Oku Sokiya Ohundo

POKU tambula ocikele coku linga ohundo, valua okuti va likolisilako oku soneha cosi, okupisa kefetikilo toke kesulilo liovina viosi vaka popia vohundo. Osimbu handi ohundo yaco ka ya puile oku yi pongiya, kua sonehiwa ale olopapelo viakahandangala. Oku linga ndoco, cambata olowola vialua.

Eyi hẽ oyo onjila wa siata oku kuama poku pongiya olohundo viove? O yongola oku lilongisa onjila yimue ya leluka vali? Nda wa lilongisa ndomo o sokiya ohundo, ku ka sukila vali oku soneha cosi. Eci cika ku ĩha vali otembo yoku lipongiyila oku ka linga ohundo. Ohundo yove ka yika leluka ño koku yi linga, pole yika soliwa vali oku yi yevelela kuenda yika vetiya vali olonjeveleli viove.

Ocili okuti, olohundo viowiñi vilingiwila vekongelo, ulandu waco wa pongiyiwa ale. Pole, eci hacoko ci kasi kueci catiamẽla konepa yalua yolohundo vikuavo. Ove pamue va ku ĩha ño ocipama ale osapi yaco lika. Ale pamue o pingiwa oco o linge ohundo yocipama cimue ca pongiyiwa ale. Olonjanja vimue, ci tava okuti o tambula lika olonumbi vimue vitito. Kovikele viaco viosi evi, ove o sukila oku sokiya ulandu wohundo yove muẽle.

Ongangu yi sangiwa kemẽla 41, yika ku ĩha cimue ocisimĩlo ndomo o pondola oku sokiya ohundo vakukutu amue atito. Limbuka okuti atosi osi a velapo a fetikila kepĩli kuenda a sonehiwa lolomalaka vinene. Vemẽhi lietosi liosi lia velapo, mua sonehiwa ovisimĩlo viatiamẽla ketosi liaco. Atosi akuavo aka kuatisa oku lombolola ovisimĩlo viaco, a kasi vemẽhi liaco vali, kuenda a iñilapo vali kamue okupisa kepĩli. Konomuisa ohundo yaco lutate. Oka limbuka okuti atosi avali a velapo, a litokeka losapi ya velapo yohundo yaco. Kũlĩhĩsavo okuti, otuatosi tu kasi vemẽhi liatosi a velapo, ka tua kapiwililemo ño omo okuti tuwa. Puãi, etosi letosi, liatiamẽla ketosi lia velapo vemẽhi omu olio li molẽhela.

Eci o pongiya ulandu wohundo yimue, ka u sukila oku kala muẽle ndeci ci kasi vongangu ya lekisiwa. Pole, nda wa tẽla oku kuata elomboloko liolonumbi via kongeliwamo, cika ku kuatisa oku sokiya ocipama cove, kuenda oku pongiya ohundo yiwa votembo ya sokamo. Ndamupi hẽ o pondola oku ci linga?

Konomuisa, Pungula, Kuenda Sokiya

Ove o sukila osapi. Osapi yove handakako yimue yi vangula ño vocosi, okuti yi kongeliwa ño vondaka yimosi. Osapi, oyo ocisimĩlo ca velapo o sesamẽla oku pitiya, kuenda haiyo yi lekisa oku ohundo yove yika tiamisiwila. Nda wa tambula ale osapi, konomuisa ciwa olondaka viosi via velapo vi sangiwa vosapi yaco. Nda osapi wa tambula oka yi lombolola loku kuama ocipama cimue ca pongiyiwa ale, lilongisa ocipama caco loku ivaluka osapi va ku ĩha. Nda wa tambula lika ocipama, o sukila oku nõla osapi yaco. Pole, osimbu handi kua ci lingile, ciwa okuti o linga limue ekonomuiso. Lutima wa tula, olonjanja vialua okuti oka kuata ovisimĩlo viokaliye.

Osimbu wamamako loku ci linga, lipula ove muẽle okuti: Momo lie esapulo eli li kuetele esilivilo kolonjeveleli viange? Ocimãho cange ce? Hakulombololako lika ocipama ale pamue oku linga ohundo yimue yinjembe, pole, oku sapula cimue ci kuatisa kolonjeveleli. Eci ocimãho cove ci limbukiwa, ci soneha. Osimbu o lipongiya, amamako loku li sokoluisa ocimãho cove.

Pana okuti wa limbuka ale ocimãho cove kuenda wa nõla ale osapi yi lisesama locipama caco (ale wa konomuisa ale ndomo osapi va ku ĩha yi likuata locimãho cove), ove ci tava okuti o linga ekonomuiso li tiamisiwila vali enene kocimãho caco. Sandiliya ovipama vina okuti vika kala viesilivilo kolonjeveleli viove. Ku ka linge ekonomuiso limue li lombolola ño vocosi, puãi konomuisa atosi ana a eca elomboloko hao a eca ekuatiso. Teta onimbu ketendelo liakonomuiso o linga. Olonjanja vialua okuti, oka kuata ovipama vialua vioku konomuisa okuti evi o sukila ci sule. Kuenje, oka sukila oku nõla.

Limbuka atosi a velapo ove o sesamẽla oku tukula poku lombolola osapi yove kuenda oku tẽlisa ocimãho cove. Esokiyo eli olio lika kala ono yohundo yove. Oco hẽ, atosi añami a velapo a sesamẽla oku kala vohundo? Pamue avali ci tẽla vohundo yimue yitito. Kueci catiamẽla kohundo yi lingiwa votembo yalua, atosi atãlo a tẽla. Nda okuti atosi a velapo atito vohundo, cika leluka vali kolonjeveleli viove oku ivaluka atosi aco.

Pana okuti wa sanga ale osapi yohundo yove kuenda wa patekela ale atosi a velapo a sangiwamo, angiliya alivulu oka konomuisa. Nõla ovipama vina viatiamẽla katosi a velapo a sangiwamo. Nõla atosi ana aka vokiya ongusu kohundo yove. Poku nõla ovinimbu Viembimbiliya vi likuata latosi a velapo, kũlĩhĩsa ovisimĩlo vika ku kuatisa oku lombolola ovinimbu viaco lonjila yimue yi lomboloka ciwa. Kapa onepa lonepa vemẽhi lietosi lia velapo li sesamẽla. Nda onepa yimue ka yi likuata letosi lalimue lia velapo, yi siapo, ndaño muẽle yiwa calua. Ale yi kapa vociseleko cove, toke eteke oka yi sukila. Kongelamo lika ovipama vi likuata ciwa lohundo yove. Nda wa pongiya ovipama vialua, oka vangula calua lonjanga, kuenje ohundo yove ka yika kala yondongosi. Ca velapo oku lombolola atosi amue ño atito ana okuti a kuete esilivilo liocili kolonjeveleli, oco cu ku ecelele oku a lombolola ciwa. Ku ka pesele otembo yalua.

Konepa eyi, nda hacoko wa siata oku linga, angiliya ulandu wove lonjila yimue ya suñama. Usonehi we Evangeliu, Luka haicovo a linga. Wongolola asapulo akahandangala a likuata lulandu waye kuenje wa fetika oku a sokiya osi ‘ndomo a likuãi.’ (Luka 1:⁠3) Ove ci tava okuti o sokiya ocipama cove loku kuama otembo lotembo kua pita esapulo liaco ale o ci sokiya loku kuama eteke ale kocitumãlo oku kua pita esapulo liaco. Loku lekisavo eci ca koka esapulo liaco kuenda eci ceyililako. Ale o ci sokiya loku lekisa ocitangi cimue kuenda ndomo ca tetuluiwa. Cosi catiamẽla ño kueci ciwapo vali koku tẽlisa ocimãho cove. Ka ci tava okuti pa kala oku talama kumue kuonjanga loku tehẽla kocisimĩlo cikuavo. Olonjeveleli viove te vi tualiwa lulelu kocisimĩlo cimue la cikuavo, okuti ka pa kala evelo lalimue okuti ka li pitahãliwa lonjanga. Uvangi u lekisiwa, te u tuala olonjeveleli kelomboloko limue liwa. Osimbu o pongiya atosi oka popia, sokolola ndomo ohundo yove yika tambuiwa lolonjeveleli viove. Ovo hẽ, vaka kuama muẽle lulelu walua ovisimĩlo viove? Ovo hẽ, vaka vetiyiwa muẽle oku linga eci va yeva, okuti vaka linga muẽle ndocimãho o yongola oku tẽlisa?

Noke, pongiya olondaka oka fetika lavio ohundo yove. Olondaka viaco, te vina okuti vi vetiyila olonjeveleli viove kueci oka lombolola vohundo yove haivio vi lekisa kokuavo okuti, eci oka lombolola ci kuete esilivilo lialua kokuavo. Eci cika ku kuatisa oku soneha olondaka vimue ño vitito vioku fetika. Oku sulako, pongiya olondaka oka sulako lavio, vina okuti vi vetiya haivio vi likuata locimãho cove.

Nda wa pongiya selo ohundo yove, oka kuata otembo yoku yi sisa ciwa osimbu handi kua yi lingile. Ove pamue oka limbuka okuti, kovisimĩlo vimue, ciwa oku vokiyako elomboluilo limue li lekisa atendelo, ale oku sokisa ocisimĩlo caco locina cimue, ale oku vokiyako ulandu umue. Oku tukula ovina vimue vi kasi loku pita otembo yilo, ale oku tukula ovina vimue vi kasi loku sakalaisa omanu valua pocitumãlo, ci kuatisa olonjeveleli viove oku limbuka lonjanga esilivilo lieci o kasi loku lombolola. Osimbu o pitulula oku kũlĩhĩsa ciwa ohundo yove, oka limbuka apuluvi oku tiamisila esapulo liaco kolonjeveleli viove. Upange woku konomuisa ovipama kuenda oku vi sisa ciwa, u kuete esilivilo liocili koku sokiya ovipama viaco oco vi kale ohundo yimue yiwa.

Olohundi vimue vi sukila vali oku soneha atosi alua okuti vikuavo ci sule. Pole, nda wa sokiya ohundo yove latosi amue ño atito a velapo, okuti upamo atosi osi okuti ka a tiamẽlele kohundo yaco, kuenda ovisimĩlo viove wa vi kapa vesokiyo lia sunguluka, oka limbuka okuti, ndaño kua loñolohele calua, kuka sukila vali oku soneha cosi oka yongola oku popia vohundo yove. Eci ci kuatisa cocili momo ka ci pesela otembo yalua. Kuenda olohundo viove vika kala vali viwa. Eci cika lekisa uvangi wokuti ove o kasi muẽle lokupa esilivilo Kosikola Yupange Wakristão.