Pitulula Atosi a Velapo

ATOSI a velapo hẽ nye? Atosi a velapo havisimĩloko vina vi vetiya, vi pitiwa ño kilu oku vi lombolola. Pole ovisimĩlo vina vi kuete esilivilo, vi lomboluiwa vali lundongosi haivio via velapo koku tẽlisa ocimãho cohundo.

Osapi yoku lingisa okuti atosi a velapo a pituluiwa ciwa, oku nõla ciwa kuenda oku sokiya ovipama viove luloño. Olonjanja vialua okuti poku konomuisa ovipama viatiamẽla kohundo yimue, ku sangiwa alomboluilo alua okuti a pitahãla ana a sukiliwa. Ndamupi o pondola oku nõla eci oka lombolola?

Tete, kũlĩhĩsa eci catiamẽla kolonjeveleli viove. Va kũlĩha hẽ citito catiamẽla kondaka yika lomboluiwa, ale va kũlĩha ale calua? Oco hẽ, valua pokati kavo va tava kueci Embimbiliya li popia catiamẽla kondaka yaco, ale vamue pokati kavo va kuete atatahãi? Akatanga hẽ api ovo va siata oku pita lavo vomuenyo wavo weteke leteke, eci va likolisilako oku kapako eci Embimbiliya li popia catiamẽla kondaka yaco? Cavali, kũlĩhĩsa okuti wa patekela ciwa ocimãho oka tẽlisa poku vangula lolonjeveleli eci catiamẽla kondaka wa sokiya oku ka lombolola. Loku kuama olonumbi evi vivali, konomuisa ovipama viaco kuenje nõlamo lika evi vi likuata ciwa locimãho caco.

Nda wa tambula ohundo yina ya sokiyiwa lika lolondaka vionimbu okuti yi kuete ale atosi a velapo, yi kuama muẽle ciwa. Pole, esilivilo lieci oka lombolola, lika vokiyiwa vali nda wa kapako olonumbi via eciwa konano poku lombolola etosi letosi lia velapo.

Nda kua tambuile ohundo yina ya sokiyiwa lika lolondaka vionimbu, ocikele coku nõla atosi a velapo ci kala peka liove.

Nda wa patekela ciwa atosi a velapo kuenda atosi akuavo wa a sokiyila vemẽhi liatosi aco, cika leluka vali kokuove oku linga ohundo yaco. Kuenda olonjeveleli viove vikopako vali esilivilo.

Olonumbi Vioku Sokiya Ovipama Vika Lomboluiwa. Kuli olonumbi viñi viñi vioku sokiya ovipama vika lomboluiwa vohundo. Poku vi kũlĩhĩsa ciwa, oka limbuka okuti vialua pokati kavio vi pondola oku ku kuatisa. Cosi catiamẽla ño kocimãho cove.

Onumbi ya siata oku kuamiwa vali enene yeyi yatiamẽla koku tepa osapi yocipama votuinimbu. (Etosi letosi lia velapo li sukiliwa momo li kuatisa olonjeveleli oku kuata elomboloko liondaka yi kasi oku lomboluiwa ale li kuatisa koku tẽlisa ocimãho cohundo.) Onjila yikuavo, oku lombolola ndomo ovina via pita kuenda ndomo via likuama. (Ndongangu, ovina via pita eci handi Etande ka lieyile, vieya oku kuamiwa lovina via pita eci handi o Yerusalãi ka ya nyõliwile kunyamo 70 K.K. Kuenje evi vieyavo oku kuamiwa lovina vi kasi loku pita koloneke vilo.) Onjila yatatu, oku lombolola esunga liocina cimue kuenda eci ceyililako. (Eci ci tava okuti ci lomboluiwa loku kuama olonjila vivali. Tete o lombolola ocina cimue ci kasi loku pita cilo okuti oco ceyilila kelinga limue, kuenje oco o lombolola noke esunga liaco. Ale ci tava okuti o fetika loku lombolola esunga liaco, noke oco o lombolola eci ceyililako.) Onumbi ya kuãla, oku lombolola oku litepa kuovina. (Ove ci tava okuti o lekisa oku litepa kuocina cimue ciwa leci cĩvi, ale kuocina cimue ca sunguluka leci ka ca sungulukile.) Olonjanja vimue, vohundo yimuamue ci tava okuti mu kongela oku kuama eci ci pitahãla onumbi yimosi.

Eci Stefano a lundiliwile yu a neniwa konjango yinene yakulu va Yudea, eye lutõi wa lingile ohundo yimue okuti ya kuama onumbi yoku lombolola ndomo ovina via pita. Poku yi tanga kelivulu Liovilinga 7:2-53, oka limbuka okuti, oku tepisa kuaye atosi, ku lekisa okuti eye wa kala locimãho cimue a yonguile oku tẽlisa vovisimĩlo viaye. Catete, Stefano wa lekisa ciwa okuti eye wa kala loku tukula ovina vimue via pita kosimbu okuti olonjeveleli viaye ka via tẽlele oku vi patãla. Noke wa lekisa okuti ndaño Yosefe wa nyaliwile la vamanjaye, lopo Suku wo sumũluisilile oku popela ovimuenyo. Handi vali, eye wa lekisavo okuti va Yudea ka va pokuile ku Mose, u Suku a ihĩle ocikele coku va songuila. Noke wa sulako loku lekisa okuti, ocituwa ca lekisiwa la va Yudea vokosiahũlu ca lekisiwavo la vana veya oku ponda Yesu Kristu.

Ku ka Lombolole Atosi Alua Enene a Velapo. Ku sukiliwa lika atosi amue atito a velapo koku lombolola osapi yohundo yimue. Olonjanja vialua, ku sukiliwa lika cimue ci soka atosi atãlo. Eci ci kapiwako, cikale eci o vangula vakukutu atãlo, vakukutu ekũi, vakukutu akũi atatu, ale ceci o vangula votembo yaluapo vali. Ku ka seteke oku molehĩsa enene atosi alua a velapo. Olonjeveleli vi tẽla oku patekela lika ovisimĩlo vitito via litepa viohundo yimue. Nda okuti ohundo ya lepa enene, ci sukila vali handi oku eca ongusu kuenda oku molehĩsa ciwa atosi a velapo.

Cikale okuti oka lombolola atosi alua ale atito, likolisilako oku a lombolola ciwa. Eca kolonjeveleli otembo yi tẽla yoku konomuisa etosi letosi lia velapo oco li patekeliwe ciwa vovisimĩlo viavo.

Ohundo yove te yi yevala lulelu. Eci halonjanja viosiko okuti catiamẽla ketendelo liovipama vika lomboluiwa. Nda ovisimĩlo viove via sokiyiwa ciwa, okuti via kapiwa vemẽhi liatosi a velapo, kuenda wa lombolola atosi aco limue limue vonjanja, ohundo yika leluka vali oku yi kuama kuenda cika tĩla oku yi ivala.

Pitulula Ciwa Atosi a Velapo. Nda ovipama viove via sokiyiwa ciwa, ka cika tĩla oku lekisa esilivilo liatosi a velapo poku lingiwa kuohundo.

Onjila yiwa yoku pitulula atosi a velapo, oku lekisa uvangi, oku tanga ovisonehua, kuenda oku lombolola ovipama vikuavo lonjila yimue okuti vi tiamisiwila katosi a velapo haiyo yamisako vali oku situlula atosi aco. Atosi osi akuavo a kuete oku situlula, oku lekisa uvangi, ale oku amisako oku lombolola etosi lia velapo. Ku ka vokiyeko ovisimĩlo ka vi kuete esilivilo omo ño okuti viwa. Poku lombolola atosi akuavo, lekisa ciwa elitokeko atosi aco a kuete letosi lia velapo lia tiamẽla katosi aco. Ocikele caco ku ka ci sile olonjeveleli. Elitokeko liaco li pondola oku lekisiwa loku pitulula olondaka via velapo vina vi lekisa ocisimĩlo ca velapo, ale ci lingiwa loku pitulula oku tukula olonjanja vimue eci catiamẽla ketosi lia velapo.

Olohundi vimue vi pitulula atosi a velapo loku a tukula. Ndaño okuti eyi onjila yimue yiwa yoku pitulula atosi a velapo, ka ci tava okuti ci piñanya pomangu yoku nõla lutate kuenda yoku lombolola ocipama lesuñamiso liwa.

Ci tava okuti o nõlapo oku tukula etosi lia velapo eci handi kua lekisile elomboluilo li lekisa uvangi watiamẽlako. Eci cika kuatisa olonjeveleli oku eca esilivilo kueci cika kuamamo, kuendavo cika eca ongusu ketosi liaco lia velapo. Ove ci tavavo okuti eca ongusu ketosi liaco loku pitulula oku li lombolola pana okuti wa li lombolola ale.

Kupange Woku Kunda. Olonumbi via lomboluiwa konano ka vi kapiwako lika kolohundo, pole vi kapiwakovo poku vangula lomanu kupange woku kunda. Poku liangiliya, kapako eci ci kasi vovisimĩlo viomanu valua va sangiwa vimbo. Nõla osapi yi ku ecelela oku lekisa elavoko Liembimbiliya lioku mãlako ekalo liaco. Pamue nõlamo ño atosi avali a velapo oka lombolola la-o osapi. Nõla ovisonehua oka tanga, vina vika eca uvangi watiamẽla katosi aco. Noke sokiya ndomo oka fetika oku lombolola ohundo yove. Elipongiyo liaco liecelela epongoloko, nda ku sukiliwa epongoloko limue. Eci ci kuatisavo oku popia cimue okuti omunu oka ci ivaluka.