“Ameli ku Suku Kuenje Eye Amela Kokuene”

Tete Kuenda Noke Eye wa Sanga Unene Woku Pongoloka

UKÃI umue o tukuiwa hati Sandra kofeka yo Mexiku wa lombolola eci catiamẽla kokuaye muẽle okuti ka kuatele ovituwa via sunguluka vepata liaye. Vokuenda kuotembo eci eye a kala umalẽhe wa kuata ovitangi vioku livala ukamba lavakuavo kuenda ekambo liocisola. Eye wa lombolola hati: “Ame nda kula lovisimĩlo vimue ka via sungulukile viatiamẽla komuenyo kuenda atatahãi alua esunga lieci ndi kasilili komuenyo.”

Eci Sandra a kala handi oku tangela kosikola ya velapo haico a fetika oku nyua ovinyu ya isiaye ya kala vonjo. Vokuenda kuotembo eye wa fetika oku landa ovinyu yaye muẽle kuenje noke wa linga oholua. Eye wa lombolola hati: “Sia kuatele layimue onjongole yoku kala vali lomuenyo.” Omo lioku pua elavoko wa fetika oku sipa epangue. Eye wamisako loku lombolola hati: “Ocina ca enda loku ndi kuatisa lika koku ivala ovitangi viange, oku ambata vokacipete kange ndeci: okavinyu ale kamue okaliamba.”

Eci Sandra a mala oku tanga okuti wa linga ondotolo yoku sakula omanu, otembo yaco wa kala ale oholua. Olonjanja vialua wa seteka oku liponda. Pole, eye ka file.

Sandra ka tẽlele oku sanga ekuatiso kespiritu kuenda ovisimĩlo via sunguluka vatavo ana eye aenda enda. Kuenje, ka kuatele vali elavoko lalimue kuenda wa lisiõsiõla lolukandi ku Suku hati: “Pi o kasi? Kuenda momo lie ku ndi kuatisila?” Eci Ombangi yimue ya Yehova ya vangula laye eci catiamẽla Kembimbiliya, kokuaye omuenyo waye ka wa kuatele vali esilivilo lalimue. Kuenje, covetiya oku lilongisa Embimbiliya. Sandra wa yeva evetiyo liocili eci eye a lilongisa okuti, “Yehova yu ocipepi la vakuavitima via teka.”​—⁠Osamo 34:⁠18.

Ombangi ya Yehova ya kala oku lilongisa laye Embimbiliya, yo kuatisa oku kuata elomboloko liokuti, Yehova Suku wa kũlĩha okuti etu tuakuakandu kuenda ka tua lipuile omo lioku piñala ekandu ku isietu Adama. Sandra wa kuata elomboloko liokuti Suku wa kũlĩha okuti etu ka tu pondola oku kuama ovihandeleko via Suku ndomanu vana va lipua. (Osamo 51:5; Va Roma 3:23; 5:​12, 18) Kuenje wa kuata esanju lialua eci a lilongisa okuti Suku ka lavulula akandu etu, kuenda eye ka kevelela kokuetu eci ka tu tẽla oku linga. Ukualosamo wa linga epulilo hati: “A Yehova, nda ove o patekela olongole, helie o talama, a Yehova?​—⁠Osamo 130:⁠3.

Ocili cimue ca velapo ci sangiwa Vembimbiliya okuti oco ca vetiya calua utima wa Sandra, ocilumba cocisembi ca Yesu Kristu. Lekuatiso liocilumba caco Yehova wa lekisa ohenda yaye ya velapo komanu vosi vana vakuakupokola ndaño okuti ovo ka va lipuile. (1 Yoano 2:2; 4:​9, 10) Ocili okuti tu pondola oku sanga ‘ongecelo yakandu etu’ kuenda oku kuatisiwa oco tu yule ovisimĩlo viosi vi tuala omunu koku hongua.​—⁠Va Efeso 1:⁠7.

Sandra wopavo esilivilo lialua poku lilongisa ongangu yupostolo Paulu. Eye wa kuata esanju lialua omo liohenda ya Suku poku wecela akandu aye osi a linga kuenda oku u kuatisa oco a yuvule ovisimĩlo viosi vina vi lekisa ehonguo. (Va Roma 7:​15-25; 1 Va Korindo 15:​9, 10) Upostolo Paulu wa li kolisilako oku linga apongoloko komuenyo waye, ‘poku veta etimba liaye loku lipokuisa’ oco a kuate esumũlũho lioku taviwa la Suku. (1 Va Korindo 9:27) Eye ka ecelele okuti olonjongole viaye ka via sungulukile viu lingisa upika.

Olonjongole vietimba via Sandra via enda oku u yula, pole eye wamamako oku yaka lavio oco a vi yule. Eye wa enda oku likutilila ku Yehova lesunguluko oco o kuatise oku vi yula kuenje weya oku sanga ohenda ya Suku. (Osamo 55:22; Tiago 4:⁠8) Eci Sandra a limbuka okuti Suku wokapako muẽle ndomunu, eye wa tẽla oku linga apongoloko komuenyo waye. Kuenje, wa popia hati: “Ndi kuete esanju lialua lioku longisa vakuetu ocili Cembimbiliya otembo yosi.” Eye wa kuata esumũlũho lioku longisa manjaye ufeko okuti ukulu waye kuenda manjaye ufeko umalẽhe waye oku kũlĩha Yehova. Osimbu eye a kala oku likolisilako ‘oku linga eci ciwa’, eye wa enda oku lieca olumue oco a kuatise omanu luloño waye woku sakula vamanji kolohongele viofeka Violombangi via Yehova.​—⁠Va Galatia 6:⁠10.

Nye Sandra a vokiya kulandu waye? Eye wa loñolako poku popia hati: “Utima wange wa yela. Cilo si kasi vali oku nyua ale oku sipa epangue. Ovina viaco si vi sukila vali. Ame nda sanga eci nda enda oku sandiliya.”

[Etosi lia velapo kemẽla 9]

“Nda sanga eci nda enda oku sandiliya.”

[Okakasia kemẽla 9]

Olonumbi Viembimbiliya Vina Vieca Ekuatiso

Olonumbi vimue Viembimbiliya via siata oku kuatisa omanu vamue oku siapo ovituwa vina ka via sungulukile:

“Tu liyelisi kovina viosi vi vĩhisa etimba levi vi vĩhisa utima. Tu suisipo okukola kuetu loku sumbila Suku.” (2 Va Korindo 7:⁠1) Suku o sumũlũisa omanu vana va liyelisa ovo muẽle kovina vi vĩhisa kuenda oku yuvula ovituwa vina ka via sungulukile.

“Oku sumbila Yehova oko oku suvuka evĩho.“ (Olosapo 8:13) Oku lekisa esumbilo lia sunguluka ku Suku ci kuatisa omunu oku siapo ovituwa vina ka via sungulukile oku kongelamo okusipa epangue. Kuenje, esumbilo liaco omunu a lekisa poku linga apongoloko, ka a sanjuisa lika Yehova, pole li teyuila omunu kovoveyi añi añi.

“[Sumbili] olombiali lolosoma, loku vi pokola.” (Tito 3:⁠1) Kolofeka vialua ale kovitumãlo vimue, oku landisa kuenda oku sipa epangue ci lekisa oku tomba ovihandeleko. Omo liaco, Akristão vocili lalimue eteke vaka kuata ale oku sipa epangue.