Ceci ci Pondola Oku ku Kuatisa Oku Lilongisa Olosemana Viosi
KA CI leluka hẽ kokuove oku lilongisa Embimbiliya olosemana viosi? Vosi yetu tua liyevele ale ndoco. Pole, sokolola kovina vikuavo tua siata oku linga oloneke viosi ndeci okuyua. Oco oyue, o sukila oku likolisilako pole, noke o yeva ekavuluko! Elilongiso Liembimbiliya li pondolavo oku ku kavuluisa nda wa “li sukula lovava pocakati condaka.” (Va Efe. 5:26) Konomuisa atosi amue a pondola oku ku kuatisa:
Linga esokiyo limue. Elilongiso liopokolika, li kasi pokati ‘kovina via velapo vali,’ tu sukila oku linga. (Va Fil. 1:10) Oco ci leluke oku kuama esokiyo liove, momo lie ku kapela esokiyo liaco pocitumãlo cimue ci leluka oku ci mola, ndeci vekuadru limue ale vepito lionjilela? Ale o pondola oku sokiya otembo yaco votelefone yove oco yi ku ivaluise epuluvi lioku lilongisa.
Nõla otembo kuenda onjila yoku lilongisa ya ku sungulukila. Kokuove ci leluka vali oku lilongisa vokuenda kuotembo yalua ale, votembo yitito? Ove wa kũlĩha ciwa ekalo liove. Omo liaco, poku sokiya otembo yove yoku lilongisa, kapako ekalo liove. Nda ku kuete otembo yoku lilongisa velivala wa sokiya, momo lie ku ci lingila vokuenda kuakukutu ekũi? Ndaño wa lilongisa lika akukutu ekũi, vokuenda kuakukutu aco, o ka lilongisa ovina vialua. Nda wa ci fetika, o pondola oku vetiyiwa oku amamako oku ci linga.—Va Fil. 2:13.
Nõla tete eci o ka lilongisa. Nda eci o wa o ka lilongisa wa sokolola lika vepuluvi liaco, citava okuti ku ka tẽla oku “talavaya ciwa lotembo” yove. (Va Efe. 5:16) Momo lie ku sokiyila ulala wovipama ale olosapi o yongola oku lilongisa? Olosemana viosi o kuata epulilo limue, soneha epulilo liaco. Kesulilo liocipama locipama celilongiso, ove o pondola oku vokiya olosapi vikuavo o yongola oku lilongisa.
Linga apongoloko nda ci sukiliwa. Seteka oku linga apongoloko vesokiyo liove catiamẽla kotembo o pesela kelilongiso ale kolosapi o nõla. Ci kuete esilivilo okuti o lilongisa olosemana viosi. Omo liaco nda ci sukiliwa, pongolola eteke, elivala, otembo o tumala poku lilongisa kuenda ovina o lilongisa.
Ocili okuti tu kuatisiwa poku lilongisa olosemana viosi. Ukamba wetu la Yehova u ka pama calua, tu ka lilongisa oku nõla olonjila viwa komuenyo kuenda tu ka liyeva okuti tua pama.—Yeh. 1:8.