Olohongele Vietu Viofeka Vieca Uvangi Wocili
1. Ovipito va Isareli va lingaile unyamo lunyamo, via va iha epuluvi lioku sokolola kuenda oku vangula ovina vipi viocili konepa yespiritu?
1 Va Isareli kosimbu va enda oku liongolola olonjanja vitatu vunyamo oco va linge ovipito. Ndaño okuti alume ovo lika va kisikiwile oku enda kovipito viaco, olonjanja vimue epata liosi lia enda oku linga ungende woku enda ko Yerusalãi oco va kale kolohongele viaco. (Esin. 16:15, 16) Ovipito viaco via enda oku eca epuluvi lioku sokolola loku vangula ovina viocili konepa yespiritu. Vipi vimue pokati kovina viaco viocili? Cimue pokati kavio ceci okuti Yehova ongavi, Ukuakuecaeca locisola. (Esin. 15:4, 5) Cikuavo ceci okuti eye o pondola oku yovola, oku songuila kuenda oku teyuila. (Esin. 32:9, 10) Omo va Isareli va kala omanu va Yehova va sukilile oku setukula esunga liaye. (Esin. 7:6, 11) Koloneke vilo olohongele vietu viofeka vi kuetevo ocimãho cimuamue.
2. Ulandu wohongele yofeka u ka tu kuatisa ndati oku kuata elomboloko liocili Cembimbiliya?
2 Ulandu u Kuatisa Oku Kuata Elomboloko Liocili: Kolohongele vietu viofeka kua siata oku lingiwa olohundo, olondalama, ovindekaise, kuenda oku pulisiwa, oco tu kuatisiwe oku kuata elomboloko loku kapako ocili Cembimbiliya. (Yoa. 17:17) Cilo ku kasi ale oku lingiwa upange walua wohongele yofeka tu lavoka. Ocisoko ca Yehova ci kasi oku pongiya ulandu u likuata lovina vi sukiliwa voluali luosi. (Mat. 24:45-47) O kasi hẽ oku lavoka lesanju oku mola kuenda oku yeva ovina vi ka lekisiwa?
3. Nye tu sukila oku linga oco tu kuatisiwe lulandu wovipama?
3 Tu kuatisiwa lika lesokiyo liaco nda tua enda kuenda tua yevelela lutate ulandu woloneke viaco vitatu. O sukila oku pinga ku cime cove, oco a ku ĩhe oloneke viepuyuko kupange. Puyuka ciwa luteke oco ku ka pekele vokuenda kuovipama. Valua va limbuka okuti oku luluvala ku hundi loku soneha atosi amue, ci va kuatisa oku yevelela lutate. Ku ka ecelele okuti o telefone yove yi tateka vakuene oku yevelela. Yuvula oku soneha olomesage, oku lia, ale oku nyua vokuenda kuovipama.
4. Nye olonjali vi sukila oku linga oco vi kuatise omãla vavo oku upa esilivilo kohongele yofeka?
4 Kanyamo Esambata, eci apata a va Isareli a enda oku liongolola oco va yevelele oku tangiwa Kuocihandeleko Kocipito Colosinge, ovo “lomãla” vavo, “va yevelela loku lilongisa.” (Esin. 31:12) Ci tu sanjuisa calua eci tu mola apata a tumala pamosi vokuenda kuohongele lamalẽhe va lavulula kuenda va yevelela lutate ovipama! Koñolosi loñolosi momo lie ka vu konomuisila ovina wa sonehi kuenda oku sapela catiamela katosi a velapo ovipama? Omo okuti “vutima womõla muli esanda” olonjali vi sukila oku lava omãla vavo vatito oku kongelamo vana va kula ale vepuluvi liepuyuko kuenda osimbu va kasi vowotele, okuti ka va eceleliwa oku enda lika liavo oku ‘ñuala ñuala.’—Olosap. 22:15; 29:15.
5. Ovituwa vietu viwa vimba ndati uvangi wocili vowotele?
5 Ovituwa Vietu Viwa Vimba Uvangi Wocili: Ovituwa vietu viwa vimba uvangi wocili pocitumãlo pa lingiwila ohongele. (Tito 2:10) Olonalavayi viowotele via siata oku limbuka ndomo vamanji va kuama olonumbi viowotele loku lekisa epandi kuenda umbombe lolonalavayi. (Va Kol. 4:6) Unyamo wa pita eci onumiwa yombetele ya sapela lusongui wo wotele ovo vo sapuila hati: “Etu tu sanjuka calua eci omanu vene veya ko wotele yetu omo okuti vawa calua. Ovo va kuete ovituwa viwa, ocisola, kuenda va lekisa esumbilo kolonalavayi.”
6. Oku wala kuetu ku imba ndati uvangi wocili eci tu kasi pocitumãlo cohongele?
6 Eci tu wala okokanda kohongele yofeka ka tu sapula lika ohongele yofeka loku limbukiwa la vamanji, pole ceca uvangi komanu vakuavo va tu lete. Omanu pocitumãlo cohongele va ka limbuka okuti vana va wala okokanda kohongele, va wala kuenda va li posuisa ciwa, okuti uwalo waco ka u lekisa olonepa vietimba ndomo ca siata voluali. (1 Tim. 2:9, 10) Tu sukila oku wala loku liposuisa ciwa osimbu tu kasi kocitumãlo cohongele, oku kongelamo eci tu kũlĩhĩsa owotele tu ka sikĩla. Oku wala o putula lomisola ka ci lekisa esumbilo. Ndaño ohongole yi lingiwa voluayela, tu sukila oku wala ciwa. Nda tua sokiya oku pongolola uwalo wetu noke yovipama viohongele oco tu ende vowotele, tu sukila oku ivaluka okuti handi tu kasi kohongele kuenda tu yuvula oku wala lonjila yimue ka ya sungulukile.
7. Vepuluvi lipi etu Tuakristão tu lekisa omunga pokati ketu vokuenda kuohongele yofeka?
7 Ovipito via lingawaile unyamo lunyamo via ecelelele va Isareli oku livetiya pokati loku likuata omunga lafendeli vo kolonepa vikuavo viofeka kuenda voluali. (Ovil. 2:1, 5) Vokuenda kuolohongele viofeka, etu Tuakristão tu kuete epuluvi lioku lekisa omunga yi kasi pokati ketu. Ekalo liaco liwa konepa yespiritu lia siata oku komohisa omanu. (Osa. 133:1) Ciwa okuti tu pongiya okulia kuetu okuti ka tu landi kosamua, momo oku ci linga ci tu ĩha epuluvi lioku sapela la vamanji va tumala ponele yetu!
8. Esunga lipi tu kuete lioku lieca olumue nda otembo yetu yecelela?
8 Omanu va siata oku komoha esokiyo liwa li lingiwa kohongele, ca piãla enene eci va limbuka okuti upange waco u lingiwa lava va lieca olumue. Wa sokiya hẽ oku lieca olumue oco o kuatise kovopange amue kohongele yofeka? (Osa. 110:3) Apata amue a siata oku lieca olumue ndonjila yoku pindisa omãla oco va kuatevo ocituwa caco. Nda ku kuete ocituwa coku lianja, oku talavaya kohongele yofeka onjila yimue yoku linga ukamba la vamanji valua. Manji umue ukãi wa lombolola hati: “Oku upamo epata liange kuenda akamba vatito ndi kuete, sia kũlĩhile vali omanu vakuavo. Pole eci nda lieca olumue kupange woku yelisa ca ndi kuatisa oku kũlĩha vamanji valua alume lakãi. Kuenje eci ca ndi sanjuisa calua!” Oku vokiya etendelo liakamba vetu poku kala kolohongele viofeka ci tu nenela esanju lialua. (2 Va Kor. 6:12, 13) Nda okuti kua la lieca olumue, pinga kakulu vekongelo oco va ku kuatise ndomo o pondola oku ci linga.
9. Tu laleka ndati omanu oco va ende kohongele yofeka?
9 Laleka Omanu Oco va Yeve Ocili: Ndeci ca siata anyamo osi, eci ku kamba olosemana vitatu osimbu ohongele yofeka ka ya pitilile, tu ka linga upange woku eca otuikanda tuoku laleka omanu oku enda kohongele. Akongelo a sukila oku talavaya olonepa viosi viocikanjo lokokanda kelaleko nda ci tava. (Tala okakasia “Tu Eca Ndati Okokanda Koku Laleka?”) Otuikanda tu supapo tu ambatiwe kohongele yofeka. Vamanji va pondola oku eca uvangi ka wa sokiyiwile lotuikanda tuaco kocitumãlo cohongele.
10. Tukula ovolandu a lekisa onima yi yilila koku eca otuikanda tuoku laleka.
10 Ange hẽ omanu va siata oku tambuluiya ciwa kupange woku laleka u lingaiwa unyamo lunyamo? Kohongele yimue yofeka manji ukuakuilika wa kuatisa ohueli yimue oku sanga omangu. Ovo vo sapuila okuti va tambula okokanda kelaleko kuenda “va ci sanjukila.” Va linga ungende wa soka 320 kolokilometulu oco va kale kohongele! Kepuluvi likuavo, manji umue ukãi poku kunda konjo lanjo wa eca okokanda koku laleka kulume umue wa yonguile oku kũliha eci catiamẽla kohongele yofeka. Manji yaco wa sanda otembo yoku u lomboluila ovina vi sangiwa vokokanda. Noke yoloneke vimue osimbu manji a kala kohongele yofeka, wa mola ulume waco lekamba liaye va ambata alivulu a sandekiwa!
11. Momo lie ci kuetele esilivilo oku endanda kolohongele viofeka unyamo lunyamo?
11 Ovipito via lingawaile unyamo lunyamo eliangiliyo limue liocisola li tunda ku Yehova oco li kuatise va Isareli oku ‘u vumba lutima wosi locili.’ (Yeh. 24:14) Koloneke vilo olohongele viofeka vi tu kuatisavo oku ‘endela vocili,’ kuenda vi panga onepa kefendelo lietu. (3 Yoa. 3) Tu lavoka okuti Yehova o sumũlũisa alikolisilo a vana va sole ocili, oco va ende kohongele kuenda oku kuatisiwa lulandu waco!
[Etosi lia velapo kemẽla 4]
Ovituwa vietu viwa vimba uvangi wocili pocitumãlo pa lingiwila ohongele
[Etosi lia velapo kemẽla 5]
Eci ku kamba olosemana vitatu osimbu ohongele yofeka ka ya pitilile, tu ka linga upange woku eca otuikanda tuoku laleka omanu oku enda kohongele
[Okakasia kemẽla 6]
Olonumbi Viohongele Yofeka Yunyamo wo 2012
◼ Elivala Lioku Fetika Ovipama: Vokuenda kuoloneke vitatu, ovipama viohongele yofeka vi ka fetika kelivala 8:20. Apito a ka yuluiwa kelivala 6 komẽle. Eci manji o songola ovipama a tukula ovisikilo vioku fetika, vosi tu sukila oku tumãla polomangu vietu, oco tu fetike ciwa ohongele. Votãlo kuenda Casapalo, ohongele yi ka malusuiwa kelivala 15:55, Calumingu 14:40.
◼ Ovitumãlo Vioku Yeka Oviendelo: Kolohongele viofeka, ku sangiwa ocitumãlo cimue coku yeka oviendelo okuti, ka ci sukila oku feta. Pole, oviendelo vi ka kapiwa loku kuama otembo omunu a pitila. Oviendelo via vana va lemãla, ovio lika vi kuete ovitumãlo via selekiwa. Omo okuti ovitumãlo vioku yeka akãlu vitito, nda citava, vamanji vamue poku enda kohongele, va linge eliangiliyo lioku endela vekãlu limuamue.
◼ Oku Seleka Olomangu: Citava lika oku selekela olomangu vana wendeli vocendelo cimuamue, vana vu kasi vonjo yimuamue, ale vana o longisa Embimbiliya.—1 Va Kor. 13:5.
◼ Onanya: Nena okulia kuove oco ku ka tunde pocitumãlo cohongele oku landa okulia kelivala lionanya. Ku ka ambate ekualu lina okuti ka li iñila vemehi liomangu. Ka ca sungulukile oku nena ekualu linene, kuenda olokopo, ale ovikuata vikuavo vi tetuka.
◼ Olombanjaile: Tu lekisa olopandu keliangiyo lia lingiwa poku eca olombanjaile vietu kohongele yofeka, oco vi kuatise kupange woku kunda voluali luosi. Nda umue wa eca o cheque yoku tambula olombongo kombango, ku sonehiwe hati, ya loña ko “Associação das Testemunhas de Jeová.” Oku upisa unyamo ulo kolohongele viosi viofeka ci tava oku tambula olo cartões de credito oku kongelamo olombongo vio peka kuenda olo cheque.
◼ Oku li Lemeha Kuenda Oku Sakuiwa Kuonjanga: Nda kua moleha umue o sukila oku sakuiwa lonjanga, citava oku vangula la manji umue ukuakutumãlisa o kasi ocipepi laye. Noke, eye o ka tuala ocitangi caco Koseketa Yoku Sakula, kuenda vamanji vaco va ka eca ekuatiso li sukiliwa.
◼ Ovihemba: Nda kosipitali va ku kisika oku nyua ovihemba vimue, ciwa oku ambata evi vi tẽla, momo kocitumãlo cohongele ka ku ka kala ovihemba viosi.
◼ Olosapato: Unyamo lunyamo kua siata oku kala omanu valua va li lemẽha omo liolosapato. Omo liaco, wala olosapato via sunguluka, vina vi kusua ciwa okuti vi ku ecelela oku liatela ciwa posi, ndaño pana pa sielena.
◼ Ovisitatũi: Pokati kolohongele viofeka vi ka lingiwila Konjango yo ko Viana, ku ka kala eliangiliyo lioku pitiya ovipama Velimi Lioku Ilaika, kateke 6-8 Yevambi Linene.
◼ Otuakãlu Tuoku Ambata Oloñaña: Otuakãlu tuoku ambatela oloñaña, ka citava okuti, tu ambatiwa apa o ka tumãla kohongele yofeka. Pole, citava lika oku ambata uhamba woloñaña okuti wecelela oku u kapa ponele yomangu yolonjali.
◼ Ulela Welemba: Olohongele vialua viofeka via siata oku lingiwila vocitumãlo cimue okuti, ka mu piti ofela yalua. Omo liaco, ciwa okuti, poku liwaveka ulela u kuete elemba, tu likapa ño katito oco ka ci ka pange lãvi vamanji vana va kuete uvei wesuka ale uvei ukuavo.—1 Va Kor. 10:24.
◼ Oloformulariu (S-43) Queira Visitar: Vo formulariu losapi hati, Queira Visitar, mu sonehiwe olonumbi viatiamẽla komanu vana va lekisa onjongole eci va tambula uvangi kepuluvi liohongele yofeka. Akundi va sukila oku nena kohongele o formulariu yimosi ale vivali. Noke yoku soneha vo formulariu yaco olonumbi vi sukiliwa, citava oku yeca kukulu wekongelo usonehi.—Tala Upange Wetu Wusoma wa Kupemba wo 2011, kemẽla 3.
◼ Upange Woku Lieca Olumue: Nda umue o yongola oku lieca olumue, citava oku sapela la vamanji va talavaya Voseketa Yupange Woku Lieca Olumue kohongele yofeka. Omãla vana va kuete 16 kanyamo, va pondolavo oku ci linga, poku kuama olonjali viavo, ale omunu ukuavo ukulu okuti, wa taviwa lolonjali viavo.
[Okakasia kemẽla 6]
Tu Eca Ndati Okokanda Koku Laleka?
Oco tu tokeke ocikanjo cetu, tu sukila oku teta onimbu poku vangula. Tu pondola oku popia ndoco: “Kalunga. Tu kasi kupange woku eca okokanda koku laleka omanu u kasi oku lingiwa koluali luosi. Okokanda aka kove. Olonumbi vikuavo vi kasi vokokanda kaco.” Vangula lesanju. Poku eca otuikanda tuaco kesulilo liosemana citavavo oku eca olorevista nda cecelela.