4 | Embimbiliya Lieca Alungulo Awa

Ceci ci Lomboloka

Ndaño okuti Embimbiliya elivuluko liatiamẽla kesaku, pole, lieca alungulo awa hao a kuatisa. Elungulo liaco, li pondola oku kuatisa omunu umue o kasi oku liyaka lovitangi viuvei wovisimĩlo. Kũlĩhĩsa ndomo olio li kuatisa:

Ndomo tu Kuatisiwa

“Omanu va kuete uhayele ka va sukila ondotolo, te vana va vela.”—MATEO 9:12.

Embimbiliya li lekisa okuti, tu sukila oku sandiliya ekuatiso liolondotolo. Omanu valua vana va kuete uvei wovisimĩlo, va kuatisiwa poku kuata elomboloko lia suapo liatiamẽla kocitangi cavo kuenda oku sanda ekuatiso liondotolo yimue.

“Oku pokuisa etimba ku kuete esilivilo.”—1 TIMOTEO 4:8.

Oku linga ovina vi kuatisa kuhayele wove wo ketimba, ci kuatisavo oku kuata uhayele uwa wovisimĩlo. Vovina viaco, mua kongela oku pindisa etimba olonjanja viosi, oku lia ovikulia via suapo kuenda oku pekela velivala lia sokiyiwa.

“Utima umue wesanju u kasi ndovihemba vi kayisa, pole, utima wa sumua u lingisa etimba oku leñela.”—OLOSAPO 17:22.

Oku tanga ovinimbu vi vetiya vi sangiwa Vembimbiliya loku tumbika ovimãho o tẽla oku tẽlisa, ci pondola oku ku kuatisa oku kuata esanju. Nda komuenyo wove o tiamisila utima kovina viwa kuenda wa kolela okuti ovina vi ka pongoloka kovaso yoloneke, eci ci ka ku kuatisa oku liyaka lovitangi viove viuvei wovisimĩlo.

“Olondunge vi kasi la vana va li suluvika.”—OLOSAPO 11:2.

Ove o pondola oku limbuka okuti ku tẽla oku linga ovina viosi o yongola longusu yove muẽle. Omo liaco, lonjongole yalua, tava ekuatiso lia vakuene. Akamba kuenda epata citava okuti va yongola oku ku kuatisa, pole, ovo ka va kũlĩhĩle eci va sukila oku linga. Va sapuila ovina ovo va pondola oku linga okuti vi ku kuatisa cocili. Ku ka lavoke okuti ovo va ka linga ovina viosi, pole, olonjanja viosi lekisa olopandu omo liekuatiso ovo va eca.

Ndomo Alungulo Awa Embimbiliya a Siata Oku Kuatisa Vana va Tala Ohali

“Ame nda limbuka okuti ocina cimue vetimba liange ka ca kaile ciwa kuenje nda sandiliya ondotolo yimue. Eye wa kũlĩhĩsa ciwa ekalo liange. Eci ca ndi kuatisa oku kuata elomboloko liatiamẽla kocitangi cange kuenda oku kũlĩha olonjila vioku sakuiwa vi sangiwa, oco ndi tate ciwa uhayele wange.”— Nicole,a ukãi umue o kasi oku liyaka luvei u lingisa okuti, vepuluvi limue o sanjuka, vepuluvi likuavo o sumua.

“Ame nda limbuka okuti oku tanga Embimbiliya olonjanja viosi kumue lukãi wange, ci ndi kuatisa oku fetika eteke lovisimĩlo viwa haivio vi pamisa. Kuenje olonjanja viosi, kateke ana ka a lelukile, ocinimbu cimue Cembimbiliya ci vetiya utima wange.”— Peter, o kasi oku tala ohali omo liuvei woku sumua calua.

“Kosimbu ka ca lelukile oku sapuilako vakuetu catiamẽla kuvei wange, momo nda kuatele osõi yalua. Pole, ekamba limue lia ndi yevelela lutate kuenje lohenda yalua, lia seteka oku kuata elomboloko lionjila ndomo nda kala oku liyeva. Eye wa ndi kuatisa cocili oco ndi liyeve ciwa loku limbuka okuti si kasi lika liange.”—Ji-yoo, ukãi umue o kasi oku liyaka luvei wovisimĩlo u koka ombuanja kekalo lioku litekula.

“Embimbiliya lia siata oku ndi kuatisa oku kuata ocituwa ca pita pokati okuti, ndi kuata otembo yiwa yoku puyuka kuenda ndi yuvula oku talavaya calua. Olondunge evi, via siata oku ndi kuatisa oku liyaka lovitangi viovisimĩlo via siata oku ndi sakalaisa.”—Timothy, o kasi oku liyaka luvei u lingisa okuti, ovisimĩlo vi li pitulula olonjanja vialua.