Sulako Lombangulo

OVE pamue wa konomuisa lutate ovipama oka lombolola vohundo yove kuenda wa vi sokiya ciwa. Kuendavo wa pongiya olondaka viwa vioku fetika okuti vi vetiya onjongole. Pole, kuli vali cimue ci sukiliwa, olondaka vioku sulako ciwa lohundo. Ku ka sepule esilivilo liavio. Eci ove o popia kesulilo, ci patekeliwa vokuenda kuotembo yalua. Nda olondaka vioku sulako via hongua, olondaka viosi via popiwa tete ka vika kuata ongusu yi sesamẽla.

Konomuisa ongangu yikuãimo: Yehosua kesulilo liomuenyo waye, wa lingilile ohundo yimue yiwa kovaso yakulu va Isareli. Noke yoku ivaluisa omanu ndomo Yehova a tata va Isareli tunde koloneke via Avirahama, anga hẽ Yehosua wa pitulula ño oku tukula olondaka vimue via velapo loku teta onimbu? Sio, hacoko. Eye longusu yalua wa vetiya omanu hati: “Sumbi Yehova. U vumbi lutima wosi locili.” Litangela ove muẽle olondaka vioku sulako via Yehosua, via sonehiwa kelivulu lia Yehosua 24:14, 15.

Ohundo yimue yikuavo yiwa, yi sangiwa kelivulu Liovilinga 2:14-36, eyi upostolo Petulu a lingilile kovaso yowiñi womanu weyile ko Yerusalãi Kocipito co Pendekoste kunyamo wo 33 K.K. Catete eye wa lombolola okuti ovo va kala loku mõla uvangi woku tẽlisiwa kuocitumasuku ci sangiwa kelivulu lia Yoeli catiamẽla koku sukumuiwa kuespiritu lia Suku. Noke eye wa lekisa ndomo ocitumasuku eci ca kala lelitokeko leci ci sangiwa kovitumasuku viatiamẽla ku Mesiya vi sangiwa kelivulu Liolosamo okuti, vi lombolola eci catiamẽla kepinduko lia Yesu Kristu kuenda koku vialekiwa kuaye kondio ya Suku. Volondaka viaye vioku sulako, Petulu wa situlula ciwa ondaka yimue okuti omunu lomunu pokati kolonjeveleli viaye wa sukilile oku yi kũlĩha. Eye wa popia hati: “Oco, epata liosi lia Isareli li limbuke okuti ocili, u Yesu, una ene wa valeli [kuti, NW] Suku wo lingisa Ñala kuenda Kristu.” Olonjeveleli via pula hati: “Akuetu, tu linga nye?” Petulu wa tambulula hati: “Ene vosi omunu omunu, likekembeli akandu ene, papatisilui ongecelo yakandu vonduko ya Yesu Kristu.” (Ovil. 2:37, 38) Veteke liaco, ci soka olohũlũkãi vitatu viomanu pokati kolonjeveleli viaye, va vetiyiwa leci va yeva kuenje va tava kocili catiamẽla ku Yesu Kristu.

Atosi a Sukila Oku Patekeliwa. Eci o popia poku sulako te catiamisiwila kosapi yohundo yove. Te ca likuata latosi a velapo wa lombolola ale. Ndaño okuti ove pamue oka yongola oku kongelamo olondaka vimue via velapo viosapi yohundo yove, oku pitulula oku tukula olondaka viosapi yove oyo onjila yiwa oku yi kuama.

Ndomo ca siata, esunga lieci o vanguila, oku vetiya omanu oku linga cimue catiamẽla kondaka o kasi loku lombolola. Esunga limue lia velapo lieci ku popiwila olondaka vioku sulako, oku lekisa kokuavo eci va kuete oku linga. Eci wa nõla osapi yohundo yove kuenda atosi a velapo, wa konomuisa hẽ ciwa lutate esunga lieci ovipama viaco vi kuetele esilivilo kolonjeveleli viove kuenda ocimãho cove poku linga ohundo yaco? Nda oco, ove wa kũlĩha eci o yongola okuti oco ovo va linga. Kaliye ove o sukila oku lombolola ocina caco o yongola okuti oco ovo va linga kuenda ndomo ci lingiwa.

Noke yoku lekisa kolonjeveleli viove eci va sesamẽla oku linga, volondaka viove vioku sulako te wa kongelamo olondaka vievetiyo. Volondaka viaco ci tava okuti o kongelamo oku lekisa esunga lieci va sukilila oku linga ocina caco kuenda asumũlũho eyilila koku ci linga. Nda olondaka via sulako via sokoluiwa ciwa kuenda via popiwa ciwa, vika vokiya ongusu kohundo yove yosi.

Kapelako okuti ohundo yi kasi kesulilo. Eci te ca lekisiwila kolondaka viove. Enanga liove te lia kalavo limue lia sunguluka. Ku ka vangule lonjanga yalua toke kesulilo okuti poku sulako oku pulako ño. Kuendavo ku ka tepululeko enene ocileñi condaka yove. Ocileñi condaka yove ci sokepo, ka ci ka piãle ño enene. Olondaka viove vioku sulako te via yevalisa elaka lioku sulako. Oku vi vangula kuove te kua lekisa esunguluko kuenda utõi. Poku li pongiyila oku ka linga ohundo, ku ka ivaleko oku pongiya olondaka viove vioku sulako.

Olondaka vioku sulako vi kuete oku sulila toke pi? Eci hacinacimueko ci sokisiwila ño kotembo. Olondaka vioku sulako ka ci tava okuti vi kokiwa. Otembo olondaka vioku sulako vi kuete oku tumãla, yi sokisiwila kevetiyo ovio vieca kolonjeveleli. Oku sulako lolondaka via leluka, vionimbu, haivio vi vetiya, vi soliwa vali. Pole, nda via sokiyiwa ciwa, olondaka vioku sulako okuti mu kongela oku sokisa cimue, ndaño vi tumãlapo vali kamue, ci tava okuti vi soliwavo. Sokisa olondaka vioku sulako vielivulu liosi Liukundi, vi sangiwa kelivulu Liukundi 12:13, 14, levi viohundo ya Yesu yo Komunda vi sangiwa kelivulu lia Mateo 7:24-27, okuti vimbumbulupo vali.

Kupange Woku Kunda. Ka kuli konepa layimue okuti oko oka sukila vali olondaka vioku sulako ndo kupange woku kunda. Loku lipongiya kuenda loku kuatela omanu ocisola, ove oka pondola oku linga uwa walua. Olonumbi via eciwa kamẽla atete vi pondola oku kapiwako luwa ndaño muẽle poku vangula lomunu umosi.

Ombangulo yaco pamue yi teta onimbu. Omunu pamue wa sakalala loku linga ovina vikuavo. Epasu liove liosi pamue li tumãla ño ekukutu limosi. Nda ca sunguluka, ove ci tava okuti o popia cimue ca soka ndeci: “Ndi lete okuti wa sakalala. Pole linga husapuileko ño ocisimĩlo cimue ci vetiya. Embimbiliya li lekisa okuti Ululiki wetu o kuete onjongole yimue yiwa yoku pongolola ilu lieve oco li kale ocitumãlo cimue okuti omanu vaka pondola oku kalamo otembo ka yi pui. Etu ci tava okuti tuka kala Vofeka yaco eyi Yelau, pole tu sukila oku lilongisa ovihandeleko via Suku.” Ale ci tava oku u sapuila okuti oka tiuka eteke likuavo kotembo ya sunguluka.

Nda epasu lia timbuiwa omo okuti omunu wa sangiwa ukuanyeño haeye ukuamanya, lopo handi ci tava okuti ku lingiwa eci ciwa. Ivaluka olonumbi vi sangiwa kelivulu lia Mateo 10:12, 13 kuenda kelivulu lia Va Roma 12:17, 18. Etambululo liove liomboka pamue lika pongolola ocisimĩlo caye kueci catiamẽla Kolombangi via Yehova. Eci nda oco ca lingiwa, ciwa.

Handi vali, pamue wa kuata ombangulo yimue yiwa lomunu wa sanga. Nye ku pituluila atosi a velapo ana o yongola okuti eye o va patekela? Vombangulo yaco kongelamo olondaka vioku u vetiya oku linga cimue catiamẽla kondaka yaco.

Nda wa limbuka okuti kuli epuluvi lioku amisako ombangulo eteke likuavo, eca elavoko limue komunu, oco a kevelele lonjongole. Linga epulilo limue, ndeci eli li sangiwa velivulu Raciocínios à Base das Escrituras ale velivulu limue lia sokiyiwila oku songola alilongiso Embimbiliya. Patekela ciwa ocimãho cove, ndomo ca tumbikiwa la Yesu kuenje ca sonehiwa kelivulu lia Mateo 28:19, 20.

O kasi hẽ oku malusula oku songola elilongiso limue Liembimbiliya? Oku pitulula osapi yeci ca vanguiwa cika kuatisa ondonge oku patekela eci a lilongisa. Oku linga apulilo voku pitulula, cika kuatisa ondonge oku patekela atosi a velapo, ca piãla enene nda ka ca lingiwile lonjanga yalua. Oku pula ndomo ovipama a lilongisa vi pondola oku u kuatisa ale ndomo eye a pondola oku sapuilako vakuavo, ci ko vetiya oku sokolola ndomo aka kapako eci a lilongisa.​—Olosap. 4:7.

Ivaluka okuti olondaka viove vioku sulako vi vokiya ongusu kolondaka viosi wa vangula ale tete.