Ceci tu Fisa Umue Ngandietu

NDA wa fisa omunu umue o sole, o kuata ovisimĩlo ndevi: esumuo kuenda ulika. O pondolavo oku yeva onyeño, oku livetela evelo kuenda oku kuata usumba. O pondolavo oku sokolola nda omuenyo wove u kuete muẽle esilivilo ale sio.

Kũlĩha okuti oku lila ka ci lomboloka oku hongua. Ci lekisa ocisola wa kuatelele omunu una wa fa. Pole, citava hẽ oku sanga elembeleko kohali yaco?

OLONUMBI VI KUATISA OKU PANDIKISA

Ndaño o sima okuti esumuo liove ka li kuete esulilo, olonumbi vi kuãimo vi pondola oku ku lembeleka:

SANDA OTEMBO YOKU LILA

Omanu havosiko okuti va yeva evalo limuamue ale vokuenda kuotembo yimuamue. Omo liaco, oku lila ci pondola oku kuatisa oku tepulula evalo. Vanessa wa tukuiwa ale, wa popia hati: “Nda enda lika oku lila; Nda sukilile oku tepulula evalo.” Ukãi umue o tukuiwa Sofia okuti manjaye wa fa ocipikipiki wa popia hati: “Ka ca lelukile oku sokolola kovina via pita, ca kala ndoku sukula pepute limue. Ci koka evalo lialua, pole, li ecelela okuti epute li kaya.”

SITULULA OVISIMĨLO VIOVE KUENDA OVINA O YEVITE

Ocili okuti, olonjanja vimue o kuata lika onjongole yoku kala lika liove. Pole, oku yuvula oku situlula evalo liove, ca lisoka loku ambata ocilemo cimue lika liove. Jared, o kuete ekũi lepanduvali kanyamo okuti wa fisa isiaye, wa popia hati: “Nda enda oku vangula lomanu catiamẽla kovina ndi yevite. Sia kũlĩhĩle nda olondaka nda popia via kuata muẽle esilivilo, pole, poku ci linga, nda liyeva ciwa.” Janice wa tukuiwa kocipama catete, wa lombolola ekuatiso likuavo hati: “Oku vangula lavakuetu, ca ndi lembeleka calua. Nda liyeva ndu okuti vakuetu va ndi kapako kuenda sia li yevele ulika.”

TAVA EKUATISO

Ondotolo yimue ya popia ndoco: “Omanu vana va fisa ngandiavo kuenda va ecelela okuti akamba lepata li va kuatisa kefetikilo, va yuvula lonjanga esumuo.” Ecelela okuti akamba vove va kũlĩha eci va sukila oku linga oco va ku kuatise; ovo va yongola oku ku kuatisa, pole, citava okuti ka va lete ndomo va ci linga.—Olosapo 17:17.

KUATA UKAMBA LA SUKU

Ukãi umue o tukuiwa hati Tina, wa popia ndoco: “Eci nda fisa ulume wange wa kuata uveyi wo Kanser, sia ponduile vali oku sapela laye, omo liaco, nda enda oku sapuila cosi ku Suku! Oloneke viosi, nda enda oku pinga ku Suku oco a ndi kuatise vokuenda kueteke. Suku wa ndi kuatisa volonjila via li tepa okuti si tẽla oku vi lombolola.” Tarsha wa kuata 22 kayamo eci inaye a fa, wa popia hati: “Oku tanga Embimbiliya eteke leteke, ca ndi lembeleka. Olio, lia enda oku eca kokuange ovina ndi sokolola vokuenda kueteke.”

SOKOLOLA ELAVOKO LIEPINDUKO

Tina wa amisako poku popia hati: “Kefetikilo, elavoko liepinduko ka lia ndembelekele momo, nda sukilile oku kala lulume wange kuenda omãla vange va sukilile isiavo. Pole, cilo, ndaño pa pita ale anyamo akuãla, nda kakatela kelavoko liepinduko. Olio, li ñuatisa calua oku pandikisa. Nda siata oku sokolola oku u mola vali, kuenje ci ndi nenela ombembua kuenda esanju!”

Citava okuti ku liyevi ciwa vepuluvi liaco. Pole, ulandu wa Vanessa u pondola oku ku lembeleka. Eye wa popia hati: “Ove o sima okuti lalimue eteke o ka liyeva ciwa, pole, vokuenda kuotembo evalo liaco li tepuluka.”

Ivaluka okuti, ndaño evalo o yevite ka li piti, omuenyo handi u amamako. Lekuatiso lia Suku, o pondola oku kuata esanju, akamba vawa kuenda oku kuata ocimãho komuenyo. Ndopo, Suku o ka pindula omanu va fa. Eye o yongola okuti o kala vali la va ngandiove va fa. Kuenje evalo o yevite vutima, ka u ka kalako vali!