Ndomo Yehova a Tambulula Olohutililo Vietu

1-2. Nye pamue tua siata oku lipula catiamẽla kolohutililo vietu?

OVE hẽ wa lipulile ale nda Yehova o kasi oku tambulula olohutililo viove? Nda oco, haveko lika. Vamanji valua va siatavo oku lipula ca piãla enene eci va lipita lovitangi. Eci tu tala ohali tu limbukavo ndomo Yehova a tambululavo olohutililo vietu.

² Tu konomuisi ndomo tu pondola oku kolela okuti Yehova o tambulula olohutililo viafendeli vaye. (1 Yoa. 5:15) Tu ka konomuisavo apulilo ndeci: Momo lie pamue ci molẽhela ndu okuti Yehova ka kasi oku tambulula olohutililo vietu? Volonjila vipi Yehova a tambulula olohutillilo vietu koloneke vilo?

YEHOVA PAMUE KA TAMBULULA OHUTILILO YETU NDOMO TUA LAVOKAILE

3. Momo lie Yehova a yonguila okuti tu likutilila kokuaye?

³ Ovisonehua vi tu sapuila okuti Yehova o tu sole calua kuenda tu kuete esilivilo kokuaye. (Hag. 2:7; 1 Yoa. 4:10) Eli olio esunga lieci a tu lalekela oku pinga ekuatiso kokuaye pocakati cohutililo. (1 Pet. 5:6, 7) Eye o yongola oku tu kuatisa oco tu kuate ukamba laye kuenda oku pandikisa kovitangi tu liyaka lavio.

4. Tua kũlĩha ndati okuti Yehova o tambulula olohutililo viafendeli vaye? (Talavo ociluvialuvia.)

⁴ Vembimbiliya tua siata oku tanga okuti, Yehova o tambulula olohutililo viafendeli vaye. Ivaluka hẽ ulandu umue? Ulandu umue wa Soma Daviti. Eye wa liyaka lohele yalua yovanyãli komuenyo waye kuenje olonjanja vialua wa pinga ekuatiso lia Yehova vohutililo. Onjanja yimue wa pinga ku Yehova hati: “A Yehova, yevelela ohutililo yange; Yevelela epingilo liange liekuatiso. Ndi tambulule vocili cove kuenda vesunga liove.” (Osa. 143:1) Yehova wa tambulula ohutililo ya Daviti poku u yovola. (1 Sam. 19:10, 18-20; 2 Sam. 5:17-25) Kuenje Daviti wa ponduile oku vangula lekolelo hati: “Yehova o kasi ocipepi la vosi vana vo vilikiya.” Etu tu pondolavo oku kuata ekolelo liaco.—Osa. 145:18.

5. Anga hẽ afendeli va Yehova kosimbu olohutililo viavo via tambuluiwa ndomo ovo va lavokaile? Tukula ulandu umue. (Talavo ociluvialuvia.)

⁵ Yehova pamue ka tambulula olohutililo vietu ndomo tua lavokaile. Eci oco ca pita lupostolo Paulu. Eye wa pinga ku Suku oco o upe “osongo ketimba.” Olonjanja vitatu Paulu wa likutilila oku tukula ocitangi caco. Anga hẽ Yehova wa tambulula olohutilo viaco? Oco, pole, ka ci lingile ndomo Paulu a ci lavokaile. Yehova kopileko ocitangi caco, pole, wo wĩha ongusu eye a sukilile oco amameko oku u vumba lekolelo.—2 Va Kor. 12:7-10.

6. Olonjanja vimue, momo lie ci molẽhela ndu okuti Yehova ka tambulula olohutililo vietu?

⁶ Olonjanja vimue, tu tambula etambululo lina okuti halioko tua lavokaile. Pole, tu koleli okuti Yehova wa kũlĩha ciwa eci ci tu kuatisa. Eye o pondola “oku linga calua okuti, ovina viosi tu pinga, ale tu sima, vi sule.” (Va Efe. 3:20) Omo liaco, etambululo liaye kolohutililo vietu, citava okuti liya votembo, ale lonjila yimue ka tua lavokaile.

7. Momo lie pamue tu sukilila oku pongolola ovina tua siata oku likutilila? Tukula ulandu umue.

⁷ Olonjanja vimue tu sukila oku pongolola olohutililo vietu eci tu limbuka cipi ocipango ca Yehova. Kũlĩhĩsa ulandu wa manji Martin Poetzinger. Noke lioku kuela, eye wa tualiwa kocila coku talisiwa ohali colo Nazista. Catete wa pinga ku Yehova oco o yovole kocila coku talisiwa ohali loku ka tata ukãi waye kuenda oku amisako lupange woku kunda. Noke liolosemana vivali eye ka limbukile okuti Yehova wa laikele oku u yovola. Kuenje wa fetika oku likutilila ndoco: “A Yehova mange ohenda ndekise eci ndi sukila oku linga.” Noke wa fetikavo oku sokolola ndomo vamanji vakuavo kocila caco va kala oku pandikisavo. Valua pokati kavo va kuatelevo esakalalo lakãi vavo kuenda omãla. Manji Poetzinger noke wa likutilila hati: “A Yehova nda pandula omo liocikele cange cokaliye. Ñuatise oku pamisa loku vetiya vamanji.” Eye wa pita anyamo ecea kocila coku talisiwa ohali poku linga ocina a pinga!

8. Ocina cipi ci kuete esilivilo tu sukila oku ivaluka eci tu likutilila?

⁸ Tu sukila oku ivaluka okuti Yehova o kuete ocipango cimue kuenda votembo eye a sokiya o ka ci tẽlisa. Vocipango caco mua kongela oku malako ovitangi viosi via siata oku koka ohali koloneke vilo ndeci, ovilunga, uvei kuenda olofa. Yehova o ka tẽlisa ocipango caye pocakati cusoma waye. (Dan. 2:44; Esit. 21:3, 4) Pole, osimbu otembo yaco ka ya pitĩlile Yehova o kasi oku ecelela okuti Satana o viala oluali.b Nda okuti Yehova wa maleleko ovitangi viomanu cilo, nda ca lekisa okuti uviali wa Satana u kasi oku litunda ciwa. Omo liaco, osimbu tu lavoka Yehova oku tẽlisa olohuminyo viaye, ka cilomboloka okuti eye wa tu yanduluka. Tu konomuisi olonjila vimue vi lekisa ovina Yehova a siata oku linga oco a tu kuatise.

NDOMO YEHOVA A TAMBULULA OLOHUTILILO KOLONEKE VILO

9. Yehova o tu kuatisa ndati eci tu sukila oku nõla onjila yimue? Tukula ocindekaise.

⁹ Eye o tu ĩha olondunge. Yehova wa likuminya oku tu ĩha olondunge eci tu sukila oku nõla onjila yimue yiwa. Etu tu sukila olondunge eci tu nõla onjila yimue mua kongela ekalo liomuenyo wetu wosi ndeci, nda tu nõlapo oku kuela, ale sio. (Tia. 1:5) Kũlĩhĩsa ulandu wa manji umue ukãi ka kuelele o tukuiwa Maria.c Eye wa kuatele esanju lioku talavaya ndukundi wotembo yosi eci a likũlĩha la manji umue ulume. Eye hati: “ Osimbu ukamba wetu wa kala oku livokiya tua fetika oku lisola omunu lukuavo. Nda kũlĩhĩle okuti nda sukilile oku nõla onjila yimue. Kuenje nda likutilila calua catiamẽla konepa yaco. Nda sukilile onumbi ya Yehova, pole, nda kũlĩhĩlevo okuti Yehova ka ponduile oku ndi nõlelako onjila yimue.” Eye wa limbuka okuti Yehova wa tambulula olohutililo viaye violondunge. Ndamupi? Osimbu a kala oku linga akonomuiso valivulu etu, wa tẽla oku sanga ovipama vio kuatisa oku sanga atambululo kapulilo a kuatele. Eye wa kapakovo alungulo awa a inaye. Elungulo liaco lia kuatisa manji Maria oku konomuisa ciwa onjila a yonguile oku nõla. Noke wa tẽla oku nõla onjila yimue yolondunge.

10. Ndomo ca tangiwa ku Va Filipoi 4:13, nye Yehova a siata oku linga oco a kuatise afendeli vaye? Tukula ulandu umue. (Talavo ociluvialuvia.)

¹⁰ Eye o tu ĩha unene woku pandikisa. Ndeci Yehova a linga lupostolo Paulu, eye o ka tu ĩhavo unene oco tu pandikise kovitangi. (Tanga Va Filipoi 4:13.) Konomuisa ndomo Yehova a kuatisa manji umue o tukuiwa Benjamin oco a pandikise kovitangi a kala oku liyaka lavio. Manji Benjamin eci a kala umalẽhe, eye kumue lepata liaye va kala kocila coku tila uyaki vo Afrika. Manji Benjamin hati: “Nda enda oku likutilila otembo yosi ku Yehova oku u pinga oco a nyĩhe ongusu yoku linga ovina viu sanjuisa. Yehova wa tambulula olohutililo viange poku nyĩha ombembua yo vutima, utõi woku amamako oku kunda kuenda alivulu, oco ndamameko oku pama konepa yespiritu.” Eye wamisako hati: “Oku tanga ovolandu a vamanji kuenda oku lilongisa ndomo Yehova a va kuatisa oku pandikisa, ca pamisa onjongole yange yoku amamako lekolelo.”

11-12. Yehova wa siata oku vetiya ndati vamanjetu oco a tambulule olohutililo vietu? (Talavo ociluvialuvia.)

¹¹ Eye o tu kuatisa pocakati cepata lietu konepa yespiritu. Vuteke osimbu Yesu ka ecele omuenyo waye ndocilumba, wa likutilila lolupili. Wa pinga ku Yehova oco ka ka ecelele vakuavo oku sima okuti eye ondingaĩvi. Yehova wa ci linga poku tuma umue pokati kovangelo oco a pamise loku kuatisa Yesu. (Luka 22:42, 43) Yehova o pondolavo oku tu kuatisa pocakati cevetiyo limue tu tambula votelefone, ale poku nyuliwa la vamanji. Vosi yetu tu pondola oku sanda apuluvi oku eca “ondaka yiwa” ku vamanji.—Olosap. 12:25.

¹² Kũlĩhĩsa ulandu wa manji umue o tukuiwa Miriam. Noke liolosemana vimue tunde apa ulume waye a fa, manji Miriam wa li yeva ulika kuenda wa yevavo esumuo lialua. Eye wa enda oku lila calua kuenda wa sukilile oku sapela lomunu umue. Eye hati: “Sia kuatele ongusu yoku tieñela umue kuenje nda likutilila ku Yehova. Osimbu nda kala oku lila kuenda oku likutilila, o telefone yange ya kala oku vilikiya. Ukulu umue wekongelo haiye ekamba, eye wa kala oku tieña.” Manji Miriam wa tambula elembeleko liukulu waco wekongelo kumue lukãi waye. Eye wa kolelele okuti Yehova eye wa vetiya manji yaco oco o tieñele.

13. Lombolola ulandu umue ndomo Yehova a vetiya vana ka vo fendela oku tambulula olohutililo vietu.

¹³ Yehova o pondola oku vetiya vana ka vo fendela. (Olosap. 21:1) Olonjanja vimue Yehova o tambulula olohutililo viafendeli vaye, poku vetiya vana ka vo fendela oco va va kuatise. Ndeci, eye wa vetiya Soma Aretasesete oku ecelela Nehemiya oku tiukila ko Yerusalãi, oco a ka kuatise koku tumbulula olupale. (Neh. 2:3-6) Koloneke vilo, Yehova o pondolavo oku vetiya vana ka vo fendela oco va tu kuatise eci tu sukila.

14. Ulandu wa manji Soo Hing wa ku pamisa ndati? (Talavo ociluvialuvia.)

¹⁴ Manji umue londuko Soo Hing, wa limbuka okuti Yehova wo kuatisa pocakati ca ndotolo yaye. Omõlaye o kasi oku liyaka locitangi cinene cutue. Eci eye a lipita locilunga cimue cinene, manji Soo Hing kumue lulume waye va siapo upange wavo oco va ko tate. Kuenje ca va kokela ocitangi cekambo liolombongo. Manji Soo Hing, wa liyeva okuti ka ponduile vali oku pandikisa kovitangi viaco. Yu wa likutilila ku Yehova lutima wosi oku pinga ekuatiso. Noke ndotolo wa sanda onjila yoku u kuatisa kumue lepata liaye. Ovo va fetika oku tambula ekuatiso kombiali kuenda oku sanga ocitumãlo cimue ciwa coku kala. Manji Soo Hing wa popia hati: “Tua limbuka eka lia Yehova oku tu kuatisa kocitangi eci. Ocili okuti eye ‘Ukuakuyeva ohutililo.’”—Osa. 65:2.

CI SUKILA EKOLELO OKU SANDA LOKU TAVA ETAMBULULO LIA YEHOVA

15. Nye ca kuatisa manji umue oku limbuka okuti Yehova wa kala oku tambulula olohutililo viaye?

¹⁵ Olohutililo vietu pamue, ka vi tambuluiwa lonjila yimue yi komõhisa. Pole, atambululo tu tambula, ana tu sukila oco tu amameko lekolelo ku Isietu wokilu. Omo liaco, tu sukila oku lavulula ndomo Yehova a tambulula olohutililo vietu. Manji umue ukãi o tukuiwa Yoko, wa liyevele ndu okuti Yehova ka kaile oku tambulula olohutililo viaye, pole, noke wa fetika oku soneha ovina eye a enda pinga ku Yehova. Noke yotembo yimue, wa kũlĩhĩsa vokalivulu kaye a sonehele yu wa limbuka okuti Yehova wa tambulula onepa yalua yolohutililo viaye toke muẽle vina vio limbile ale. Otembo lotembo tu sukila oku talama loku sokolola ndomo Yehova a tambulula olohutililo vietu.—Osa. 66:19, 20.

16. Tu lekisa ndati ekolelo kolohutililo vietu? (Va Heveru 11:6)

¹⁶ Etu ka tu lekisa lika ekolelo poku likutilila ku Yehova, pole, tu tavavo ndomo eye a tambulula olohutililo vietu ndaño lonjila yimue ka tua lavokaile. (Tanga Va Heveru 11:6.) Kũlĩhĩsa ulandu wa manji Mike lukãi waye Chrissy. Ovo va kuatele ocimãho coku talavaya ko Betele. Manji Mike hati: “Tua pita anyamo alua loku likutilila ku Yehova catiamẽla kocimãho caco, pole, lalimue eteke va tu kovongele.” Manji Mike lukãi waye Chrissy vamamako oku kolela okuti Yehova wa kũlĩhĩle ciwa upange va laikele oku u lingila. Kuenje vamamako oku linga cosi va tẽla poku talavaya ndakundi votembo yosi, kocitumãlo kuli esukila liakundi kuenda oku kuatisa koku tunga ovitumãlo viusoma. Cilo va kasi kupange woku nyula akongelo. Manji Mike wamisako hati: “Yehova halonjanja viosiko a tambulula olohutililo vietu lonjila tua lavokaile, pole, eye wa siata oku tu tambulula lonjila yimue ya velapo haiyo ka tua lavokaile.”

17-18. Ndomo ca lekisiwa Kosamo 86:6, 7, nye tu pondola oku kolela?

¹⁷ Tanga Olosamo 86:6, 7. Ukualosamo Daviti wa kũlĩhĩle okuti Yehova wa yeva loku tambulula olohutililo viaye. Ove o pondola oku kuata ekolelo limuamue. Ovolandu tua konomuisa vocipama cilo, a tu ĩha ekolelo liokuti Yehova o pondola oku tu ĩha olondunge longusu tu sukila oco tu pandikise. Eye pamue o vetiya vamanji, ale vana okuti, ka vo fendela oco va tu kuatise lonjila yimue.

¹⁸ Ndaño okuti Yehova pamue ka tambulula olohutililo vietu lonjila tua lavokaile, pole, tua kũlĩha okuti o ka vi tambulula. Yehova o ka tu ĩha ovina tu sukila vepuluvi tu sukila. Omo liaco, amamako oku likutilila loku kolela okuti, Yehova o ku tata cilo kuenda o ka “tẽlisa olonjongole viovina viosi vi kasi lomuenyo” voluali luokaliye lu keya.—Osa. 145:16.