvei, kuenje wa tualiwa kosipitali lokamuenyo kimbanda. Eci a tiukila konjo yaye, kafeko Ombangi ya Yehova wa enda oku u telekelako okulia vokuenda kuosãi. Lomue ukuetavo liaye wo nyũla. Onima yipi yeyililako? Ukãi waco wa inasi oviteka viaye, yu wa siapo etavo liaye kuenda wa fetika oku lilongisa Embimbiliya. Ocili okuti, ocisola Cakristão ci kuete unene! Ocisola, ci vetiya omanu okuti ombangulo ci sule.
21. Tu pondola oku kuata ndati elavoko lia kolapo?
21 Ndopo Yesu o ka sapuila akristão vesanda hati: “Sia lo kũlĩhi. Nundi, alondingaĩvi.” (Mat. 7:23) Omo liaco, tu likolisiliko oku ima apako a sanjuisa Isia kuenda Omõla. Yesu wa popia hati: “Wosi o yeva olondaka evi viange kuenje o vi linga wa soka ndomunu wa lunguka wa tungila onjo yaye vohanda.” (Mat. 7:24) Nda tu lekisa okuti tu londonge viocili via Kristu, tu ka tambula ohenda ya Suku, kuenda elavoko lietu li kolapo, ndonjo ya tungiwila kilu liohanda!
[Atosi pombuelo yamẽla]
a Valivulu amue a sandekiwa letavo lio Katolika Kongelesi oku kongelamo A Bíblia de Jerusalém, mu sangiwa o tetragrama “Yahweh.”
Ivaluka Eci Tua Lilongisa?
• Akristão vocili va tepisiwa ndati lakristão vesanda?
• Tukula “apako” amue a limbukisa Akristão vocili.
• Catiamẽla kapako Akristão vocili, ocimãho cipi o yongola oku tẽlisa?
[Elitalatu kemẽla 13]
Anga hẽ o kuete ocituwa coku tangela omanu Embimbiliya kupange woku kunda?
[Elitalatu kemẽla 15]
Vakuene va kũlĩha hẽ okuti ku pangi onepa kovipito violuali?