Anga Suku o Yevelela Olohutililo Viange?

Etambululo Liembimbiliya

Eye o yevelela. Embimbiliya kuenda ulandu womuenyo womanu vamue, u lekisa okuti, Suku o yevelela olohutililo. Embimbiliya li popia okuti: ‘Vosi va sumbila Suku, eye o va muisa evi va yongola. O yeva uteto wavo, o va popela.’ (Osamo 145:19) Pole, cikale okuti Suku o yevelela olohutililo viove ale sio,cosi ca tamba ño kokuove.

Ceci Suku a yongola komanu vana va likutilila kokuaye

• Likutilila ku Suku, ku ka likutilile ku Yesu, ku Maria, kolosandu, kovangelo ale koviñumañuma. Yehova Suku eye lika “Ukuakuyeva ohutililo.”—Osamo 65:2.

• Linga ohutililo yi litava locipango ca Suku, ale lolonumbi viaye vi sangiwa Vembimbiliya.—1 Yoano 5:14.

• Likutilila vonduko ya Yesu oco o lekise okuti wa kapako ocikele caye. Yesu wa popia hati: “Lomue iya ku Isia, te lame.”—Yoano 14:6.

• Poku likutilila ku ka kuate atatahãi, pinga ekolelo lialua nda o sukila.—Mateo 21:22; Luka 17:5.

• Liketisa kuenda kala ukuacili. Embimbiliya li popia hati: “Yehova, ndaño unene ca piãla, haimo ivaluka olohukui.”—Osamo 138:6.

• Pandikisa. Yesu wa popia hati: “Lipiliki oku pinga kuenje vo wĩhi.”—Luka 11:9.

Ceci ka ci tateka Suku oku yevelela olohutililo

• Ekova liove ale koku wa citiwila. Embimbiliya li popia okuti: “Suku hokuacameko, pole, volofeka viosi omunu una u sumbila loku linga ovina via sunguluka, o taviwa laye.”—Ovilinga 10:34, 35.

• Ndomo o kala poku likutilila. O pondola oku likutilila ku Suku osimbu wa tumãla, oku petama, oku kekama, ale oku talama.—1 Asapulo 17:16; Nehemiya 8:6; Daniele 6:10; Marko 11:25.

• Nda o likutilila lolukandi ale vutima. Suku o yevelela ndaño muẽle olohutililo vi lingiwa vutima okuti lomue wa ci kũlĩha.—Nehemiya 2:1-6.

• Nda ovitangi viove vialua ale vitito. Suku o ku vetiya oku ‘yeka kokuaye ovilemo viove viosi, momo eye o ku tata.’—1 Petulu 5:7.