Ndomo tu Lekisa Ocisola ku Suku Kuenda Komanu tu Lisungue Lavo

Ndaño okuti Akristão ka va kisikiwa oku kuama Ocihandeleko ca Mose, pole Ovihandeleko vivali via velapo viokuti oku sola Suku kuenda vana tu lisungue lavo, handi vi situlula ovina Yehova a tu yonguila. (Mat. 22:37-39) Ocisola ka ci piñaliwa. Pole tu sukila oku ci lilongisa. Ndamupi? Onjila yimue ya velapo, oku tanga Embimbiliya eteke leteke. Eci tu kũlĩhĩsa ovituwa via Suku ndomo ci situluiwa Vovisonehua, tu kũlĩha “unumbu wa Yehova.” (Osa. 27:4) Kuenje ocisola tu u kuetele ci livokiya kuenda tu kuata ovisimĩlo ndevi viaye. Eci ci tu vetiya oku pokola kolonumbi via Suku, oku kongelamo ocihandeleko coku sola vakuetu. (Yoa. 13:34, 35; 1 Yoa. 5:3) Olonumbi vitatu vi kuãimo vi tu kuatisa oku sola oku tanga Embimbiliya:

• Talavaya luloño wove woku sokolola kuenda tiamisila utima kovina o tanga. Likongela vulandu waco. Nye o pondola oku mola, oku yeva kuenda oku lehulũla? Vipi ovisimĩlo viomanu va tukuiwa vulandu waco?

  

• Linga apongoloko kesokiyo liove lioku tanga. Kũlĩhĩsa ovisimĩlo vi kuãimo: Tanga lolukandi, ale kuamelẽla poku yevelela ulandu wa ngalavãliwa. Tanga ulandu womunu umue wa tukuiwa Vembimbiliya ale ulandu umue okuti ku tangi ovipama ndomo vilikuãi. Ndeci, kuama ulandu u sangiwa vo Apendice A7 ale B12 vo Tradução do Novo Mundo das Escrituras Sagradas oco o tange eci catiamẽla ku Yesu. Tanga ocipama cosi kuopiwa ocisonehua ceteke. Tanga alivulu Embimbiliya poku kuama ulala ndomo a sonehiwa.

  

• Tanga oco o kuate elomboloko. Ca velapo oku tanga ocipama cimosi veteke loku kuata elomboloko kuenda oku sokolola okuti, ka tu tangi lika locimãho coku mala ovipama vialua. Kũlĩhĩsa ulandu o tanga. Kũlĩhĩsavo ovina via kongelamo. Talavaya lolomapa kuenda ovisonehua via vokiyiwako. Linga a konomuisa olondaka vina okuti ku kasi oku kuata elomboloko liaco. Nda citava, sokiya otembo yimuamue yoku sokolola ulandu wa tanga.