Olonumbi Vioku Kuatisa Vamanji va Songola Olonepa Viohongele Yupange
Oku upisa Kupange Wetu ulo Wusoma, esokiyo liohongele yupange li fetika oku teta onimbu. Olonumbi vi kuãimo, vi ka piñainya vina vi sangiwa vocipama losapi hati: “Ndomo tu Lipongiyila Ohongele Yupange,” ca sandekiwa Vupange Wetu Wusoma wosãi ya Kupemba, wo 2009.
◼ Ohundo: Onepa yaco, ka yi lingiwa lapulilo amue kolonjeveleli. Manji o linga ohundo yaco, o sukila oku lombolola atosi ana a pondola oku kuatisa ekongelo.
◼ Apulilo Latambululo: Onepa yaco yi kuete olondaka vioku fetika, kuenda vioku malusula vi teta onimbu. Apulilo aco a sukila oku lingiwa kovinimbu viosi, ndeci ca siata oku lingiwa Velilongiso Liutala Wondavululi. Manji o linga onepa yaco, o sukila oku yuvula oku vangula calua. Ovinimbu vimue Viembimbiliya citava okuti vi tangiwa, nda otembo yecelela. Ka ci sukila oku tanga ovinimbu vionepa yaco. Pole, vi tangiwa lika nda wa tambula onumbi yaco.
◼ Apulilo Amue: Vohundo yaco, mua kongela oku linga lika apulilo amue kolonjeveleli. Onepa yaco ka yi lingiwa ndohundo okuti ka ci sukila oku linga apulilo, kuenda ka yi lingiwavo ndonepa yimue yi kuete apulilo latambululo.
◼ Ovindekaise Kuenda Oku Pulisa Vamue: Manji o linga onepa yaco, eye o kuete ocikele coku nõla vana va ka linga ovindekaise. Pole, ka ci tava okuti, o kuata onepa koku linga ocindekaise caco. Eye o sukila oku nõla vamanji vana va loñoloha koku linga ovindekaise, haivo va kuete ovituwa viwa. Handi vali, manji o linga onepa yaco, o sukila oku yuvula oku nõla vana va fetika ndopo oku kunda, kuenda vana ka va loñolohele, momo ka va kũlĩhĩle ndomo ovindekaise viaco vi lingiwa. Eye ka sukila oku va nõla oco va kuate ño epuluvi lioku enda kembumbua. Pole, citava lika oku va nõla oco va kale ndomunu o sangiwa kupange woku kunda. Vamanji va linga ovindekaise, va sukila oku yuvula oku imba onyima kolonjeveleli. Vana va lalekiwa oco va pulisiwe, poku eca atambululo avo, va sukila oku kala kembumbua. Vana va ka linga ovindekaise, lava va ka pulisiwa, va sukila oku li pongiya ciwa. Manji o linga onepa yaye o sukila oku tepulula otembo ya sokiyiwa, oco a kuate epuluvi lioku linga ovindekaise, ale oku pulisa vana va nõliwa. Oloñuatisi viakulu vekongelo vi sukila oku sapela lusongui wakulu vekongelo, ale lukulu ukuavo wekongelo, osimbu ka va nõlele vana va ka linga ovindekaise, ale vava va ka pulisiwa.
Nda onepa yimue yi kuete olonumbi, tu sukila oku vi kuama. Nda vamanji va linga olonepa Viohongele Yupange va kuama olonumbi via tukuiwa ndeti, cecelela okuti, Olohongele Viupange viendisiwa ‘lesokiyo liwa.’—1 Va Kor. 14:40.