‘Ku ka Kuate Usumba’
1. Ovitangi vipi tu pondola oku liyaka lavio ndeci ca pita la Yeremiya?
1 Eci Yeremiya a tambula ocikele coku kala uprofeto, wa simĩle okuti ka tẽla oku linga upange waco. Pole, Yehova wo sapuila hati: “Ku ka va kuatele ohele,” kuenda wo vetiya oco a tẽlise ocikele caye. (Yer. 1:6-10) Koloneke vilo, osõi, ale oku litenda ndu okuti ka tua loñolohele, ci pondola oku tepulula ombili yetu kupange woku kunda. Oku kuata usumba loku sokolola ndomo omanu va ka tenda esapulo tu va kundila, pamue ci tu vetiya oku kuata owesi kupange waco. Tu yula ndati usumba, kuenda asumũlũho api tu pondola oku tambula?
2. Oku lipongiya selo ku tu kuatisa ndati oku yula usumba kupange woku kunda?
2 Lipongiya Selo: Oku lipongiya ciwa, ku tu kuatisa oku yula usumba. Nda tua pongiya selo ovina tu ka popia, tu ka tẽla oku tambulula vana va tu teta kondaka, kuenda tu ka tẽla oku tambulula apulilo a siata oku lingiwa kupange woku kunda. (Olosap. 15:28) Vefendelo liene Liepata, momo lie ka vu lingila ocindekaise cimue ci lekisa ndomo vu pondola oku yula ovitangi wa siati oku liyaka lavio kosikola, ale kupange woku kunda?—1 Pet. 3:15.
3. Oku kolela ku Yehova ku tu kuatisa ndati oku yula usumba?
3 Kolela ku Yehova: Oku kolela ku Yehova Suku yetu, ku tu kuatisa oku yula usumba. Yehova wa likuminya oku tu kuatisa. (Isa. 41:10-13) Ociteyuilo cipi ca velapo tu kuete? Yesu wa likuminyile okuti, espiritu sandu lia Suku li tu kuatisa oku kunda olondaka viwa lutõi, ndaño lovitangi. (Mar. 13:11) Omo liaco, pinga espiritu sandu lia Yehova olonjanja viosi.—Luka 11:13.
4. Asumũlũho api eyilila koku pandikisa kupange woku kunda ndaño lovitangi?
4 Asumũlũho: Osimbu tu amamako oku pandikisa kupange woku kunda ndaño lovitangi, tu pamisiwa, oco tu yule ciwa ovitangi vi keya kovaso yoloneke. Tu sukila oku kuata epandi lutõi, momo ovituwa viaco, ovio via siata oku lekisiwa la vana va kuete espiritu sandu. (Ovil. 4:31) Osimbu tu amamako oku yula usumba lekuatiso lia Yehova, tu pamisa ekolelo lietu kokuaye kuenda kepopelo li tunda kokuaye. (Isa. 33:2) Tu kuata esanju poku kũlĩha okuti, tu kasi oku sanjuisa utima wa Isietu wo kilu. (1 Pet. 4:13, 14) Omo liaco, tu amamiko oku kunda esapulo Liusoma lutõi loku yuvula usumba, kuenda tu koleli kekuatiso lia Yehova olonjanja viosi!