Ono Yovipama Viohongele Ekalo Lietu Tuakristão Kuenda Oku Kunda

OSEMANA 2-8 YA KUVALA

OVOKUASI A SANGIWA VONDAKA YA SUKU | ETUNDILO 39-40

“Mose wa Kuama Lutate Olonumbi”

(Etundilo 39:32) Oco upange wosi wotavernakulu yombalaka yoku ñualẽhẽla la Yehova wa pua. Va Isareli va linga viosi Yehova a sapuila Mose; ovio muẽle va linga.

Utala Wandavululi, 15/9/2011 kem. 27 ocin. 13

Ove hẽ wa Kũlĩhĩwa la Yehova?

¹³ Mose wa kala ‘ulume umue womboka calua okuti, omanu vosi vo kilu lieve va sule.’ Omo liaco, wa ekisa ocituwa ca litepa. (Ate. 12:3) Eye wa lekisa epokolo lumbombe poku kuama lutate olonumbi via Yehova. (Etu. 7:6; 40:16) Ka kuli uvangi u lekisa okuti, onjanja yimue Mose wa tombele olonumbi via Yehova, ale wa sumuile omo ka yonguile oku kuama ovihandeleko viaye. Yehova wa ecele olonumbi viatiamẽla koku tunga o tavernakulu ndeci: Evala lionanga ya kapiwile vokati kaco, kuenda etendelo liolongovela via sukilile oku kapiwa konanga yaco. (Etu. 26:1-6) Nda omunu umue o kuete ovikele vocisoko ca Yehova eci a ku ĩha olonumbi vimue okuti ka ca lelukile oku vi pokola, pamue ove o sumua. Pole, Yehova eye mitavaso wa velapo, kuenda wa siata oku eca olonumbi viwa kafendeli vaye. Nda Yehova eca olonumbi vialua, o kuete esunga lieci a ci lingila. Ivaluka okuti, Mose ka temẽle omo lioku tambula olonumbi vimue ku Yehova kuenda ka simĩle okuti, Yehova ka kapeleko elianjo liaye. Pole, ‘wa kuama lutate’ olonumbi a tambuile ku Suku. (Etu. 39:32) Mose wa lekisa umbombe walua! Momo wa kũlĩhĩle okuti, Yehova eye wa tumĩle upange a kala oku linga.

(Etundilo 39:43) Mose yu wa mola upange wosi kuenje tala, va ci linga; ndeci Yehova a lombolola haico va ci linga kuenje Mose yu wa va sivaya.

(Etundilo 40:1, 2) Yehova yu wa popia la Mose hati, ² Eteke liatete liosãi yatete o tunga otavernakulu yombalaka yoku ñualehela la Yehova.

(Etundilo 40:16) Oco Mose a linga. Viosi Yehova o sapuila ovio a linga.

Utala Wondavululi, 1/8/2005 kem. 27 ocin. 3

Ove Hẽ Wa Siata Oku Lekisa Esunga Kovina Viosi?

³ Elivulu lia va Heveru 3:5, li popia hati: “Mose wa vumba [Yehova] lesunguluko.” Nye ca kuatisa Mose oku kala ukuesunga? Eci otavarnakulu ya tungiwa leci ya tumbikiwa, Mose ‘wa pokola kovina viosi Yehova o sapuila.’ (Etundilo 40:16) Etu tumanu va Yehova tu sukilavo oku lekisa esunguluko poku pokola kokuaye. Voku lekisa esunguluko mua kongela oku kolela ku Yehova eci tu liyaka lovitangi. Pole, oku pandikisa kovitangi vinene, hawoko uvangi woku sunguluka ku Yehova. Yesu wa popia hati: “U o linga esunga leci citito, eye o linga esunga leci ca lua. U ka lingi esunga leci citito, eye ka lingi esunga leci ca lua.” (Luka 16:10) Tu sukilavo oku lekisa esunguluko kovina vitito.

Oku Konomuisa Lutate Ovina vi Sangiwa Vembimbiliya

(Etundilo 39:34) locisikililo covipa violonupi va vi teka leci ci kusuka, locisikĩlĩlo covipa violonjundu, longumbo yoku vindikiya;

Perspicaz-3 kem. 219 ocin. 3

Ocipa Colonjundu

Ndomo va Isareli va Ponduile Oku yi Sanga. Ondaka tá·hhash, Vembimbiliya yi tiamisiwila konjundu, omo liaco pamue ku votuiwa epulilo liokuti va Isareli va ponduile oku sanga ndati ocipa colonjundu. Ndaño okuti olonjundu via kũlĩhĩwa okuti vi sangiwa vali kolofeka viokonano kuenda viokombuelo, kuna ku linga ombambi yalua, vimue vi sole kovitumãlo kuli owuya walua. Koloneke vilo, olonjundu vimue vi sangiwa kolonepa viokokalunga vio Kutundilo kuenda kovitumãlo vikuavo kuli ovava a tokota. Vokuenda kuotembo, omanu va kasi oku tepulula etendelo liolonjundu kuenje kosimbu ovinyama viaco vialuile Kutundilo kuenda vokalunga Kakusuka. Kunyamo wo 1832, o Dicionaliu yimue Yembimbilya li Kola kongelesi lia Calmet (kem. 139) ya popia okuti: “Ku sangiwa olonjundu vialua kovifuka vio kalunga Kakusuka kovitumãlo viocifuka co Sinai.” Talavo o The Tabernacle’s Typical Teaching (O Ensino Típico do Tabernáculo), de A. J. Pollock, Londres, kem. 47.

(Etundilo 40:34) Oco elende lia sikĩlila ombalaka yoku ñualẽhẽla la Yehova, ulamba wa Yehova wa yukisa otavernakulu.

Utala Wondavululi, 15/7/2015 kem. 21 ocin. 1 kelimi Lioputu

Anga hẽ ci kuete esilivilo umue oku limbuka upange wove?

Eci o tavernakulu ya malusuiwa, elende limue “lia sikĩlila ombalaka yoku ñualẽhẽla la Yehova, ulamba wa Yehova wa yukisa otavernakulu.” (Etu. 40:34) Owu uvangi wokuti upange waco wa taviwa la Yehova! Ndamupi Becalele la Aholiava va liyeva vepuluvi liaco? Ndaño okuti olonduko viavo ka via molehele kovina va panga, pole, va kuata esanju poku kũlĩha okuti Suku wa sumũlũisa elikolisilo liavo. (Olosap. 10:22) Vanyamo akuamamo, ovo va kuata esanju poku mola okuti ovina va panga vamamako oku talavaya lavio kupange wa Yehova. Eci va ka pinduiwa voluali luokaliye, Becalele la Aholiava va ka komõha poku kũlĩha okuti votavernakulu va enda oku fendelelamo Yehova ci soka 500 kanyamo!

Oku Tangiwa Kuembimbiliya

(Etundilo 39:1-21) Lalinya onoloti la a vumbula la a kusuka va tunga lao uwalo wa fina woku vumbila omu mu kola kuenda uwalo u kola wa Arone va tunga; ndeci Yehova a handeleka Mose. ² Yu wa panga efonde lulu lalinya onoloti la a vumbula la a kusuka lovalatanya. ³ Va vandisa ulu ho pelevela, vo wonjolola alimi olosambo oku posuisa lao pokati kalinya onoloti la a vumbula la a kusuka kuenda ovalatanya, upange wuloño. ⁴ Efonde va li tungila apatahãlo kapepe, a litokeka; lia litokeka kolosungu viaco vivali. ⁵ Uvia wa vindiwa luloño, wa kala lalio woku itika, wa linga lalio cimosi, wa pangiwa ndeci va panga efonde, wulu lalinya onoloti la a vumbula la a kusuka lovalatanya; ndeci Yehova a handeleka Mose. ⁶ Va linga upange wotuvawe tuasardonika tua ñualiwa lovivela viulu, loku sokotola ndeci va sokotola osinete lolonduko viomãla va Isareli. ⁷ Wa tu kapa kapatahãlo efonde, ha tu lingi ovawe oku ivaluka omãla va Isareli; ndeci Yehova a handeleka Mose. ⁸ Wa tunga onjeke yoponete, upange wuloño, ndupange wefonde, lulu lalinya onoloti la a vumbula la a kusuka lovalatanya. ⁹ Ya kala lavindi akuãla a lisoka; va tunga onjeke yaco lombandihinyo; usõvi epaluma, upati epaluma, lombandihinyo. ¹⁰ Va kapako ovilala vikuãla viotuvawe. Ulala wa sardiu, topasiu, karbunkulu, owo ulala watete; ¹¹ ulala wavali emeralda, safira, diamante; ¹² ulala watatu jasintu, agata, la ametisitia; ¹³ ulala wakuãla turkesa, sardonika la jaspe. Tua ñualĩwa lovivela viulu oku pandekiwa lawo. ¹⁴ Ovawe a lisoka lolonduko viomãla va Isareli, ekui liovawe kovawe avali, ca soka lolonduko viavo; ndoku sokotola osinete, eli londuko yalio, eli londuko yalio, kapata aco ekui la avali. ¹⁵ Va tongela konjeke yaco yoponete alienge ndovikolo a vindiwa lulu wa fina. ¹⁶ Va tunga ovivela vivali viulu lovinunga vivali viulu, va kapa ovinunga viaco vivali kolonẽle vivali vionjeke yoponete. ¹⁷ Alienge avali a vindiwa lulu va kapa vovinunga vivali kolonẽle vionjeke yoponete. ¹⁸ Olosungu vivali vikuavo vialienge avali a vindiwa va kapa kovivela viaco vivali, va vi kapa kapatahãlo efonde, konẽle yokovaso. ¹⁹ Va tunga ovinunga vivali viulu, va vi tongela kolonẽle vivali vionjeke yoponete, konẽle vi lisungue lonẽle yefonde yovokati. ²⁰ Va tunga ovinunga vivali viulu, va vi kapa kapatahãlo avali efonde, vemẽhi, konẽle yokovaso ocipepi lokutuihinya kuaco, kilu liuvia wefonde wa vindiwa luloño. ²¹ Va pandeka lukolo wonoloti onjeke yoponete lovinuga viaco kovinunga viefonde, ha yi litokeka luvia wefonde wa vindiwa luloño, okuti onjeke yoponete ka yi tundi kefonde; ndeci Yehova a handeleka Mose.

OSEMANA 9-15 YA KUVALA

OVOKUASI A SANGIWA VONDAKA YA SUKU | OVISILA 1–3

“Ocimãho Covilumba”

(Ovisila 1:3) Ocilumba caye nda ocilumba coku pia elisi congombe, o nena ongombe yulume ka yi kuete etondelo. O yi lumbila kuvelo wombalaka yoku ñualehẽla la Yehova, okuti o taviwa la Yehova.

(Ovisila 2:1) Nda omunu o nena ku Yehova ocilumba colomema, ocilumba caye ci kale cosema ya fina. Muẽle itilako ulela o kapako insensu.

(Ovisila 2:12) Oku vi nena ku Yehova ndocilumba covaima atete ci tava. Puãi oku vi yokela kutala okuti ku tunda elemba li pepa oco ka ci tava.

Perspicaz-3 kem. 120; kem. 123 ocin. 5

Ovilumba

Ovilumba vioku pia elisi. Ovilumba vioku pia elisi via enda oku eciwa viosi ku Suku; ufendeli wa enda oku eca olonepa viosi viocinyama. (Tala Olong. 11:30, 31, 39, 40) Ya kala ondimbukiso yoku taviwa la Yehova okuti, ecela akandu avo osi. Ndeci ca kala “ocilumba coku pia elisi,” Yesu Kristu wa eca etimba liaye liosi.

Perspicaz-3 kem. 123 ocin. 5

Ovilumba

Ovilumba violomema. Ovilumba violomema via enda oku eciwa kumosi lovilumba vioku pia elisi, viombembua, lovilumba viosi viekandu kuenda ovaima atete koku ungula, pole, vapuluvi amue omunu eca eci a panga. (Etu. 29:40-42; Ovis. 23:10-13, 15-18; Ate. 15:8, 9, 22-24; 28:9, 10, 20, 26-28) Ovio via enda oku eciwa omo lioku limbuka ocali ca Suku coku va ĩha esumũlũho kuenda ekalo liwa. Ovio via endavo oku kapiwa ulela kuenda insensu. Ovilumba violomema, via kala osema ya fina, yekende ya yokiwa okuti ya pangiwila vociyo cimue ca longa. Onepa yimue yocilumba colomema ya enda oku kapiwa kutala wocilumba coku pia elisi, onepa yikuavo ya enda oku liwa lovitunda kuenda ovilumba viombembua omunu o yeca wa endavo oku liako. (Ovis. 6:14-23; 7:11-13; Ate. 18:8-11) Lacimue ocilumba colomema ci eciwa kutala ci kapiwa etumbisa ale “owiki” (citava okuti ci tiamisiwila kusole u tunda kakuyu, ale kapako akuavo) okuti ca ponduile oku tumbisa ovilumba.—Ovis. 2:1-16.

(Ovisila 3:1) Oco nda ocilumba caye ocilumba cocitundasonde combembua, o nena ongombe. Yi kale onale pamue omange, o nena ku Yehova eyi ka yi kuete etondelo.

Perspicaz-3 kem. 121 ocin. 1

Ovilumba

Ovilumba viocitundasonde (ale viombembua). Ocilumba cocitundasonde cina ca taviwile la Yehova ca situluile ombembua laye. Ufendeli kuenda epata liaye va pangaile onepa kokuavio (kocitali cotavernakulu ndomo ca kisikiwile, kua tungiwile olombalaka, ongumbo yañualele ocitali kuenda vonembele mua kuatele olohondo). Ocitunda okuti mitavaso wa enda oku tambula onepa yimue kuenda ovitunda oloñuatisi via enda oku tambula onepa yikuavo. Yehova wa enda oku tambula owisi welemba liwa liulela wa timihĩwa. Osonde okuti yi lomboka omuenyo ya enda oku eciwa ku Suku, momo yatiamẽla kokuaye. Omo liaco, ovitunda, afendeli vakuavo kuenda Yehova, va kala ndu okuti va kasi oku lia kumosi, ca lombolokele ukamba wombembua pokati kavo. Omunu wa pangele onepa kokuavio okuti wa vĩha (okuti evĩho lina lia tukuiwa Vocihandeleko) ale olia ositu yina okuti ya pita ale otembo ya sokiyiwile (vepuluvi liowuya okuti ya ponduile oku vola) wa sesamelele oku pondiwa. Momo eye nda wa vĩhisa okulia omo kua vĩha kuenda oku lia cina ca vĩha kovaso a Yehova Suku, nda ca lekisa ekambo liesumbilo kovaso aye.

—Ovis. 7:16-21; 19:5-8.

Oku Konomuisa Lutate Ovina vi Sangiwa Vembimbiliya

(Ovisila 2:13) Ovilumba viove viosi violomema o vi singa omongua. Ka ci tava okuti omongua wocisila wa lisila la Suku yove u kamba kocilumba cove colomema. O kapa omongua vovilumba viove viosi.

(Esekiele 43:24) O vi eca muẽle kovaso a Yehova kuenje ovitunda vi kapako omongua, loku vi lumbila Yehova ocilumba coku pia elisi.

Utala Wondavululi, 1/6/2004 kem. 20 ocin. 1

Atosi Avelapo Velivulu Liovisila

2:13—Momo lie omongua wa enda loku kapiwila ‘kovilumba viosi’? Omongua ka wa endaile loku kapiwilako oku vokiya epepo kovilumba. Ca kala ndeci omanu va siata oku kapa omongua kovikulia vimue oco ka vi ka nyolẽhe. Cimuamue haico, omongua wa enda loku kapiwa kovilumba ndocindekaise cocina cimue ka ca volele.

(Ovisila 3:17) Ci kala ocisila ka ci pui covitungilo viene viosi, okuti ka vu li ulela ndaño osonde.

Perspicaz-2 kem. 246

Ulela

Ocimãho cocihandeleko caco. Vemẽhi Liocihandeleko cikale osonde kuenda ulela via tendiwile okuti via tiamẽla ku Yehova. Osonde omuenyo, okuti Yehova eye lika o yeca, omo liaco yatiamẽla kokuaye. (Ovis. 17:11, 14) Ulela wa tendiwile okuti onepa yimue yikuete esilivilo kocinyama. Ocilumba culela wocinyama ca tendiwile okuti onepa ya valapo yatiamẽlele ku Yehova, una o linga aliangiliyo kuenda nda ca lekisa onjongole yufendeli yoku eca ku Suku eci ca velapo. Omo lioku kala ocindekaise ku va Isareli oku eca ovina via velapo ku Yehova kua enda oku popiwa okuti, owisi wa tundaile kutala wa kala ‘ndokulia’ kuenda “ndelemba li pepa” kokuaye. (Ovis. 3:11, 16) Omo liaco, oku lia ulela ka ca sungulukile kovaso a Yehova, ca kala ndoku lueya ovihandeleko viaye. Oku lia ulela ca enda oku koka olofa. Ca litepa losonde ceci okuti, ulela wa ponduile oku lingiwa lawo ovina vikuavo, ndeci, ocinyama ca lifila ale ca pondiwa locinyama cikuavo—Ovis. 7:23-25.

Utala Wondavululi, 1/6/2004 kem. 20 ocin. 1

Atosi Avelapo Velivulu Liovisila

3:17. Ulela wa enda oku sokisiwa ndonepa ya velapo yocilumba. Kuenje ocihandeleko cokuti lomue o lia ulela, ca vetiya va Isareli oku limbuka okuti onepa ya velapo ya Yehova. (Efetikilo 45:18) Eci ci tu ivaluisavo okuti tu sukila oku eca eci ca velapo ku Yehova.—Olosapo 3:9, 10; Va Kolosai 3:23, 24.

Oku Tangiwa Kuembimbiliya

(Ovisila 1:1-17) Yehova wa kala vombalaka yoku ñualehẽla laye. Wa pañinya Mose hati, ² Popia la va Isareli. Va sapuila huti, Eci umue pokati kene a nena ocilumba ku Yehova, ocilumba caco o cupa kocunda caye, pamue colongombe, pamue colomeme, pamue colohombo. ³ Ocilumba caye nda ocilumba coku pia elisi congombe, o nena ongombe yulume ka yi kuete etondelo. O yi lumbila kuvelo wombalaka yoku ñualehẽla la Yehova, okuti o taviwa la Yehova. ⁴ O kapa eka liaye kutue wocilumba coku pia elisi, kuenje cu taviwila oku yelisua laco. ⁵ Noke, muẽle eye ipaila onale yaco kovaso a Yehova. Omãla va Arone, ovo ovitunda, va nena osonde yaco, oco va nyila osonde yaco oku ñualisa kutala u kasi kuvelo wombalaka yoku ñualehẽla la Yehova. ⁶ Muẽle o yuva ocilumba caco coku pia elisi, kuenje o ci sasa ovinimbu. ⁷ Omãla vocitunda Arone va siakãla ondalu kutala, kuenje va kapa olohuĩ kondalu yaco. ⁸ Oco omãla va Arone, haivo ovitunda, va langeka ovinimbu viaco lutue waco kuenda ulela kilu liolohuĩ vi kasi kondalu yi li kutala. ⁹ Puãi ovãla likalo lovoko, muẽle o vi sukula lovava. Kuenje ocitunda ci yokela cosi kilu liutala. Ci linga ocilumba coku pia elisi, haico ocilumba covondalu, celemba li pepa ku Yehova. ¹⁰ Nda ocilumba caye coku pia elisi ci tunda kocunda colomeme pamue colohombo o nena yulume ka yi kuete etondelo. ¹¹ O yipaila kovaso a Yehova, konẽle yutala yoko Norte. Omãla va Arone, ovo ovitunda, va nyila osonde yaco oku ñualisa kutala kolonele viosi. ¹² Muẽle o yi teta teta ovinimbu kumue lutue lulela waco. Ocitunda ci vi kapa kolohuĩ vi kasi kondalu yi li kutala. ¹³ Ovãla puãi kuenda ikalo lovoko, muẽle o vi sukula lovava. Ocitunda ci lumba cosi loku ci yokela kutala. Ci linga ocilumba coku pia elisi ocilumba covondalu celemba li pepa ku Yehova. ¹⁴ Nda ocilumba caye coku Yehova ocilumba coku pia elisi colonjila, muẽle o nena ocilumba colopomba pamue civuvu violonende. ¹⁵ Ocitunda o ci nena kutala, o ci soyola utue, kuenje o ci yokela kutala. Osonde yaco o yi nosila konẽle yutala. ¹⁶ Upapo esãsa liaco kumue lovonya, o vimba keyala konẽle yutala yokutundilo wekumbi. ¹⁷ O yi tioñolõla lavava aco, puãi ka yi teti pokati. Ocitunda ci yi yokela kutala, kolohuĩ vi kasi kondalu. Ci linga ocilumba coku pia elisi, ocilumba covondalu, celemba lipepa ku Yehova.

OSEMANA 16-22 YA KUVALA

OVOKUASI A SANGIWA VONDAKA YA SUKU | OVISILA 4–5

“Eca ku Yehova Cosi Ove o Tẽla Oku Linga”

(Ovisila 5:5, 6) Kuenje ci kala ndomo: eci a kasi leko liocina cimue cevi, o litavela ocina a lueya, ⁶ kuenje o nena ku Yehova ocilumba caco ci kale omange yokocunda, okameme pamue ohombo, ndocilumba cekandu. Noke ocitunda cu likutilila ha ci tuvika ekandu liaye.

Perspicaz-3 kem. 121 ocin. 7

Ovilumba

Ovilumba vieko. Ovilumba vieko via enda oku lumbiwa omo liekandu, momo veko liosi mua kongela ekandu. A kala akandu ana okuti omunu wa a linga o kuete eko kuenda ca litepele lovilumba vikuavo viakandu kuenje citava okuti via enda oku lumbiwa oco ku tumbuluiwe ekalo liomunu waco. Ci kale kovaso a Yehova, ale kofeka yaye yi kola yina a lueyela. Ocilumba cekandu ca kuata esilivilo kovaso a Yehova omo liekandu lia lingiwa, ale oku tumbulula ekalo liomunu wa likekembela kuenda oku kuata ongecelo omo liekandu liaye.—Sokisa Isa. 53:10.

(Ovisila 5:7) Puãi nda ka tẽla oku landa okameme, o nena ku Yehova, ndocilumba ceko liaye, olopomba vivali pamue ivuvu vivali violonende, omo wa linga ekandu; eyi ocilumba cekandu, eyi ocilumba coku pia elisi.

Utala Wondavululi, 1/6/2009 kem. 26 ocin. 3 kelimi Lioputu

Eye wa Kapako Ekalo Lietu

Poku situlula ocisola calua ca Yehova, Ocihandeleko ca popele hati: “Puãi nda [eye] ka tẽla oku landa okameme, o nena ku Yehova, ndocilumba ceko liaye, olopomba vivali pamue ivuvu vivali violonende.” (Ocinimbu 7) Ondaka yokuti “nda ka tẽla oku landa,” citava okuti yi pongoluiwavo hati, “nda eka liaye ka lia tẽlele oku sanga.” Nda u Isareli umue wa kala ohukũi calua kuenje ka tẽlele oku landa omeme yimue, Suku wa tavaile lesanju lialua cina ovo va kuata oco va ci lumbe ndeci, olopomba vivali pamue ivuvu vivali violonende.

(Ovisila 5:11) Puãi nda eci a kuete ka ci tẽla olopomba vivali pamue ivuvu vivali violonende, o nena ndocilumba cekandu a linga, onepa yekũi yefa liosema ya fina. Ka kapipo ulela, ndaño insensu ka kapipo, momo oco ocilumba cekandu.

Utala Wondavululi, 1/6/2009 kem. 26 ocin. 4 kelimi Lioputu

Eye wa Kapako Ekalo Lietu

Nda hẽ omunu ka kuatele epondolo lioku landa olonjila vivali? Ocihandeleko ca popele okuti, “o nena ndocilumba cekandu a linga, onepa yekũi yefa liosema ya fina.” (Ocinimbu 11) Omunu wa kala ohukũi calua, Yehova wa ecelela okuti ocilumba a eca ka ci kuata osonde. Ko Isareli, uhukũi ka wa tatekele layumue oku tuvika akandu, ale oku kuata esumũlũho lioku kuata ombembua la Suku.

Oku Konomuisa Lutate Ovina vi Sangiwa Vembimbiliya

(Ovisila 5:1) Nda omunu o lueya omo a yeva ondaka yoku lisinga londuko ya Suku, haeye wa kala ombangi ya ci mõla pamue ya ci kulĩha puãi ka ci sapuile, omunu waco o sanga ongole.

Utala Wondavululi, 16.02 kem. 24 ocin. 14

Setukula Afendeli va Yehova Vakuekolelo

¹⁴ Ove o sukilavo oku pokola tete ku Yehova kuenda oku lekisa okuti ukuacili komanu vakuavo poku va sola. Pamue wa kũlĩha okuti manji umue wa linga ekandu linene. Citava okuti, ove o yongola oku kakatela kokuaye ca piãla enene nda eye ekamba liove, ale umue ukuepata. Pole, wa kũlĩhavo okuti ca velapo oku pokola ku Yehova. Ndeci ca linga Natana, pokola ku Yehova, pole lekisa ocisola ku manjove. U sapuila oco a pinge ekuatiso kakulu vekongelo kuenda a ci linge lonjanga. Nda ka ci lingile, ove muẽle o sukila oku sapuilako akulu vekongelo. Poku ci linga o lekisa okuti o kasi oku pokola ku Yehova. Handi vali, o kasi oku lekisa ocisola ku manjove omo akulu vekongelo va ko kuatisa oku kuata vali ukamba uwa la Yehova. Ovo va ka lekisa esunguluko kuenda ocisola poku u lungula.—Tanga Ovisila 5:1; Va Galatia 6:1.

(Ovisila 5:15, 16) Nda omunu umue o linga ahuku ha lueya lonumbi kovina vi kola via Yehova, o nena ku Yehova ndocilumba ceko liaye omange yokocunda ka yi kuete etondelo, ndeci ove o sokiya lolosiekele viopalata, ndosiekele yonembele; oco ocilumba ceko. ¹⁶ Omo a linga ahuku oku sama eci ci kola o feta. O vandekako onepa yatãlo ha yeci kocitunda. Noke ocitunda cu likutilila lomange yocilumba ceko oku ima ekandu, kuenje ecelua.

Perspicaz-3 529 ocin. 1

Oku Kola

Ovinyama Kuenda Ovaima o Posi. Onuñulu yongombe pamue yomeme ale yohombo, via tendiwile okuti vi kola ku Yehova kuenda ka ca tavele oku vi yovola. Via sukilile oku eciwa ndovilumba kuenda onepa yimue ya tiamẽlele kucitunda mitavaso. (Ate. 18:17-19) Ovaima atete kuenda onepa yekũi via kolele ndeci ovilumba viosi kuenda olombanjaile viosi vi kola viupange wohondo yi kola. (Etu. 28:38) Ovina viosi vi kola ku Yehova, via kolele kuenda ka ca tavele oku vi tenda ndovina ka vikuete esilivilo, ale oku talavaya lavio lonjila yimue ka ya sungulukile. Ocindekaise cimue ocihandeleko catiamẽla konepa yekũi. Nda omunu umue o seleka onepa yimue yekũi ovina ongula ndeci otiliku kuenje eye ale umue ukuepata liaye o linga ahuku oku sama eci ci kola ndeci oku ci teleka, omunu waco o kuata eko omo lioku lueya ocihandeleko ca Suku coku sumbila ovina vi kola. Ocihandeleko ca kisikile okuti ku eciwa kohondo yi kola ocilumba cimue ci soka olopurcendu 20, oku kongelamo oku lumba okameme ka ka kuete etondelo. Eci ca enda oku koka esumbilo kovina vi kola viatiamẽla ku Yehova.—Ovis. 5:14-16.

Oku Tangiwa Kuembimbiliya

(Ovisila 4:27–5:4) Omunu waño nda o lueya lonumbi kuenje o sama cimue covina viaco Yehova a handeleka hati, Ka vi ka lingiwe, kuenje o kasi leko, ²⁸ ekandu liaye a linga, nda wa li limbuka, o nena ohombo ndocilumba caye, omange ka yi kuete etondelo, o yi nena omo a linga ekandu. ²⁹ O kapa eka liaye kutue wocilumba cekandu, kuenda ipalela ocilumba cekandu komangu yocilumba coku pia elisi. ³⁰ Ocitunda ci nyañula okasonde kaco lomuine waye, ci ka kapa kolombinga viutala wocilumba coku pia elisi. Osonde yaco yosi ci yi peselela posi konẽle yutala. ³¹ Ulela waco wosi ci wupapo, ndeci va upopa ulela kocitundasonde combembua. Ocitunda cu yokela kutala ndelemba li pepa ku Yehova. Noke ocitunda cu likutilila oku tuvika ekandu, kuenje ecelua. ³² Nda o nena okameme ndocilumba caye cekandu, o nena omange ka yi kuete etondelo. ³³ O kapa eka liaye kutue wocilumba caco cekandu, o yipalela ndocilumba cekandu oku va ipãlaila ocilumba coku pia elisi. ³⁴ Ocitunda ci nyañula kamue kosonde yocilumba cekandu lomuine waye, ci ka kapa kolombinga viutala wocilumba coku pia elisi. Osonde yaco yosi ci yi peselela posi konẽle yutala. ³⁵ Oco ulela waco wosi ci wupapo ndeci vopapo ulela wokameme kocitundasonde combelua. Oco ocitunda cu yokela kutala ndovilumba via Yehova viovondalu. Noke ocitunda cu likutilila ha tuvika ekandu liaye a linga, kuenje ecelua.

5:1 Nda omunu o lueya omo a yeva ondaka yoku lisinga londuko ya Suku, haeye wa kala ombangi ya ci mõla pamue ya ci kulĩha puãia ka ci sapuile, omunu waco o sanga ongole. ² Pamue nda umue o lamba cimue ca vĩha, ci kale ocife cocinyama ci vĩhĩsa, pamue ci kale ocife capuka a vĩhĩsa, kuenje o kasi lonumbi yaco yu wa vĩhĩsua, oco o kasi leko. ³ Pamue nda o lamba cimue comunu ci vĩhĩsa, evĩho liaco lio vĩhĩsa nda lie nda lie, kuenje haimo eye o kasi lonumbi yaco, eci a ci limbuka oco o kala leko. ⁴ Pamue nda omunu lomẽla waye o lisinga lonjanga oku linga cimue cĩvi, ndaño oku linga ciwa; ci kale nye la nye omunu o popia lonjanga oku lisinga, yu ka co lombolokele, eteke a ci limbuka o kala leko liocina caco.

OSEMANA 23-29 YA KUVALA

OVOKUASI A SANGIWA VONDAKA YA SUKU | OVISILA 6–7

‘Ocilumba Coku Lekisa Olopandu’

(Ovisila 7:11, 12) Kuenje ocihandeleko cocitundasonde combembua omunu a lumba ku Yehova ceci: ¹² Nda o nena coku panduila a lumbe locitundasonde colupandu otumbolo ka tu kuete etumbisa, tua tengiwa lulela, lotumbolo tua tengiwa lulela, otuo tuosema ya fina ye yukila ulela.

Utala Wondavululi, 19.11 kem. 22 ocin. 9

Ceci tu Lilongisila Kelivulu Liovisila

⁹ Ceci tu lilongisilako. Vali: Tu vumba Yehova omo tu yongola oku lekisa olopandu vietu kokuaye. Eci ci tu ivaluisa ovilumba viombembua via enda oku eciwa. Onepa yovilumba viaco, via kuata esilivilo lialua kefendelo liocili ku va isareli. Elivulu Liovisila li lombolola okuti, u Isareli wa ponduile oku eca ocilumba cocitundasonde combembua, ‘ndocilumba coku lekisa olopandu.’ (Ovis. 7:11-13, 16-18) Eye ka ponduile oku eca ocilumba caco ndekisika, pole, wa sukilile oku ceca lutima wosi. U Isareli wa ponduile oku eca ocilumba caco lutima wosi momo wa solele Suku yavo, Yehova. Omunu una eca ocilumba, epata liaye kuenda ovitunda, ovo va ponduile okulia ositu yocinyama ca lumbiwa. Pole, olonepa vimue viatiamẽla kocinyama caco, va enda oku vieca ku Yehova. Vipi olonepa viaco?

(Ovisila 7:13-15) Oku vokiya kotumbolo tuaco o nena ocilumba colombolo vi kuete etumbisa, kumuamue locitundasonde caye combembua oco colupandu. ¹⁴ Oco o lumbila kamue kocilumba kamue kocilumba, tu linga ocilumba coku tulika ku Yehova. Vikuavo vi tiamẽla kocitunda ci nyila osonde yovilumba viombembua. ¹⁵ Oco ositu yocitundasonde caye combembua haico colupandu yi liwa eteke va ci lumba; ka ci tava oku sia yimue toke komẽle.

Utala Wondavululi, 1/9/2000 kem. 6 ocin. 15

Ovilumba Visanjuisa Suku

¹⁵ Ocilumba cikuavo cocali va enda oku lumba, ca kala ocilumba cocitundasonde combembua, calomboluiwa kelivulu Liovisila kocipama ca 3. Onduko yaco eyi citava oku yi pongoluisavo okuti, “ovilumba vilumbiwila ombembua, [NW].” Kelimi lio Heveru ondaka “ombembua,” yikuete elomboloko lia velapo vali okuti haku imuha ko ño lika kuyaki ale kuombuanja. Elivulu litukuiwa okuti, Studies in the Mosaic Institutions, li lombolola okuti: Vembimbiliya eci cilombolokavo ekalo ale elitokeko liombembua la Suku, ndeci, ekalo liwa, liesunguluko kuenda liesanju. Omo liaco, ocilumba cocitundasonde combembua, ka va endele oku ci lumba lika oco va kuate ombembua la Suku, ndu okuti oku u sanjuisa. Puãi va enda oku ci lumba oco vaece olopandu kokuaye, ale oco va tumbangiye ekalo liombembua la Suku lia enda loku kala pokati ka vana va enda loku taviwa laye. Ovitunda kuenda ava va kuataile onepa ko ku lumba ovilumba viaco noke osonde lulela waco va enda oku vi lumba ku Yehova. (Ovisila 3:17; 7:16–21; 19:5–8) Loku kuama onjila yimue yiwa haiyo ya sunguluka, vakuakulumba ovilumba, lovitunda, kumue la Yehova Suku, ovo lika va kuataile onepa ko ku lia ovilumba viaco, kuenda eci ca lombolokaile elitokeko liocili liombembua lia kala pokati kavo.

(Ovisila 7:20) Omunu o lia kositu yocitundasonde combembua, haico ca Yehova, haeye o kasi leci co vĩhĩsa, omunu waco o tepiwa ku vakuavo.

Utala Wondavululi, 1/9/2000 kem. 11 ocin. 8

Ovilumba Viesivayo Visanjuisa Yehova

⁸ Helie wa enda loku lumba ocilumba? Ocihandeleko ca kisakaile okuti omunu wosi amẽla ku Yehova te lika una wa yelisua haeye walipua. Omunu wosi okuti wa vihisua omo liekandu limue a linga, ca kisakaile okuti tete, eye o kuete oku lumba ocilumba cekandu ale ceko oco a liyelise kovaso a Yehova. Kuenje, ocilumba caye coku pia elisi ale cocitundasonde combembua, oco ca tavawaile noke la Yehova. (Ovisila 5:1–6,15,17) Anga hẽ, tua kapako esilivilo lioku liyelisa kovaso a Yehova? Nda tu yongola okuti efendelo lietu li taviwa la Suku, tu kuete oku imbapo lonjanga yalua ovituwa viosi vi pisiwa lovihandeleko via Suku. Tu sukila oku sandiliya lonjanga ekuatiso lia sokiyiwa la Suku okuti, “akulu vekongelo,” pokati “[k]ocitundasonde cakandu etu” okuti Yesu Kristu−Tiago 5:14; 1 Yoano 2:1, 2.

Oku Konomuisa Lutate Ovina vi Sangiwa Vembimbiliya

(Ovisila 6:13) Va taimise ño hũ ondalu yi taima ño hũ, ka yimi.

Perspicaz-2 kem. 148 ocin. 4

Ondalu

Ndomo yi tiamisiwila kotavernakulu kuenda konembele. Ondalu ya enda oku panga onepa kefendelo votavernakulu kuenda noke vonembele. Omẽle lomẽle, kuenda oñolosi, ocitunda cinene ca sukilile oku timiha insensu kutala winsensu. (Etu. 30:7, 8) Ocihandeleko ca Suku ca kisikile okuti ondalu kutala wovilumba vioku pia elisi yamamako oku taima. (Ovis. 6:12, 13) Kociholo ca va Yudea, ondalu kutala oku amamako oku taima ca kala ocikomo ca Suku, pole ociholo caco ka ci li kuata Lovisonehua. Ndomo Yehova a handelekele ku Mose, omãla va Arone va sukilile oku “siakãla ondalu kutala kuenje va kapa olohuĩ kondalu yaco” osimbu ka va kapele ovilumba kutala. (Ovis. 1:7, 8) Eci ca lingiwa noke lioku tumbikiwa kutunda wa Arone kuenda noke yoku eca ocilumba coku tumbikiwa, okuti ondalu ya tunda ku Yehova citava okuti, ya tunda velende kilu liotavernakulu kuenje yalia ocilumba ca kala kutala. Lonjila eyi, ondalu yocikomo ya molẽha haloku siakãlako ondalu lolohuĩ kutala, pole, “ya lia ocilumba coku pia elisi lulela kilu liutala.” Ondalu yamamako kutala, citava okuti oku litenga kuondalu ya tunda ku Suku leyi ya kala ale kutala. (Ovis. 8:14–9:24) Cimuamue haico okuti, ondalu yocikomo ya tunda ku Yehova ya lia ovilumba noke ya Salomone oku linga ohutililo yoku tumbika onembele.—2 Asa. 7:1; talavo Olong. 6:21; 1 Olos. 18:21-39; 1 Asa. 21:26 vi lombololavo ovolandu akuavo atiamẽla kondalu yocikomo ca tunda ku Yehova poku tava ovilumba viafendeli vaye.

(Ovisila 6:25) Sapuila Arone lomãla vaye, huti, Ocihandeleko cocilumba cekandu ceci: oko va ipalela ocilumba cekandu kovaso a Yehova; oco ci kola cimue.

Toda a Escritura, kem. 27 ocin. 15

Elivulu 3 Liembimbiliya—Ovisila

¹⁵ (3) Ku kisikiwa ocilumba cekandu cina okuti hacocipangoko. Ocinyama ceciwa ca tamba ño komunu o ka tuvika akandu aye, nda yocitunda, nda yomanu vakuavo nda yusongui ale yomanu vaño. Ca litepa lovilumba vioku pia elisi kuenda viombembua ceci okuti, ovilumba viekandu via enda oku kisikiwa.—4:1-35; 6:24-30.

Oku Tangiwa Kuembimbiliya

(Ovisila 6:1-18) Yehova wa popia la Mose hati, ² Nda omunu umue o lueya ha lingila Yehova ekandu poku kembela ukuavo cimue a pindikisa, pamue cimue conjeke, pamue coku iva, pamue wa lingisa ukuavo cĩvi, ³ pamue wa alula cimue ca nyelile, ya wa ci kembela ha lisinga luhembi; vovina evi viosi omanu va lingainga loku lueyamo, ⁴ eci umue a vi lueya, kuenje a kuete eko, oco o tiula caco eci a ivile pamue ceci va pindikisile, pamue ceci va nyelisile eye wa ci alula, ⁵ ndaño ceci a ci lisingila luhembi. O ci tiula cosi, kuenje o va ndekako onepa yatãlo; o ceca ku muẽle yaco eteke vo wasa eko. ⁶ Kuenje o nena kocitunda ocilumba caye ceko coku Yehova, omange yokocunda ka yi kuete etondelo, ndeci ove o sokiya; oco ocilumba ceko. ⁷ Noke ocitunda cu likutilila ku Yehova oku tuvika ekandu, kuenje ecelua cosi a linga co muisa eko. ⁸ Yehova wa popia la Mose hati, ⁹ Sapuila Arone lomãla vaye huti, Ocihandeleko cokocilumba coku pia elisi ceci: Ocilumba coku pia elisi ci kala kilu liolohui kutala uteke wosi toke omele, kuenda ondalu yokutala yi taima ño-o, ¹⁰ locitunda ci wala ocikutu caye covalatanya. Ovikasau viaye viovalatanya ci vi kapa ketimba liaye, kuenje ci yuka etiko liocilumba coku pia elisi eci ca liwa londalu kutala, ci li kapa konẽle yutala. ¹¹ Oco ci lula uwalo waye, ci wala uwalo ukuavo, ci tuala etiko liaco keyala, kofeka. ¹² Ondalu yokutala yi taima ño, ka yimi; kuenje ocitunda ci sokekapo olohui omẽle komẽle, ci kapapo ciwa ocilumba coku pia elisi, ci yokapo ulela wovilumba viombembua. ¹³ Va taimise ño hũ ondalu yi taima ño hũ, ka yimi. ¹⁴ Ocihandeleko cocilumba colomema ceci: omãla va Arone va ci nena ku Yehova, kovaso yutala. ¹⁵ Umue o yoyako epupu kosema yavo ya fina yocilumba colomema kuenda kulela waco linsensu viavo viosi vi li kocilumba colomema, o vi yokela kutala ndonjivaluiso yaco, ndelemba li pepa ku Yehova. ¹⁶ Kuenje caco ca supapo Arone lomãla vaye va ci lia. Ka ci kala letumbisa. Ci liwila apa pa kola; kocitali combalaka yoku ñualehela la Yehova oko va ci lila. ¹⁷ Ka ci yokiwa letumbisa. Nda ceca ndonepa yavo yovilumba viange viovondalu; ci kola ca piãla, ndocilumba cekandu kuenda ndocilumba ceko. ¹⁸ Alume vosi pokati komãla va Arone va tẽla oku ci lia ndocisila cavo oloneke ka vi pui kovitumbulukila viene, covilumba via Yehova viovondalu. U o vi lamba o kolisua.

OSEMAN 30 YA KUVALA–6 YA CEMBANIMA

OVOKUASI A SANGIWA VONDAKA YA SUKU | OVISILA 8–9

“Ovovangi a Situlula Asumũlũho a Yehova”

(Ovisila 8:6-9) Oco Mose wa nena Arone lomãla vaye valume, wa va sukula lovava. ⁷ Kuenje wo walisa ocikutu, wo witika uvia, wo walisa esanya, wo kapa efonde, wo witikisa luvia wefonde wa vindiwa luloño, wo li pandekela. ⁸ Oco wo kapa onjeke yoponete; vonjeke yaco yoponete wa kapa Urimi la Tumimi. ⁹ Kuenje wo kapa ekofue kutue waye, lo kokofue kovaso yaco oco wa kapako ulame wulu, ekolowa li kola. Ndeci Yehova a sapuila Mose haico Mose a linga.

(Ovisila 8:12) Wa itila kutue wa Arone ulela woku waveka, wo waveka ho kolisa.

Perspicaz-2 kem. 414

Oku tumbikiwa

Mose wa sukula Arone kuenda omãla vaye, Nadava, Avihu, la Eleasa kuenda Itamare (ale wa va handeleka okuti ovo muẽle va li sukula) petasu liosipi ya kala kocitali kuenda wa walisa Arone uwalo wocitunda cinene. (Ate. 3:2, 3) Noke lioku wa lisiwa uwalo waco wa posoka, Arone wa tumbikiwa kocikele cutunda, uwalo waco wa lombolokele ovituwa kuenda ocikele co wĩhiwa. Noke, Mose wa waveka otavernakulu, lovikuata vialio kuenda utala wocilumba coku pia elisi, oku kongelamo etasu lovikuata va enda oku talavaya lavio. Eci ca va kolisa, kuenda ca va ecelela okuti va linga lika upange wa Suku una va handelekiwa oku linga. Noke Mose wa waveka Arone lulela kutue waye.—Ovis. 8:6-12; Etu. 30:22-33; Osa. 133:2.

(Ovisila 9:1-5) Oco noke keteke liecelãla Mose wa pañinya Arone kuenda omãla vaye valume lakulu va Isareli. ² Wa popoa la Arone hati, Likuatela okanale kocunda ocilumba cekandu, locitupi cocilumba coku pia elisi. Nola evi ka vi kuete etondelo, vi nena ku Yehova. ³ Oco popia la va Isareli huti, Likuateli ocitupi cohombo cocilumba cekandu kuenda okanale lokameme kunyamo umosi. Nola eci ka vi kuete etondelo, ndocilumba coku pia elisi. ⁴ Longombe locitupi comeme vi linga ocilumba viombembua oku lumbila Yehova kuenda ocilumba cosema ca tengiwa lulela. Omo etalili Yehova o tukuluka kokuene. ⁵ Oco va nena kovaso yombalaka yoku ñualehela la Yehova evi via tukula Mose, kuenje owiñi wosi wa kokela ho talama kovaso a Yehova.

Perspicaz-2 kem. 415 ocin. 6

Oku tumbikiwa

Keteke liecelãla, utunda okuti wa lipongiya loku kapiwa kocikele caye, (okuti ka kuatisiwa la Mose) onjanja yatete u linga upange woku tuvika akandu kepata lia va Isareli lia sukilile oku yelisiwa, ka va sukilile oku yelisiwa lika omo liakandu avo pole, momo liesino lioku fendela ongombe yulu, cina ca sumuisa Yehova. (Ovis. 9:1-7; Etu. 32:1-10) Poku malusula upange watete wutunda, Yehova wa lekisa okuti wa tava upange wutunda waco, poku tuma ondalu locikomo, ocili okuti onjuvungo yongunji yelende ya tuvika otavernakulu loku lia ocilumba ca supile kutala.—Ovis. 9:23, 24.

(Ovisila 9:23, 24) Mose la Arone va iñila vombalaka yoku ñualehela la Yehova. Eci va tundamo va sumũluĩsa omanu kuenje ulamba wa Yehova wa mõlehela komanu vosi. ²⁴ Kuenje kovaso a Yehova kua tunda ondalu, yu ya lia ocilumba coku pia elisi lulela kilu liutala. Eci omanu vosi va ci mõla va kaluka, va lituvika ovipala viavo posi.

Utala Wondavululi, 19.11 kem. 23 ocin. 13

Ceci tu Lilongisila Kelivulu Liovisila

¹³ Ceci tu lilongisilako. Kuãla: Yehova o kasi oku sumũlũisa onepa yocisoko caye palo posi. Sokolola kueci ca pita kunyamo wo 1512 K.Y, eci otavernakulu ya tungiwa ketapi Liomunda Sinai. (Etu. 40:17) Mose wa linga ohundo yimue, kuna Arone lomãla vaye va ñoliwa oco va kale ovitunda. Va Isareli va liongolola oku tala ovitunda oku eca ovilumba viatete viovinyama. (Ovis. 9:1-5) Yehova wa lekisa ndati okuti wa tava ovitunda viaco viokaliye? Osimbu Mose la Arone va sumũlũisa omanu, Yehova wa tuma ondalu ya lia ovilumba viosi via kala kilu liutala.—Tanga Ovisila 9:23, 24.

Oku Konomuisa Lutate Ovina vi Sangiwa Vembimbiliya

(Ovisila 8:6) Oco Mose wa nena Arone lomãla vaye valume, wa va sukula lovava.

Utala Wondavululi, 15/11/2014 kem. 11 ocin. 6

Esunga Lieci tu Sukilila Oku Kala Omanu va Kola

⁶ Oku liyelisa kuovitunda via va Isareli ketimba ku lomboloka nye kokuetu koloneke vilo? Omanu valua va lilongisa Embimbiliya letu va limbuka okuti tua yela, kuenda tua siatavo oku yelisa ovitumãlo vietu viefendelo. Omanu vana va yongola oku vumba Yehova va sukila oku kuata ‘utima wa pua evĩho.’ (Tanga Osamo 24:3, 4; Isa. 2:2, 3.) Omo liaco, tu sukila oku vumba Yehova lutima wa yela kuenda etimba lia yela. Tu sukilavo oku konomuisa ekalo lietu olonjanja viosi. Poku ci linga ci tu kuatisa oku limbuka okuti tu sukila oku linga apongoloko oco tu kale omanu va kola. (2 Va Kor. 13:5) Nda omunu umue wa papatisiwa o tala omanu va kasi epolõla haivo va linga ovina viumbondo, o sukila oku li pula ndoco: ‘Ndi li tenda hẽ ndomunu umue o kola?’ Omo liaco, o sukila oku pinga ekuatiso oco a yuvule ovina viaco via vĩha.—Tia. 5:14.

(Ovisila 8:14-17) Oco wa nena onale yocilumba cekandu kuenje Arone lomãla vaye va imbila ovaka avo kutue wonale yocilumba cekandu. ¹⁵ Kuenje Mose wa yipa. Oco Mose wa nyañula osonde yaco, wa yi kapa lomuine kolombinga viutala kolonele viosi. Wa yelisa utala, wa peselela osonde posi konele yutala okuti wo kolisa loku u wupa eviho liawo. ¹⁶ Wa nyañula ulela wa kala kovãla kuenda oluleki lu sungue komuma lolongela vivali lulela wavio, kuenje Mose wa vi yokela kutala. ¹⁷ Onale yaco puãi kuenda ocipa caco lositu laniña wa vi yoka londalu keyala liocilombo, kofeka. Ndeci Yehova a sapuila Mose haico Mose a linga.

Perspicaz-3 kem. 17 ocin. 6

Mose

Suku wa nõla Mose oco a kale kapitiya kocisila Cocihandeleko ku va Isareli, okuti ocikele caco lomue omunu o ci kuata kovaso a Suku, te lika Yesu Kristu Mitakati yocisila cokaliye. Mose wa nyila elivulu liocisila losonde yovilumba viovinyama, poku lekisa ku Yehova “onepa” yimue kuenda omanu (okuti vonduko yakulu) “onepa” yikuavo. Wa tangela omanu elivulu liovisila kuenje ovo va tambulula vati: “Viosi via popia Yehova tu vi linga, tu pokola.” (Etu. 24:3-8; Va Hev. 9:19) Mose kocikele caye cumitakati, wa kuata esumũlũho lioku songuila koku tungiwa kuotavernakulu kuenda oku pangiwa kuovikuata vialio, okuti onumbi yaco ya eciwa la Suku kuenda oku tumbikiwa kutunda, oku waveka otavernakulu kuenda Arone okuti ocitunda cinene lulela ulikasi. Noke wa songuila ovopange atete a lingiwa lutunda wokaliye.— Etu. ovip. 25-29; Ovis. ovip. 8, 9.

Oku Tangiwa Kuembimbiliya

(Ovisila 8:31–9:7) Mose wa popia la Arone lomãla vaye hati, Telekeli ositu yaco puvelo wombalaka yoku ñualehela la Yehova, haiko wu yi lili lombolo yi kasi vuhamba wocikundi, ndomo nda sapula siti, Arone lomãla vaye valumue va yi lie. ³² Eci ci supako cositu yaco lombolo yaco wu ci yoka londalu. ³³ Oloneke epanduvali ka ci tava oku tundila kuvelo wombalaka yoku ñualehela la Yehova, te oloneke viocikundi cene via pita. Momo Yehova u wihi ocikundi oloneke epanduvali. ³⁴ Ndeci ca lingiwa etaili haico Yehova a handeleka oku linga, oku tuvika akandu ene. ³⁵ Kuvelo wombalaka yoku ñualehela la Yehova haiko wu kala utanya luteke oloneke epanduvali ho patekeli ocikundica Yehova, oco ko fi momo oco ca handelekiwa. ³⁶ Arone lomãla vaye va linga viosi Yehova a va handeleka lomela wa Mose.

9:1 Oco noke keteke liecelãla Mose wa pañinya Arone kuenda omãla vaye valume lakulu va Isareli. ² Wa popoa la Arone hati, Likuatela okanale kocunda ocilumba cekandu, locitupi cocilumba coku pia elisi. Nola evi ka vi kuete etondelo, vi nena ku Yehova. ³ Oco popia la va Isareli huti, Likuateli ocitupi cohombo cocilumba cekandu kuenda okanale lokameme kunyamo umosi. Nola eci ka vi kuete etondelo, ndocilumba coku pia elisi. ⁴ Longombe locitupi comeme vi linga ocilumba viombembua oku lumbila Yehova kuenda ocilumba cosema ca tengiwa lulela. Omo etalili Yehova o tukuluka kokuene. ⁵ Oco va nena kovaso yombalaka yoku ñualehela la Yehova evi via tukula Mose, kuenje owiñi wosi wa kokela ho talama kovaso a Yehova. ⁶ Mose yu wa linga hati, Ocina eci oco ca sapula Yehova okuti vu ci linga, oco ulamba wa Yehova u tukulukila kokuene. ⁷ Oco Mose wa popia la Arone hati, Amela kutala. Lumba ocilumba cove cekandu locilumba cove coku pia elisi. Likutilila ove muele kuenda omanu oku tuvika akandu ene. Nenavo ocilumba comanu oku va litutilila. Ndeci Yehova a sapula haivo o linga.