‘Kũlĩhĩsa Ciwa Onjila Yolomãhi Viove,’ Oco Wamameko

ECI afendeli va Yehova va tunda ko Bavulono kunyamo wo 537 O.Y., Yehova wa va kuatisa oco va tiukile ko Yerusalãi. Eye wa va sapuila hati: “Yelisi onjila yomanu vange; pemi, pendi elila, nõlimo ovawe.” (Isa. 62:10) Sokolola ndomo vamue pokati ka va Yudea va linga upange waco. Vamue pokati kavo va pitile kovaso, va panga ciwa etapalo poku lembika ovikulungu, kuenda oku li semũlula ciwa. Poku linga upange waco, ca kuatisa vamanjavo va sialele konyima oco va tiukile ciwa kofeka yavo.

Ulandu wa tukuiwa ndeti, ocindekaise cimue ci tu kuatisa oku tẽlisa ovimãho vietu kupange wa Yehova. Momo, o yongola okuti, afendeli vaye poku linga upange waco ka va kuata ovina vi va tateke oku u tẽlisa. Ondaka yaye yi tu sapuila hati: ‘Kũlĩhĩsa ciwa onjila yolomãhi viove, oco ovina viosi o linga vi ende ciwa.’ (Olosap. 4:26) Cikale okuti umalẽhe, ale ukulu, o pondola oku limbuka esilivilo lioku kapako elungulo eli li tunda ku Suku.

NÕLA ONJILA YA SUNGULUKA

Pamue wa yevele ale omanu va popia ovina viatiamẽla kumalẽhe umue vati: ‘O kuete ovimãho vialua, ale o ka amamako oku tẽlisa ovimãho viaye.’ Ocili okuti, amalẽhe va kuete uhayele, va loñoloha calua koku lilongisa ovina, kuenda va yongola oku kuata ekalo liwa komuenyo. Embimbiliya li popia hati: ‘Ulamba wamalẽhe olohõlo viavo.’ (Olosap. 20:29) Umalẽhe o pondola lika oku kuata esanju liocili, nda o nõlapo oku pesila uloño waye kupange wa Yehova, oco a tẽlise ovimãho viaye.

Ocili okuti, omanu voluali va kapako calua ovoloño amalẽhe va kuete. Nda umalẽhe umue Ombangi ya Yehova wa loñoloha calua kosikola, alongisi vaye, kumue lolondunguli vio kosikola yaco, ale akamba vaye, vo vetiya oku kuata elilongiso lio kosikola ya velapo, oco a kuate ekalo liwa voluali lulo. Citava okuti, nda umalẽhe umue Ombangi ya Yehova wa loñoloha calua koku tasula ombunje, akamba vaye vo vetiya oku tiamisila utima waye kovina viaco. Ove hẽ wa liyakele ale locitangi caco, ale wa kũlĩha omunu umue o kasi oku vetiyiwa oku ci linga? Nye ci pondola oku kuatisa Ukristão oku nõla lolondunge onjila a yongola oku kuama?

Olonumbi Viembimbiliya vi pondola oku tu kuatisa oku endela vonjila yi tuala komuenyo ko pui. Elivulu Liukundi 12:1, li popia hati: ‘Ivaluka Ululiki wove voloneke viove viutila.’ Nda ove umalẽhe ale ukulu, o pondola ‘oku sokolola ndati Ululiki wove’?

Kũlĩhĩsa ulandu wa pita la manji umue o tukuiwa hati Erica o kasi Kutakelo wocifuka co Afrika. Eye wa solele calua oku tasula ombunje. Eci akuata lika 15 kanyamo wa nõliwile oku tasula ombunje locimunga cimue cofeka yaco. Pole, tete wa sukilile oku pindisiwa calua kocifuka co Europa, oco a loñolohe koku tasula ombunje. Manji Eric wa kapako ndati onumbi yoku ‘ivaluka Ululiki’ waye? Nye o pondola oku lilongisa kulandu wa tukuiwa ndeti?

Osimbu umalẽhe Eric a kala oku tanga kosikola, wa fetika oku lilongisa Embimbiliya Lolombangi Via Yehova. Noke, wa lilongisa okuti, Ululiki waye o ka malako ovitangi viosi pokati komanu. Noke, wa limbuka esilivilo lioku pesila otembo yaye longusu yaye, koku linga ocipango ca Yehova. Ovina a lilongisa, vio vetiya oku yuvula oku nõlapo oku tiamisila utima waye koku tasula ombunje. Kuenje, noke yoku papatisiwa, wa fetika oku pesila otembo yaye kupange wa Yehova. Vokuenda kuotembo, wa linga oñuatisi yekongelo, noke, wa pindisiwa Kosikola Yoku Pindisa Vamanji Alume ka va Kuelele.

Nda manji Eric wa nõlelepo oku tẽlisa ocimãho caye coku tasula ombunje, nda wa kuata olombongo vialua, kuenda ekemãlo lioluali lulo. Pole, wa limbuka ocili colondaka Viembimbiliya li popia hati: “Huasi ombonge yaye ukuasi waye, wa soka ndocimbaka ca lepa cu vetatela.” (Olosap. 18:11) Omunu o kuete ovokuasi pamue o sima okuti, wa kolapo, pole, ovina viaco ka vi kuete esilivilo. Momo, vana va yongola oku linga olohuasi ‘va kupukila vayonjo, kuenje, va tala ohali ya lua.’—1 Tim. 6:9, 10.

Amalẽhe valua va siata oku kuata esanju loku kolapo, omo lioku kala akundi votembo yosi. Manji Eric wa popia hati: “Nda likongela ‘kocimunga’ ca vamanji va nõlapo oku kala akundi votembo yosi kupange wa Yehova. Ocimunga nda tiamẽla, oco lika ca velapo. Omo liaco, ngeca olopandu ku Yehova omo a ndi lekisa onjila yi nena esanju liocili, kuenda ekalo liwa komuenyo.”

Nye ci popiwa catiamẽla kokuove? Yuvula oku kuama ovimãho violuali. O pondola hẽ oku nõla ‘onjila’ yi ku kuatisa oku linga upange wa Yehova?—Tanga pokakasia losapi hati: “Ku Pondola Oku Kuata Onima Yiwa Kosikola ya Velapo”

UPA VONJILA OVINA VI KU TATEKA

Manji umue lukãi waye, osimbu va kala oku nyula o Betele kofeka yo Estados Unidos, va limbuka esanju lia vamanji va kasi oku linga upange wa Yehova ko Betele. Noke, ukãi wa manji yaco wa soneha ndoco: “Tua sanjukilile calua ovopange etu eteke leteke.” Kuenje, va nõlapo oku pesila otembo yavo kupange wa Yehova.

Ka ca lelukile ku manji yaco lukãi waye oku linga apongoloko a sukiliwa. Onjanja yimue, eci va mala oku tanga ocinimbu Cembimbiliya ceteke, va fetika oku ci sokolola lutate. Ocinimbu caco ci sangiwa kelivulu lia Yoano 8:31, kuna Yesu a popia hati: “Nda vu pandikisa oku pokola kolondaka viange, vu londonge viange ocili.” Noke lioku tanga ocinimbu caco loku ci sokolola lutate, va popia vati: “Oku likolisilako oku leluisa omuenyo, oco ocina ca velapo.” Omo liaco, va landisa onjo yavo yinene, kuenda va siapo ovina vikuavo via enda oku va tateka. Kuenje, va ilukila vekongelo limue lia sukilile ekuatiso. Cilo, va linga akundi votembo yosi, pole, va siatavo oku kuatisa kupange woku tunga Olonjango Viusoma, kuenda oku lieca olumue kovopange kolohongele viofeka. Nye ci kasi kovitima viavo omo liapongoloko va linga? Ovo va lombolola vati: “Tu kuete esanju lialua omo lioku ambata omuenyo wa leluka, kuenda tua tiamisila lika utima kovina ocisoko ca Yehova ci tu vetiya oku linga.”

“ENDELA VONJILA YI KU KUATISA OKU PAMISA EKOLELO LIOVE

Salomone wa soneha ndoco: “Ovaso ove a vanje kovaso, a suñame muẽle miu.” (Olosap. 4:25) Ndeci ci pita lomunu endisa ekãlu okuti o luluvala kovaso, cimuamue haico tu sukila oku linga, poku yuvula ovina vi tu tateka oku tẽlisa ovimãho vietu.

Olombangi Via Yehova vi likolisilako oku tẽlisa ovimaho viespiritu osimbu va kasi amalẽhe; 2. Onjila yimue okuti ka muli atateko

Ovimãho vipi o kuete kupange wa Yehova? Oku kala ukundi wotembo yosi, oyo onjila ya sunguluka. O pondolavo oku kundila vocikanjo cimue cinene ci kasi ocipepi lekongelo liene okuti, ci sukila ekuatiso liakundi va loñoloha. Citava okuti, ilukila vekongelo lina muli akundi valua, pole, ka li kuete akulu valua vekongelo, kuenda oloñuatisi viekongelo. O pondola hẽ oku kuatisa kovopange a tukuiwa ndeti? Momo lie ku sapelela lamanji ukuakunyula akongelo, oco a kũlĩhĩse nda o pondola oku eca ekuatiso liove? Nda o yongola oku kundila vocikanjo cimue ci kasi ocipãla limbo liene, sandiliya olonumbi vi lekisa ndomo o pondola oku kundila vekongelo liaco li sukila ekuatiso.b

Tu tiukili kulandu wa tukuiwa kelivulu lia Isaya 62:10. Ocili okuti, vamue pokati ka va Yudea va sukilile oku talavaya calua kupange woku yelisa onjila, oco afendeli va Yehova va tiukile ciwa kofeka yavo. Nda o yongola oku tẽlisa ovimãho viove kupange wa Yehova, ku ka liwekepo. Lekuatiso liaye o pondola oku tẽlisa ovimãho viaco. Omo liaco, amamako oku pinga olondunge ku Yehova oco a ku kuatise, osimbu o likolisilako oku yuvula ovina vi pondola oku ku tateka. Nda wa ci linga, o limbuka ndomo Yehova a pondola oku ku kuatisa oku ‘kũlĩhĩsa ciwa onjila yolomãhi viove.’—Olosap. 4:26.

a Onduko ya pongoluiwa.

b Tanga velivulu Organizados Para Fazer a Vontade de Jeová, kemẽla 111-112.

Onima ku Pondola Oku Tambula Kosikola ya Velapo

ECI manji Flavia a kala umalẽhe, inakulu yaye okuti Ombangi ya Yehova, wa enda oku sapela laye catiamẽla Kembimbiliya. Pole, omo okuti isiaye wa kala ulongisi wo kosikola, wo vetiya oku lilongisa eci catiamẽla kovina vi kasi voluali, kuenda oku lilongisila kosikola ya velapo. Omanu vakuavo vosapuila vati: “Ocitumbulukila cove, ci pondola oku popela oluali kovitangi.” Lekuatiso lia isiaye, wa fetika oku lilongisila kosikola ya velapo, kuna a kala oku konomuisa uloño u kuatisa oku upa posi opetololiu ya yela.

Noke, manji Flavia wa limbuka okuti, valua pokati kolondonge, ka va kuatele onjongole yoku ‘popela oluali kovitangi.’ Eye wa limbukavo okuti, ovipama vimue via enda oku longisiwa kosikola ya velapo, via sukilile oku fetiwa loloseketa vimue viupange. Kuenje, vakuakulinga akonomuiso aco, va kapeleko calua vakualoseketa viaco. Ovina viaco via sumuisa manji Flavia. Pole, eci Olombangi Via Yehova via endele konjo yavo, wa lekisa onjongole kovina Embimbiliya li popia catiamẽla ku Suku, kuenje wa fetika oku kuata elavoko kovina vi keya kovaso yoloneke.

Noke, manji Flavia wa tava oku lilongisa Embimbiliya, kuenje, wa papatisiwa. Omo okuti wa kala oku lilongisila kosikola ya velapo, ka kuatele otembo yalua yoku endaenda kupange woku kunda olondaka viwa. Eteke limue wa yeva ohundo ya lingiwa la manji ukuakunyula akongelo, wa lombolola elivulu lia Tiago 4:17, li popia hati: ‘Wosi wa kũlĩha eci ca sunguluka, pole ka ci lingi, ekandu kokuaye.’ Ovina manji Flavia a yeva vohundo yaco, vio kuatisa oku sokolola lutate ekalo liomuenyo waye. Kuenje, wa popia hati: “Ndaño okuti ndi yongola oku tambula asumũlũho a Yehova, pole, ndi yongolavo oku tẽlisa onjongole yange yoku konomuisa ovoloño oluali. Omo liaco, nda sukilile oku nõla onjila ndi kuama.”

Noke, wa nõla oku liwekapo oku tangela kosikola ya velapo. Anga hẽ manji Flavia wa livela omo lioku nõla onjila yaco? Eye wa popia hati:

“Upange wa Yehova, wa nyiha onima yiwa okuti, ka yi sokisiwa lovina nda ndeya oku lilongisa kosikola ya velapo. Yehova wa siata oku ndi kuatisa calua. Eye wa siata oku ndi longisa oku kuata ovituwa viwa, oku lekisa ocisola, oco ndi kuatise omanu vakuavo oku kũlĩha ovina viatiamẽla kokuaye. Cilo, ndi kuete olohuela vimue viwa, kuenda elavoko liwa lio kovaso yoloneke okuti, ka li sokisiwa lovoloño nda ndeya oku lilongisa kosikola ya velapo. Yehova eye lika o pondola oku popela oluali. Lalimue eteke ndu yanduluka.” Cilo, manji Flavia kumue lulume waye, va kasi kombala Yolombangi via Yehova ko Nova Yorke.