Ceci ku Pita Ocilunga Cimue
NDA WA lipitile ale locilunga cimue, citava okuti wa kũlĩha ndomo omanu vakuavo va siata oku liyeva eci va lipita locilunga cimue: esumuo, oku liamũha lavakuetu, atatahãi, asakalalo kuenda oku sokolola. Omanu valua okuti va li pita lovilunga, va sumua calua okuti ka va kuata vali elavoko kuenda onjongole yoku amamako komuenyo.
Nda ovina viove viosi via nyõleha omo liocilunga cimue, citava okuti o kuata esumuo lialua kuenda o liyeva ndu okuti ku tẽla oku pandikisa omo liasakalalo. O liyeva ndu okuti omuenyo wove ka u kuete vali esilivilo. Pole, Embimbiliya li lekisa okuti, omuenyo wove u kuete esilivilo kuenda o kuete asunga awa oku lavoka ekalo liwa kovaso yoloneke.
OLOHUMINYO VIEMBIMBILIYA VI TU ĨHA ELAVOKO
Elivulu Liukundi 7:8 li popia ndoco: “Esulilo liocina cimue lia velapo, efetikilo liaco li sule.” Eci o li pita locilunga cimue, o kala ndu okuti ku kuete elavoko komuenyo. Pole, nda wa kuata epandi loku yuvula oku tiamisila utima kovina via pita, ekalo liomuenyo wove yi pondola oku pongoloka.
Embimbiliya li lekisa otembo yimue okuti “ka mu yevala vali ondaka yoku litetela, pamue ondaka yoku lila.” (Isaya 65:19) Olondaka viaco vi ka telisiwa eci ongongo yi ka pongoluiwa ocumbo celau vemẽhi Liusoma wa Suku. (Osamo 37:11, 29) Ka ku ka kala vali ovilunga. Ka tu ka kuata vali esumuo omo liovilunga tu li pita lavio, momo Suku Ukuonene wosi wa likuminya ndoco: “Ovina viale ka vi ivalukiwa, ka vi sokoluiwa.”—Isaya 65:17.
Sokolola: Ululiki wa sokiya oku tu ‘wavela elavoko lioloneke viya’ okuti omuenyo umue wesanju vemẽyi wusoma waye wa lipua. (Yeremiya 29:11) Anga hẽ oku kũlĩha ocili, ci kuatisa oku kuata elavoko komuenyo? Sally wa tukuiwa kefetikilo liorevista yilo, wa popia ndoco: “Oku sokolola kovina viwa Usoma wa Suku u ka tu lingila, ci ndi kuatisa oku liwekapo oku sokolola kovina via pita loku tiamisila utima kovina vi keya kovaso yoloneke.”
Momo lie ku lilongisila ovina vikuavo Usoma wa Suku u ka lingila omanu kovaso yoloneke? Nda wa ci linga, o pondola oku kolela okuti, ndaño o liyaka lovilunga, cilo omuenyo wove u kuete esilivilo osimbu o lavoka lesanju omuenyo kovaso yoloneke okuti, ka ku ka kala vali ovilunga. Pole cilo osimbu otembo yaco ka ya pitĩlile, Embimbiliya li tu ĩha olonumbi vi pondola oku tu kuatisa eci o li pita lovilunga. Kũlĩhĩsa ovolandu amue.