Ceci Omuenyo u Kala Ndu Okuti ka u Kuete Esilivilo

Ulume umue o tukuiwa Sally,a wo kofeka yo Estados Unidos okuti wa pesela ovina viaye viosi vocilunga cimue, wa popia ndoco: “Nda simile okuti sia kuatele vali ongunsu yoku liyaka locitangi caco. Olonjanja vialua nda sima okuti si tẽla vali oku pandikisa.”

Ocitangi cikuavo tua siata oku liyaka laco, oku fisa umue ngandietu. Ukãi umue o tukuiwa Janice wo kofeka yo Australia, wa popia hati: “Eci nda fisa omãla vange vavali, nda sima okuti omuenyo ka u kuete vali esilivilo. Nda likutilila ku Suku hati: ‘Si tẽla vali oku pandikisa kohali! Hĩse ndi fe. Si yongola oku kala vali komuenyo.’”

Ulandu ukuavo, wulume umue o tukuiwa Daniel okuti, wa sumuile calua eci ukãi waye wo pakula. Eye wa popia hati: “Eci ukãi wange a ndi sapuila okuti wa linga ukahokolo, ca kala ndu okuti va ndi toma omoko vutima. Ohali ya kokiwa lukãi wange omo lioku ndi pakula, ca kala vokuenda kuotembo yalua.”

Utala ulo Wondavululi, u ka lombolola esunga lieci ci kuetele esilivilo oku kala komuenyo ndaño ceci

• Tu lipita lovilunga

• Tu fisa umue ngandietu

• Ohueli yetu yi liwekapo oku kala ukuacili kokuetu

• O kasi oku liyaka luveyi umue okuti ka u kuete ovihemba woku yi sakula

• Omuenyo u kala ndu okuti ka u kuete esilivilo

Catete, nye tu pondola oku linga eci tu pita locilunga cimue?