Esapulo 75
Amalẽhe va Kuãla ko Bavulono
SOMA Nevukandesa wa tuala ko Bavulono omanu vosi va Isareli vana va longisiwa ciwa. Pokati komanu vaco eye wa nõlelepo akuenje vamue va posoka haivo va loñoloha ciwa. Vamue pokati kavo vava o lete ndeti palo. Umue Daniele, vakuavo vatatu va Bavulono va valuka olonduko hati, Sadrake, Mesake kuenda Aved-Nego.
Nevukandesa wa sokiyile oku pindisa amalẽhe vaco oco va talavaye kelombe liaye. Noke lianyamo atatu, eye o ka nõla lika vana va loñoloha oco vo kuatise koku tetulula ovitangi. Soma wa yonguile okuti vokuenda kuoloneke viepindiso, amalẽhe vaco va kuata ongusu kuenda uhayele. Omo liaco, wa handeleka akuenje vaye oco va ece okulia kuwa kamalẽhe vaco. Wa handelekavo oku eca kokuavo ovinyu yina eye a nyua nyua lepata liaye.
Kũlĩhisa umalẽhe Daniele. Ove hẽ wa kũlĩha eci eye a kasi oku sapuila Asepenase kalei kakuenje velombe? Daniele wo sapuila okuti, eye ka yongola okulia komesa ya soma. Pole, Asepenase kalei kelombe wa saluka. Wa popia hati, ‘Soma eye wa sokiya ovina ulia levi unyua.’ Nda ene ka wa pameli ndamalẽhe vakuavo, soma onjipaya.’
Noke Daniele wa vangula lomunu una Asepenase a kapa kocikele coku lava eye [Daniele] lakamba vaye. Daniele wa popia laye hati: ‘Tu kape koseteko ci soka ekũi lioloneke. Tu ĩhe ovilia viaño viocumbo, kuenda ovava. Noke vanja ovipala vietu levi viamalẽhe vana va lialia okulia kua Soma oco o limbuke ava va velapo.’
Kalei wa tava kondaka yaco. Kesulilo lioloneke viaco ekũi, ovipala viavo vieya oku posoka kuenda va neta ciwa okuti amalẽhe vakuavo ci sule. Noke kalei kaco wa vopa ovilia via soma okuti va lialia lika okulia kuocumbo.
Kesulilo lianyamo atatu, amalẽhe vaco veya oku tualiwa ku soma Nevukandesa. Noke lioku vangula lamalẽhe vosi, soma wa limbuka okuti, Daniele lakamba vaye va kuete olondunge viocili. Omo liaco, wa va kapa kelombe liaye. Soma wa enda loku pula ovina vimue ku Daniele la Sadrake la Mesake kuenda Aved-Nego. Wa enda loku ecavo kokuavo ovitangi vimue via tĩla oco va vitetulule. Pole, Daniele lakamba vaye va kuatele olondunge vialua okuti ovitunda via soma lolonoño viaye, ci sule.