‘Lipopela Ove Muele Kuenda Popelavo Ava va ku Yeva’

“Lilava ove muele. Lavavo oku longisa kuove. . . . omo, nda o ci linga, o lipopela ove muele, [kuenda] o popelavo ava va ku yeva.”−1 Timoteo 4:16.

1, 2. Nye civetiya Akristão vocili oco vamameko kupange wavo woku popela ovimuenyo?

VIMBO limue likasi ocipãla vetapi lio konano yofeka yo Tailandia, kusangiwa ulume umue lukãi waye okuti Olombangi via Yehova, kuenje, otembo yapita ndopo, ovo va seteka oku lilongisa elimi liomanu vimbo liaco. Oco va kundile omanu vovimbo liaco olondaka viwa Viusoma wa Suku, otembo ya pita ndopo, ulume waco lukãi waye, va lilongisa ciwa elimi lio Lahu.

² Ulume waco wa popia hati: “Ka tu tela oku sapula esanju tukuete, omo lioku talavaya vimbo lilo okuti omanu vaco valekisa onjongole yocili. Etu tuliyevite okuti, tua kongeliwa voku telisiwa kuolondaka Viesituluilo 14:6, 7, vipopia catiamela ko ku sapuila olondaka viwa ‘komanu vo kolofeka viosi, lo kapata osi, okuti va vangula alimi añi añi.’ Kuli lika onepa vimue okuti ka kapitilile handi olondaka viwa viusoma, kuenda ocikanjo cilo, handi ka kua la pitilavo olondaka viusoma. Etu, tukuete alilongiso alua Embimbiliya okuti ka tu tela oku a tata osi.” Ocili okuti, ulume u lukãi waye, valavoka oku lipopela ovo muele, kuendavo omanu vosi va va yevelela. Oco he etu Tuakristão, vosi yetu ka tukuetevo elavoko lioku linga cimuamue?

“LILAVA OVE MUELE”

3. Oco tu popele vakuetu, nye tu sukila tete oku linga?

³ Eci upostolo Paulu a lungula Timoteo hati, ‘lilava ove muele, [kuenda] Lavavo okulongisa kuove,’ elungulo liaco eli liatiamelavo Kakristão vosi. (1 Timoteo 4:16) Ocili okuti, poku kuatisa vakuetu oco va popeliwe, tete tu sukila oku lilava etu muele. Oco he tupondola oku cilinga ndati? Cimue tu kuete oku linga, oku lunguka omo liotembo yilo tukasi ndeti cilo. Yesu walekisa ondimbukiso yimue yikuete elomboloko lialitepa oco olondonge viaye vi kulihe eci ‘esulilo lioluali’ liya. Pole, Yesu wa popiavo hati etu ka tua kulihile eteke esulilo likeya. (Mateo 24:3, 36) Nye tusukila oku linga catiamela kondaka eyi?

4. (a)Ocituwa cipi he tukuete oku kuama votembo yakambapo koluali lulo? (b)Ocituwa cipi he tukuete oku yuvula?

⁴ Omunu lomunu pokati ketu citava okuti o lipula eye muele, hati: ‘Otembo yilo yakambapo ndeti koluali lulo, ndikasi he loku yi kapa kovina vi ndi kuatisa oco ndilipopele ame muele kuenda oco ndipopelevo omanu vosi va ndi yevelela? Ale ndikasi he loku sima okuti: “Omo ka tuakulihile otembo esulilo likeya, silitumbika ño enene kupange owu”?’ Ocisimilo casulako ndeti cikoka ohele. Calitepa calua lelungulo lia Yesu eci a popia hati: “Liangiliyi, momo Mõlomanu iya owola ka wa simili.” (Mateo 24:44) Ocili okuti, yilo hayoko otembo yoku tepulula ombili yetu kupange wa Yehova, okuti tu kapako lika oku kolapo kuoluali lulo kuenda esanju aluo.−Luka 21:34–36.

5.Ongangu yipi yalekisiwa lolombangi viatete via Yehova?

⁵ Onjila yikuavo tu pondola oku lekisa okuti tukasi loku lilava etu muele, oku pandikisa lekolelo vonjila Yukristão. Omanu va Suku kotembo yosimbo,va pandikisa cocili, ndaño ka va kulihile nda epopelo liavo lia kala ocipepi ale sio. Noke yoku tukula ovolandu apita lolombangi viatete via Yehova ndeci, Havele, Enoke, Noha, Avirahama, kuenda Sara, Paulu wa popia hati: “[Vosi yavo] ka va tambuile ovina via likuminyiwa, puãi va vi muila ocipãla loku vi yolela, kuenje va tava okuti va kala okombe, haivo ovingendeleyi, kilu lieve.” Ovo vaecelele onjongole layimue yoku ambata omuenyo waleluka, kuenda ka va wilile vayonjo vomanu vakahonga vakala ocipepi lavo, puãi va kuata evaloko ‘liovina via va likuminyiwa.’−Va Heveru 11:13; 12:1.

6. Ocisimilo Cakristão vokocita catete catiamela kepopelo ca vetiya ndati ekalo liavo?

⁶ Akristão vo kocita catete, vaenda loku lisokisavo ovo muele ‘ndakombe’ voluali lulo. (1 Petulu 2:11) Ndaño muele ceci okuti vayovuiwa ale kelundulo lio Yerusalãi kunyamo wa 70 K.K., Akristão vocili ka valiwekelepo oku kunda, kuenda ka va tiukilile konyima komuenyo woluali. Ovo vakulihile okuti epopelo liavelapo liomanu vosi vakamamako lekolelo likeya handi kovaso. Omo liaco, kefetikilo liunyamo wa 98 K.K., upostolo Yoano wasoneha ndoco: “Oluali lu takata loñeyi yaluo, puãi u o lingainga ocipango ca Suku okala oloneke ka vi pui.”−1 Yoano 2:17,28.

7. Olombangi via Yehova viasiata ndati oku lekisa epandi koloneke vilo?

⁷ Koloneke vilo, Olombangi via Yehova viasiatavo oku pandikisa kupange Wakristão, ndaño olonjanja vimue viasiata oku pita lovitangi viatiamela koku kuamaiwa. Epandi liavo he lialinga liolivova? Sio, kalialingile, momo Yesu wa va likuminya hati: Ndaño okuti oloseteko viaco vikeya kesulilo lioluali lulo luakuka, ale pamue viya muele otembo yilo, cavelapo ceci okuti, “u o pandakaisa toke kesulilo eye o[ka] popeliwa.” Kepinduko, Yehova oka va ivaluka, kuenda oka eca onima komanu vaye vosi vakuekoleloa vafa.−Mateo 24:13; Va Heveru 6:10.

8. Tulekisa ndati okuti tuasola calua epandi Liakristão vo kotembo yosimbu?

⁸ Handi vali, tua sanjuka calua omo okuti Akristão vakuekolelo vokotembo yosimbu, ka va kapeleko lika oku lipopela ovo muele. Ocili okuti, etu tua lilongisa eci catiamela Kusoma omo lioku likolisilako kuavo, tu pandula calua omo va pandikisa koku telisa ocikundi Yesu a sia hati: “Oco kuendi, ka tavisi [omanu vo k]olofeka viosi oco va linge olondonge. . . . va longisi oku linga ovina viosi ndo kundiki.” (Mateo 28:19, 20) Osimbu handi kuli epuluvi, tupondola oku lekisa olopandu vietu poku kundila vakuetu okuti kavayevele handi olondaka viwa. Pole, oku kunda efetikilo ño handi liupange utuala koku longisa omanu oco valinge olondonge.

‘LAVAVO OKU LONGISA KUOVE’

9.Oku kuata ocisimilo ca sunguluka cipondola ndati oku tu kuatisa oku fetika Alilongiso Embimbiliya?

⁹ Ocikele cetu cupange ka catiamele lika koku kunda, pole, muakongelavo oku longisa. Yesu wa tu iha ocikele coku longisa omanu oco va kuame ovina viosi eye atuma. Ocili okuti, kovikanjo vimue, soketi vatito vayongola oku lilongisa eci catiamela ku Yehova. Pole, nda tua sima okuti vocikanjo ka tusangimo omanu valekisa onjongole, ocisimilo eci cipondola oku tu tateka oku likolisilako kuetu koku fetika alilongiso Embimbiliya. Umue ukundi wotembo yosi otukuiwa londuko ya Yvette, okasi vocikanjo cimue okuti vacitukowaile okuti ka cimi apako, noke yoku ñuala vocikanjo caco, eci eye a pasuisa omanu vaco, walimbuka okuti kuli valua valekisa onjongole, kuenje wa fetika alilongiso Embimbiliya lomanu vaco kolonjo viavo. Noke eci Yvette aendako vali lovisimilo via sunguluka, wa sanga omanu vayongola oku lilongisa Embimbiliya.

10. Omo okuti etu tualongisi Vembimbiliya, ocikele cipi tukuete?

¹⁰ Akristão vamue pamue va suma suma poku fetika elilongiso Liembimbiliya lomanu va lekisa onjongole, momo ovo vakasi oku sima okuti, ka va tela oku linga elilongiso Liembimbiliya. Ocili okuti koku loñoloha kualitepa. Pole, kacisukila okuti tuloñoloha calua oco tu linge alongisi vawa Vondaka ya Suku. Ondaka yalipua Yembimbiliya yikuete ongusu yocili, kuenda Yesu wa popia hati, omanu vakasi ndolomeme vakuliha Ondaka Yungombo eci ovo va yi yeva. Upange wetu watiamela kokuambata Yungombo Uwa Yesu, okuti tulinga eci tutela.−Yoano 10:4, 14.

11. Ove he opondola ndati oku kuatisa ciwa omunu olongisa Embimbiliya?

¹¹ Ove he opondola ndati oku yevalisa muele ciwa ondaka ya Yesu? Poku fetika, ove muele kulihisa tete eci Embimbiliya lipopia catiamela kovipama oyongola oku longisa. Cisukila okuti ovipama o ka longisa ku vakuena, tete ove muele viu ku lomboloke ciwa. Vokuenda kuelilongiso, sunguluka kuenda lekisa ukamba. Omanu tulongisa Embimbiliya oku kongelamo ava okuti amalehe calua, va lilongisa ciwa eci ovo valianja kuenda ulongisi alekisa kokuavo esumbilo liocili lohenda.−Olosapo 16:21.

12. Ove he opondola ndati oku kuliha okuti eci okasi oku longisa komunu cikasi loku u lomboloka muele ciwa?

¹² Omo okuti ove ulongisi, ku yongola okuti omunu okasi loku longisa Embimbiliya upituluila lika eci casonehiwa pocinimbu. Ukuatisa oco eci eye akasi loku lilongisa culomboloke muele ciwa. Elilongiso liaye akuete lio kosikola, ekalo liaye, kuenda ukulihiso eye akuete weci catiamela Kembimbiliya, ovina viaco evi vikokuatisako oku kuata elomboloko lieci ove wusapuila. Omo liaco, citava okuti o lipula ove muele ndoco: ‘Ovipama Viembimbiliya vitukuiwa velilongiso eye he vikasi oku u lomboloka muele ciwa?’ Citava okuti ove ulinga apulilo okuti ka a tambulula lika londaka vialeluka ndevi viokuti: Oco muele, ale hacoko. Pole, eye osukila oku lombolola volondaka viaye muele. (Luka 9:18–20) Konepa yikuavo, omanu vamue tulongisa pamue vasiata oku lisamaila oku pula ulongisi wavo. Omo liaco, pamue citava okuti vamamako oku lilongisa pole, ka va kuata elomboloko lieci vakasi oku longisiwa. Vetiya omunu ove okasi loku longisa oco alinge epulilo, kuenje eci eye alimbuka okuti etosi limue ka liombolokele ciwa, alipulise kokuove.−Marko 4:10; 9:32, 33.

13. Ove he opondola ndati oku kuatisa omunu okasi loku longisa oco alingevo ulongisi?

¹³ Yimue onepa yavelapo yoku songola elilongiso Liembimbiliya, yatiamela koku kuatisa omunu ove okasi loku longisa oco alingevo ulongisi.(Va Galatia 6:6) Oco eci citelisiwe, poku pitulula lomunu waco, citava okuti opinga kokuaye oco alombolole etosi limue volondaka vialeluka, pole, cikale ndu okuti eye okasi loku vi lomboluila komunu umue onjanja yatete. Eci olimbuka okuti eye waloñoloha kuenda opondola oku kuata onepa kupange woku kunda, citava okuti ulaleka oco aende love kupange woku kunda. Eye oka sanjuka calua oku talavaya kumue love, kuenje upange waco owu wu ko kuatisa okuti oloñoloha toke eci eye muele apondola okuenda kupange woku kunda likawaye.

KUATISA OMUNU OVE OKASI LOKU LONGISA OCO ALINGE EKAMBA LIA YEHOVA

14. Cipi he ocimãho cove cavelapo ove ulongisi, kuenda nye cika ku kuatisa oco otelise ocimãho caco?

¹⁴ Onjongole yavelapo kalongisi Akristão yatiamela koku kuatisa omanu vakasi loku longisiwa Embimbiliya oco valinge akamba va Yehova. Ove ocikele eci oka citelisa lolondaka viove, kuenda longangu yove yiwa. Oku longisa loku lekisa ongangu yiwa, oyo onjila yavelapo okuti cosi cipopiwa ciñila kovitima viava tukasi loku longisa. Ovilinga vi vetiya vali okuti olondaka cisule, pole, capiãla vali enene nda okuti ovilinga viaco viatiamela koku longisa ovituwa via sunguluka kuenda oku kuata ombili lomunu tukasi loku longisa. Nda eye walimbuka okuti olondaka viove lovilinga viatiamela kelitokeko liocili la Yehova, citava okuti eye muele o kuatavo onjongole yoku lekisa elitokeko liaco.

15. (a)Momo lie cavelelapo okuti omun ove okasi loku longisa amamako loku lekisa esunga lieci avumbila Yehova? (b)Ove he opondola ndati oku kuatisa omunu okasi loku longisa oco atuihinye loku kula kespiritu?

¹⁵ Ove oyongola okuti omunu okasi loku longisa, ovumba Yehova okuti kacilingila ño omo liusumba woku nyõliwa vo Harmagedo, pole, eye ocilingila omo okuti ukuetele ocisola. Nda wo vetiya oco amameko loku lekisa ocituwa caco locili, oka kala ndomunu wa tunga lovikuata ka vinyõleha londalu, okuti ekolelo liaye li ko kuatisa oku yula oloseteko. (1 Va Korindo 3:10–15) Ovisimilo ka viasungulukile ndeci, onjongole yivi yoku setukula ove ale omunu umue ukuavo, ovina viaco evi ka vikowiha ongusu yoku tamalãla kayonjo atunda kuava kavatiamele Kakristão, kuenda ka ka kuata epandi lioku linga eci casunguluka. Ivaluka okuti, ove ku ka kala ulongisi waye otembo yenda hu. Osimbu ove okuete epuluvi, uvetiya oco atiamele ku Yehova, poku tanga tanga Ondaka ya Suku eteke leteke, kuenda oku sokolola eci eye akasi loku tanga. Nda eye wa kuama onjila eyi, okamamako loku “pokola kolondaka viocili,” vi tunda Vembimbiliya kuenda valivulu alombolola eci catiamela Kembimbiliya, eci ove opitila kesulilo lioku u longisa.−2 Timoteo 1:13.

16. Opondola he ndati oku kuatisa omunu loku longisa oco atele oku linga olohutililo vitunda kutima?

¹⁶ Ove opondolavo oku kuatisa omunu okasi loku longisa oco akuate elitokeko liocili la Yehova poku u vetiya oco alinge olohutililo vitunda kutima. Eci he ove opondola oku cilinga ndati? Pamue, citava okutiu longisa ohutililo yalongisa Yesu, kuenda olohutililo vikuavo visangiwa Vembimbiliya, ndeci evi viasonehiwa kelivulu Liolosamo. (Olosamo 17, 86, 143: Mateo 6:9, 10) Handi vali, eci omunu ove okasi loku longisa ayevelela ohutililo ove o linga, ndeci yoku fetika elilongiso kuenda yoku malusula, eye oka kuata elomboloko lielitokeko liove la Yehova. Omo liaco, olohutililo viove olonjanja viosi te vikala muele viocili lesunguluko okuti vivetiya.

TALAVAYA OCO OYOVOLE OMÃLA VOVE

17. Olonjali vipondola ndati oku kuatisa omãla vavo oco vakuame onjila yituala koku popeliwa?

¹⁷ Pokati komanu etu tuyongola oku yovola, pakasivo ovimatamata viepata lietu. Omãla valua okuti olonjali viavo Akristão, ovo vasunguluka kuenda ‘vapama vekolelo.’ Pole, omãla vakuavo ocili ka ca iñilile handi kovitima viavo. (1 Petulu 5:9; Va Efeso 3:17; Va Kolosai 2:7) Valua pokati kamalehe vaco ava, eci va linga akulu, ka va yongola vali oku kuama onjila Yukristão. Nda ove unjali, nye okuete oku linga oco ayuvule ocituwa eci civi? Catete ceci okuti, ove okuete oku kuatisa epata liove oco vonjo mukale esunguluko liocili. Omuenyo wepata limue liasunguluka olio ociseveto coku kuatisa usongui wepata, koku lekisa ovituwa viwa okuti viecelela oku lisumbila pokati. (Va Heveru 12:9) Omo liaco, elitokeko liocili vepata, lipondola oku kuatisa omãla oco vakuate ukamba wocili la Yehova. (Osamo 22:10) Apata akolapo ciwa nda ovina viosi vavilingila kumuamue lelitokeko liocili, ndaño okuti olonjali vikuete oku pita otembo yalua lomãla vavo, okuti otembo yaco nda vayikapa kupange woku sanga eteku. Nda olonjali viakuama onjila eyi, vipondola oku lekisa ongangu yiwa poku longisa omãla vavo oco vanõlepo onjila yasunguluka komuenyo wavo. Alonjali, eci omãla vene va sukila vali calua kokuene, havikuatako, pole, vosukili muele ene, okuti, wupita lavo otembo yalua, loku va kuatisa locisola. Ove he okasi lokueca komãla vove ovina evi?

18. Apulilo api olonjali visukila oku kuatisa omãla vavo oku a tambulula?

¹⁸ Olonjali lalimue eteke ka vikasime okuti, omo ño ovo Akristão, omãla vavo va ka lingavo Akristão ndaño ka va kuatisiwile. Daniele okuti, umue ukulu wekongelo, okuete omãla vatãlo, wa popia hati: “Olonjali visukila oku pita otembo yalua lomãla vavo, oco vivakuatise kovitangi valiyaka lavio kosikola kuenda kovitumãlo vikuavo. Olonjali visukilavo oku kuata epandi lomãla vavo oco vatele okueca atambululo kapulilo alingiwa ndeci: “Tukasi muele kotembo yesulilo? Ocili he okuti kuli lika etavo limosi liocili? Momo lie kacasungulukile oku vala ukamba la vamue valilongisa lavo kosikola? Anga he civi omunu oku linga ukahonga eci handi ka tokekisile olohuela?’ Alonjali, ene upondola oku likutilila ku Yehova oco asumuluise oku likolisilako kuene, kuenda oco eye akapekovo omãla vene okuti va kala muele ciwa.

19. Momo lie cavelelapo okuti olonjali vi longisa ovio muele omãla vavo?

¹⁹ Olonjali vimue viasiata oku sima hati ka vi kuete uloño woku longisa eci ovio vifetika oku longisa omãla vavo muele. Pole, ka cisukila okuti ove osima ndoco, momo ka kuli laumue wa velapo koku longisa omãla vove okuti ove cisule. (Va Efeso 6:4) Nda ove muele wa longisa omãla vove cikaecelela okuti noke oka limbuka lonjanga eci ovo vakasi loku sima. Ovo he vaeca atambululo atunda muele kutima wavo, ale vaeca atambululo ana oku ku sanjuisa ño ove? Ovo he vatava muele kueci vakasi loku lilongisa? Vatava he okuti Yehova okasiko muele? Ove opondola lika oku sanga atambululo kapulilo a–a kuenda akuavo akuetevo esilivilo, nda ove muele wa longisa omãla vove.−2 Timoteo 1:5.

20. Olonjali vipondola ndati oku sokiya elilongiso liepata lisanjuisa, kuenda likuatisa?

²⁰ Opondola ndati okuamamako lelilongiso liepata wafetika? Yosefe, ukulu wekongelo okuti okuete omõla umue ukuenje, kuenda ukuavo ufeko, wa popia hati: “Esanju lisangiwa valilongiso osi Embimbiliya, te halio lisangiwavo velilongiso liepata, okuti cikala ocina cimue okuti vosi va ci kevelela. Oco tu pitile kocimãho Eci vepata lietu, ciwa okuti, ka ku kakatela ño enene kotembo. Elilongiso lietu citava okuti lipitila lika owola yimosi, pole ndaño okuti olonjanja vimue tu lilongisa lika otembo yasoka ekui liakukutu. Ocina cimue okuti oco cavelapo vali velilongiso lietu vokuenda kuosemana okuti ci vetiya omãla, ceci okuti, etu tulinga ovindekaise viovolandu amue opiwa velivulu litukuiwa okuti, Meu Livro de Historias Biblicas.a Evetiyo kuenda elomboloko litunda koku lekisiwa kuovindekaise viaco liavelapo vali okuti eci tu lilongisa ovinimbu vialua cisule.”

21. Olonjali vipondola ndati oku sokiya elilongiso liepata lisanjuisa, kuenda likuatisa?

²¹ Ocili okuti, oku longisa omãla vove ka kusulila lika velilongiso limue li lingiwa olonjanja vimue. (Esinumuilo 6:5–7) Manji Ombangi ya Yehova okasi kofeka yo Tailandia watukuiwa ale kefetikilo liocipama cilo, wa popia hati: “Ndivaluka ndomo Dad angambataile losikaleta yetu kupange woku kundila kocikanjo cimue cakala ocipãla lekongelo lietu. Ocili okuti, ongangu yiwa olonjali vietu viatuiha kuenda elongiso vatuiha kapuluvi osi ovio via tu kuatisa oku nõla onjila yoku litumbika kupange wotembo yosi. Kuenda, elongiso liaco haimo liamamako lokueca apako. Handi vali, ame ndikasi loku talavaya vocikanjo cimue cikasi ocipãla!”

22. Olonjali vipondola ndati oku sokiya elilongiso liepata lisanjuisa, kuenda likuatisa?

²² Yesu, ndopo muele votembo yasokiyiwa okeya oco alinge esombiso lia Suku voluali lulo. Ci ka kala ocipito cimue ci ka pita kolonepa viosi via kulo kilu lieve, pole omanu vakuekolelo vakamamako loku vumba Yehova, lelavoko lioku popeliwa otembo yenda hu. Ove he olavokavo oku kala pokati kavo, kumue lomãla vove kuenda omanu okasi loku longisa Embimbiliya? Nda oco, Ivaluka olondaka via popia hati: “Lilava ove muele. Lavavo oku longisa kuove. Pandikisa lovina evi, omo, nda o ci linga, o lipopela ove muele, [kuenda] o popelavo ava va ku yeva.”−1 Timoteo 4:16.

[Atosi]

◻ Ocituwa cipi tusukila oku lekisa omo okuti ka tua kulihile eteke liesombiso lia Suku?

◻ Kolonepa vipi tupondola oku ‘lava okulongisa kuetu’?

◻ Opondola ndati oku kuatisa omunu ove okasi loku longisa oco alinge ekamba lia Yehova?

◻ Momo lie cavelelapo okuti olonjali visokiya otembo yoku longisa omãla vavo?

[Elomboluil]

Elilongiso lisanjuisa vali ciwa vekalo limue liasunguluka kuenda liocisola

[Elomboluil]

Poku linga ovindekaise viovolandu a sangiwa Vembimbiliya, ndeci a–a atiamela ku Salomone wa sombisa ovipuepue vivali, cisanjuisa elilongiso liepata