Ove Citava Okuti o Mioñolola Oku Sokolola Kuove
YEHOVA SUKU wa lulika owoño womanu luloño u komohĩsa woku ivaluka. Eye wa wu lulika lepondolo limue okuti ka wu ivala lacimue ca kapiwamo. Owoño womanu ndomo wa lulikiwa, ci litava locipango ca Suku cokuti omanu nda va kala otembo yenda ño hũ.—Osa. 139:14; Yoa. 17:3.
Pole, pamue o limbuka okuti onepa yalua yovina o kapa vutue wove, vi ku limba. Cimolẽha soketi ku vi ivaluka vali eci o vi yongola. Nye hẽ o pondola oku linga oco o mioñolole oku sokolola kuove?
Lekisa Onjongole
Oku lekisa onjongole, ku kuete esilivilo liocili koku mioñolola oku sokolola kuetu. Nda okuti oku konomuisa loku lekisa onjongole komanu kuenda kovina vi pita ocipepi letu ca linga ocituwa cetu, ovisimĩlo vietu vika vetiyiwa cocili. Kuenje cika leluka vali kokuetu oku lekisa onjongole yimuamue kueci tu tanga ale kueci tu yeva okuti ci kuete esilivilo liocili.
Ca siata calua komanu oku kala lekatanga lioku ivaluka olonduko via vakuavo. Pole, etu Tuakristão tua kũlĩha okuti omanu va kuete esilivilo liocili. Ndeci vamanjetu Akristão la vana tua siata oku kundila, kuenda vana tu sapela lavo eteke leteke poku tata ovina viatiamẽla komuenyo. Nye cika tu kuatisa oku ivaluka olonduko vina tu sesamẽla oku patekela? Upostolo Paulu wa tukula eci ci pitahãla 26 kolonduko via vana va kala vekongelo eye a sonehelele. Cimue ci lekisa okuti wa va kapeleko muẽle, ceci okuti eye ka tukuile lika olonduko viavo, pole wa tukulavo ovina vimue viatiamẽla kokuavo. (Va Rom. 16:3-16) Koloneke vilo, vimue Olombangi via Yehova okuti olomitavaso vi nyula akongelo, ndaño okuti osemana losemana vi pita kakongelo añi añi, lopo vi kasi loku linga ciwa kueci catiamẽla koku ivaluka olonduko via vamanji. Nye hẽ ca siata oku va kuatisa? Ovo, va likolisilako oku pitolola oku tukula onduko yamanji va kasi oku vangula laye. Va likolisilakovo oku sokisa onduko yomunu locipala caye. Handi vali, ovo va pita otembo yalua kupange woku kunda la vamanji vañi vañi, kuenda va kalavo kumosi lavo poku lia. Eci o ñualehẽla la umue, anga hẽ ivaluka onduko yaye? Tete, sokolola esunga limue liocili lieci o kuetele oku ivaluka onduko yaye, noke seteka oku kuama vimue pokati kolonumbi via lekisiwa konano.
Oku ivaluka eci o tanga, ci kuetevo esilivilo liocili. Nye ci pondola oku ku kuatisa oco o mioñolohe konepa eyi? Oku lekisa onjongole loku kuata elomboloko, ocina cimue ci kuete esilivilo liocili konepa eyi. Ove o sesamẽla oku lekisa onjongole yocili kueci o kasi loku tanga, okuti o luluvalela lutate wocili kocina caco. Nda osimbu o kasi loku tanga ovisimĩlo viove vi kasi kumue kuiñi, kuka patekela lacimue. Oka kuata vali elomboloko liwa lieci o kasi loku tanga, nda wa sokisa eci o kasi loku tanga lovina wa kũlĩha, ale lukũlĩhĩso o kuete ale. Lipula ove muẽle ndoco: ‘Ndamupi, kuenda otembo yipi ndika kapako esapulo eli vomuenyo wange? Ndamupi esapulo eli ndi pondola oku kuatisa lalio vakuetu?’ Oka kuata vali elomboloko liwa lieci o tanga, poku tanga ulala wolondaka okuti ku tangi ño ondaka yimosi vonjanja. Cika ku leluka vali oku patekela ovisimĩlo loku limbuka atosi a velapo, okuti oka a ivaluka lonjanga.
Sandiliya Otembo Yoku Pitulula Eci wa Tanga
Vakuoloño woku longisa, va siata oku popia hati, oku pitulula ku kuete esilivilo liocili. Vekonomuiso limue lia lingiwa, ulongisi umue wa popia hati, ekukutu limosi tu pesila koku pitulula eci tua tanga vonjanja yaco, li vokiya calua epondolo lietu lioku patekela eci tua tanga. Omo liaco, eci o mãla oku tanga ocipama cimue ale ceci o tanga onepa yalua yocipama caco, lutima wove, pitulula ovisimĩlo via velapo oco o vi patekele muẽle ciwa. Sokolola ndomo volondaka viove muẽle o pondola oku lombolola atosi o kaliye wa lilongisa. Poku ivaluka lonjanga ocisimĩlo cimue wa tanga vonjanja yaco, cika ku kuatisa oku patekela etosi liaco vokuenda kuotembo yalua.
Noke, voloneke vika kuamamo, sandiliya otembo yoku pitulula eci wa tanga poku vangula la umue catiamẽla kondaka yaco. Ci tava okuti o ci vangula la umue ukuepata, umue manji vekongelo, umue u talavayeli kumosi, umue u tangeli kumuamue kosikola, umue u kasi ponsongo yimuamue, ale la umue o vangula laye kupange woku kunda. Ku ka seteke oku pitulula lika atosi a velapo, puãi pitululavo ovinimbu Viembimbiliya via kongeliwa vocipama caco. Nda wa ci linga, cika ku kuatisa oku patekela ovina via velapo wa tanga; kuenda cika kuatisavo vakuene.
Sokolola Ovina vi Kuete Esilivilo
Handi vali, kilu lioku pitulula eci wa tanga ale, loku ci sapula ku vakuene, oka limbuka okuti oku sokolola ovina via velapo wa lilongisa, cika ku kuatisa calua. Asonehi Vembimbiliya, Asafe la Daviti, oco va linga. Asafe wa popia hati: “Sinumula ovilinga via Yehova. Njivaluka ovikomo viove vionahũlu. Sokolola upange wove wosi. Sinyanyeha ovilinga viove vinene.” (Osa. 77:11, 12) Cimuamue haico Daviti a popia, hati: “Hu sokoluaila pokulendela kuteke,” kuenda “Njivaluka oloneke vionahũlu. Sokolola ovilinga viove viosi.” (Osa. 63:6; 143:5) Ove hẽ o ci lingainga?
Oku sokolola kuaco lundongosi kumue loku luluvalela kovilinga via Yehova, kovituwa viaye, kuenda kovolandu atiamẽla koku tẽlisiwa kuocipango caye, cika ku kuatisa vali calua okuti haku patekelako lika ovina wa tanga. Nda okuti oku sokolola kuaco kua linga muẽle ocituwa cove, utima wove uka patekela ovina vialua vi kuete esilivilo liocili. Eci cika ku kuatisa oku pongolola utima wove oco u kale wokaliye. Ovina oka ivaluka, vika lekisa muẽle ovisimĩlo viutima wove.—Osa. 119:16.
Ocikele Cespiritu Sandu
Eci tu likolisilako oku ivaluka ovopange a Yehova kuenda ovina Yesu Kristu a vangula, tu limbuka okuti ka tua siwile ulika. Vuteke Yesu a kala loku lavoka olofa viaye, wa sapuila olondonge viaye hati: ‘Ovina evi nda vi vanguila lene osimbu ñasi handi lene. Puãi ñuatisi, haeye espiritu sandu, lina Isia a tumila vonduko yange, liu longisi ovina viosi, kuenda liu wivaluisi ovina viosi nda popia lene.’ (Yoa. 14:25, 26) Eci Yesu a popia olondaka evi, Mateo la Yoano va kalapovo. Kuli hẽ uvangi u lekisa okuti espiritu sandu lia va kuatisa muẽle? Ocili okuti kuli! Pana okuti pa pita anyamo ecelãla tunde eci Yesu a ci popia, Mateo wa malusula oku soneha ulandu watete watiamẽla komuenyo wa Kristu. Vulandu waco, wa kongelamo eci catiamẽla Kohundo Yavelapo Yesu a lingila Komunda, kumue lulandu wondimbukiso yoku tukuluka kua Kristu, kuenda yesulilo lioluali. Eci pa pita akũi epandu kanyamo lanyamo vatãlo tunde kolofa via Yesu, upostolo Yoano wa soneha Evangeliu liaye oku kongelamo ovolandu atiamẽla kueci Ñala Yesu a popia kuteke wa sulako a kala lolondonge viaye. Ocili okuti, Mateo la Yoano va ivaluka ovina vialua Yesu a popia levi a linga eci a kala lavo. Pole, espiritu sandu lia va kuatisa calua oco ka va ka ivaleko lacimue ci kuete esilivilo Yehova a yonguile okuti ci sonehiwa Vondaka yaye.
Anga hẽ espiritu sandu li kuatisavo omanu va Suku koloneke vilo? Li kuatisa! Ocili okuti, espiritu sandu ka li kapi vovitima vietu ocina cimue okuti ka tua la ci lilongisa. Pole, olio li kala oñuatisi koku tu ivaluisa ovina via velapo tua lilongisa ale osimbu. (Luka 11:13; 1 Yoa. 5:14) Omo liaco, eci tu sukila oku ivaluka cimue, espiritu sandu li vetiya ovisimĩlo vietu oco tu ‘ivaluke olondaka via popiwa lovaprofeto va kola, locihandeleko ca Ñala, haeye Upopeli wetu.’—2 Pet. 3:1, 2.
‘Kuka Ivaleko’
Yehova olonjanja vialua wa lungula va Isareli hati: “Koka ivaliko.” Eci ka ci lekisa okuti eye wa yonguile oco ovo va ivaluke muẽle ovina viosi, okuti ka va kambisapo lacimue. Yehova wa yonguile okuti, ovo ka va pitisa enene kovaso ovina viavo muẽle, okuti va ivalako ovina Eye a va lingila. Ovo va sesamẽlele oku ivaluka ovikomo Yehova a va lingila, eci a va yovuila peka liungelo wa ponda olonuñulu viosi vioko Egito, leci Yehova a tepa ovava o Vokalunga Kakusuka oco va pite, noke wa tokeka vali ovava aco kuenje Fareo lolohoka viaye va filamo. Va Isareli va sesamẽlele oku ivaluka okuti, Suku wa va ihĩle Ocihandeleko caye Komunda Sinai, kuenda wa va songuila eci va pita vekango, toke eci va pitila Vofeka Yohuminyo. Ovo va va sapuilile hati, koka ivaliko, ci lomboloka okuti, ovo va sesamẽlele oku ivaluka ovina viaco otembo yosi yomuenyo wavo.—Esin. 4:9, 10; 8:10-18; Etu. 12:24-27; Osa. 136:15.
Etu tu sukilavo oku lunguka oco ka tuka linge vakuakuivala. Osimbu tu amamako loku liyaka lovitangi vieteke leteke, tu sukila oku ivaluka Yehova. Loku ivalukavo ocisola eye a lekisa kokuetu poku tuma Omõla waye wongunga oco a file akandu etu, loku tu yuluila onjila yoku tambula omuenyo ko pui koloneke viya kovaso. (Osa. 103:2, 8; 106:7, 13; Yoa. 3:16; Va Rom. 6:23) Oku tanga Embimbiliya oloneke viosi, loku panga onepa kolohongele viekongelo, kuenda oku kuata onepa kupange woku kunda, cika tu kuatisa oku ivaluka ovina viaco evi vi komohĩsa.
Eci tu sima oku linga cimue, cikale cinene ale citito, tu sesamẽla oku ivaluka ovolandu aco, kuenda oku ecelela okuti, a vetiya ovisimĩlo vietu. Kuka ivaleko. Lupukila ku Yehova oco a ku songuile. Kuka tende ovina ndomo omanu vakuetimba liositu va siata oku vi tenda. Kuendavo kuka kolele kueci utima u ku vetiya oku linga, momo owo ka wa lipuile. Puãi, lipula ove muẽle ndoco: ‘Elungulo lipi ale ocihandeleko cipi ci sangiwa Vondaka ya Suku, okuti ndi kuete oku ci kuama oco ci ndi kuatise oku nõla eci ndi sesamẽla oku linga?’ (Olosap. 3:5-7; 28:26) Ove ku tẽla oku ivaluka lacimue okuti lalimue eteke wa ci tangele ale lalimue eteke wa ci yevele. Pole, osimbu ukũlĩhĩso wove locisola cove ku Yehova camamako, oka kuata ukũlĩhĩso walua espiritu lia Suku lika ku ivaluisa. Kuenda osimbu ocisola cove ku Yehova ci livokiya oka vetiyiwa oku linga eci cu sanjuisa.