Ndomo tu Vetiya Ovitima Via Vana tu Longisa Embimbiliya
1. Ovina Yesu a longisa via vetiya ndati ovitima violonjeveleli viaye?
1 Yesu Kristu wa vetiya ovitima violonjeveleli viaye. Onjanja yimue ovitima violondonge viaye via “tokotele” eci eye a va lomboluila Ovisonehua. (Luka 24:32) Omo okuti onjongole yoku pokola ku Suku te ya tunda vutima, tu vetiya ndati ovisimĩlo via vana tu longisa Embimbiliya oco va linge apongoloko komuenyo wavo? —Va Rom. 6:17.
2. Olondunge kuenda uloño vi kuatisa ndati koku vetiya utima womunu?
2 Kuata Olondunge Kuenda Uloño: Oku sapuila lika komanu vamue okuti eci ciwa, eci cĩvi, ka ci va vetiya oku linga apongoloko. Oku pisa alongiso atavo avo lovisonehua Viembimbiliya ci tepulula ombili yavo yoku amamako oku lilongisa. Oco tu vetiye omanu, tu sukila oku limbuka esunga lieci ovo va kolelela kovina viaco kuenda oku vi linga . Oku kuata utate kuenda oku linga epulilo lia sunguluka ci ko vetiya oku vangula eci ci kasi kutima. (Olosap. 20:5) Tu sukila oku nõla olonumbi vi tunda Vondaka ya Suku okuti yi pondola oku vetiya utima waye. Omo liaco, tu sukila oku lekisa onjongole komanu kuenda oku kala vakuepandi. (Olosap. 25:15) Tu sukila oku limbuka okuti olondonge vi kula kespiritu volonepa via litepa. Ecelela okuti espiritu sandu lia Yehova livetiya ovisimĩlo kuenda ovilinga viavo.—Mar. 4:26-29.
3. Tu kuatisa ndati omanu tu longisa oco va kuate ovituwa viwa?
3 Va Kuatisa Oku Lekisa Ovituwa Viwa: Ovisonehua Viembimbiliya vi lekisa ohenda kuenda ocisola ca Yehova ci pondola oku kuatisa omanu tu longisa oco va kuate ovituwa viwa. Tu pondola oku tukula elivulu Liosamo 139:1-4 ale Luka 12:6, 7 oco tu lekise ndomo Suku a kapako omunu lomunu pokati ketu. Eci omanu va lekisa olopandu kohenda ya piãla ya Yehova, ocisola kuenda ombili yavo yoku fendela Suku yi livokiya. (Va Rom. 5:6-8; 1 Yoa. 4:19) Handi vali, eci va lilongisa okuti ovilinga viavo vi pondola oku sanjuisa ale oku sumuisa Yehova, ovo va vetiyiwa oku linga ovina vi u sanjuisa kuenda vi u sivaya.—Osa. 78:40, 41; Olosap. 23:15.
4. Eci tu longisa omunu umue kupange woku kunda tu lekisa ndati esumbilo kelianjo liomunu lioku linõlela osimbu tu va longisa?
4 Yehova ka kisika omunu oku pokola kolonumbi viaye. Pole, eye o kuatisa omanu poku va lekisa onima yi tunda koku kuama olonumbi viaye. (Isa. 48:17, 18) Tu setukula Yehova poku longisa omanu lonjila yimue yi va kuatisa oku limbuka ocili. Eci ovo muẽle va limbuka okuti va sukila oku linga apongoloko komuenyo wavo, va kuata asumũlũho ka a pui. (Va Rom. 12:2) Kuenje ci va kuatisa oku pamisa ukamba wavo la Yehova ‘ukuakukonomuisa ovitima.’—Olosap. 17:3.