Ocihandeleko Coku Sola Vakuetu Elilongiso Limue Lioluali Luosi

“Ovina viosi vu yongola okuti omanu vo linga haivio vu va linga.”—Mateo 7:12.

TUNDE eci Yesu Kristu a vangula olondaka evi Vohundo yaye Komunda, papita ale ci soka olohulukãi vivali kanyamo. Vokuenda kuovita vianyamo kua sonehiwa calua catiamẽla kondaka yaco. Ondaka yaco eyi, ya tukuiwa ‘ndono ya velapo Vovisonehua. Omo liaco, Akristão va kuete ocikundi coku sapuilako vakuavo ondaka yaco eyi yi kuete esilivilo liocili.

Ocili okuti, ocisimilo Cocihandeleko coku lisola pokati condaka ya Yesu ka catiamẽlele lika Kakristão. Atavo alua a lombolola ovisimilo via litepa viatiamẽla kondaka yaco ndeci, o Judaismo, o budismo kuenda uloño waño woko Helasi. Ondaka yaco eyi ya Confúcio onoño haeye ulongisi wa sumbiwa calua, ya kulihiwa lomanu vo kolofeka vio Kutundilo. Pokati kalivulu akuãla a Confúcio, velivulu liaye liatatu tu sangamo ocisimilo caco okuti ca tukuiwa olonjanja vitatu. Poku tambulula olondonge viaye olonjanja vivali, Confúcio wa lombolola hati: “Ovina o yongola okuti ka va ku vi lingila ku ka vi lingilevo vakuene.” Onjanja yi kuavo, eci ondonge yaye Zigong ya lipanda oku vangula hati: “Ovina ndi yongola okuti vakuetu ka va vi ndingi, lamevo havioko ndi va linga,” ulongisi wo tambulula hati: “Oco muẽle, pole eci handi ocina cimue ku tẽla oku linga.”

Omunu wosi o tanga ondaka eyi, o pondola oku limbuka okuti ondaka ya Confúcio ya litepa leyi ya vanguiwa noke la Yesu. Etepiso li sanguiwapo lieli okuti, ondaka ya Yesu ka yi pisa, pole yi vetiya oku linga eci ciwa komanu. Sokolola nda omanu va kapeleko muẽle ocili ondaka ya Yesu, yoku tata vakuavo locisola, poku va kuatisa kuenda oku kapako ocihandeleko caco eteke leteke. Ku simi hẽ okuti oluali etaili nda lu kasi ocitumãlo cimue ciwa? Ka kuli atatahãi.

Cikale okuti olonumbi viaco via lomboluiwa lonjila yoku pisa, cikale lonjila yoku vetiya ale yimue yikuaco, ca velapo handi ceci okuti vokuenda kuotembo kolonepa viñi viñi, omanu vakapako ocihandeleko eci catiamẽla kondaka ya Yesu. Eci ci lekisa okuti cina Yesu a vangula Vohundo yo Komunda, elongiso limue lioluali luosi. Kuenda elongiso liaco liatiamẽla komanu vosi.

Lipula ove muẽle ndoco: ‘Ndi sole okuti ndi tatiwa lesumbilo, lonjila yimue ka yi lekisa olonepele kuenda lesunga? Ndi sole oku kala voluali lumue ka muli olonepele viakova, ungangala kuenda uyaki? Anga hẽ ndi sole oku kala vepata limue okuti omunu lomunu o lekisa onjongole kovisimilo kuenda kekalo liwa lia vakuavo?’ Helie hẽ o tẽla oku popia hati si yongola ovina ndevi? Ocili okuti, ovitangi ovio lika vi tepulula esanju liaco. Komanu valua ka ca lelukile oku kevelela ovina ndevi.

Ocihandekeko Coku Sola Vakuetu ca Pengisiwa

Vokuenda kuesapulo kua siata oku pita ungangala walua okuti omoko yekalo liwa liomanu ka ya siatele oku kapiwako. Vungangala waco mua kongela oku landisa apika va tunda vo Afrika, loku kisika omãla oco va talavaye kuenda oku pondiwa kuomanu kovitumãlo viñi viñi. Kua lingiwa ovina vialua vivi okuti ka vi tendiwa.

Etaili voluali luetu lulo luovoloño kuenda luovomesele añi añi, omanu va siata oku livelisapo. Kuli omanu vamue okuti va sokolola lika vakuavo nda va yongola oku ci linga ale va ci linga lika eci ekalo liaco likala kohele. (2 Timoteo 3:1–5) Oco hẽ, momo lie omanu va lisolele lika ovo muẽle okuti ka va kuetele ocikembe vakuavo? Eci hesungako lieci okuti olondaka via Yesu vina via kulihiwa calua ka via kapiwileko vali? Ci sumuisa calua omo okuti ovina viaco evi vi kasi loku pita pokati komanu, ndaño muẽle komanu vana va siata oku vangula hati va tava ku Suku. Kuenje, loku vanja ndomo ovina vi kasi lokuenda, omanu vaka mamako loku lisola ovo muẽle.

Omo liaco, ku lingiwa apulilo ndoco: Voku kapako Ocihandeleko coku sola vakuetu mua kongela hẽ nye? Anga hẽ kuli handi omanu va kasi loku kapako Ocihandeleko caco? Kuka kala hẽ eteke limue okuti omanu vosi voluali vaka kapako Ocihandeleko coku lisola pokati otembo ka yi pui? Oco o sange atambululo ocili kapulilo aco, tanga ocipama ci kuãyimo.

[Elitalatu kemela 3]

Confúcio kuenda vakuavo va longisa ocihandeleko ca Yesu poku kuama olonjila vialitepa