EPULILO 10

Anga hẽ Embimbiliya li Pondola Oku Ndi Kuatisa?

ESUNGA LIECI OKU SOKOLOLA EPULILO ELI CI KUETELE ESILIVILO

Embimbiliya li popia hati: “Ovina viosi via sonehiwa Vovisonehua vi Kola, vi tunda ku Suku.” (2 Timoteo 3:16) Nda o tava okuti, olondaka via tukuiwa ndeti viocili, Embimbiliya li pondola oku ku lekisa onjila ya sunguluka o sukila oku kuama.

NYE O SUKILA OKU LINGA?

Sokolola ulandu u kuãimo ndoco: Ukuenje umue o tukuiwa hati David, osimbu a kasi oku endisa ekãlu, o pita povitumãlo vimue ka kũlĩhĩle ciwa. Noke, wa tanga olonumbi via sonehiwa vetapalo vi lekisa okuti, o kasi ocipãla locitumalo a yongola oku enda. Kuenje, wa limbuka okuti, wa nyelẽla. Citava okuti, osimbu a kala oku linga ungede, wa ñualela vetapalo likuavo.

Nda ove wa kalele David nye nda wa linga?

SOKOLOLA LUTATE!

O pondola oku kuama ovisimĩlo vi kuãimo ndeci:

Pinga onumbi ya sunguluka komunu umue.
Tala vomapa, ale vomakina yi tukuiwa hati, GPS.
Amamako oku endisa ekãlu, toke eci o sanga etapalo li ku tuala kocitumãlo o yongola oku enda.

Ocisimĩlo C, ka ca sungulukile.

Ocisimĩlo B, ca velapo ocisimĩlo catete. Momo, poku linga ungende, ca sunguluka oku ambata omapa, ale oku tala vo GPS, oco o kuatisiwe. Nda wa ci linga, eci o limbuka okuti wa nyelẽla, o tala vovina viaco, oco o limbuke onjila o sukila oku kuama.

Embimbiliya li sokisiwa lomapa okuti, li pondola oku ku kuatisa komuenyo wove!

Omo okuti Embimbiliya lia siata oku eciwa calua voluali, li pondola:

ku ku songuila eci o liyaka lovitangi.
Li ku kuatisa oku kũlĩha ciwa ekalo liove, oco o kale omunu umue uwa.
Li lekisa ndomo o pondola oku kuata ekalo liwa komuenyo.

ATAMBULULO KAPULILO A KUETE ESILIVILO LIA VELAPO KOMUENYO

Eci tu lilongisa oku vangula, tu linga apulilo amue ndeci:

Momo lie ilu li kuetele evala litekãva?
Momo lie olombungululu vi kuetele ocinyi?

Osimbu tuamamako oku kula, tu linga apulilo atiamẽla kovina vi sangiwa voluali lulo.

Momo lie voluali mua siatela oku pita ovina vĩvi?
Momo lie omanu va siatela oku fa?

Nye o sukila oku linga, nda wa limbuka okuti, atambululo kapulilo a lingiwa ndeti a sangiwa Vembimbiliya?

Omanu vamue va tava kovisimĩlo viokuti, Vembimbiliya mu sangiwa ovolandu vuhembi. Olio ka likuete esilivilo, kuenda ka ca lelukile oku kuata elomboloko liaco. Pole, ovina vipi via siata oku nena a tatahãi oco? Anga hẽ Embimbiliya, ale ovina omanu va siata oku yeva viatiamẽla kovolandu aco? Anga hẽ omanu omanu va kuete ovisimĩlo viaco, ka va longisiwile ciwa ovina vi sangiwa Vembimbiliya?

Omanu vamue va siata oku sima okuti, Embimbiliya li popia hati, Suku eye o kasi oku viala oluali lulo. Anga hẽ olondaka evi viocili? Tu kasi voluali lumue lue yuka ovitangi vialua! Momo tua siata oku liyaka lovitangi vialua ndeci: Ohali, ovoveyi, olofa, uhukũi, kuenda ovilunga. Citava hẽ okuti, Suku umue ukuacisola eye wa siata oku koka ovitangi viaco?

Ove hẽ o yongola oku kũlĩha etambululo liaco? O komõha calua poku limbuka eci Embimbiliya li popia catiamẽla komunu o kasi oku viala oluali lulo.

Ove hẽ wa limbuka okuti, alungulo a kasi vombrochura yilo a sangiwa Vembimbiliya? Olombangi Via Yehova via kolela okuti, Embimbiliya li pondola oku lekisa onjila ya sunguluka tu sukila oku kuama. Tu pondola oku kolela kovina vi sangiwa Vembimbiliya, momo, lia ‘tunda ku Suku, kuenje li silivila koku tu longisa, koku tu pisa, kuenda koku suñamisa ovina.’ (2 Timoteo 3:16, 17) Omo liaco, o sukila oku kapako ovina vi sangiwa Vembimbiliya. Momo, ndaño liosimbu, pole, li pondola oku ku kuatisa koloneke vilo!