LEKISA ONJONGOLE
OCIPAMA 8
Poku Lekisa Epandi
Ocisonehua: “Ocisola ci pandikisa.”—1 Va Kor. 13:4.
Ceci Yesu a Linga
1. Tala OVIDEO, ale tanga Yoano 7:3-5 kuenda 1 Va Korindo 15:3, 4, 7. Noke tambulula apulilo a kuãimo:
Kefetikilo, ocituwa cipi vamanji va Yesu va lekisa kesapulo a va kundila?
Nye ci lekisa okuti Yesu ka liwekelepo oku kuatisa manjaye Tiago?
Nye tu Lilongisila ku Yesu?
2. Tu sukila oku kala vakuepandi, momo omanu vamue oco va tave olondaka viwa cambata otembo yalua okuti, vakuavo ci sule.
Setukula Yesu
3. Seteka oku kuama onjila yimue ya litepa. Omunu umue nda ka tava oku fetika elilongiso Liembimbiliya vonjanja yaco, ku ko kisike. Vepuluvi limue lia sunguluka, talavaya lolovideo, ale lovipama vionumbi yetu, oco viu kuatise oku kuata elomboloko ndomo ku lingiwa elilongiso limue Liembimbiliya kuenda ndomo a pondola oku upako esilivilo.
4. Yuvula oku sokisa. Omunu lomunu wa litepa lukuavo. Nda umue ukuepata, ale poku linga epasu limue omunu waco ka yongola oku lilongisa Embimbiliya, ale ka tava kelongiso limue Liembimbiliya, kũlĩhĩsa esunga liaco. Anga hẽ kuli elongiso limue lietavo eye a kakatela calua? Eye o kasi hẽ oku lambalaliwa la vakuepata, ale la vana va lisungue laye? Ecelela okuti ku pita otembo yimue, oco eye a sokolole kueci wa popia, loku limbuka esilivilo lieci Embimbiliya li popia.
5. Likutililako omunu wa lekisa onjongole. Pinga ku Yehova oco a ku kuatise oku amamako oku kuata ocisimĩlo ca sunguluka, loku kala ukuotate. Likutilila oku pinga olondunge, oco o kũlĩhe otembo o sukila oku liwekapo oku nyula omunu ka lekisa onjongole.—1 Va Kor. 9:26.