Nye Yesu a Popia Catiamẽla Koku Tata Vakuetu?

Etambululo Liembimbiliya

Ondaka Oku “Tata Vakuetu,” ka yi sangiwa Vembimbiliya, pole, valua va siata oku yi tiamisila kocituwa Yesu a longisa. Vohundo Yesu a Lingila Komunda, yi tukuiwavo okuti “Ohundo Yokomunda,” wa popia hati: “Ovina viosi vu yongola okuti omanu vo vi lingili, haivio vu linga kokuavo.” (Mateo 7:12; Luka 6:31) Ondaka Oku Tata Vakuetu, yi lomboluiwavo volondaka viokuti: “Tata omanu ndomo o yongola okuti oco va ku tatavo.”—Bíblia Fácil de Ler.

• Nye ci lomboloka oku Tata Vakuetu?

• Momo lie oku Tata Vakuetu ci kuetele esilivilo?

• Anga hẽ oku Tata Vakuetu ci lomboloka oku eca locimãho coku tambula?

• O kapako ndati ocituwa coku tata vakuene?

Nye ci lomboloka oku Tata Vakuetu?

Oku Tata Vakuetu, ci tu vetiya oku va tata ndeci tu yongola okuti oco va tu tatavo. Ndeci, olonjanja vimue tu sole calua oku tatiwa lesumbilo, ohenda kuenda ocisola. Omo liaco, tu sukila oku tata vakuetu ndomo va yongola okuti oco tu va tata.—Luka 6:31.

Momo lie oku Tata Vakuetu ci kuetele esilivilo?

Ondaka oku Tata Vakuetu, yi pondola oku tiamisiwila kovina viosi. Ndeci, yi tiamisiwila koku . . .

• Pamisa olohuela.—Va Efeso 5:28, 33.

• Koku kuatisa olonjali poku tata omãla.—Va Efeso 6:4.

• Mioñolola ukamba tu kuete lakamba, la vana tu lisungue lavo kuenda vana tu talavaya lavo.—Olosapo 3:27, 28; Va Kolosai 3:13.

Oku Tata Vakuetu onumbi yimue tu pondola oku sanga Votestamento Yale. Kelivulu lia Mateo 7:12 Yesu wa popia hati, “eci oco Ocihandeleko kuenda Ovaprofeto va longisa,” ondaka Ocihandeleko [yi tiamisiwila kalivulu atete atãlo Embimbiliya,] kuenda ondaka Ovaprofeto, [yi tiamisiwila kalivulu ovaprofeto.] (Mateo 7:12) Volondaka vikuavo, ondaka oku Tata Vakuetu, yi lekisa onumbi yimue Yembimbiliya yi sangiwa Votestamento Yale yokuti: Sola u o lisungue love.—Va Roma 13:8-10.

Anga hẽ oku Tata Vakuetu ci lomboloka oku eca locimãho coku tambula?

Sio. Oku tata vakuetu ci tiamisiwila koku eca ale koku lingila vakuetu eci ciwa. Eci Yesu a tukula ocituwa coku tata vakuetu, eye wa kala oku popia ndomo tu tata omanu vosi oku kongelamo ovanyãli. (Luka 6:27-31, 35) Omo liaco, ocituwa coku tata vakuetu ci tu vetiya oku lingila omanu vosi eci ciwa.

O kapako ndati ocituwa Coku Tata Vakuene?

1. 1. Kuata ocituwa coku lavulula. Kapako vana va kasi ocipepi love. Ndeci, pamue o lete omunu umue wa ambata olonjenge via lema calua, ale wa kũlĩha umue okuti o kasi kosipitali, pamue ekamba liove lio kupange lia sumua. Nda wa kapako omanu vaco loku ‘sokolola ovina via vakuene,’ citava okuti o ka kuata apuluvi alua oku popia ale oku linga ocina cimue oco o kuatise vakuene.—Va Filipoi 2:4.

2. 2. Likapa pocitumãlo comunu ukuavo. Sokolola ndu okuti wa likapa pocitumãlo comunu ukuavo. O liyeva ndati? (Va Roma 12:15) Nda ove o kuete ovisimĩlo ndevi via vakuene, citava okuti o pondola oku va kuatisa.

3. 3. Kuata ovisimĩlo via sunguluka. Ivaluka okuti ovituwa kuenda ekalo liomunu lomunu via litepa. Olonjanja haviosiko okuti eci ove o yongola okuti oco va ku lingila, oco omunu ukuavo a yongolavo okuti vo ci lingila. Kuli ovina vikuavo ove o pondola oku linga, pole, nõla oku linga cina okuti omunu ukuavo o ka ci sola.—Va 1 Korindo 10:24.