Oku Tanga Ciwa

OVISONEHUA vi lombolola okuti onjongole ya Suku yeyi okuti omanu vosi “veya kukũlĩhĩso wocili.” (1 Tim. 2:4) Lonjila ya soka ndoyo, eci tu tanga Embimbiliya lolukandi, onjongole yetu yoku pitiya ukũlĩhĩso wocili, yi tu vetiya ndomo tu pondola oku tanga.

Uloño woku tanga lolukandi Embimbiliya kuenda alivulu a lombolola eci ci kasi Vembimbiliya, owo wa velapo kamalẽhe kuenda kakulu. Etu Tulombangi via Yehova, tu kuete ocikele coku sapula ku vakuetu ukũlĩhĩso wa Yehova kuenda olonjila viaye. Omu olonjanja vialua, mu kongela oku tangela omunu umue ale ocimunga cimue citito. Etu tu pondolavo oku tangela vakuepata lietu. Kosikola Yupange Wakristão, kuli apuluvi a sesama ku vamanji alume lakãi, amalẽhe lakulu, oku tambula elungulo oco va mioñolohe koku tanga kuavo.

Oku tangela Embimbiliya kowiñi, ocina cimue okuti tu kuete oku ci kapako cocili, cikale koku kunda cikale vekongelo. Embimbiliya lia tumiwa oku sonehiwa la Suku. Handi vali, “ondaka ya Suku yi kasi lomuenyo haiyo yi kasi lunene.  . . kuenda yi tepa utima womunu lasokoluilo lupuma haiyo yi limbuka ovisimĩlo lovipango viutima, NW.” (Va Hev. 4:12) Vondaka ya Suku mu sangiwa ukũlĩhĩso wocili una okuti ka u sangiwa konepa layimue yikuavo. Owo u pondola oku kuatisa omunu oco a kũlĩhe Suku umosi lika yocili loku kuata ukamba umue uwa laye kuenda oku liyaka ciwa lovitangi viomuenyo. Ondaka ya Suku yi lombololavo onjila yoku kuata omuenyo ko pui voluali luokaliye lua Suku. Ocimãho cetu cikale coku tanga Embimbiliya oco tu mioñolole uloño wetu woku tanga.​—Osa. 119:140; Yer. 26:2.

Ndomo tu Tanga Ciwa. Kuli olonjila vialua vioku tanga ciwa, pole oku tanga lutate okuo enanga liatete. Eci ci lomboloka oku likolisilako oku tanga ciwa eci ca sonehiwa. Kuata utate, ku ka tẽhe olondaka kuenda ku ka vokiyeko ale oku lomboka olondaka omo via lisetahãla la vikuavo.

Oco o tange ciwa, ove o sukila oku kuata elomboloko lieci ci sangiwa vocipama caco cosi. Eci cika sukila eliangiliyo lia suapo konepa yove. Vokuenda kuotembo, osimbu o kuata uloño woku tanga kuenda woku katula utue oku vanja komanu, eci cika ku kuatisa oku mioñolola vali ciwa oku tanga kuove.

Olondimbukiso vi kasi kolondaka ale atosi, vi kuete esilivilo lia velapo koku soneha elimi limue. Atosi, a lekisa apa tu sukila oku talama, a lekisavo ndomo tu tula, kuenda apa pa sukila oku lelenya ondaka. Valimi amue, ekambo lioku pongolola ocileñi eci ci kisikiwa latosi, ci pondola oku pongolola epulilo limue vocipama, ale oku pongolola elomboloko liacosi. Pole, olonjanja vimue, esilivilo liatosi liatiamẽla calua ko gramatika. Valimi alua okuti, ca tĩla calua oku tanga ciwa nda okuti ku kuata utate woku kapako olondimbukiso vi kasi kolondaka, cikale vina via sonehiwa, ale vina ka via sonehiwile okuti vi lomboloka ño poku tanga ocipama cosi. Ovio vi pongoluisa olondaka oku viatiamẽla. Kũlĩhĩsa ciwa lutate ndomo kelimi liove atosi kuenda olondimbukiso viaco vi kapiwa kolondaka. Eyi oyo osapi yoku tanga kumue ku lomboloka ciwa. Ivaluka okuti ocimãho cove oku pitiya ovisimĩlo, hakuvangulako lika olondaka.

Ci sukila oku likisa oku tanga, oco o kuate uloño woku tanga ciwa. Tanga ño ocinimbu cimue, loku ci pitulula olonjanja vimue toke eci ove o tẽla oku tanga okuti ku semũla vali. Noke amako locinimbu cikuavo. Oku sulako likolisilako oku tanga amẽla añi añi ocipama okuti ku tẽha tẽha olondaka loku vi pitolola, ale oku pitiya lãvi olondaka vimue. Noke yoku eca elianga eli, pinga umue oco a lavulule ndomo oku tanga kuove kua suñama kuenda oco a ku lekise apa wa lueya.

Kolonepa vimue violuali, ekambo liocinyi lia siatavo oku tateka oku tanga ciwa. Nda ci tava oku linga cimue oco ocitangi caco ci tetuluiwe, emioñoloho lioku tanga, olio lika lieca onima yiwa.

Vepuluvi limue, va manji okuti va tanga ciwa, ci tava okuti va lalekiwa oco va tange onepa yimue vekongelo Kelilongiso Lielivulu kuenda Kelilongiso Liutala Wondavululi. Pole, omu mua kongela vali calua okuti hakutẽlako lika oku tanga ciwa. Oco o kale umue ukuakutangela ciwa owiñi vekongelo, o sukila oku kuata ocituwa ciwa coku tanga lika liove. Omu mu kongela oku limbuka okuti ondaka londaka yi kuete esilivilo liayo. Ku ka lomboke lavimue olondaka sanga ku kuata elomboloko lieci ci kasi loku lomboluiwa. Nda o lomboka olondaka, ndaño muẽle ceci o tanga lika liove, elomboloko liocinimbu wa tanga lika pengisiwa. Oku tanga lãvi ku tunda koku siapo oku kapako ondimbukiso yi sangiwa kolondaka ale koku siapo oku konomuisa apa ondaka yaco ya kapiwa. Likolisilako oco o kuate elomboloko liolondaka vi molẽha vocipama. Kũlĩhĩsavo olondimbukiso ale atosi atiamẽla kelomboloko liocipama. Ivaluka okuti ovisimĩlo, via siata oku lomboluiwa pokati kolondaka vialua vi kasi pamosi. Eci o kasi loku tanga lolukandi, kũlĩhĩsa ciwa ndomo o tanga olondaka vi kasi pamosi. Ku ka tange ondaka londaka. Elomboloko liwa lieci ove o kasi loku tanga, elinga limue lisilivila lioku pitiya ciwa ukũlĩhĩso poku tangela owiñi.

Eci oco ca pita la umue Ukristão ukulu wekongelo, una upostolo Paulu a sonehelele hati: “Kolisako oku tangela omanu.” (1 Tim. 4:13) Eyi onepa yimue vosi yetu tu sukila oku mioñolõha.