Ndomo Ocisola ci tu Kuatisa Oku Yula Usumba

1. Usumba upi wa siata calua?

KŨLĨHĨSA ekalo limue lia liyaka Lolombangi vimue Via Yehova. Manji Nestor kuenda ukãi waye María, va yonguile oku ka talavaya kocikanjo cimue okuti kuli esukila liakundi.b Oco va ci linge, va sukilile oku pongolola ekalo liavo liomuenyo. Pole, ovo va kuata usumba wokuti, ka va ponduile oku kuata esanju lolombongo vitito. Eci manji Biniam a linga Ombangi ya Yehova, vofeka yimue okuti upange wetu wa kala loku tatekiwa, eye wa limbuka okuti omo wa kala umue pokati kafendeli va Suku, wa laikele oku lambalaliwa. Kuenje wa kuata usumba walua. Pole, eci co kokela vali usumba, oku sokolola ndomo epata liaye lia laikele oku liyeva, eci va ka yeva okuti o kasi vetavo likuavo. Manji Valérie weya oku limbukiwa okuti o kasi luvei wo kancer kuenje eye wa likolisilako oku sanda ondotolo yimue yi pelala, okuti ya sumbila ovina eye a tava vina via kunamẽla Vembimbiliya viatiamẽla kosonde. Ocili, eye wa kuata usumba woku sima okuti wa laikele oku fa.

2. Momo lie tu sukilila oku likolisilako oku yula usumba?

² Anga hẽ wa kuatele ale usumba? Valua pokati ketu tu kuete. Nda ka tua likolisilileko oku likandangiya kusumba, citava okuti tu ka nõla onjila yimue ka ya sungulukile, yi pondola oku nyõla ukamba wetu la Yehova. Eci oco Satana a yongola. Eye wa siatavo oku likolisilako oku kuama usumba tu kuete, oco u tu kokele oku sinĩla ovihandeleko via Yehova, oku kongelamo ocikundi coku kunda olondaka viwa. (Esi 12:17) Satana ongangala kuenda ka kuete ocikembe. Pole, o pondola oku li teyuila kokuaye. Ndamupi?

3. Nye ci pondola oku tu kuatisa oku yula usumba?

³ Eci tu kolela okuti Yehova o tu sole kuenda o kasi konele yetu, Satana ka pondola oku tu kokela usumba. (Os 118:6) Usonehi Wolosamo 118, wa liyaka lovitangi vialua via enda oku u sakalaisa. Eye wa kuatele ovanyãli valua, oku kongelamo vana va kala kocikele ca velelepo (ovinimbu 9, 10). Olonjanja vimue wa enda oku sakalala calua (ocinimbu 13). Kuenje eye wa tambuile elungulo linene ku Yehova (ocinimbu 18). Ndaño ndoco, ukualosamo waco wa vetiyiwa oku imba hati: “Si ka kuata usumba.” Nye co kuatisa oku kuata utõi? Eye wa kũlĩhĩle okuti ndaño Yehova wo wĩha elungulo, Isiaye wokilu u sole calua. Ukualosamo wa kolelele okuti, ovitangi viosi a kala oku liyaka lavio, Suku yaye ukuacisola olonjanja viosi wa likapeleleko oku u kuatisa.—Os 118:29.

4. Usumba upi tu pondola oku yula nda tua kolela okuti Suku o tu sole?

⁴ Tu sukila oku kolela okuti Yehova o tu sole. Eci ci ka tu kuatisa oku yula ovina vitatu via siata oku tu kokela usumba ndeci: (1) usumba wokuti ka tu tẽla oku eca eci epata lietu li sukila; (2) usumba womunu kuenda (3) usumba wolofa. Vamanji va tukuiwa kocinimbu catete, va tẽla oku yula usumba va kuatele, momo va kolelele kocisola ca Suku.

USUMBA WOKUTI KA TU TẼLA OKU ECA ECI EPATA LIETU LI SUKILA

5. Ovina vipi vi pondola oku kokela esakalalo kusongui umue wepata? (Tala ociluvialuvia koñoño yemẽla.)

⁵ Ukristão umue okuti usongui wepata, wa kapako calua ocikele coku tata epata liaye konepa yetimba. (1Ti 5:8) Nda ove usongui wepata citava okuti vokuenda kuefengi, wa kala lesakalalo lioku pumba upange o kuete. Pamue wa sakalalele okuti, kua ponduile oku sanga eteku kuenda onjo yoku kala lepata liove. Citava okuti wa kuatavo usumba wokuti, nda wa pumba upange wove woku sanda eteku, pamue ku sangi vali upange ukuavo. Ale, ndeci ca linga manji Nestor lukãi waye María, va tukuiwa ale, pamue o kuata usumba woku sima okuti, omunu ka tẽla oku landa ovina lolombongo vitito. Satana wa kuata onima yalua poku kuama onjila eyi yusumba.

6. Kovina vipi Satana a tu seteka oku tava?

⁶ Satana o tu seteka oku tava okuti, Yehova ka kapeleko omunu lomunu kuenda ndaño ovina vi tekula epata lietu, etu muẽle tu vi sanda. Kuenje tu fetika oku sima okuti tu sukila oku linga cosi oco tu amameko kupange wetu, ndaño okuti mua kongela ovina vi li patãla Lovisonehua.

7. Nye Yesu a tu likuminya?

⁷ Yesu wa kũlĩha ciwa Isiaye okuti omunu ukuavo ci sule, eye o tu likuminya okuti Suku yetu, ‘wa kũlĩha ovina [tu] sukila osimbu ka [tuo] pingile.’ (Mat 6:8) Yesu wa kũlĩha okuti Yehova, wa li kapelako oku tu ĩha ovina viosi tu sukila. Etu Tuakristão, tu panga onepa kepata lia Suku. Omo Yehova usongui wepata tu sukila oku kolela okuti, eye o ka tẽlisa olonumbi a sapuila kasongui vepata vi sangiwa kukanda 1 Timoteo 5:8.

8. (a) Nye ci pondola oku tu kuatisa oku yula usumba woku sima okuti ka tu ka tẽla, oku sanga eteku liepata lietu? (Mateo 6:31-33) (b) Tu pondola oku setukula ndati ohueli ya lekisiwa velitalatu okuti ya siata oku eca okulia ku manji umue ukãi?

⁸ Eci tu kolela okuti Yehova o tu sole kuenda o solevo epata lietu, tu kolela okuti eye o tu ĩha ovina tu sukila. (Tanga Mateo 6:31-33.) Yehova o yongola oku tu ĩha ovina tu sukila, momo eye ukuacisola kuenda ukuacali Kokueca! Eci eye a lulika ongongo, wa tu ĩha ovina vialua tu sukila, oco tu kale lomuenyo. Eye wa yukisa ongongo lovina vialua via ponduile oku tu ĩha esanju. (Efet. 2:9) Ndaño okuti olonjanja vimue ka tu kuete calua, pole, tu sukila oku luluvalela kovina tua siata oku kuata. Yehova ka la liwekapo oku tu ĩha ovina tu sukila. (Mat. 6:11) Tu ivaluki okuti, alikolisilo osi tu linga cilo a sule, oku a sokisa lovina Suku a siata oku tu ĩha kuenda ovina eye a ka tu ĩha kovaso yoloneke. Eci oco manji Nestor kuenda María va limbuka.—Isa. 65:21, 22.

9. Nye o lilongisila kulandu wa manji Nestor kuenda María?

⁹ Manji Nestor kuenda María va kuatele onjo yiwa kuenda upange uwa ko Kolombia. Ovo va popia hati: “Tua kuata ocisimĩlo coku leluisa omuenyo wetu kuenda oku vokiya upange wetu woku kunda, pole, tua kuata usumba, omo tua simĩle okuti ka tua ponduile oku kuata esanju lolombonga vitito.” Nye ca va kuatisa oku yula usumba ovo va kuatele? Ovo va sokolola kolonjila vialua ndomo Yehova a siata oku lekisa ocisola caye kokuavo. Poku kolela okuti eye wa ponduile oku va tata, va siapo upange wavo, una va enda oku nganyala olombongo vialua. Ovo va landisa onjo yavo, lovikuata kuenje va ilukila kocikanjo kuli esukila liakundi Vusoma. Va liyeva ndati omo lionjila va nõla? Manji Nestor wa popia hati: “Tua siata oku mola oku tẽlisiwa kuolondaka vi sangiwa ku Mateo 6:33. Ka tua lakambela lacimue kovina tu sukila. Cilo, tu kuete omuenyo umue wesanju.”

USUMBA WOMUNU

10. Momo lie ka ci komõhisa omunu oku kuatela usumba omunu ukuavo?

¹⁰ Tunde kosimbu ulandu u lekisa okuti, omanu va siata oku kuata ocituwa coku liñualelapo omunu lukuavo. (Uku 8:9) Ndeci, omanu va siata oku talavaya lãvi lomoko yavo yoku viala ovo va kuete, momo ovo va linga ungangala, vamue va sanumuiwa lakamba vavo kosikola, kupange kuenda vakuavo va tata lãvi epata liavo. Eci ka ci komõhisa okuti, omunu o kuatela usumba omunu ukuavo! Satana wa siata oku talavaya ndati lusumba wonunu, oco a tu yapuise?

11-12. Satana wa siata oku talavaya ndati lusumba wonunu oco a tu yapuise?

¹¹ Satana o talavaya lusumba womunu, oco a tu yapuise oku liwekapo oku kunda loku tẽlisa ovina Yehova a yongola okuti tu vi linga. Levetiyo lia Satana, olombiali via siata oku tateka upange wetu kuenda oku tu lambalala. (Luk 21:12; Esi 2:10) Ovitundo vialua violuali lua Satana, via siata oku lundila kuenda oku popia lãvi Olombangi Via Yehova. Omanu vana va tava kalundi aco, va pondola oku tu sepula, ale oku tu tata lungangala. (Mat 10:36) Anga atutu a Satana a tu komõhisa? Sio, a hosiko. Eye wa talavayavo latutu aco kocita catete!—Ovl 5:27, 28, 40.

¹² Usumba woku lambalaliwa lolombiali, hawoko lika etutu Satana a siata oku talavaya lalio. Vamue va yeva usumba ndomo epata lika liyeva, poku kũlĩha okuti ovo va linga Olombangi Via Yehova. Ovo va sole calua epata liavo kuenje va yongolavo okuti epata liaco, li kũlĩha kuenda li sola Yehova. Ovo va sumua calua eci va yeva okuti, epata liavo li sepula Suku yocili kuenda afendeli vaye. Pole, kolonjanja vimue, epata lina lia enda oku va lambalala li fetikavo oku lilongisa ocili. Sokolola okuti, epata lietu li tepa ukamba letu, omo liovina tu tava. Tu liyeva hẽ ndati?

13. Oku kolela kocisola ca Suku ci tu kuatisa ndati, eci tu yandulukiwa lepata? (Olosamo 27:10)

¹³ Tu lembelekiwa calua lolondaka viwa, vi sangiwa Kolosamo 27:10. (Tanga.) Poku sokolola kocisola calua Suku a tu kuetele, tu kolapo eci tu lambalaliwa. Etu tua kolela okuti, eye o ka tu sumũlũisa omo liepandi lietu. Yehova o ka tu ĩha ovina viosi tu sukila, o tu kuatisa oku tulumũha loku kuata esanju kuenda o tu kuatisavo oku amẽla kokuaye okuti, lomue o pondola oku ci linga. Eci oco manji Biniam wa tukuiwa ale, a limbuka.

14. Nye o pondola oku lilongisa kulandu wa manji Biniam?

¹⁴ Manji Biniam, eci a linga Ombangi ya Yehova wa kũlĩhĩle ale okuti, wa ponduile oku liyaka lelambalalo. Konomuisa ndomo manji Biniam a kuatisiwa oku yula usumba womunu poku kũlĩha okuti Yehova u sole. Eye wa popia hati: “Ka la sima okuti wa ponduile oku lambalaliwa lonjila ndeyi, pole, nda kuatelele vali usumba welambalalo liepata, okuti wolombiali ci sule. Ame nda kuata usumba wokuti onjila nda nõla yoku kala Ombangi yimue ya Yehova, ya ponduile oku sumuisa isiange kuenda sia ponduile vali oku sumbiwa lepata liange.” Pole, manji Biniam wa kolelele okuti, Yehova olonjanja viosi o tata vana vo sole. Manji Biniam wa lombolola hati: “Nda sokolola ndomo Yehova a kuatisa omanu vakuavo oku liyaka lovitangi viekambo liolombongo, olonepele kuenda ungangala. Ame nda kũlĩhĩle okuti nda nda kolela Yehova, eye wa laikele oku ndi sumũlũisa. Eci ndaenda oku kapiwa vokayike olonjanja vialua, loku tipuiwa, nda limbuka ndomo Yehova a pondola oku tu kuatisa eci tu amamako oku u kolela.” Yehova wa kala nda Isia umue ukuacili ku manji Biniam kuenda afendeli vaye va lekisavo okuti, epata ku manji Biniam.

USUMBA WOLOFA

15. Momo lie hacĩviko oku kuatela usumba olofa?

¹⁵ Embimbiliya li popia okuti olofa unyãli umue. (1Ko 15:25, 26) Tu pondola oku kuata usumba lolofa, ca piãla enene nda etu ale umue tu sole o vela calua. Momo lie tu kuetele usumba wolofa? Momo Yehova wa tu lulika lonjongole yoku kala komuenyo otembo ka yi pui. (Uku 3:11) Usumba wolofa u pondola oku tu kuatisa oku teyuila omuenyo wetu. Ndeci, usumba wolofa u pondola oku tu kuatisa oku nõla olonjila viwa viatiamẽla koku lia ovina vi kuatisa kuhayele, koku pindisa etimba, koku sanda ondotolo, ovihemba vi sukiliwa kuenda oku yuvula ovina vi kapa kohele omuenyo wetu.

16. Satana o talavaya ndati lusumba tu kuetele olofa?

¹⁶ Satana wa kũlĩha okuti etu tu tenda omuenyo okuti u kuete esilivilo lialua. Eye wa popia hati, tu pondola oku eca cosi tu kuate oku kongelamo oku nyõla ukamba wetu la Yehova, oco tu yovole omuenyo wetu. (Yov 2:4, 5) Eci Satana a popia haciliko! Omo okuti Satana “o kuete unene woku koka olofa,” eye o kuama usumba tu kuetele olofa oco tu liwekepo oku vumba Yehova. (Hev 2:14, 15) Olonjanja vimue vana va tiamẽla ku Satana, va seteka oku ponda afendeli va Yehova omo okuti, ka va yongola oku liwekapo kekolelo liavo. Ale pamue Satana o seteka oku tu konyuisa, nda tu kasi luveyi umue u kapa kohele omuenyo wetu. Olondotolo, ale apata ana okuti Halombangiko Via Yehova, pamue va tu kisika oco tu tave oku tambula osonde, okuti ocina cimue ci li patãla locihandeleko ca Suku. Ale pamue omunu umue o seteka oku tu kisika oku sakuiwa lonjila yimue ka yi likuata lolonumbi Viembimbiliya.

17. Ndomo ci sangiwa ku Va Roma 8:37-39, momo lie ka ci sukilila oku kuatela usumba olofa?

¹⁷ Ndaño okuti ka tu yongola oku fa, tua kũlĩha okuti Yehova lalimue eteke a ka liwekapo oku tu sola nda tua fa (Tanga Va Roma 8:37-39.) Eci akamba va Yehova va fa ovo va amamako vovisimĩlo viaye ndu okuti, handi va kasi lomuenyo. (Luk 20:37, 38) Eye o ka va nena vali komuenyo. (Yov 14:15) Yehova wa feta ondando yimue yalua oco tu ‘kuate omuenyo ko pui.’ (Yoa 3:16) Etu tua kũlĩha okuti Yehova o tu kuetele ocisola calua kuenda wa tu kapako. Yehova ka tu yanduluka eci tu vela, ale tu kala kohele yoku fa omo liaco, tua kolela kelembeleko liaye kolondunge kuenda kongusu yaye. Eci oco ca linga manji Valérie kumue lulume waye.—Os 41:3.

18. Nye o pondola oku lilongisila kulandu wa manji Valérie?

¹⁸ Eci manji Valérie a kuata 35 kanyamo wa limbukiwa okuti o kuete uvei wo kancer. Konomuisa ndomo ocisola co kuatisa oku yula usumba wolofa. Eye wa popia hati: “Eci va ndi sapuila okuti ñuete o kancer, ca pongolola omuenyo wetu. Ame nda sukilile oku pelaliwa. Noke nda sapela lolondotolo vialua vakuakupelala, pole, vosi yavo va popia hati, ka va ponduile oku ci linga, nda sia tambuile osonde. Nda kala lusumba, pole, omo lioku kapako ocihandeleko ca Suku, sia ponduile oku tava oku kapiwa osonde! Vokuenda kuomuenyo wange Yehova wa siata oku lekisa ocisola caye kokuange. Cilo ñuete epuluvi lioku lekisa ocisola cange kokuaye. Olonjanja viosi eci ndi tambula esapulo lĩvi, ndi nõlapo oku sanjuisa Yehova okuti Satana sio. Noke nda pelaliwa ciwa, ndaño sia kapiwile osonde. Ndaño okuti handi si kuete uhayele uwa, Yehova olonjanja viosi o tu ĩha eci tu sukila. Ndeci, kohongele yetu yesulilo liosemana osimbu sia limbukiwile luvei waco, tua konomuisa ocipama losapi hati, ‘Ndomo tu Lekisa Utõi Poku Liyaka Lovitangi Koloneke Vilo.’c Ocipama caco ca tu lembeleka calua. Etu tua tanga ocipama caco olonjanja vialua. Ovipama via soka ndevi, via siata oku kuatisa ulume wange kuenda ame, oku amamako oku linga ovina tu sole ndeci, oku kunda oku kala kolohongele kuenda oku tu kuatisa oku tula utima.”

TU YULI USUMBA

19. Nye ci ka pita ndopo?

¹⁹ Lekuatiso lia Yehova, Akristão vo kolonepa viosi violuali, va siata oku yula ovitangi kuenda va siata oku litunda ciwa kelambalalo lia Satana. (1Pe 5:8, 9) Ove o pondolavo oku ci linga. Ndopo Yehova o ka tuma Yesu kuenda vana va ka viala laye ‘oco va nyõle ovilinga Vieliapu.’ (1Yo 3:8) Noke liovina viaco, afendeli va Suku palo posi, va ko vumba okuti ‘ka va ka kuatela usumba cimue kuenda ka va ka kuata esunga lioku kuata usumba.’ (Isa 54:14; Mik 4:4) Oku upisa cilo, tu sukila oku likolisilako oku yula usumba.

20. Nye ci ka tu kuatisa oku yula usumba?

²⁰ Cilo, tu sukila oku amamako oku pamisa ekolelo lietu liokuti Yehova o tu sole kuenda o teyuila afendeli vaye. Ocina cimue ci pondola oku tu kuatisa oku ci linga, oku sokolola loku vangula ndomo Yehova a kuatisa afendeli vaye kosimbu. Tu sukila oku sokolola ndomo eye a siata oku kuatisa omunu lomunu oku liyaka lovitangi. Kuenje lekuatiso lia Yehova, tu pondola oku yula usumba.—Os 34:4.