Ku ka Tepulule Ombili Yoku Kunda Omo Lioku Tẽlisa Lika Olonjongole Viove
1. Momo lie vamanji vamue va kuetele ohele yoku longisa omanu Embimbiliya?
1 Vamanji valua va kuete ohele yoku longisa omunu Embimbiliya, omo liupange walua va kuete. Momo oku longisa omunu Embimbiliya ci sukila otembo. Ci sukila otembo yoku lipongiya, yoku longisa omunu, kuenda oku kuatisa ondonge oku yula ovitangi viaye. Upostolo Paulu, wa liecele olumue oco a kuatise va Tesalonike oku kũlĩha Yehova. (1 Va Tes. 2:7, 8) Tu pondola oku longisa ndati omanu Embimbiliya ndaño olonjanja vimue tu kuete upange walua?
2. Ocisola tu kuetele Yehova ci tu vetiya ndati oku sokiya ciwa otembo yetu?
2 Oku Linga Efendelo ci Sukila Otembo: Oco tu linge efendelo lietu, tu sukila oku kuata otembo. Tu sukila oku sandiliya otembo yoku kala kolohongele, otembo yoku enda kupange woku kunda, otembo yoku tanga Embimbiliya kuenda yoku likutilila. Omunu o kuele o sandiliya otembo yoku kala kumue lohueli yaye oco va kuate esanju. Ca piãla enene kokuetu okuti, tu sukila oku ‘landa’ otembo yoku fendela Yehova momo tu u sole. (Va Efe. 5:15-17; 1 Yoa. 5:3) Ndomo Yesu a ci popia, ocina cimue ci kuete esilivilo kefendelo lietu, oku longisa omanu oco va linge olondonge. (Mat. 28:19, 20) Oku sokolola upange waco, ci tu kuatisa oku yuvula oku likala ocikele coku longisa omanu Embimbiliya.
3. Tu sokiya ndati okuti omunu tu longisa Embimbiliya ka liwekapo nda ekalo lietu ka li ecelela oku linga upange woku kunda?
3 Oco hẽ, nye ci popiwa nda esokiyo lietu li tatekiwa lupange woku nganyala olombongo, ale oku vela kualua? Akundi vamue omo ka va kuete epondolo lioku enda konjo yomanu oku va longisa Embimbiliya, va ci linga lekuatiso liotelefone, ale vo Internet. Vamanji vana va vela, va sokiya okuti olondonge vi enda konjo yavo oku ka lilongisa. Vamanji vakuavo nda va linga ungende, va pinga ku manji umue wa koleliwa oco a longise ondonge yavo.
4. Asumũlũho api tu pondola oku kuata poku longisa omanu Embimbiliya?
4 Paulu wa kuata esanju lialua poku sokiya ciwa otembo, loku pesela ongusu yaye koku kuatisa omanu oku kũlĩha ocili Condaka ya Suku. (Ovil. 20:35) Eci a limbuka onima yupange waye ko Tesalonike, wa vetiyiwa oku eca olopandu ku Yehova. (1 Va Tes. 1:2) Esanju lietu kupange woku kunda, li pondola oku li vokiya nda ka tu ecelela okuti ovina vikuavo vi tepulula ombili yetu kupange woku longisa omanu Embimbiliya.