O Tava hẽ Oku Songuiwa la Kristu?
“Ko ka tukuiwi, vati, A cime, momo Cime cene umuamue [lika], Kristu.”—MATEO 23:10.
1. Helie Usongui Wakristão vocili?
CA KALA Vovali keteke 11 kosãi ya Nisana. Otembo yaco, kua kambele lika oloneke vitatu osimbu handi Yesu Kristu kafile. Eyi oyo onjanja ya sulako eye a linga epasu vonembele. Keteke liaco, Yesu wa eca elongiso limue lia velapo kowiñi wa kala vonembele kumue lolondonge viaye. Eye wa popia hati: “Ko ka tukuiwi, vati, A Rambei, momo ulongisi wene umuamue, lene vosi wamanji. Ko ka tukuli omunu kilu lieve hoti, Isietu, momo Isiene umuamue, o kasi kilu. Ko ka tukuiwi, vati, A cime, momo Cime cene umuamue [lika], Kristu.” (Mateo 23:8-10) Omo liaco, Yesu Kristu eye lika Usongui Wakristão vocili.
2, 3. Ekuatiso lipi tu pondola oku tambula poku yevelela kolonumbi via Yehova kuenda oku pokola Kusongui eye a nõla?
2 Hekuatisokuolio tu pondola oku tambula komuenyo wetu nda tua tava oku songuiwa la Yesu! Yehova Suku wa nõla uprofeto Isaya oco a lombolole eci catiamẽla kokuiya Kusongui waco oku popia hati: “Ene vosi vu kasi lenyona, enjui kovava. Wosi ka kuete olombongo eye, a lande, a lie. Enjui muẽle, ndo landi ovinyu lasenjele, puãi halolombongoko, [kuenda] halondandoko. . . . Njeveleli lutate ho li eci ciwa, oco ovitima viene vi sanjuke lelau. . . . Tala, ndo tukula ombangi ya vakualofeka, haeye usongui wa vakualofeka, haeye kesongo liavo.”—Isaya 55:1-4.
3 Isaya wa tukula ovava ana omanu va siata oku nyua, asenjele, kuenda ovinyu, oco a lekise ndomo omunu lomunu pokati ketu a pondola oku kuatisiwa poku yevelela ku Yehova loku pokola eci eye a tuma lekuatiso Liusongui wetu Yesu Kristu. Ekuatiso liaco li kavuluisa, li kasi ndo kopo yovava atalala tu nyua nda kuli utanya wa lua. Omo liaco, enyona tu kuetele kondaka yocili haiyo yesunga noke li tepuluka. Ndomo asenjele a siata oku kuatisa oloñaña oco vi kale ciwa, ondaka ya Suku yi kasi ‘ndasenjele,’ ci tava okuti yi tu ĩhavo ongusu yoku loñoloha kespiritu oco tu kuate ukamba wocili la Suku. (1 Petulu 2:1-3) Pole, helie o tẽla oku popia hati ovinyu ka yi pondola oku sanjuisa omanu va kasi kocipito cimue? Cimuamue haico ci pita lava va kasi loku fendela Suku yocili. Poku kuama ongangu Yusongui wavo Yesu Kristu una wa nõliwa la Suku, ovo va pondola oku kuata ‘esanju’ liocili komuenyo wavo. (Esinumuĩlo 16:15) Ciwa okuti, ci kale amalẽhe ale akulu, alume lakãi, vosi yetu tu tavi oku songuiwa la Kristu. Ndamupi tu pondola oku tava okuti Mesiya eye Usongui wetu?
Amalẽhe, ‘Amamiko Kolondunge’
4. (a) Eci Yesu a kuata ci soka 12 kanyamo nye ceya oku pita eci va endele ko Yerusalãi kotembo Yopaskoa? (b) Olondunge vipi Yesu a lekisa eci a kuata cisoka 12 kanyamo?
4 Konomuisa ongangu Usongui wetu a eca kamalẽhe. Ndaño okuti ka tua kũlĩhĩle calua catiamẽla ku Yesu eci a kala umalẽhe, pole, kuli handi ulandu watiamẽla kokuaye. Eci Yesu a kuata ci soka 12 kanyamo, olonjali viaye via endele laye kocipito co Paskoa cina va enda oku linga anyamo osi ko Yerusalãi. Omo okuti eye wa kala oku situlula Ovisonehua, eci olonjali viaye via tiukila ka viomuile, kuenje vosiapo. Eci papita oloneke vitatu, olonjali viaye Yosefa la Maria vieya oku saluka calua, noke veya oku u sanga vonembele “wa tumala pokati kalongisi oku va yevelela loku va pula pula.” Omo liaco, “vosi vo yeva va komoha olondunge viaye latambululo aye.” Ndaño okuti Yesu wa kuata lika ci soka 12 kanyamo, ka tẽlele lika oku sapula eci catiamẽla kovina viespiritu, pole, wa tẽlavo oku eca atambululo olondunge. Ocili okuti, eye wa kuatisiwa calua poku longisiwa lolonjali viaye.—Luka 2:41-50.
5. Ndamupi amalẽhe vamue va siata oku lekisa esilivilo kelilongiso Liembimbiliya vepata liavo?
5 Citava okuti pamue ove handi umalẽhe. Nda okuti olonjali viove via litumbika kupange wa Suku, wa siata oku linga elilongiso Liembimbiliya lepata konjo yene. Ndamupi o tenda elilongiso vepata? Ca velapo oku sokolola kapulilo ndeci: ‘Anga hẽ nda siata oku eca ekuatiso kelilongiso Liembimbiliya vepata? Ndi sole hẽ oku eca ekuatiso eci ku lingiwa elilongiso oco si ka nyõle eliangiliyo liaco?’ (Va Filipoi 3:16) ‘Nda Siata hẽ oku eca atambululo eci tu linga elilongiso? Nda siata hẽ oku linga apulilo atiamẽla kocipama tu lilongisa loku tambulula apulilo aco ndomo a kapiwako komuenyo wetu? Osimbu ndi kasi loku amamako oku loñoloha kespiritu, nda siata hẽ oku lekisa onjongole ‘kokulia kuakola kuna akulu va sesamẽla’?—Va Heveru 5:13, 14.
6, 7. Oku tanga Embimbiliya oloneke viosi ku kuete esilivilo lipi kamalẽhe?
6 Oku tanga Embimbiliya oloneke viosi ku kuatisa calua. Ukualosamo wa imba ocisungo hati: ‘Wa sumũlũha omunu una okuti ka endaenda lalungulo olondingaĩvi. Pole o sanjukila lika ovihandeleko via Yehova, kuenda o sokolola ovihandeleko viaye utanya luteke.’ (Osamo 1:1, 2) Yehosua kapiñala ka Mose, wa enda loku ‘tanga elivulu liovihandeleko utanya luteke.’ Eci cowiha olondunge viocili, kuenda co kuatisa koku tẽlisa upange a tambuile ku Suku. (Yehosua 1:8) Usongui wetu Yesu Kristu wa popia hati: “Ca sonehiwa okuti, Omunu ka muila omuenyo kombolo lika, te kondaka yosi yi tunda vomẽla wa Suku.” (Mateo 4:4) Omo okuti tu sukila eteku lietimba oloneke viosi, tu sukilavo oku tambula okulia kuespiritu oloneke viosi.
7 Nikole eci akuata ci soka 13 kanyamo, omo a kala lonjala yespiritu, weya oku fetika oku tanga Embimbiliya oloneke viosi.a Cilo, o kuete eci ci soka 16 kanyamo, kuenje wa tanga ale Embimbiliya liosi. Pole, wa fetika vali oku tanga Embimbiliya onjanja yavali, kuenda o kasi ale vocakati. Eye o kuãi onjila yimue ya sunguluka. Omo liaco, wa popia hati: “Nda nõlapo onjila yokuti, oloneke viosi ndi tanga ocipama cimosi Cembimbiliya.” Ekuatiso lipi a tambula koku tanga Embimbiliya oloneke viosi? Eye wa tambulula hati: “Koloneke vilo, ovituwa vĩvi via livokiya calua. Oloneke viosi nda siata oku liyaka layonjo kosikola kuenda kolonepa vikuavo okuti a kapa kohele ekolelo liange. Oku tanga Embimbiliya oloneke viosi ku ndi kuatisa calua, kuenda ku njivaluisa ovihandeleko lolonumbi Viembimbiliya vina vi ndi kuatisa koku tamalãla layonjo. Kuenje, cilo ndi kuete ukamba wocili la Yehova kuenda la Yesu.”
8. Ocituwa cipi Yesu a kuatele kueci catiamẽla koku endaenda vosunangonga? Ndamupi amalẽhe va pondola oku kuama ongangu yaye?
8 Yesu wa kuatele ocituwa coku yevelela loku tangela Ovisonehua vo sunangonga. (Luka 4:16; Ovilinga 15:21) Eci ci kuatisa calua amalẽhe vana okuti va kuãi ongangu yaco poku endaenda kolohongele viekongelo olonjanja viosi, oku ku tangiwa kuenda ku lilongisiwa Embimbiliya. Okamõla kamue kukuenje o tukuiwa hati Richard eci a kuata ci soka 14 kanyamo, wa eca olopandu viaye hati: “Olohongele viekongelo vi kuete esilivilo liocili kokuange. Kolohongele, nda siata oku tambula elungulo liatiamẽla koku linga eci ciwa loku yuvula eci cĩvi, eci ca sunguluka, leci ka ca sungulukile. Handi vali, ndi lilongisavo oku kuama cosi ci taviwa Lakristão kuenda oku yuvula cosi ovo ka va sole. Ndi lilongisa calua poku yevelela ovolandu a sumũlũisa.” Ocili okuti, “uvangi wa Yehova wocili, u muisa olondunge ava va wulua.” (Osamo 19:7) Nicole wa nõlapovo oku endaenda kolohongele vitãlo vi lingiwa vokuenda kuosemana. Eye wa siatavo oku pita olowola vivali ale vitatu loku pongiya ovipama violohongele.—Va Efeso 5:15, 16.
9. Ndamupi amalẽhe va pondola ‘oku amamako kolondunge’?
9 Otembo yovomalẽhe oyo yiwa yoku sanga epuluvi lioku kuata ‘ukũlĩhĩso wa Suku yocili, kuenda oku kũlĩhavo Yesu Kristu una eye a tuma.’ (Yoano 17:3) Pamue ove wa kũlĩha amalẽhe vana okuti otembo yavo va yi pesila lika koku tanga alivulu ana a kokisa ovinjola, loku tala o Televisão, lolomapalo vi lingiwilamo, ale ovipama vi yapula omanu. Momo lie ove o sukilila oku kuama ongangu yavo osimbu okuti nda o pondola oku kuama ongangu yiwa ya Yesu kristu? Eci Yesu a kala umalẽhe, wa kuata esanju liocili poku lilongisa eci catiamẽla ku Yehova. Oco hẽ asumũlũho api eye a tambula? Omo okuti Yesu wa solele calua cosi catiamẽla kovina viespiritu, eye weya ‘oku amamako kolondunge.’ (Luka 2:52) Ove o pondolavo oku kuama ongangu yaye.
“Lipokoli Pokati”
10. Nye cika kuatisa oco vepata mu kale ombembua lesanju?
10 Onjo ci tava okuti yi linga ocitumãlo cimue combembua lesanju, ale pamue yi linga ocitumãlo cimue conjuela. (Olosapo 21:19; 26:21) Nda tua tava oku songuiwa la Kristu, tuka kuatisiwa calua momo ci tava okuti vepata lietu mu kala ombembua lesanju. Apata va sukila oku kuama ongangu ya Yesu oco va kuate ukamba wocili. Embimbiliya li popia hati: ‘Omo okuti wa sumbili Kristu, li sumbili pokati. Akãi, pokoli ku vaveyene ndeci ku Ñala. Momo ulume eye utue wukãi waye ndeci Kristu eye utue wekongelo, hailio etimba liaye, kuenje Kristu haeye upopeli walio. . . . Ene alume, soli akãi vene ndeci Kristu a sola ekongelo, kuenje wa liecela.’ (Va Efeso 5:21-25) Upostolo Paulu wa sonehela ekongelo lio ko Kolosai hati: “Ene amãla, pokoli kolonjali viene kovina viosi, momo oco ci sanjuisa Ñala.”—Va Kolosai 3:18-20.
11. Ndamupi ulume a pondola oku lekisa okuti o pokola koku songola kua Kristu?
11 Oku kuama elungulo eli, ci lomboloka okuti ulume o sukila oku songuila epata liaye. Pole, ukãi o sukilavo oku kuatisa omo lioku pokola kulume waye, kuenda omãla te va pokola kolonjali viavo. Ulume ci tava okuti o linga usongui umue uwa vepata, nda o songola lesunguluko. Ulume ukualondunge o sukila oku lilongisa ndomo a songuila epata liaye poku kuama ongangu Yusongui waye Yesu Kristu. (1 Va Korindo 11:3) Ndaño okuti Yesu weya oku linga “utue wovina viosi viekongelo,” eye keyilile palo posi oco ‘a vumbiwe, pole, weyilila oku vumba.’ (Va Efeso 1:22; Mateo 20:28) Cimuamue haicovo ci pita lulume Ukristão okuti, poku songuila epata liaye, ka sandiliya olonjongole viaye muẽle, pole o pitisa kovaso olonjongole viepata liosi ndeci, viukãi waye kuenda viomãla. (1 Va Korindo 13:4, 5) Eye o sandiliya oku kuama ovituwa via Yesu Kristu usongui waye. Ndeci Kristu a linga, eye o sukila oku lekisa umbombe loku liketisa vutima. (Mateo 11:28-30) Nda ulume wa lueya, ka catĩlile oku kuama olondaka ndeci, “ngecele,” ale “ove o kuete esunga.” Ongangu yaye yiwa, ci tava okuti yecelela ukãi waye oku linga “oñuatisi” ulume “asesamẽla” okuti o lilongisila ‘kokuaye’ poku talavaya kumuamue laye.—Efetikilo 2:20; Malakiya 2:14.
12. Nye ci pondola oku kuatisa ukãi oco a tave kocihandeleko coku sumbila usongui wepata?
12 Ukãi o sukilavo oku lekisa esumbilo kulume waye. Pole, nda eye wa yapuiwa lovituwa violuali ci tava okuti o kapa kohele ocihandeleko coku sumbila usongui wepata, noke oku lekisa esumbilo kulume ci linga ocitangi kokuaye. Embimbiliya ka livetiya okuti akãi te va vialiwa lalume vavo. Pole, ovo va sukila oku lekisa esumbilo liocili kalume vavo. (Va Efeso 5:24) Embimbiliya li vetiya alume ale olonjali oco vi tẽlise ovikele viavo vepata. Kuenje, nda elungulo liaco lia kuamiwa, ci kuatisa oco vepata mu kale ombembua kuenda esunguluko liocili.—Va Filipoi 2:5.
13. Ongangu yipi yatiamẽla kepokolo Yesu a sila omãla?
13 Omãla va sukilavo oku pokola kolonjali viavo. Yesu wa sia ongangu yimue yiwa yatiamẽla kondaka eyi. Ulandu umue wa pita vonembele u lekisa okuti, eci Yesu a kuata ci soka 12 kanyamo wa sialele vonembele vokuenda kuoloneke vitatu. Eye ‘wa endele kumue lolonjali viaye Konasara, kuenje wamamako loku pokola kokuavo.’ (Luka 2:51) Nda omãla va pokola kolonjali viavo, ci tava okuti vepata mu kala esanju liocili. Nda omunu lomunu o tava oku songuiwa la Kristu, vepata mu kala ombembua kuenda esanju liocili.
14, 15. Nye cika tu kuatisa koku yula ovitangi vepata? Lombolola ulandu umue.
14 Eci vepata muiya ovitangi, tu sukila oku kuama ongangu ya Yesu kuenda oku tava kolonumbi viaye. Kũlĩhĩsa ulandu owu: Ulume umue otukuiwa hati, Jerry, eci a tokekisa olohuela viaye la Lana, wa kuata eci ci soka 35 kanyamo. Pole, Lana wo sanga ale lomõla ufeko. Omõla waco weya oku va nenela ovitangi vina okuti lalimue eteke va vi simĩle. Jerry wa lombolola hati: “Nda kũlĩha okuti oco ndi linge usongui umue uwa vepata, nda sukilile oku pokola kolonumbi Viembimbiliya vina vieca ekuatiso liocili vepata. Pole, noke ndeya oku limbuka okuti, olonumbi viaco nda kala loku vi kuama luloño wocili kuenda lolondunge.” Omõla waco ufeko ka kuatele esumbilo liocili la inaye wocita kuenda Jerry. Jerry wa sukilile oku kũlĩhĩsa oco a limbuke olombangulo lovilinga viufeko waco. Ndamupi eye a tetulula ocitangi caco? Jerry wa tambulula hati: “Lana kumue lame tua tava okuti pamue ci sukila okuti Lana eye o pindisa ufeko, osimbu ame ndilikolisilako oku kuata ukamba wocili lufeko. Noke, eci ceya oku nena ekuatiso liocili.”
15 Eci tu li yaka lovitangi vepata, tu sukila oku kũlĩhĩsa eci vakuepata va popia lovituwa viavo kuenda ndomo va ci linga. Tu sukilavo uloño oco tu kuame olonumbi via Suku via sunguluka. Ndeci, Yesu wa limbukile ocitangi cukãi una wa kala oku liyaka luveyi woku pita osonde. Kuenje, eye wa vangula laye ciwa, kuenda wa lekisa esunguluko kokuaye. (Ovisila 15:25-27; Marko 5:30-34) Omo liaco, tu sesamẽla oku kuata ukũlĩhĩso lolondunge. (Olosapo 8:12) Usongui wetu Yesu, wa kuata olondunge kuenda uloño.
‘Sandiliya Tete Usoma’
16. Upange upi okuti owo tu sukila oku pitisa kovaso vomuenyo wetu? Pole, ndamupi Yesu a ci lekisa longangu yaye?
16 Yesu wa lombolola okuti, vana va tava oku songuiwa laye va sukila oku konomuisa ovina va sukila oku pitisa kovaso vomuenyo wavo. Eye wa popia hati: ‘Puãi tete sandiliyi usoma wa Suku kuenda esunga liaye.’ (Mateo 6:33) Yesu wa tu sila ongangu okuti oyo tu sukila oku kuama kuenda wa tulekisavo ndomo tu pondola oku cilinga. Kesulilo lieci ci soka 40 koloneke eci Yesu a kala loku likutilila kuenda oku sokolola noke yoku papatisiwa kuaye, eye weya oku liyaka loseteko yimue. Satana Eliapu wo lekisa ovoviali osi oluali kumue ‘lulamba waco.’ Sokolola ño ovokuasi Yesu nda eya oku kuata nda okuti wa tavele kombanjaile ya Satana. Pole, eye wa nõlapo lika oku linga ocipango ca Isiaye. Eye wa kũlĩhĩle okuti, omuenyo voluali lulo lua Satana ka u kala otembo yalua. Kuenje, eye wa likala ombanjaile Yeliapu poku popia hati: “Ca sonehiwa citi, fendela Yehova Suku yove, eye lika o vumba.” Noke, Yesu “wa fetika oku kunda hati, likekembeli akandu ene, momo usoma wokilu u kasi ocipepi.” (Mateo 4:2, 8-10, 17) Otembo yosi Kristu a kala palo posi, wa li tumbikile lika kupange woku kunda Usoma wa Suku.
17. Ndamupi tu pondola oku lekisa okuti Usoma wa Suku owo tua pitisa kovaso vomuenyo wetu?
17 Tu linga ciwa nda tua kuama ongangu Yusongui wetu Yesu, poku likala olonjanjo violuali lulo lua Satana luna lu vetiya oku kuata upange umue weca olombongo vialua, kuenda oku kuama umesele umue okuti owo tu pitisa kovaso komuenyo wetu. (Marko 1:17-21) Oku kuama onjila yaco eyi uveke, momo ci tava okuti tu yapuiwa lovokuasi oluali lulo, kuenje upange Wusoma tu u kapa konyima. Yesu wa tu ĩha ocikele coku kunda Usoma kuenda oku longisa omanu oco va linge olondonge. (Mateo 24:14; 28:19, 20) Ocili okuti, pamue tu kuete ocikele coku tata epata, ale ovikele vikuavo. Anga ka tu pondola hẽ oku sandiliya otembo kekumbi, kuenda kesulilo liolosemana oco tu li tumbike kupange woku kunda kuenda woku longisa? Hevetiyokuolio tu pondola oku tambula eci tu tala upange woku kunda Usoma wa lingiwa vokuenda kunyamo wo 2001 okuti, ci soka 780.000 komanu va litumbika kupange wakundi votembo yosi!
18. Nye ci pondola oku tu kuatisa oco tu sange esanju kupange woku kunda?
18 Avanjeliu a lombolola okuti, Yesu wa kala ulume umue wa litumbikile kupange woku kunda kuenda wa kuatele ohenda lomanu. Eci eye a limbuka okuti vana va kala ponele yaye va sukilile okulia kuespiritu, eye wa va kuatele ohenda, kuenda wa va kuatisa. (Marko 6:31-34) Upange wetu woku kunda u pondola oku nena esanju liocili eci tu lekisa ocisola ku vakuetu lonjongole yoku va kuatisa. Pole, ndamupi tu pondola oku kuata onjongole yaco? Ukuenje umue o tukuiwa hati Jayson wa lombolola hati: “Eci nda kala umalẽhe, sia kuatele onjongole kupange woku kunda.” Nye co kuatisa oku sola upange waco? Jayson wa tambulula hati: “Vepata liange, keteke lia Casapalo, tua enda oku li tumbika kupange woku kunda. Omo liaco, eci ca ndi kuatisa calua, momo kupange woku kunda ndaenda oku tẽlisa upange wange, kuenje ndeya oku kuata esanju liocili.” Etu tu sukilavo oku li tumbika kupange woku kunda olonjanja viosi lonjongole yocili.
19. Onjila yipi tu sukila oku nõlapo kueci catiamẽla koku songuiwa la Kristu?
19 Oku tava koku songuiwa la Kristu ku kavuluisa kuenda ku nena onima yocili. Nda tua kuama onjila eyi, otembo yumalẽhe yi kala yoku amamako loku kuata ukũlĩhĩso wasuapo kuenda olondunge. Omuenyo wepata u pondola oku kala ono yombembua lesanju kuenda upange woku kunda u nena esanju liocili. Omo liaco, cikale eci tu yongola oku linga komuenyo wetu, ale onjila tu yongola oku kuama, tu ivaluki okuti Kristu eye usongui wetu. (Va Kolosai 3:23, 24) Handi vali, Yesu Kristu wa sokiyavo ekongelo Liakristão oco tu tambule ekuatiso lioku endisiwa vonjila ya sunguluka. Omo liaco, ocipama cikuãimo cika lombolola ndomo tu pondola oku kuatisiwa leliangiliyo liaco.
[Etosi pombuelo yemẽla]
a Olonduko vimue via pongoluiwa
Handi Ocivaluka?
• Ekuatiso lipi tu pondola okupa koku pokola Kusongui wetu wa nõliwa la Suku?
• Ndamupi amalẽhe va pondola oku lekisa okuti va yongola oku songuiwa la Yesu?
• Epata lina li pokola koku songuiwa la Kristu li tambula ekuatiso lipi?
• Ndamupi upange wetu woku kunda u pondola oku lekisa okuti tu kasi loku songuiwa la Kristu?
[Olondaka vielitalatu kemẽla 10]
Otembo yovomalẽhe oyo yiwa yoku kuata ukũlĩhĩso wa Suku kuenda wa una eye a nõla oco a linge Usongui wetu
[Olondaka vielitalatu kemẽla 11]
Oku pokola koku songuiwa la Kristu ku nena esanju liocili vepata
[Olondaka vielitalatu kemẽla 13]
Yesu wa pitisile kovaso Usoma wa Suku. Ci popiwa hẽ ndati catiamẽla kokuove?