Nye Embimbiliya li Popia Catiamẽla Kelianjo Lioku Linõlela?
Etambululo Liembimbiliya
Suku wa tu kapako poku tu ĩha elianjo lioku nõla, okuti ocituwa coku nõla onjila tu yongola oku kuama. Omo liaco, Suku hayeko wa siata oku nõla ovina tu yongola oku linga ale oku koka ovina vi pita vomuenyo wetu. Kũlĩhĩsa eci Embimbiliya li longisa.
Suku wa lulika omanu lesetahãlo liaye. (Efetikilo 1:26) Ca litepa lovinyama ceci okuti ovio ka vi kuete uloño woku sokolola, pole, etu tua lulikiwa lesetãhalo lia Suku, momo tu pondola oku lekisa ovituwa ndeci: Ocisola kuenda esunga. Etu tu kuetevo elianjo lioku li nõlela ndeci Ululiki wetu a kuete.
Onjila tu nõla oyo yi lekisa ekalo lietu lio kovaso yoloneke. Embimbiliya li tu vetiya oku “nõla omuenyo ... poku pokola kondaka ya [Suku]” okuti oku nõla oku pokola kovihandeleko viaye. (Esinumuĩlo 30:19, 20) Nda ka tua kuatele elianjo lioku linõlela, ombanjaile yaco nda ka ya kuatele esilivilo. Suku ka tu kisika oku linga ovina eye a popia, pole, eye o tu sapuila hati: “Nda wa yevelile ovihandeleko viange! Nda ombembua yove nda ya lingile ndolui.”—Isaya 48:18.
Ovina tu linga cilo ovio vi lekisa ekalo lietu lio kovaso yoloneke. Oco tu litunde ciwa kovina viosi, tu sukila oku likolisilako. Embimbiliya li popia hati: “Cosi eka liove lia kuata ci linga longusu yove.” (Ukundi 9:10) Olio li popiavo ndoco: “Okuliangiliya kukuambili ku muisa elau.”—Olosapo 21:5.
Elianjo lioku linõlela, ombajaile yimue yi kuete esilivilo ya tunda ku Suku, momo yi tu ecelela oku nõla oku lekisa ocisola kokuaye “lutima wosi.”—Mateo 22:37.
Suku ka lavulula ovina viosi?
Embimbiliya li longisa okuti Suku ukuonene wosi kuenda lomue o pondola oku tumila unene waye. (Yovi 37:23; Isaya 40:26) Omo liaco, eye ka talavaya lunene waye oco a lavulule ovina viosi. Embimbiliya li popia okuti Suku wa “likandangiyile” Lombavulono, olupale lumue lua kala unyali wafendeli vaye. (Isaya 42:14) Cimuamue haico okuti, eye wa nõlapo oku ecelela omanu vana va talavaya lãvi lelianjo liavo lioku linõlela haivo va linga lavĩ vakuavo. Pole, Suku ka ka ecelela ovina viaco otembo ka yi pui.—Osamo 37:10, 11.