Lekisa Onjongole Kolonjeveleli

POKU kundila ocili Cembimbiliya komanu, tu sukila oku linga vali calua okuti hakuyukisako ño ovisimĩlo viavo lalomboluilo. Tu kuete oku vetiya ovitima viavo. Onjila yimue yoku ci linga oku lekisa onjongole yocili komunu lomunu pokati kolonjeveleli vietu. Onjongole yaco yi lekisiwa lolonjila viñi viñi.

Kapako Ovisimĩlo Violonjeveleli Viove. Upostolo Paulu wa kapaileko oku tuwa kuolonjeveleli viaye kuenda ovisimĩlo viavo. Eye wa lombolola hati: “Va Yudea nda linga lavo ndu Yudea okuti nganyala va Yudea. Vakuavihandeleko nda linga lavo ndukuavihandeleko okuti nganyala vakuavihandeleko ndaño ame siukuavihandelekoko. Ava ka va kolela ovihandeleko nda linga lavo ndu ka kolela ovihandeleko, okuti nganyala ava ka va kolela ovihandeleko. Hamomoko okuti si kasi kovihandeleko via Suku, omo ocili ñasi kovihandeleko via Kristu. Ava va leñela nda linga lavo ndu wa leñela okuti nganyala ava va leñela. Nda linga lomanu vosi ndukuavina viosi okuti mopela vamue. Cosi ndi ci lingila ondaka yiwa, okuti lamevo ndi yi sumũlũhila.” (1 Va Kor. 9:​20-23) Ndamupi tu pondola oku “linga lomanu vosi ndukuavina viosi” oloneke vilo?

Nda ove o kuete epuluvi lioku vanja komanu, ndaño vakukutu amue ño, osimbu handi kua fetikile oku vangula lavo, ci tava okuti o limbuka onjongole yavo kuenda ekalo liavo. O tẽla hẽ oku limbuka eci va siata oku linga vomuenyo wavo? O tẽla hẽ oku limbuka cimue ci lekisa uvangi wetavo liavo? Kuli hẽ cimue ci lekisa ekalo liomuenyo wepata liavo? Oku tiamisila kueci wa konomuisa, ci tava hẽ okuti o tiamisila ombangulo yove kovina viaco oco yi vetiye vali olonjeveleli viove?

Oco ombangulo yove yi kale yimue yi vetiya, tete ci sukila oku konomuisa ciwa ndomo amẽla komanu vocikanjo cene. Kolonepa vimue, omu mu kongela omanu vana va tunda kolofeka vikuavo. Nda omanu vaco va kasi vocikanjo cove, wa sanga ale hẽ onjila yimue yiwa yoku va kundila? Omo Suku o yongola okuti: “omanu vosi va popeliwa ha veya kukũlĩhĩso w’ocili,” ci kale ocimãho cove oku kunda ondaka Yusoma lonjila yimue okuti yi vetiya omanu vosi o sanga.​—1 Tim. 2:4.

Yevelela Lutate. Ndaño okuti Yehova wa kũlĩha ovina viosi, eye o yevelela eci vakuavo va vangula. Vocinjoinjoi cimue Uprofeto Mikaya wa mõla Yehova, okuti o kasi loku vetiya ovangelo oco va vangule ocisimĩlo cavo kueci catiamẽla koku potolola ocitangi cimue. Noke, Suku wa tava kocisimĩlo ca umue ungelo kuenje wo wiha omoko yoku ci linga. (1 Olo. 22:19-22) Eci Avirahama a lekisa esakalalo omo lienyõleho lio Sodoma, Yehova wo wecelela oku lombolola ovisimĩlo viaye poku u yevelela lepandi. (Efet. 18:23-33) Kupange wetu woku kunda, ndamupi hẽ tu pondola oku setukula ongangu eyi ya Yehova yoku yevelela?

Vetiya omanu oku lombolola ovisimĩlo viavo. Linga apulilo a sunguluka, noke ecelela okatembo kamue oco ovo va tambulule. Yevelela lutate. Oku yevelela kuove kuocisola kuka va vetiya oku vangula loku lianja. Nda etambululo liavo li lekisa okuti va kuetele onjongole ocina cimue, lutate, linga apulilo akuavo atiamẽlako. Sandiliya oku va kũlĩha ciwa, pole ku ka linge apulilo alua atiamẽla komuenyo wavo. Va pandiya kovisimĩlo viavo, nda o pondola oku ci linga lutima wove wosi. Ndaño muẽle ku tava kovisimĩlo viavo, yevelela lesumbilo kueci va popia.​—Va Kol. 4:6.

Pole, tu sukila oku kuata utate oco onjongole yetu lomanu ka yi ka pitahãle vongave ya sunguluka. Oku lekisa onjongole komanu, ka ci tu ĩha omoko yoku likapa vomuenyo wavo. (1 Pet. 4:15) Tu sukila oku kuata utate oco okuti omunu, nda ukãi nda ulume, ka ka kuata ocisimĩlo cĩvi kueci catiamẽla konjongole tu kasi loku lekisa kokuaye. Omo eci ci tendiwa okuti ca sunguluka koku lekisa onjongole komanu ca litepa kofeka lofeka, ale komunu lomunu, ci sukila oku kuata olondunge.​—Luka 6:31.

Eliangiliyo olio ekuatiso lioku kala onjeveleli yiwa. Nda ondaka tuka vangula ya lomboloka ciwa vovisimĩlo vietu, cika tu kuatisa oku tulumũha kuenda oku yevelela vakuetu lonjila yimue yiwa. Eci cika lingisa okuti ovo va lianja kuenda cika va vetiya vali oku vangula letu.

Etu tu lekisa esumbilo ku vakuetu poku va yevelela. (Va Rom. 12:10) Eci cika lekisa uvangi wokuti tueca esilivilo kovisimĩlo viavo. Eci ci pondola oku va vetiya oku yevelela ciwa lutate kueci tu kuete coku vangula. Eli olio esunga lieci Ondaka ya Suku yi tu vetiyila oku ‘kala lutima woku yevelela, kuenda oku livala koku popia.’​—Tia. 1:19.

Kuatisa Vakuene Oku Amamako Kespiritu. Oku sakalala la vakuetu cika kuatisa oku ivaluka vana va lekisa onjongole kuenda oku va pasuisa onjanja yikuavo oco tu va kundile olondaka viocili vi sangiwa Vembimbiliya, vina va sukila kovimuenyo viavo. Eci o sokolola oku tiukila koku ka linga epasu, kapako cina wa kũlĩha ale, catiamẽla komunu. Pongiya ocipama cimue ci vetiya omunu. Lombolola esilivilo liocipama caco, loku va kuatisa oku limbuka ndomo ovo va pondola oku kuatisiwa leci va kasi loku lilongisa.​—Isa. 48:17.

Nda omunu wa situlula ondaka yimue ale ocitangi cimue ci kasi loku u sakalaisa, ci kapako ndepuluvi lioku u kundila olondaka viwa. Kuama ongangu ya Yesu, okuti olonjanja viosi wa lekasaile onjongole yoku kuatisa ava va sumua. (Mar. 6:31-34) Yuvula enyiko lioku eca etetululo limue lionjanga, ale lioku eca elungulo limue ka lia simiwile ciwa. Ocituwa caco ci lingisa okuti omunu o kuata ocisimĩlo cokuti onjongole yove laye hayociliko. Pole, lekisa ocikembe. (1 Pet. 3:8) Noke, konomuisa valivulu a lombolola eci catiamẽla Kembimbiliya, kuenje lekisa alomboluilo a kuatisa omunu oku tẽla oku potolola ekatanga liaco. Ocili okuti, ocisola o kuetele omunu waco cika ku teyuila koku sapula cimue eye a ku sapuila pokolika, te lika nda kuli esunga limue liwa lioku ci sapula.​—Olosap. 25:9.

Tu kuete oku lekisa onjongole, ca piãla vali ku vana tua siata oku longisa Embimbiliya. Volohutililo viove kongelamo asukila ondonge londonge, kuenda poku lipongiya kapako asukila aco. Lipula ndoco, ‘Enanga lipi likuavo ondonge yange yi sukila oku eca oco yamameko kespiritu?’ Locisola, u kuatisa oku limbuka eci Embimbiliya lalivulu “ukuenje wa kolelua haeye wa lunguka” a popia catiamẽla kenanga liaco. (Mat. 24:45) Kuli akalo amue okuti oku eca ño elomboluilo ka ci tẽla. Ove pamue o sukila oku lekisa kondonge ndomo ku kapiwako olonumbi vimue Viembimbiliya, loku lingila kumosi londonge cimue ci lekisa ndomo olonumbi viaco vi kapiwako.​—Yoa. 13:1-15.

Ci sukila esunguluko kuenda olondunge poku kuatisa omanu oku tiamisila ovimuenyo viavo kovihandeleko via Yehova. Omanu ka va kuete ovituwa vimuamue ndaño eloñoloho limuamue. Kuenda oku amamako kuavo kua litepa. Sunguluka kueci o kevelela ku vakuene. (Va Fil. 4:5) Ku ka va sindiliye oku linga apongoloko vomuenyo wavo. Pole, ecelela okuti Ondaka ya Suku kuenda espiritu liaye, olio li va vetiya. Yehova o yongola okuti omanu vo vumba lutima wavo muẽle haloku sindiliyiwako. (Osa. 110:3) Yuvula oku eca ovisimĩlo viove kovitangi vina okuti omunu eye muẽle o kuete oku nõlapo eci a linga, ndaño muẽle eye wa ku pinga oku eca ocisimĩlo cove kueci catiamẽla kocitangi caco. Kala lutate oco ku ka va nõleleko eci va linga catiamẽla kocitangi caco.​—Va Gal. 6:5.

Eca Ekuatiso Limuiwa. Ndaño okuti Yesu wa sakalalele tete lekalo liwa kespiritu liolonjeveleli viaye, eye wa kapelekovo asukila avo akuavo. (Mat. 15:32) Ndaño okuti ka tu kuete ovipako vialua, kuli kovina vialua tu pondola oku eca ekuatiso.

Oku kuata onjongole lomanu ci tu vetiya oku lekisa esumbilo. Nda otembo ka yi kasi ño enene ciwa okuti kuli ocituto ale utanya walua, okuti omunu ove o kasi oku vangula laye ci kasi loku u sakalaisa, nõlapo oku sondolokela kocitumãlo cimue cikuavo ci kasi ciwa, ale nõlapo oku amamako lombangulo keteke likuavo. Nda okuti poku ka linga epasu wa enda kelivala limue ka liecelela, sokiya oku tiukilako noke. Nda u o lisungue love ale omunu umue wa lekisa onjongole o kasi loku vela konjo ale kosipitali, lekisa onjongole laye poku u tumisa okokanda, ale oku u pasuisa. Nda ca sunguluka, ci tava okuti u pongiyilako kamue okakulia ale ocina cikuavo.

Osimbu olondonge Viembimbiliya viamamako kespiritu, pamue vi yeva ekambo vutima, omo ka va siatele vali oku kala otembo yalua lakamba vavo vosimbu. Lika ukamba lavo. Sokiya okatembo kamue noke yelilongiso Liembimbiliya, ale votembo yimue yikuavo oco o sapele lavo. Va vetiya oku kuata akamba vawa. (Olos. 13:20) Va kuatisa oku endaenda kolohongele. Kolohongele viaco, tumãla lavo pamosi kuenda va kuatisako oku tata omãla vavo oco vosi va pondole okupa esilivilo liwa kovipama.

Lekisa Onjongole Lutima Wove Wosi. Oku lekisa onjongole komanu, huloño umueko u lilongisiwa, pole ocituwa cimue covutima. Onjongole tu kuetele vakuetu yi lekisiwa volonjila viñi viñi. Ci lekisiwila ndomo tu yevelela vakuetu, kuenda ndomo tu vangula lavo. Ci lekisiwilavo kocisola kuenda kesumbilo tu lekisa ku vakuetu. Ndaño muẽle ka tu vangula lacimue ale ka tu lingi cimue, cika lekisiwila kocituwa cetu kuenda pupolo wetu. Nda okuti tu kuete muẽle onjongole la vakuetu, ovo vaka ci limbuka.

Esunga lia velapo lieci tu lekisila onjongole komanu lieli okuti poku ci linga, tu setukula ocisola kuenda ohenda ya Isietu wokilu. Eci ci kuatisa oku vetiyila olonjeveleli vietu ku Yehova kuenda kondaka eye a tu kundika oku sandeka. Omo liaco, osimbu wamamako loku kunda olondaka viwa, likolisilako okuti ku tiamisila utima wove koku ‘sokolola ovina viove lika, puãi koku sokolola ovina via vakuene.’​—Va Fil. 2:4.