Ono Yovipama Viohongele Ekalo Lietu Tuakristão Kuenda Oku Kunda
OSEMANA 7-13 YA CEMBANIMA
OVOKUASI A SANGIWA VONDAKA YA SUKU | OVISILA 10-11
“Ocisola o Kuetele Yehova ci Velepo Ocisola o Kuetele Epata”
(Ovisila 10:1, 2) Oco Nadava la Avihu, omãla va Arone, va nyañula u ociyukilo caye, u ociyukilo caye. Va yukilamo ondalu, va kapamo insensu, va nena ondalu yiñi ku Yehova, yimue Yehova ka va tukuilile. 2 Kuenje ondalu ya tunda ku Yehova, yu ya va lia, kuenje va fila kovaso a Yehova.
Perspicaz-2 kem. 371
Oku linga cimue ka ca handelekiwile
Ondalu kuenda insensu ka via handelekiwile. Elivulu Liovisila 10:1 kelimi lio Heveru ondaka zar (okuti, za•ráh; ci lomboloka okuti ka ca kũlĩhĩwile) ya siata oku tukuiwa “ndondalu ka ya handelekiwile la [Suku]” pole, Nadava la Avihu, omãla va Arone va lisandela esunga ku Yehova kuenje Yehova wa va ponda pocakati condalu. (Ovis. 10:1, 2; Ate. 3:4; 26:61) Kuenje Yehova wa sapuila Arone hati: “Ka ci tava oku nyua ovinyu pamue vikuavo vi koluisa, ndaño ove ndaño omãla vove, eci wiñili vombalaka yoku ñualehela lame sanga vu fa. Ci kala ocisila ka ci pui kovitumbulukila viene viosi. Wu tepisa ciwa pokati keci ci kola leci ka ci koli, vu tepisavo pokati keci ca liña leci ca yela. Kuenda vali vu longaisa va Isareli ovisila viosi Yehova a popia lavo lomẽla wa Mose.” (Ovis. 10:8-11) Ulandu owu u lekisa okuti Nadava la Avihu citava okuti va koluele kuenje ca va vetiya oku eca ondalu ka ya handelekiwile. Citava okuti ondalu yaco ka ya tavele oku yi lumba ndomo ekalo liaco lia lekisile kocitumãlo, ale konjila ndomo ya eciwa, ale citava okuti insensu via litepa la vina via tukuiwa Ketundilo 30:34, 35. Omo liekalo liuholua va sangiwile, ka va eceliwile omo liekandu va linga.
(Ovisila 10:4, 5) Oco Mose wa pañinya Misiaele la Elicafane, omãla va Usiyele, isia ya Arone yumalẽhe, yu wa popia lavo hati, Ameli ocipepi. Upi vakuẽle kovaso ocitumalo ci kola, va tuali kofeka. 5 Kuenje va amako, va va tuala lovikutu viavo kofeka ndeci Mose a popia.
(Ovisila 10:6, 7) Oco Mose wa popia la Arone kuenda Eleasa la Itamare, omãla vaye, hati, Ko ka futululi kovitue viene ndaño oku kesula uwalo wene, sanga vu fa, kuenje onyeño yi wengukila omanu vosi. Puãi vakuẽle vakuepata liosi lia Isareli va lile epĩle Yehova a timiha. 7 Oco ko ka tundili kuvelo wombalaka yoku ñualeheha la Yehova, sanga vu fa, momo wa wavekiwi lulela wokuwaveka kua Yehova. Oco va linga ndondaka ya Mose.
Utala Wondavululi, 15/7/2011 kem. 31 ocin. 16
Ove Hẽ Wa Iñila Ale Vepuyuko Lia Suku?
16 Arone, manji a Mose, wa liyaka locitangi comãla vaye vavali valume. Sokolola ndomo a liyeva eci omãla vaye valume Nadava la Avihu va lumbila Yehova ondalu ka ya sungulukile kuenje Wa va ponda. Elinga liaco, lia imula ukamba wosi nda va kuata lolonjali viavo. Pole, kua kala vali ocina cikuavo. Yehova wa sapuila Arone lomãla vaye vakuavo valume hati: “Ko ka futululi kovitue viene ndaño oku kesula uwalo wene [omo liesumuo], sanga vu fa, kuenje onyeño [ya Yehova] yi wengukila omanu vosi.” (Ovis. 10:1-6) Onumbi eyi ya lomboloka ciwa. Ocisola tu kuetele Yehova ci sukila oku pamisiwa calua okuti cina tu kuetele vangandietu vakuesino ci sule.
Oku Konomuisa Lutate Ovina vi Sangiwa Vembimbiliya
(Ovisila 10:8-11) Oco Yehova wa popia la Arone hati, 9 Ka ci tava oku nyua ovinyu pamue vikuavo vi koluisa, ndaño ove ndaño omãla vove, eci wiñili vombalaka yoku ñualehela lame sanga vu fa. Ci kala ocisila ka ci pui kovitumbulukila viene viosi. 10 Wu tepisa ciwa pokati keci ci kola leci ka ci koli, vu tepisavo pokati keci ca liña leci ca yela. 11 Kuenda vali vu longaisa va Isareli ovisila viosi Yehova a popia lavo lomẽla wa Mose.
Utala Wondavululi, 15/11/2014 kem. 20 ocin. 18
Tu Sukila Oku Kala Omanu Va Kola Kovilinga Vietu Viosi
18 Oco tu kale omanu va kola, tu sukila oku konomuisa lutate Ovisonehua, kuenda oku linga ovina Suku a pinga kokuetu. Omãla va Arone ndeci Nadava la Avihu va pondiwa omo lioku eca “ondalu yiñi.” Citava okuti va lingavo ovina viaco noke yoku nyua ovinyu. (Ovis. 10:1, 2) Kũlĩhĩsa olondaka Suku a sapuila Arone. (Tanga Ovisila 10:8-11.) Anga hẽ olondaka evi vi lomboloka okuti, ka ci tava oku nyua ovina vi koluisa osimbu ka tua endele kohongele? Sokolola katosi a kuãimo ndeci: Ka tu kasi vemehi Liocihandeleko. (Va Rom. 10:4) Kolofeka vimue vamanjetu osimbu ka va endele kohongele, poku lia va siata oku nyua ovinyu, pole va ci linga lonjila yimue ya sunguluka. Kocipito Copaskoa, kua kala olokopo vikuãla viovinyu. Eci Yesu a linga esokiyo liocipito Conjivaluko, kumue lolondonge viaye va nyua ovinyu yi lomboloka osonde yaye. (Mat. 26:27) Embimbiliya li pisa oku nyua calua kuenda uholua. (1 Va Kor. 6:10; 1 Tim. 3:8) Vamanji valua utima wavo ka u va ecelela oku nyua ovina vi koluisa poku linga upange umue watiamẽla koku fendela Yehova. Ndaño okuti ovituwa viofeka lofeka via litepa, pole ocina ca velapo Akristão va sukila oku linga, oku “tepisa . . . pokati keci ci kola leci ka ci koli,” oco va amameko oku kala omanu va kola, kuenda oku sanjuisa Yehova.
(Ovisila 11:8) Ko ka li ositu yavio, ko ka lambi ovife viaco, viu vĩhĩsi.
Perspicaz-1 kem. 135 ocin. 5
Ovinyama
Onumbi yi sangiwa kelivulu Liovisila 11:8, viokuti: “Viu vĩhĩsi” via kapiwileko lika ku vana va kala vemehi Liocihandeleko ca eciwile ku Mose okuti ku va Isareli. Ocihandeleko caco ceya oku imuhako locisembi colofa via Kristu Yesu kuenje omanu vosi va ponduile oku kuatisiwa locisembi caco ndomo ca sapuiwile ku Noha noke Lietande.—Va Kol. 2:13-17; Efet. 9:3, 4.
Oku Tangiwa Kuembimbiliya
(Ovisila 10:1-15) Oco Nadava la Avihu, omãla va Arone, va nyañula u ociyukilo caye, u ociyukilo caye. Va yukilamo ondalu, va kapamo insensu, va nena ondalu yiñi ku Yehova, yimue Yehova ka va tukuilile. 2 Kuenje ondalu ya tunda ku Yehova, yu ya va lia, kuenje va fila kovaso a Yehova. 3 Oco Mose wa popia la Arone hati, Ca popia Yehova ceci, hati, Kuava va kasi ocipepi lame, ndi lilekisa okuti ñola. Muisua ulamba kovaso omanu vosi. Arone woha ño ne. 4 Oco Mose wa pañinya Misiaele la Elicafane, omãla va Usiyele, isia ya Arone yumalẽhe, yu wa popia lavo hati, Ameli ocipepi. Upi vakuẽle kovaso ocitumalo ci kola, va tuali kofeka. 5 Kuenje va amako, va va tuala lovikutu viavo kofeka ndeci Mose a popia. 6 Oco Mose wa popia la Arone kuenda Eleasa la Itamare, omãla vaye, hati, Ko ka futululi kovitue viene ndaño oku kesula uwalo wene, sanga vu fa, kuenje onyeño yi wengukila omanu vosi. Puãi vakuẽle vakuepata liosi lia Isareli va lile epĩle Yehova a timiha. 7 Oco ko ka tundili kuvelo wombalaka yoku ñualeheha la Yehova, sanga vu fa, momo wa wavekiwi lulela wokuwaveka kua Yehova. Oco va linga ndondaka ya Mose. 8 Oco Yehova wa popia la Arone hati, 9 Ka ci tava oku nyua ovinyu pamue vikuavo vi koluisa, ndaño ove ndaño omãla vove, eci wiñili vombalaka yoku ñualehela lame sanga vu fa. Ci kala ocisila ka ci pui kovitumbulukila viene viosi. 10 Wu tepisa ciwa pokati keci ci kola leci ka ci koli, vu tepisavo pokati keci ca liña leci ca yela. 11 Kuenda vali vu longaisa va Isareli ovisila viosi Yehova a popia lavo lomẽla wa Mose. 12 Mose wa popia la Arone, le Eleasa kuenda Itamare, ava omãla vaye valume vo supilapo, hati, Nyañuli ocilumba cosema ca supa pokati kovilumba via Yehova viovondalu, ci lili konele yutala, letumbisa hacoko omo ci kola cimue. 13 Ci lili oku ku kola, omo eci oco ocikepa cove leci comãla vove valume covilumba via Yehova viovondalu. Oco nda handelekiwa. 14 Puãi onete yoku yangela locikalo coku tulika ci tava oku vi lila kuosi ño ku yela, ove muẽle lomãla vove valume kuenda omãla vove vakãi kumuamue love. Momo via eciwa ndocikepa cove lomãla vove valume ca tunda kovitundasonde viombembua via va Isareli. 15 Ocikalo coku tulika kuenda onete yoku yangela va vi nena lovilumba viulela viovondalu, oku vi yangelisila kovaso a Yehova ndocilumba coku yangela. Vi linga viove levi viomãla vove valume kumue love ndocikepa cenda ño hũ ndeci Yehova a popia.
OSEMANA 14-20 YA CEMBANIMA
OVOKUASI A SANGIWA VONDAKA YA SUKU | OVISILA 12–13
“Lilongisila Kovihandeleko Via Eciwile ku va Kuavilundu”
(Ovisila 13:4, 5) Apa pa ñañala nda pa yela vekova liositu yaye kuenda okumõleha kuaco ka kua longelele kosi yekova kuenda oluveyi ka lu yeli, oco ocitunda ci yika u o kasi luvei waco oloneke epanduvali. 5 Oco ocitunda cu vanja keteke liepanduvali, kuenje tala, nda vovaso aye mu molehela hutu ño uvevi u tãi, ka wa sambukilile vekova, oco ocitunda cu yika vali oloneke epanduvali.
Utala Wondavululi, 18.1 kem. 7
Ka li Kuete Esilivilo ale Handi li Kuete Esilivilo?
• Oku tepa omanu va vela pokati ka vakuavo.
Ocihandeleko Suku a ecele ku Mose ca lekisile okuti omanu va kuete uvei wovilundu ka citava okuti va kala kumosi lomanu vakuavo. Noke yoku pita afengi amue vokuenda Kuocita Catãlo Toke Kocita Cekũi Latãlo, oco olondotolo via lilongisa oku kapako onumbi eyi okuti, toke cilo oku kuama onjila yaco ci kuete esilivilo.—Ovisila, ocipama 13 kuenda 14.
(Ovisila 13:45, 46) Ukuailundu o kasi luvei waco o wala olonanga via totoloka, ocifuko caye ci kala onuma, eye o sitika onjembu yokilu, kuenje o vilikiya hati, Nda vĩhĩsua, nda vĩhĩsua. 46 Oloneke viosi a kasi luvei wa vĩhĩsua. Wa vĩhĩsua, o kala kala ulika; osinge yaye ka yi kala vocilombo, yi kala vofeka.
Utala Wondavululi, 16.4 kem. 9 ocin. 1
Wa ci kũlĩha?
Kosimbu, va Yudea va kuatele usumba lovilundu via siatele calua kotembo yaco. Uvei waco wa ponduile oku sambukila etimba liomunu liosi. Olonjanja vimue etimba liomunu lia ponduile oku tunyuha. Owo ka wa kuatele esaku kuenda wa enda oku sambukiwa. Eli olio esunga lieci okuti omunu wa kuatele ovilundu wa sukilile oku yikiwa loku sapuilako omanu vakuavo catiamẽla kuvei waco.—Ovisila 13:45, 46.
(Ovisila 13:52) Oco o yoka uwalo waco, ndaño uvei u kasi kalinya usovi pamue kalinya upati, ndaño kovonya omeme ndaño kovalatanya, ndaño kocina cimue cocipa; momo uvei waco ilundu viukuakutoñola; ci yokiwa londalu.
(Ovisila 13:57) Oco nda a mõlehela ño vuwalo waco, ndaño kalinya usõvi, ndaño kalinya upati, pamue kumue kocipa, u kasi loku sambuka, ove o yoka londalu luvei waco.
Perspicaz-2 kem. 690 ocin. 3
Ovilundu
Kuwalo kuenda volonjo. Ovilundu via ponduile oku sambukila kuwalo wovonya omeme, ale kuwalo wovalatanya kuenda kueci ca tungiwa locipa. Citava okuti uvei waco wa ponduile oku pita poku lisukula kuenda kua kala esokiyo lioku kala ocipãla locikuata ca sambukiwa. Pole, nda uvei waco wamamako oku talala pamue oku kusuka ocikuata caco ca sukiliwile oku timĩhiwa. (Ovis. 13:47-59) Nda vocimano conjo yimue mumoleha atime amue oku talala pamue oku kusuka, ocitunda ca sukilile oku handeleka oku yika onjo yaco. Pamue ca sukilile oku tungulula olondopi vi kasi latime kuenda oku handeleka oku kunga vokati konjo kuenje ovawe aco lonata ya kungiwa ya sukiliwile oku cinasi kupãla lolupale. Nda okuti uvei waco wa tiuka vali vonjo yaco oyo ya sukilile oku yi teya kuenda ovikuata viaco via sukiliwilevo oku nyõliwa. Pole, onjo okuti ka ya kuatele uvei waco kua kala esokiyo lioku yi yelisa. (Ovis. 14:33-57) Kua siata oku popiwa okuti ovilundu via enda oku sambukiwa kuwalo, ale volonjo via kala ndohume; pole, ka kuli uvangi waco wasuapo.
Konomuisa Lutate Ovina vi Sangiwa Vembimbiliya
(Ovisila 12:2) Sapuila va Isareli, huti, Nda ukãi wa mina kuenje wa cita omõla ulume, oco nyoho yaco o vĩhĩsua oloneke epanduvali; ndeci oloneke vioku ipa okandimba haico o vĩhĩsua.
(Ovisila 12:5) Puãi nda wa cita omõla ukãi, oco o vĩhĩsua olosemana vivali, ndomo muoku ipa okandimba haimo; kuenje o kala ño losonde yaye yoku liyelisa akui epandu koloneke koloneke epandu.
Utala Wondavululi, 1/6/2004 kem. 21 ocin. 2
Atosi Avelapo Velivulu Liovisila
12:2, 5—Momo lie ukãi wa cita a tendiwilile okuti wa ‘vĩhĩsua’? Ovimatamata viuyali via pangiwilile oco mu pite omunu wa lipua. Pole omo liekandu lia piñaliwa, vovimatamata viuyali mua fetika oku pita omunu ka lipuile. Otembo yoku vihĩsua kukãi wa cita, kuenda oku vihĩsua kukãi o kasi kocituwa ale ulume o tunda ombuto kocimatamata caye cuyali, cosi eci kokuavo ca kala ndonjivaluko yokuti va piñala ekandu. (Ovisila 15:16-24; Osamo 51:5; Va Roma 5:12) Akisika atiamẽlele koku liyelisa a kuatisa va Isareli oku limbuka okuti va sukilile ocilumba cocisembi coku yovola omanu kekandu. Kuenje Ocihandeleko ca va kuatisa ‘oku va tuala ku Kristu.’—Va Galatia 3:24.
(Ovisila 12:3) Kuenje keteke lecelãla ositu yociyuvuluila comõlaco yi seviwa.
Utala Wondavululi, 18.1 kem. 7
Ka li Kuete Esilivilo ale Handi li Kuete Esilivilo?
• Otembo yoku sevisa evamba.
Ocihandeleko ca Suku ca lekisile okuti omõla ulume o sukila oku seviwa evamba noke lioloneke ecelãla. (Ovisila 12:3) Oloñaña via citiwa ndopo, citava okuti osonde yavo yecelela oku ci linga noke liosemana yatete. Pole, nda ca lingiwa selo ci koka oku pita osonde yalua. Kosimbu, uloño woku sakula ka wa kaile ndeci ci kasi koloneke vilo. Omo liaco, ca sungulukile oku kevelela osemana oco ku sevisiwe evamba.
Oku Tangiwa Kuembimbiliya
(Ovisila 13:9-28) Eci uvei wovilundu u li vomunu oco vo tuala kocitunda. 10 Ocitunda ci vanja kuenje, nda kekova ku kasi apa pa lenda haipo pa yela, yu ca pongoluisa oluveyi oku yela, ku kasivo epute poku lenda kuaco, 11 oco ilundu viosimbu vi kasi ale vekova liositu yaye. Ocitunda cu tukuila okuti wa vĩhĩsua. Ko yiki momo wa vĩhĩsua. 12 Kuenda nda ilundu viaco via lisanduila kekova, ilundu viaco yu vi kasi vekova liosi liukuovei tunde kutue toke kolomãi, ndeci ci molẽhela kocitunda, 13 oco ocitunda ci vanja kuenje nda ilundu via sĩkĩlila etimba liaye liosi, ci tukuila ukuovei waco hati, Wa yela, viosi via pongoloka vi yela; wa yela muẽle. 14 Puãi nda epute li mõleha ketimba liaye, wa vĩhĩsua. 15 Kuenje ocitunda ci vanja kepute kuenje cu tukuila okuti wa vĩhĩsua; epute liaco lia vĩha; uvei waco ilundu. 16 Pamue nda epute li pongoloka vali okuti ositu yaco yi yela, oco iya kocitunda, 17 kuenje ocitunda cu vanja. Nda uvei waco u yela oco ocitunda ci tukula ukuovei hati, Wa yela, wa yela muẽle. 18 Oco ositu eci yi kasi locipumbu kekova liaco yu ca kaya, 19 kuenje komangu yaco ku piñala oku lenda ku yela, pamue papa pa ñañala haipo pa kusuluka, oco ku lekisiwa kocitunda. 20 Ocitunda ci vanja nda okumõleha kua longela kosi yekova, kuenda oluveyi luaco lua pongoloka lu yela, oco ocitunda cu tukula okuti wa vĩhĩsua. Uvei waco ovilundu, via tuika vocipumbu. 21 Puãi nda ocitunda ci ci vanja kuenje ka kuli oluveyi lu yela, ka ca longelele kosi yekova puãi ci wumbula, ocitunda cu yika oloneke epanduvali. 22 Nda ci sambukila vekova, oco ocitunda cu tukula hati, Wa vĩhĩsua, oco uvei. 23 Puãi nda papa pa ñañala pa tãi vomangu yaco, ka pa sambuka, oco emome liocipumbu, kuenje ocitunda cu tukula hati, O yela. 24 Pamue ositu nda ya pia londalu kekova liaco, kuenje epute liaco li ñañala paco pa pia, lositu yi kusuluka pamue yi yela, 25 oco ocitunda ci ci vanja kuenje nda oluveyi lu kasi apa pa ñañala lua pongoloka lu yela, kuenda okumõleha kuaco kua longela kosi yekova, uvei waco ilundu, via tuikila apa pa pia. Kuenje ocitunda cu tukula okuti wa vĩhĩsua, uvei waco ilundu. 26 Puãi nda ocitunda ci ci vanja kuenje ka kuli oluveyi lu yela apa pa ñañala, ka pa longelele kosi yekova, puãi pa wumbula, nda oco ocitunda cu yika oloneke epanduvali. 27 Kuenje keteke liepanduvali ocitunda cu vanja, nda pa sambukila kekova ocitunda cu tukula okuti wa vĩhĩsua, uvei waco ovilundu. 28 Kuenje nda papa pa ñañala pa tãi vomangu yaco ka pa sambukilile vekova, puãi pa wumbula, oco okulenda kuoku pia. Ocitunda cu tukula hati, O yela, olio emome lioku pia.
OSEMANA 21-27 YA CEMBANIMA
OVOKUASI A SANGIWA VONDAKA YA SUKU | OVISILA 14-15
“Efendelo Liocili li Sukila Oku Yelisiwa”
(Ovisila 15:13-15) Oco eci u o kasi lokatutuila kaco a yelisua kokatutuila o litendela oloneke epanduvali vioku yelisua ha sukula uwalo waye; kuenda o yua vovava a enda oco kuenje o yela. 14 Keteke liecelãla o nyañula olopomba vivali pamue ivuvu vivali violonende, kuenje iya ku Yehova kuvelo wombalaka yoku ñualehela la Yehova ha vi eci kocitunda. 15 Kuenje ocitunda ci vi lumba, yikuavo ocilumba cekandu, yikuavo ocilumba coku pia elisi. Kuenje ocitunda cu likutilila kovaso a Yehova ha tuvika okatutuila kaye.
Perspicaz-1 kem. 305
Okuyua
Ca sukilile asunga alua konepa ya va Isareli oku liyelisa kumue ku likasi. Omunu una o kaya kovilundu, ale una o kuata ovikuata viomunu wa kala luvei waco, pamue olucito lulume lu tunda, ale ukãi o kasi lofuko, ale o kasi lokupita osonde kuenda wosi o lipekela laye o “vĩhĩsua” kuenje o sukila okuyua. (Ovis. 14:8, 9; 15:4-27) Omunu wosi o kala vombalaka yimue muli ocivimbi, ale o ci kuata o “vĩhĩsua” kuenje wa sukilile okuyua lovava oku liyelisa. Wosi ka pokuile kocisila caco wa sukilile oku ‘upiwa ku va Isareli, momo wa vĩhĩsa ocitumãlo ci kola ca Yehova.’ (Ate. 19:20) Ocili okuti ondaka okuyua ya kala ocindekaise cimue coku kuata ekalo lia yela kovaso a Yehova. (Osa. 26:6; 73:13; Isa. 1:16; Esek. 16:9) Okuyua londaka yocili ya Yehova yi lomboloka ovava, ci kuete unene woku yelisa.—Va Efe. 5:26.
(Ovisila 15:28-30) Puãi nda ukãi o yelisua kokupita kuaco, oco o litendela oloneke epanduvali noke o yela. 29 Oco keteke liecelãla o linyañuila olopomba vivali pamue ivuvu vivali violonende, kuenje o vi nena kocitunda kuvelo wombalaka yoku ñualehela la Yehova. 30 Kuenje ocitunda ci lumba, yikuavo ndocilumba cekandu, yikuavo ndocilumba coku pia elisi; kuenje ocitunda cu likutilila kovaso a Yehova ha tuvika okupita kuavo kuo vĩhĩsa.
Perspicaz-2 kem. 805 ocin. 2
Ofuko
Ukãi wa tendiwilevo okuti wa vĩhĩsa vokuenda kuokupita osonde otembo yalua, ale o kasi “lokupita kumue kua piãla osimbu yofuko yaye,” lonjila eyi wa enda oku vĩhĩsa ovikuata viosi ndeci apa a pekaila, a enda oku tumala kuenda omanu va enda oku kuata ovikuata viaco. Noke liocituwa caco oku pua, wa sukilile oku pita oloneke epanduvali kuenje oco lika ukãi waco a tendiwile okuti wa yela. Keteke liecelãla o linyañuila olopomba vivali pamue ivuvu vivali violonende, kuenje o vi nena kocitunda wa enda oku tuvikilako akandu poku lumba yimue pokati kovinyama kovaso a Yehova ndocilumba cekandu kuenda cikuavo ndocilumba coku pia elisi.—Ovis. 15:19-30; tala LIMPO, LIMPEZA.
(Ovisila 15:31) Oco wu tepaisaila va Isareli koku vĩhĩsua kuavo okuti ka va fi lokuvĩhĩsua kuavo eci va vĩhĩsa otavernakulu yange yi kasi pokati kavo.
Perspicaz-2 kem. 724
Ocitumãlo ci Kola
2. Ombalaka yoku ñualehẽla la Yehova kuenda noke onembele. Viosi yavio oku kongelamo ocitali cotavernakulu kuenda ovitali vionembele via kala ovitumãlo vi kola. (Etu. 38:24; 2 Asa. 29:5; Ovil. 21:28) Ovikuata via velapo via kala kocitali utala woku eca ovilumba kueda etasu liosipi. Ovio via kala ovikuata vi kola. Omunu una wa yela eye lika wa ponduile oku iñila kocitali cotavernakulu kapuluvi osi; pole, omunu una wa vĩhĩsua ka ponduile oku iñila kocitali conembele. Ndeci, ukãi una wa vĩhĩsua ka ca tavele okuti o lamba kocikuata cimue ci kola, ndaño oku iñila vocitumãlo ci kola. (Ovis. 12:2-4) Omo liaco, nda va Isareli handi va kuatele etime lievĩho va tendiwile ndoku vĩhĩsa otavernakulu. (Ovis. 15:31) Vana va enda oku nena ovilumba vioku yelisiwa kovilundu va enda oku nena ovilumba viavo toke pombundi yocitali. (Ovis. 14:11) Lomue wa vĩhĩsua wa ponduile oku panga onepa kocilumba cocitundasonde combembua votarvernakulu, ale vonembele omunu waco ponduile oku pondiwa.—Ovis. 7:20, 21.
Konomuisa Lutate Ovina vi Sangiwa Vembimbiliya
(Ovisila 14:14) Ocitunda ci nyañula kosonde yocilumba ceko, kuenje ocitunda ci yi kapa kosungu yetui liondio liu o yelisua, lokomumba yeka liaye liondio lokomumba yomãi yaye yondio.
(Ovisila 14:17) Oco ulela waco wa siala peka liaye ocitunda ci waveka kosungu yetui liondio liu o yelisua, lokomumba yeka liaye liondio, lokomumba yomãi yaye yondio, kilu liosonde yocilumba ceko.
(Ovisila 14:25) Oco eye ipa okameme kocilumba ceko kuenje ocitunda ci nyañula kosonde yocilumba ceko, ci yi kapa kosungu yetui liondio liu o yelisua, kuenda komumba yeka liaye liondio, lokomumba yomãi yaye yondio.
(Ovisila 14:28) Ocitunda ci waveka ulela u kasi peka liaye kosungu yetui liondio liu o yelisua, kuenda komumba yeka liaye liondio, lokomumba yomãi yaye yondio, oko kua kapiwa osonde yocilumba ceko.
Perspicaz-3 kem. 150 ocin. 5
Etũi
Oku nõliwa kuocitunda cimue ko Isareli, Mose wa handelekiwile oco a tikule osonde yokameme loku yi nyila kolosungu viovatũi a Arone kuenda viomãla vaye loku yi nyilavo kokuokuo kuondio lokokulu kuondio, ci lekisa okuti ovina viosi va yeva, upange va laikele oku linga kuenda ongendo yavo, ca laikele oku situlula ovina via ponduile oku pita. (Ovis. 8:22-24) Cimuamue haico okuti, omunu wa yesiliwa kovilundu, Ocihandeleko ca popele okuti ocitunda ca sukilile oku kapa onepa yosonde yokameme ya eciwa ndocilumba ceko kuenda onepa yulela kosungu yetũi yukuavilundu. (Ovis. 14:14, 17, 25, 28) Haicovo ca lingiwile kulume umue wa yonguile oku amamako ndupika ku cime caye otembo yosi. Kuenje upika wa laikele oku tualiwa kocikuli cepito, noke cime caye u tombola ketũi lociketelo. Ondimbukiso yaco yoku tombola ketũi, ya lekisile onjongole yupika oku amamako oku pokola cime caye kovina viosi.—Etu. 21:5, 6.
(Ovisila 14:43-45) Nda uvei wiya vali, okuti u tiuka vali vonjo kovaso yoku tundisa ovawe aco, kuenda oku kuangula onjo loku yi kolonga, 44 noke ocitunda ciya ci kulihisa kuenje nda uvei wa tiuka ocili vonjo, uvei waco ilundu viukuakutoñola, onjo, yaco ya vĩhĩsua. 45 Kuenje o teyisapo onjo yaco, ovawe aco lolohangalo lovimu viosi vionjo o vi tualisa kofeka kumue kua vĩha.
Despertai! 1/2006 kem. 14, vokakasia
Ohume Ekamba Ale Unyali!
EMBIMBILIYA LI TUKULA HẼ ECI CATIAMẼLA KOHUME?
Embimbiliya li tukula “uvei wilundu vonjo yimue,” ci lomboloka onjo yaco ya tungiwa. (Ovis. 14:34-48) Ca siata oku popiwa okuti uvei waco ‘wovilundu’ wa kala ndohume, pole, ka kuli elomboluilo lia suapo. Ocihandeleko ca Suku ca kisikile okuti mueleanjo wa sukilile oku tungulula olondopi via kuatele atime loku kunga vokati konjo kuenda oku inasi ovikuata viosi via kuatiwa luvei waco ocipãla lolupale. Nda okuti uvei waco wa tiuka vali vonjo yaco oyo ya ponduile oku tendiwa okuti ya vĩha, ya ponduile oku teyiwa kuenda eve liaco oku linasi. Olonumbi evi via lekisile ocisola cocili Yehova a kuatelele afendeli vaye kuenda esakalalo liuhayele wavo ketimba.
Oku Tangiwa Kuembimbiliya
(Ovisila 14:1-18) Yehova wa popia la Mose hati, 2 Ocihandeleko cukuavilundu veteke liokuyelisua kuaye ceci: Vo nena kocitunda. 3 Kuenje ocitunda ci tunda kocilombo, oco ocitunda ci vanja kuenje nda uvei wovilundu wa kaya kukuavilundu, 4 oco ocitunda ci handeleka okuti va nyañuile u o yelisua olonjila vivali vi li lomuenyo viombuto yi yela, luti wo- cedro, kuenda eci cohula lisapa viahisope. 5 Kuenda ocitunda ci tuma oku ipa onjila yimuamue vocikuata cotuma kilu liovava a enda. 6 Onjila ya sialapo lomuenyo ci yi nyañula luti wo-cedro kuenda eci cohula lovisapa viahisope, kuenje ci vi yava kumuamue lonjila yaco yomuenyo vosonde yonjila ya ipaiwaila kilu liovava a enda. 7 Kuenje ci nyĩla olonjanja epanduvali kuaco ku o yelisua kovilundu, cu tukula hati, Wa yela, kuenje cecela kusenge waco onjila yomuenyo. 8 Oco u o yelisua o sukula uwalo waye, kuenda o lipemũla ocifuko cosi, o yua kuenje o yela. Oco iñila vocilombo, puãi o kala oloneke epanduvali kosamua ombalaka yaye. 9 Keteke lepanduvali o lipemũla ocifuko cosi kuenda olonjele viaye lisokopia, ocifuko caye cosi o ci lipemũla. O sukula uwalo waye, o sukulavo etimba liaye oco wa yela. 10 Keteke liecelãla o nyañula otumeme tuvali tualume ka tu kuete etondelo, lomeme yomange yulima umosi ka yi kuete etondelo, kuenda olonepa vitatu viekui viefa liosema ya fina ndocilumba cosema ya tengiwa lulela, kuenda omeyu yo-litro yulela. 11 Kuenje ocitunda caco cu yelisa ci tumbika omunu waco o yelisua kuenda ovina evi kovaso a Yehova, kuvelo wombalaka yoku ñualehela la Yehova. 12 Kuenje ocitunda ci nyañula kamue kotumeme tualume, ci ka lumbila ndocilumba ceko, kuenda omeyu yo-litro yulela, ci vi yangelisa ndocilumba coku yangelisila kovaso a Yehova. 13 Kuenda cipaila okameme kaco oku ku kola kuna va ipailela ocilumba cekanda locilumba coku pia elisi, momo ndeci ocilumba cekandu ci tiamẽla kocitunda haimo muocilumba ceko, ci kola cimue. 14 Ocitunda ci nyañula kosonde yocilumba ceko, kuenje ocitunda ci yi kapa kosungu yetui liondio liu o yelisua, lokomumba yeka liaye liondio lokomumba yomãi yaye yondio. 15 Ocitunda ci nyañula kamue komeyu yo-litro yulela, citila peka liaye liokepĩli; 16 Noke ci yava omuine waye wondio vulela u kasi peka liaye liokepĩli kuenje ulela waco cu nyila lomuine waye kovaso a Yehova olonjanja epanduvali. 17 Oco ulela waco wa siala peka liaye ocitunda ci waveka kosungu yetui liondio liu o yelisua, lokomumba yeka liaye liondio, lokomumba yomãi yaye yondio, kilu liosonde yocilumba ceko. 18 Oco ulela wa siala peka liocitunda ocitunda ci u waveka kutue wu o yelisua, kuenje ocitunda cu likutilila kovaso a Yehova oku tuvika.
OSEMANA 28 YA CEMBANIMA- 3 YA SUSU
OVOKUASI A SANGIWA VONDAKA YA SUKU | OVISILA 16-17
“Eteke Lioku Tuvika Akandu Kuenda Ove”
(Ovisila 16:12) Oco noke o nyañula ociyukilo ceyuka akãla ondalu a tunda kutala u kasi kovaso a Yehova. O nyañulavo apupu avali insensu vi kuete elemba liwa haivio via suliwa, ha vi tuala vokati kongumbo.
Utala Wondavululi, 19.11 kem. 21 ocin. 4
Ceci tu Lilongisila Kelivulu Liovisila
4 Tanga Ovisila 16:12, 13. Sokolola kulandu Weteke Lioku Tuvika Akandu. Ocitunda Cinene ci iñila votavernakulu. Peka limue, o kuata ocikuata cimue ci kuete insensu vielemba liwa. Peka likuavo, o kuata ociyukilo condalu. Eye o talama kovaso yongumbo ya sitika uvelo wohondo yi Kola Koku Kola. Eyi oyo onjanja yatete pokati kolonjanja vitatu, eye a iñila vohondo yi Kola Koku Kola vokuenda Keteke Lioku Tuvika Akandu. Lesumbilo lialua, eye iñila vohondo yi Kola Koku Kola kuenda o talama kovaso Yocikasia Covisila. Ci kasi ndu okuti eye o tãi kovaso a Yehova Suku! Kuenje ocitunda lutate, o pesila insensu kondalu kuenje ku tunda elemba limue liwa. Noke, eye iñila vohondo yi Kola Koku Kola losonde yoku tuvika akandu. Ove wa ci limbuka? Ocitunda ca enda oku timiha insensu osimbu handi ka ecele osonde yoku tuvika akandu.
(Ovisila 16:13) O kapa insensu vondalu kovaso a Yehova, okuti evonge linsensu li sitika omangu yohenda yi kasi kilu liocikasia covisila, sanga o fa.
Utala Wondavululi, 19.11 kem. 21 ocin. 5
Ceci tu Lilongisila Kelivulu Liovisila
5 Nye tu pondola oku lilongisila koku timiha insensu Keteke Lioku Tuvika Akandu? Embimbiliya li lekisa okuti, ku Yehova olohutililo viafendeli vaye vi sokisiwa linsensu. (Osa. 141:2; Esit. 5:8) Ivaluka okuti ocitunda cinene ca enda oku lekisa esumbilo lialua, poku iñila linsensu kovaso a Yehova. Cimuamue haico okuti, eci tu likutilila ku Yehova tu sukila oku ci linga lesumbilo liocili. Tu eca olopandu kululiki wovina viosi poku ecelela okuti, tu amẽla kokuaye ndeci omõla a pondola oku amẽla ku isiaye. (Tia. 4:8) Eye o tu tava ndakamba vaye! (Osa. 25:14) Eli esumũlũho limue linene okuti ka tu yongola oku linga cimue ci sumuisa Yehova.
(Ovisila 16:14, 15) O nyañula kamue kosonde yonale ha yi nyĩla lomuine waye komangu yohenda konele yokutundilo, kuenda kovaso yomangu yohenda o nyĩla osonde olonjanja epanduvali lomuine waye. 15 Oco ipa ohombo yocilumba cekandu, oco comanu, ha nena osonde yaco ndeci a lingile losonde yonale, hã ha yi nyĩla komangu yohenda kuenda kovaso yomangu yohenda.
Utala Wondavululi, 19.11 kem. 21 ocin. 6
Ceci tu Lilongisila Kelivulu Liovisila
6 Ivalukavo okuti, ocitunda cinene ca ponduile lika oku timiha insensu osimbu handi ka ecele ovilumba. Lonjila eyi, eye wa ponduile oku kolela okuti wa taviwa la Suku poku eca ovilumba viaco. Ulandu owu u tu longisa nye? Sokolola ku Yesu. Tua kũlĩha okuti, eye weyile palo posi oku eca omuenyo waye ndocilumba. Osimbu handi ka ci lingile, wa sukilile oku linga cimue ci kuete esilivilo, okuti oku yovola omanu ci sule. Nye a sukilile oku linga? Yesu wa sukilile oku ci linga poku pandikisa loku kala ukuacili ku Yehova kuenda oku pongiya onjila oco Yehova a tave ocilumba caye. Lonjila eyi, Yesu wa laikele oku lekisa okuti oku linga ovina ndomo Yehova a yongola, oyo onjila yiwa yoku kala komuenyo. Handi vali, Yesu wa ponduile oku lekisa komanu vosi okuti onjila ya Yehova yoku viala, ya velapo hayo ya sunguluka.
Konomuisa Lutate Ovina vi Sangiwa Vembimbiliya
(Ovisila 16:10) Puãi ohombo eyi ocela coku inasi ca kuatela, yi tumbikiwa lomuenyo kovaso a Yehova ha va likutililako, loku yi tuma kekalasoko oku yinasi.
Perspicaz-1 kem. 283 ocin. 3
Ocela
Ndomo upostolo Paulu a ci lombolola Yesu poku eca omuenyo waye wa li pua omo liakandu omanu, eye wa linga vali ca velapo okuti “osonde yolongombe kuenda yolohombo” ci sule. (Va Hev. 10:4, 11, 12) Eye wa kala ‘ndohombo yambata akandu’ oku ‘ambata ovovei etu’ loku “totiwila olombole okulueya kuetu.” (Isa. 53:4, 5; Mat. 8:17; 1 Pet. 2:24) Eye ‘wambata’ akandu omanu vosi vana va kolela kocilumba caye. Wa lekisa eliangiliyo lia Suku lioku malako ekandu. Lonjila eyi ohombo ‘Yocela’ yi lomboloka ocisembi ca Yesu Kristu.
(Ovisila 17:10, 11) Omunu wosi ukuepata lia Isareli pamue kovingendeleyi via tunga pokati kavo, o lia osonde, nda ye nda ye, nyumalĩsila ocipala cange komunu waco o lia osonde kuenje ndu tepisa ku vakuavo. 11 Momo omuenyo wetimba u kasi vosonde kuenje nda yecela kokuene kutala oku likutilila layo ovimuenyo viene, omo osonde oyo yi tuvaika momo oyo yi kuete omuenyo.
Utala Wondavululi, 15/11/2014 kem. 12 ocin. 10
Esunga Lieci tu Sukilila Oku Kala Omanu va Kola
10 Tanga Ovisila 17:10. Yehova wa sapuila va Isareli oco ka va ka lie ‘osonde layimue.’ Koloneke vilo Akristão vocili va vetiyiwavo oku yuvula osonde yomanu kuenda yovinyama. (Ovilinga 15:28, 29) Tu sumua calua nda tua linga ovina vi tepa ukamba wetu la Suku okuti tu tundisiwa vekongelo liaye. Omo okuti tu sole Yehova tu yongola oku pokola kokuaye. Ndaño omuenyo wetu u kasi kohele ka tu ka eceleli oku yapuisiwa lomanu vana ka va kũlĩhĩle Yehova okuti va tu vetiya oku tomba olonumbi viaye. Tua kũlĩha okuti omanu vamue va pondola oku tu popia lãvi omo lioku yuvula oku sakuiwa losonde, pole tua nõlapo oku pokola ku Suku. (Yuda 17, 18) Nye ci pondola oku tu kuatisa oku amamako oku yuvula oku lia osonde kuenda oku sakuiwa layo?—Esin. 12:23.
Oku Tangiwa Kuembimbiliya
(Ovisila 16:1-17) Oco Yehova wa popia la Mose kovaso yokufa kuomãla vavali va Arone, eci vamela ku Yehova kuenje va fa. 2 Yehova yu wa popia la Mose hati, Popia la huvove Arone huti, Oloneke viosi ka vi tava oku iñila vohondo yi kola vokati kongumbo, kovaso, yomangu yohenda yi kasi kilu liocikasia, sanga o fa. Momo ame mõlehela velende kilu liomangu yohenda. 3 Puãi Arone iyaiya mulo mu kola lovina evi: onale ndocilumba cekandu, lomanga ndocilumba coku pia elisi. 4 O wala ocikutu ci kola covalatanya, lovikasãu viovalatanya vi waliwa ketimba, o litika luvia wovalatanya, o kapa ekofue liovalatanya; ovio vi linga uwalo waco u kola. O yua hã ha vi wala. 5 Kuenje o tambula ku va Isareli ovitupi vivali violohombo vocilumba cekandu, kuenda omange yimue yi linga ocilumba coku pia elisi. 6 Kuenje Arone o nena onale yaco yocilumba cekandu, oco caye, hã ha likutilila eye muele kuenda onjo yaye oku tuvika akandu avo. 7 Oco o nyañula itupi vivali ha vi tumbika kovaso a Yehova kuvelo wombalaka yoku ñualehela la Yehova. 8 Kuenda Arone imbilila olohombo viaco vivali ocela, ocela eci ca Yehova, ocela eci coku inasi. 9 Oco Arone o nena ohombo eyi ocela ca wilila Yehova, o yi lumbila ndocilumba cekandu. 10 Puãi ohombo eyi ocela coku inasi ca kuatela, yi tumbikiwa lomuenyo kovaso a Yehova ha va likutililako, loku yi tuma kekalasoko oku yinasi. 11 Kuenje Arone o nena o nale yocilumba cekandu, oco caye muele, ha likutilila eye muẽle lonjo yaye oku tuvika akandu, kuenje ipaya onale yocilumba cekandu ca linga caye. 12 Oco noke o nyañula ociyukilo ceyuka akãla ondalu a tunda kutala u kasi kovaso a Yehova. O nyañulavo apupu avali insensu vi kuete elemba liwa haivio via suliwa, ha vi tuala vokati kongumbo. 13 O kapa insensu vondalu kovaso a Yehova, okuti evonge linsensu li sitika omangu yohenda yi kasi kilu liocikasia covisila, sanga o fa. 14 O nyañula kamue kosonde yonale ha yi nyĩla lomuine waye komangu yohenda konele yokutundilo, kuenda kovaso yomangu yohenda o nyĩla osonde olonjanja epanduvali lomuine waye. 15 Oco ipa ohombo yocilumba cekandu, oco comanu, ha nena osonde yaco ndeci a lingile losonde yonale, hã ha yi nyĩla komangu yohenda kuenda kovaso yomangu yohenda. 16 O likutilila ohombo yi kola oku tuvika evi vi vĩhĩsa va Isareli kuenda okulueya kuavo, okuti akandu avo osi. Haicovo a lingila ombalaka yoku ñualehela la Yehova yina yi kasi pokati kavo, ndaño avĩho avo alua. 17 Ka mu kala omunu vombalaka yoku ñualehela la Yehova eci Arone a iñilamo oku likutilila vohondo yi kola toke eci a tundamo, okuti wa likutilila eye muẽle lonjo yaye kuenda va Isareli vosi ha tuvika akandu avo.