Apongoloko a Lingiwa Kohongele Veteke Liosemana

Oku upisa kosemana 3 Yenyenye Linene, Elilongiso Liembimbiliya Vekongelo ka li lingiwa vali vakukutu 25, pole, li ka lingiwa vakukutu 30. Manji o songola elilongiso, volondaka viaye vioku fetika vekututu limosi, o sukila oku pitulula ovina tua lilongisa osemana ya pita. Ohongele yupange ka yi lingiwa vali vakukutu 35, pole, yi ka lingiwa vakukutu 30. Ka ku ka kala vali onepa yimue yasapulo. Pole, asapulo a eciwe ku manji o linga onepa yatete yohongele yupange. Ku ka lingiwa ño asapulo atito okuti a sukiliwa, kuenda ka ci ka sukila oku tukula ovina tu lilongisa vohongele yupange. Asapulo atiamẽla kupange woku kunda, oku yelisa onjango yusoma kuenda oku yolela vamanji ka ci sukila oku lingiwa. (km 10/08 kem. 1, ocin. 4) Nda kuli asapulo alua a lingiwa, vamanji va kuete onepa kohongele yupange va sukila oku ci kũlĩha selo oco va tepulule otembo kolonepa viavo.