OCIPAMA 11
Ndamupi tu Kuatisiwa Lolonumbi Viembimbiliya?
1. Momo lie tu sukilila olonumbi?
Olonumbi Viembimbiliya vi tu vetiya ndati oku yuvula oku kapa omuenyo wetu kohele?—OSAMO 36:9.
Ululiki wetu wa kũlĩha ovina vialua okuti etu ci sule. Omo okuti eye Isia yocisola, o tu tata ciwa. Handi vali, ka yongola okuti tu lisonguila etu muẽle. (Yeremiya 10:23) Ndeci omãla va sukila oku songuiwa lolonumbi violonjali, cimuamue haico catiamẽla kokuetu okuti tu sukila oku songuiwa lolonumbi via Suku. (Isaya 48:17, 18) Embimbiliya li kuete olonumbi vi sokisiwa ndombanjaile ya tunda ku Suku.—Tanga 2 Timoteo 3:16.
JOvihandeleko via Yehova kuenda olonumbi viaye vi tu longisa ndomo tu ambata omuenyo uwa cilo, kuenda ndomo tu pondola oku kuata omuenyo ko pui kovaso yoloneke. Omo okuti Suku eye wa tu lulika, tu sukila oku pokola kolonumbi viaye viocisola.—Tanga Osamo 19:7, 11; Esituluilo 4:11.
2. Olonumbi Viembimbiliya vi lomboloka nye?
Olonumbi Viembimbiliya vi lomboloka ono yovihandeleko viondaka ya Suku. Ovihandeleko vi kapiwako eci tu liyaka lovitangi vimue. (Esinumuĩlo 22:8) Oco tu kũlĩhe ndomo tu kapako olonumbi poku liyaka locitangi cimue, tu sukila oku sokolola lutate. (Olosapo 2:10-12) Embimbiliya li tu longisa okuti omuenyo ombanjaile yimue ya tunda ku Suku. Onumbi yaco yi pondola oku tu kuatisa kupange wetu, konjo, kuenda poku linga ungende. Nda tua ivaluka onumbi yokuti omuenyo ombanjaile ya Suku, tu ka yuvula oku kapa omuenyo wetu ale wa vakuetu kohele.—Tanga Ovilinga 17:28.
3. Olonumbi vipi vivali via velapo?
Yesu wa tukula olonumbi vivali via velapo. Yatete yi situlula ocimãho comuenyo womanu okuti, oku kũlĩha Suku, loku lekisa ocisola kokuaye, kuenda oku u vumba lekolelo. Tu sukila oku kapako onumbi eyi kovina viosi tu linga komuenyo wetu. (Olosapo 3:6) Vana va kapako onumbi eyi lutima wosi, va pondola oku kala akamba va Suku, oku kuata esanju lia velapo, kuenda omuenyo ko pui.—Tanga Mateo 22:36-38.
Onumbi yavali yi pondola oku tu kuatisa oku kuata ukamba uwa la vakuetu. (1 Va Korindo 13:4-7) Voku kapako onumbi eyi yavali mua kongela oku kuama ongangu ya Suku yoku tata ciwa vakuetu.—Tanga Mateo 7:12; 22:39, 40.
4. Ndamupi tu kuatisiwa lolonumbi Viembimbiliya?
Olonumbi Viembimbiliya vi longisa apata ndomo va li kuata omunga locisola. (Va Kolosai 3:12-14) Ondaka ya Suku yi teyuilavo apata poku va longisa onumbi yikuavo yokuti olohuela ka ci tava okuti vi tepiwa.—Tanga Efetikilo 2:24.
Poku kuama olonumbi Viembimbiliya, tu pondola oku teyuila ovipako vietu kuenda kovina vikuavo vi nena esumuo. Vacime covopange, olonjanja vimue va siata oku nõla olonalavayi vina vi pokola kolonumbi Viembimbiliya vioku kala vakuacili, haivo vakuambili yupange. (Olosapo 10:4, 26; Va Heveru 13:18) Ondaka ya Suku yi tu longisa oku sanjukila ovina tu kuete kuenda oku velisapo ukamba wetu la Suku okuti ovina vikuavo ci sule.—Tanga Mateo 6:24, 25, 33; 1 Timoteo 6:8-10.
Oku pokola kolonumbi Viembimbiliya ci tu kuatisa oku kuata uhayele uwa. (Olosapo 14:30; 22:24, 25) Oku kapako ocihandeleko ca Suku catiamẽla koku yuvula uholua, ci tu teyuila kovovei ka a kuete esaku kuenda kovilunga vikuavo. (Olosapo 23:20) Yehova ecelela okuti tu nyua ovina vi koluisa, pole, te lonjongo yiwa. (Osamo 104:15; 1 Va Korindo 6:10) Olonumbi via Suku vi tu kuatisa calua, momo ka vi tu longisa lika oku lava ciwa ovilinga vietu, pole, vi tu longisavo ndomo tu lava ovisimĩlo vietu. (Osamo 119:97-100) Akristão vocili ka va pokola lika kolonumbi via Suku omo okuti vi va kuatisa komuenyo wavo. Pole, va ci linga omo liesumbilo va kuetele Yehova.—Tanga Mateo 5:14-16.