Pitulula Atosi a Velapo

Anga hẽ olonjanja vimue ca tĩla kokuove oku patekela ovina wa lilongisa ale? Eci olonjanja vimue ca siatavo oku lipita la vosi yetu. Nye ci pondola oku ku kuatisa? Oku pitulula atosi a velapo.

Osimbu o lilongisa, seteka oku talama olonjanja vimue oco o sokolole kovina wa lilongisa ale. Eci oco upostolo Paulu a vetiya vamanji oku linga osimbu va lilongisa ukanda waye. Eye wa popia hati: “Cilo etosi lia velapo tu kasi oku popia lieli.” (Va Hev. 8:1) Lolondaka evi, eye wa kuatisa olonjeveleli viaye oku kuata elomboloko lieci eye a kala oku popia kuenda ndomo ovina viosi eye a popia vi kuete elitokeko.

Ove o sukila oku tumbika otembo, citava okuti akukutu ekũi kesulilo liotembo yove yoku lilongisa oco o sokolole atosi a velapo wa lilongisa. Nda ove ku ivaluka ciwa atosi aco, vanja vali kotulosapi ale tanga olondaka viatete viocinimbu locinimbu oco ci ku kuatise oku ivaluka. Nda ove wa lilongisa ocina cimue cokaliye, seteka oku ci lombolola volondaka viove muẽle. Osimbu o pitulula atosi a velapo, ove ku ka kuatisa lika owoño wove, pole, o ka molavo ndomo ovina wa lilongisa vi pondola oku ku kuatisa komuenyo wove.