Akuenje Vakuãla va Pokola ku Yehova

Eci Nevukandesa a tuala olombuale vio Yuda ko Bavulono, wa nõla kesongo kelombe umue o tukuiwa hati, Asepenase oco a va songuile. Nevukandesa wa sapuila Asepenase oco a sandiliye vana va kasi luhayele uwa kuenda akuenje vana okuti va loñoloha calua pokati ka vakuavo. Akuenje vaco va sukilile oku pindisiwa vokuenda kuanyamo atatu. Epindiso liaco lia ponduile oku va pongiya oco va kale vakesongo va velapo vo Bavulono. Akuenje va sukilile oku lilongisa oku tanga, oku soneha, kuenda oku vangula elimi lio ko Bavulono okuti o Akadianu. Ovo va sukililevo oku lia okulia kuna soma kuenda vakuelombe liaye va lialia. Pokati kakuenje vaco pa kala akuenje vakuãla okuti Daniele, Hananiya, Misaeli kuenda Asariya. Asepenase wa eca kokuavo olonduko viokaliye vio ko Bavulono viokuti Beltesiatare, Sadrake, Mesake, kuenda Aved-Nego. Anga hẽ epindiso liaco lia ponduile oku va kokela oku liwekapo oku vumba Yehova?

Akuenje vaco vakuãla va nõlelepo oku pokola ku Yehova. Ovo va kũlĩhĩle okuti ka va pondola okulia ovina soma a lialia, momo Ocihandeleko ca Yehova ci popia okuti, vimue pokati kovikulia viaco via vĩha. Omo liaco, va sapuila Asepenase hati: ‘Linga ohenda ku ka tu ĩhe okulia kua soma.’ Asepenase wa tambulula hati: ‘Nda ka wa lili kuenje soma o mõla okuti vu vela, eye o ndi ponda!’

Daniele wa kuata ocisimĩlo cimue. Eye wa popia lukuakuava okulia hati: ‘Panga ohenda tu ĩhe lika ovilia vio vocumbo kuenda ovava vokuenda kuoloneke ekũi. Noke tu sokise lakuenje va lialia okulia kua soma.’ Ukuakuava okulia wa tava.

Noke yoloneke ekũi, Daniele lakamba vaye vatatu ovipala viavo vieya oku posoka kuenda va neta ciwa okuti akuenje vakuavo ci sule. Yehova wa sanjukile calua omo akuenje vaco va pokola kokuaye. Kuenje Yehova wa eca ku Daniele ukũlĩhĩso oco a kuate elomboloko liovinjonde kuenda liolonjoi.

Eci epindiso lia pitĩla kesulilo, Asepenase wa tuala akuenje ku Nevukandesa. Soma wa sapela lavo kuenda wa limbuka okuti Daniele, Hananiya, Misaeli kuenda Asariya va loñolohele calua kuenda va lungukile okuti akuenje vakuavo ci sule. Eye wa nõla akuenje vaco vakuãla oco va talavaye kelombe liaye. Olonjanja vimue soma wa enda oku va pinga olonumbi oco ku tetuluiwe ovitangi vimue via tatama. Yehova wa va lingisa okuti va kuata olondunge vialua okuti alume vosi va loñoloha va soma kuenda vakualumbu ci sule.

Ndaño okuti Daniele, Hananiya, Misaeli kuenda Asariya va kala ndovingendeleyi vofeka yikuavo, pole, ka va ivaleleko okuti ovo va kala afendeli va Yehova. Ove hẽ olonjanja viosi o ka ivalukavo Yehova ndaño ceci olonjali viove ka vi kasi love?