Vetiya Utima

POKU kundila omanu, ove o sukilavo oku likolisilako oku vetiya ovitima viavo. Vembimbiliya, utima olonjanja vialua u tukuiwa oku lekisa oku litepa kuemolẽhiso lioketimba. Utima wocindekaise, u lomboloka ekalo liomunu lio vokati, ndomo eye a liyevite, cosi eye a sokolola, esunga lieci eye a ci sokoluila, kuenda ndomo ovisimĩlo viaco vi lilekisila kovilinga viaye. Kutima waco owu wocindekaise oko ondaka yocili yi kũliwa. (Mat. 13:19) Kuenda epokolo ku Suku te li tundilila kutima.​—Olosap. 3:1; Va Rom. 6:17.

Oco elongiso liove li vete kutima, luluvalela kovimãho evi: (1) Kũlĩhĩsa eci ci kasi ale, vovitima violonjeveleli viove. (2) Va vetiya oku kuata ovituwa viwa ndeci ocisola kuenda oku sumbila Suku. (3) Vetiya olonjeveleli viove oku konomuisa ovisimĩlo viutima wavo oco va pondole oku sanjuisa muẽle ciwa Yehova.

Lekisa Olondunge. Esunga lieci handi omanu ka va tavelele kocili lia litepa. Poku songola elilongiso Liembimbiliya, ove pamue o sukila okupa ovisimĩlo vĩvi vutima womunu kuenda oku lekisa ocili ci mãlako ovisimĩlo viaco. Olonjanja vimue, oku lekisa lika uvangi ci tẽla. Lipula ndoco: ‘Anga hẽ omunu u, o limbuka okuti eye o kuete esukila liovina viespiritu? Kocina cipi eye a tava? Kocina cipi eye ka tava? Momo lie eye a simĩla ndoco? Anga hẽ eye o sukila ekuatiso oco a siepo ovituwa vimue viu tateka oku tava ovikele viyilila koku kũlĩha ocili?’

Olonjanja vimue ka ca lelukile oku sanga esunga lieci omanu va tavela kocina cimue. Elivulu Liolosapo 20:5 lipopia hati: “Uloño vutima womunu u kasi ndovava a longa, puãi ukualondunge eye o tẽla oku upamo, NW.” Olondunge, uloño woku limbuka cimue ka ca lombolokele ciwa. Eci ci kisika oku konomuisa ciwa lutate.

Oku sapela hakuosiko okuti ku vanguiwa lomẽla. Poku vangula eci catiamẽla kondaka yimue, ci pondola oku koka apongoloko pupolo ale kondaka yondonge. Ocili okuti nda ove unjali, wa limbuka ale, apongoloko kovituwa viomãla vove ana a lekisa okuti ovo va kasi oku lipita lovina vimue viokaliye vomuenyo wavo. Ku ka siepo oku kapako olondimbukiso viaco. Momo ovio, vi lekisa eci ci kasi vutima womunu.

Apulilo a nõliwa ciwa, a pondola oku ku kuatisa oku tundisila posamua eci ci kasi vutima womunu. Ove ci tava okuti o pula ndoco: “O sima hẽ nye kueci . . . ?” “Nye hẽ wa kolelela okuti . . . ?” “Nda wa linga hẽ ndati, nda . . . ?” Pole, kuata utate oco ku ka linge apulilo alua enene komunu. Ove ci tava okuti o linga apulilo ove lutate loku pula ndoco, “Ci tava hẽ okuti ndu ku linga epulilo limue. . . ? Oku limbuka eci ci kasi vutima womunu ocina cimue okuti ka ca lelukile kuenda ka ci tava oku ci yayuisako. Ndomo ca siata, ci sukila okuti omunu o tu kũlĩha ciwa tete, kuenje oco a situlula noke eci ci kasi vutima waye. Pole, lopo handi ci sukila oku kuata utate oco omunu ka ka kuate ocisimĩlo cokuti ove o kasi loku pula eci catiamẽla kovina ka via ku tiamẽlele.​—1 Pet. 4:15.

O sukilavo oku lekisa olondunge kocituwa o tambuluiya laco eci o yeva. Ivaluka okuti ocimãho cove oku kũlĩha ciwa eci catiamẽla komunu, oco o tẽle oku limbuka olondaka Viembimbiliya vi ko vetiya vali. Likandangiya kocituwa coku pisa ovisimĩlo viaye vina ka via sungulukile. Pole, luluvalela koku limbuka ovisimĩlo vi kasi konyima yolondaka. Noke oka kũlĩha ndomo o tambulula, kuenda ondonge yove eci yi limbuka okuti ovisimĩlo viaye via ku lomboloka, eye oka sokolola vali lonjongole kueci wo sapuila.​—Olosap. 16:23.

Ndaño muẽle ceci o vanguila pokati kowiñi walua, ci tava okuti o vetiya omunu lomunu pokati kolonjeveleli. Nda wa vanja vanja kolonjeveleli viove loku kũlĩhĩsa ciwa povipolo viavo, kuenda wa linga apulilo ana a vetiya oku sokolola okuti ka a sukila etambululo, oka kuata ocisimĩlo cimue ci lekisa ndomo olonjeveleli viove vi liyevite kueci catiamẽla kondaka o kasi loku vangula. Nda wa kũlĩha ciwa olonjeveleli viove, lekisa esumbilo kokuavo loku kapako ekalo liavo. Kapako ocituwa comanu vosi vekongelo eci o va situluila Ondaka ya Suku.​—Va Gal. 6:18.

Vetiya Oku Kuata Ovituwa Viwa. Noke yoku kũlĩha eci omunu a tava, leci eye ka tava, kuenda esunga lieci ka tavela, ove ci tava okuti o vangula eci catiamẽlako oco u kuatise. Yesu noke yepinduko liaye, wa vetiya ovitima violondonge viaye poku va “situluila Ovisonehua” viatiamẽla kovina via pita eci handi ka file. (Luka 24:32) Omo liaco likolisilakovo oku lekisa elitokeko li kasi pokati keci ca pita vomuenyo womunu, leci eye a yongola kuenda eci a kasi loku lilongisa Vondaka ya Suku. Ove oka limbuka okuti wa vetiya utima wondonge eci eye muẽle a limbuka okuti: “Eci Oco OCILI!”

Poku vangula eci catiamẽla kohenda ya Yehova, kocisola caye, kocali caye, kuenda kesunguluko liolonjila viaye, ove o kuatisa vana o kasi loku longisa oco va kuatele ocisola Yehova. Eci o kuata otembo yoku lekisa kolonjeveleli viove ovituwa viwa Suku a lete komunu lomunu pokati kavo, ove o va ĩha esunga lioku kolela okuti ci tẽliwa oku kuata ukamba la Suku. Eci ci tẽlisiwa poku konomuisila kumosi lolonjeveleli viove, ovisonehua vimue ndeci Osamo 139:1-3, Luka 21:1-4, Yoano 6:44, kuenda poku va kuatisa oku limbuka ocisola ca piãla Yehova a kuetele omanu vaye vo kolela. (Va Rom. 8:38, 39) Va lomboluila okuti Yehova ka luluvalela kakandu etu, pole eye o kũlĩhĩsa omuenyo wetu wosi, kuenje o limbuka ombili yetu tu kuetele efendelo liocili, locisola tu kuetele onduko yaye. (2 Asap. 19:2, 3; Va Hev. 6:10) Eye toke muẽle ivaluka otuvina tutito tua tiamẽla kekalo lietu, kuenje oka nena vali komuenyo “vosi [vana] va kasi vayambo.” (Yoa. 5:28, 29; Luka 12:6, 7) Omo okuti omanu va lulikiwa lesetahãlo lia Suku, oku vangula eci catiamẽla kovituwa viaye, olonjanja vialua ci vetiya vali ovitima violonjeveleli.​—Efet. 1:27.

Utima womunu u vetiyiwavo eci eye a lilongisa oku kapako vakuavo ndeci Yehova a va kapako. Ocili okuti nda Suku o lekisa ocisola kokuetu, eye o lekisavo ocisola ku vakuetu, okuti ka lekisa olonepele viofeka omunu a citiwila, ale viekova liaye, ndaño ekalo liaye. (Ovil. 10:34, 35) Pana okuti omunu colomboloka ciwa, ci ko vetiya okupa vutima waye onya lolonepele, momo o kuete ono yimue yiwa Yembimbiliya yatiamẽla kondaka yaco. Eci ci ko kuatisa oku kala lombembua la vakuavo osimbu a lilongisa oku kapako ocipango ca Suku.

Ocina cikuavo cisilivila tu sesamẽla oku kuatisa omanu tu lilongisa lavo oco va ci linge, oku kuatela esumbilo Suku. (Osa. 111:10; Esit. 14:6, 7) Oku kuatela esumbilo liaco lia piãla ku Suku, ci vetiya omunu oku linga cina okuti nda ka ca tẽliwile oku ci linga longusu yaye muẽle. Poku vangula eci catiamẽla kovopange a komohĩsa a Yehova kuenda eci catiamẽla kocali caye calua, kuatisa omanu oku kuata usumba woku lueyela Suku.​—Osa. 66:5; Yer. 32:40

Kũlĩhĩsa ciwa okuti olonjeveleli viove ca va lomboloka okuti Yehova o kapako ovilinga viavo. Eye ukuacikembe, omo liaco, oku tambulula kuetu kolonumbi viaye ci pondola oku u nenela esumuo ale esanju. (Osa. 78:40-42) Lekisa okuti ovilinga vietu vi kuete esilivilo koku eca etambululo koku lipanda kua Satana la Suku.​—⁠Olosap. 27:11.

Kuatisa olonjeveleli viove oku limbuka okuti oku kapako ovihandeleko via Suku ci va kuatisa. (Isa. 48:17) Onjila yimue yoku ci linga, oku tukula ovina vĩvi viyilila koku siapo oku kuama ovihandeleko via Suku, ndaño muẽle vokatemo kamue ño katito. Lombolola ndomo ekandu li tu kapa ocipãla la Suku, li tateka vakuetu oku lilongisila ocili kokuetu, kuenda oku nyeha vakuetu ovina via tiamẽla kokuavo. (1 Va Tes. 4:6) Kuatisa olonjeveleli viove oku sanjukila asumũlũho ovo va kuete ale, omo lioku pokola kovihandeleko via Suku. Va vetiya okuti oku sanjukila oku endela volonjila via sunguluka via Yehova ci tu teyuila kovitangi vialua. Noke yoku kolela kolonjila via sunguluka via Suku, omunu oka suvuka ovina viosi vi sumuisa Suku. (Osa. 119:104) Eye kaka tenda epokolo ndocilemo, pole oka li tenda ndonjila yoku lekisa ocisola caye ku Yehova.

Kuatisa Omanu Oku Likonomuisa. Oco omanu vamameko oku kula kespiritu, va sukila oku limbuka eci ci kasi vovitima viavo. Lombolola ndomo Embimbiliya li pondola oku va kuatisa oku ci linga.

Kuatisa olonjeveleli viove oku limbuka okuti Embimbiliya helivuluko ño liovihandeleko, lialungulo, liovina via pita kosimbu, kuenda liovitumasuku. Olio li lekisavo ovisimĩlo via Suku. Kelivulu lia Tiago 1:22-25, Ondaka ya Suku yi sokisiwa ndolumuilo. Ndomo tu liyeva kueci olio li popia kuenda ndomo Yehova a tẽlisa ocipango caye, Embimbiliya li lekisa eci tu kuete vutima wetu kuenda li lekisavo ndomo Suku “o pataisa itima,” a tu lete. (Olosap. 17:3) Vetiya olonjeveleli viove oku ci patekela. Va vetiyavo oku kũlĩhĩsa eci Suku a tu kapela Vovisonehua kuenda oku konomuisavo apongoloko ovo pamue va sukila oku linga vomuenyo wavo oco va pondole oku sanjuisa vali ciwa Suku. Va kuatisa oku limbuka okuti oku tanga Embimbiliya oyo onjila yoku kũlĩha ndomo Yehova a tenda “ovisimilo lovipango viutima.” Kuenje va pondola oku tiamisila alikolisilo avo koku linga apongoloko osi a sukiliwa.​—Va Hev. 4:12; Va Rom. 15:4.

Olondonge vimue Viembimbiliya pamue vi yongola oku kapako eci va kasi loku lilongisa, pole va kuete ohele yeci vakuavo vaka sima. Ovo pamue va kasi oku liyaka loloñeyi vimue vietimba. Ale pamue va kasi oku seteka oku sandiliya limue evelo lioku vumba Suku osimbu handi vamamako loku linga ovina violuali. Va lekisa ohele yoku tatayala kuaco pokati kolonjila. (1 Olos. 18:21) Va vetiya oku likutilila ku Suku oco ava kũlĩhĩse kuenda oco a yelise ovitima viavo.​—Osa. 26:2; 139:23, 24.

Va lomboluila okuti Yehova o lete alikolisilo avo, kuenda okuti Embimbiliya li vangula eci catiamẽla kueci ci kasi loku pita lavo. (Va Rom. 7:22, 23) Va lomboluila okuti va sukila oku kuata utate oco ka va ka ecelele oku vialiwa lovisimĩlo vĩvi viutima ka wa lipuile.​—Olosap. 3:5, 6; 28:26; Yer. 17:9, 10.

Vetiya omunu lomunu pokati kavo oku konomuisa eci cu vetiya. Va vetiya oku lipula ovo muẽle ndoco: ‘Momo lie ndi yonguila oku lingila eci? Eci hẽ cika lekisa ku Yehova okuti ame ndi sole muẽle ovina viosi eye a siata oku ndingila?’ Likolisilako oku pamisa ekolelo liavo liokuti oku kuata ukamba uwa la Yehova oco ocina ca velapo omunu a pondola oku kuata.

Kuatisa olonjeveleli viove oku kuata elomboloko liwa lieci ci lomboloka oku vumba Yehova ‘lutima wosi.’ (Luka 10:27) Omu mua kongela oku tiamisila ovisimĩlo, olonjongole kuenda evetiyo liutima wavo kolonjila via Yehova. Omo liaco, ku ka vetiye lika olonjeveleli viove oku konomuisa ovilinga viavo, pole va vetiyavo oku kũlĩhĩsa ndomo ovo va tenda ovihandeleko via Suku kuenda oku konomuisavo eci ci va vetiya oku u vumba. (Osa. 37:4) Eci olondonge viove vi limbuka kolonepa vimue va sukila oku linga apongoloko, va vetiya oku likutilila ku Yehova ndoco: “Pandeka utima wange kesumbilo lionduko yove.”​—Osa. 86:11.

Eci ondonge yi fetika oku kuata ukamba la Yehova, oyo yi fetika oku pokola kokuaye omo liekolelo o kuetele, hamomoko okuti ove u vetiya oku ci linga. Kuenje eye muẽle oka likolisilako oku “kũlĩhĩsa ovina vi sanjuisa Ñala.” (Va Efe. 5:10; Va Fil. 2:12) Epokolo liaco liokutima, olio li sanjuisa Yehova.​—Olosap. 23:15.

Ivaluka okuti Yehova eye o konomuisa ovitima haeye o kokela omanu kokuaye oco va kale akamba Vaye. (Olosap. 21:2; Yoa. 6:44) Ocikele cetu coku kala ño oloñuatisi. (1 Va Kor. 3:9) “Elaleko lia Suku li pitiyiwa letu.” (2 Va Kor. 5:20; Ovil. 16:14) Yehova ka sindiliya omunu laumue oco a tave kocili. Pole osimbu tu tanga Ovisonehua, eye ci tava okuti o vetiya olonjeveleli vietu oku limbuka okuti eci ovo va kasi loku yeva, etambululo kapulilo avo ale etambululo lio lohutililo viavo. Patekela ondaka eyi otembo yosi eci o kala lepuluvi lioku longisa, kuenda pinga locili ku Yehova oco a ku songuile kuenda oco a ku kuatise.​—1 Asap. 29:18, 19; Va Efe. 1:16-18.