Ndomo Umbumba wa Veta Akãi Vamue Vavali
SANDRA, ocimbumba cimue ci kasi ko Australia. Eci ulume waye a fa, anyamo amue konyima, ekalo lia Sandra vonjanja yatete lia kala liesumuo lia piãla. “Vonjanja yaco nda limbuka okuti nda pesela ukuanjo yange haeye ekamba liavelapo kuenje ca ñokela esumuo. Ocili okuti si ivaluka ndomo nda tiukila konjo oku tunda kosipitali ale ceci ndalinga voloneke vikuavo. Vokuenda kuolosemana vimue via kuamamo usumba wange wa amamako oku kala evalo limue lietimba.”
Sandra o kuete ekamba limue liukulu Elaine okuti ocimbumba vokuenda kuanyamo amue a soka epandu. Elaine wa tata ulume waye Daviti olosãi epandu eci handi ka file luveyi wo cancer. Esumuo liaye lia luile calua okuti vokatembo kamue, noke yoku fa kulune waye wa linga omeke. Noke yanyamo avali eye wa kupukila powiñi. Ondotolo yeya ka ya sangale layimue ondumbukiso yuveyi ketimba. Ndaño ndoco, eye wa limbuka okuti Eaine esumuo liaye ka lilekaisa komanu, kuenje ondotolo yo wimba onumbi yokuenda konjo kuenda oku ka seteka lepandi oku kaluka. Elaine wa ci tava hati vulika, “ca pita otembo ya lua loku linala lesumuo liange, toke muẽle nda endaenda oku iñila vohondo loku muñila utue wange vovowalo a Daviti.”
Ocili, oku fa kuo hueli yi soliwe ci pondola oku nena asumuo alua, momo vumbumba muakongela vali calua okuti oku kala omunu ka kuete ulume ci sule. Ndeci, Sandra wa liyeva otembo yimue ndomunu umue wiñi. Ndovimbumba vialua vikuavo via fisa ndopo, eye wa yevavo okuti o kasi kohele, ka kolelepo. Sandra ivaluka okuti: “Nda kuatele ulume wange wa lingainga olonetululo viaco. Sakalele lotulo. Nda kavele kuenda nda kala lepuila. Eci ca tilile oku kulihisa eci ci lingiwa.”
Eteke leteke kuli ovolandu a lisoka nda a Sandra kuenda Elaine voluali luosi. Ovaveye, ovitangi, ovoyaki, oku liponda pokati kolombuto viomanu kuenda ungangala, cosi ci vetiya oku livokiya kuetendelo liovimbumba.a N’ta Valua akãi vaco ava va yevela evalo vokati okuti ka va kuluhile eci va linga akamba kuenda vakuepata oco va va kuatise oku linala lumbumba? Ocipama ci kuamamo ci kuete olonumbi vimue vi pondola okueca ekuatiso.
[Etosi pombuelo yemela]
a Akãi vakuavo va kasi vocitangi cimuamue ndovimbumba evi mekonda lialume vavo va vasiapo. Ndaño okuti oku litepa kuenda oku linyala kuolohueli ku nena ovitangi via litepa komunu lomunu, etendelo liolonumbi via vanguiwa vocipama cikuamamo ci tava okuti vi kuatisavo akãi va kasi vovitangi viaco.