Lalimue Eteke Tu Kambela Upange

1. Tua kũliha ndati okuti akundi vakuambili kocita catete lalimue eteke va simile okuti ka va kuete upange?

¹ Akundi vakuambili kocita catete, ka va liwekelepoʼ oku kundila olondaka viwa kovitumãlo viosi ku sangiwa omanu. (Ovil. 5:42) Poku enda konjo lanjo, ka va liwekelepo oku kundila omanu va ñualehela lavo vonjila. Va enda oku sanda epuluvi lioku eca uvangi ka wa sokiyiwile poku landa ovina pocitanda noke yoku mala upange woku kunda. Ndeci Yesu a linga, ovo lalimue eteke va simĩle okuti ka va kuete upange.—Mar. 6:31-34.

2. Nye ca kongela voku lekisa ovituwa vi li tava londuko yetu?

² Tu Sandi Apuluvi Oku Eca Uvangi: Onduko yetu, Olombangi Via Yehova, ka yi situlula lika eci tu linga; pole yi situlula eci tua tuwa. (Isa. 43:10-12) Olonjanja viosi tu lipongiyili oku teyuila elavoko lietu ndaño ka tu kasi oku kundila konjo lanjo. (1 Pet. 3:15) Tu pondola hẽ oku sokolola apuluvi a tu ecelela oku eca uvangi ka wa sokiyiwile loku sima ndomo tu ka vangula? Wa siata hẽ oku ambata alivulu vekolombele liove oco o a ece komanu va lekisa onjongole? (Olosap. 21:5) Wa siata hẽ oku kunda lika eci wenda konjo lanjo, ale o kundilavo olondaka viwa omanu va sangiwa kovitumãlo vikuavo nda ekalo liuku ecelela?

3. Momo lie oku eca uvangi volokololo, povitumãlo vioku yeka akãlu, poviumbo violonelẽho, povitumãlo violomĩlu kuenda kolonepa vikuavo, ka ci tava oku u tenda ndupange ka u kuete esilivilo?

³ Oku Eca Uvangi “Povitumãlo Viowiñi”: Tua siata oku kundila volokololo, povitumãlo vioku yeka akãlu, poviumbo violonelẽho, povitumãlo violomĩlu kuenda kolonepa vikuavo. Anga hẽ alikolisilo aco ka a kuete esilivilo, ale upange umue u lingiwa ño nda citava? Upostolo Paulu wa popia okuti wa kundila “vovila” ale povitumãlo pa sangiwa owiñi kuenda konjo lanjo. (Ovil. 20:20) Ocili okuti oku eca uvangi konjo lanjo oyo onjila ya velapo yoku kundila omanu kuenda yeca onima yiwa koku sandeka esapulo Liusoma. Omo liaco, akundi vo kocita catete va luluvalelele komanu, kolonjo hakoko. Ovo va enda oku sanda apuluvi osi oku sapula ocili, ci kale powiñi, oku eca uvangi ka wa sokiyiwile, kuenda konjo lanjo. Tu kuativo ocimãho coku luluvalela komanu oco tu tẽlise upange wetu woku kunda.—2 Tim. 4:5.