Ulamba Wa Yehova U Tuila Komanu Vaye

“Yehova o linga ocinyi cove ka ci pui.”​—⁠ISAYA 60:⁠20.

1. Ndamupi Yehova a siata oku sumũlũisa omanu vaye vakuekolelo?

“YEHOVA o sanjukila omanu vaye. Ava va kangisua o va posuisa leyulo.” (Osamo 149:⁠4) Ndomo ca lomboluiwa lukualosamo, asapulo a siata oku lekisa okuti, olondaka evi viocili muẽle. Yehova, eci omanu vaye va lekisa ekolelo, eye o va tata ciwa okuti va amamako lovituwa viwa kuenda oku va teyuila. Kosimbu, eye wa ecaile eyulo eci ovo va enda oku liyaka lovanyali vavo. Koloneke vilo, eye wa siata oku kuatisa omanu oco va pamisiwe kespiritu kuenda oku va likuminya oku va yovola omo liocilumba ca Yesu. (Va Roma 5:⁠9) Eye wa siata oku ci linga omo okuti, ovo omanu vamue va sunguluka kokuaye.

2. Ndaño okuti omanu va Suku va lambalaliwa, ekolelo lipi va sukila oku kuata?

² Ocili okuti, voluali lulo luowelema, omanu “vosi va yongola oku kala lomuenyo wesunga lia Suku,” va lambalaliwa. (2 Timoteo 3:12) Pole, Yehova o lete ovanyali vaco, kuenje o va lungula hati: “Ofeka kuenda omanu ka va tava oku ku vumba va nyolẽha. Olofeka ka vi tava oku ku vumba vi nyolĩwa.” (Isaya 60:12) Koloneke vilo elambalalo lia siata oku limolehĩsila volonepa vialua. Kolofeka vimue, ovanyali va siata oku seteka oku tateka efendelo liocili, lina Akristão va siata oku eca ku Yehova. Handi vali, ovanyali va siata oku punda kuenda oku timĩha ovikuata viafendeli va Yehova. Pole, ivaluka okuti, Yehova wa sokiya ale eci cika pita lovanyali vaye oco a tẽlise ocipango caye. Ovanyali ka vaka yula. Vosi vana vaka seteka oku yaka la Siono, ci lombolola okuti olombuavekua via Suku va tendiwa okuti omãla vaye va kasi handi palo posi, ka vaka li tunda ciwa. Anga hẽ eci ka ci tu vetiya oku kolela Yehova Suku yetu?

Asumũlũho a Lavokaiwa

3. Ndamupi eposo kuenda ovituwa viafendeli va Yehova via lekisiwa?

³ Uvangi u lekisa okuti, vokuenda kuoloneke vilo via sulako violuali lulo luevĩho, Yehova wa siata oku sumũlũisa omanu vaye, loku va ĩha elavoko. Eye wa siata oku amamako loku posuisa ocitumãlo caye cefendelo kuenda oku sumũlũisa vana va sandeka onduko yaye. Ndomo ca lomboluiwa vocitumasuku ca Isaya, eye wa sapuila Siono hati: “Ulamba wa Levanone wiya kokuove. Ofaya kuenda ocinendele lusombo, viyilila kumuamue ha vi posuisa ocitumãlo cange ci kola. Kuenje ociliatelo colomãi viange ndi ci muisa ulamba.” (Isaya 60:13) Olomunda kuenda ovisenge vi lekisa eposo liavio. Omo liaco, oviti via posoka, ovio ondimbukiso yeposo kuenda ovituwa viwa viafendeli va Yehova.​—⁠Isaya 41:19; 55:⁠13.

4. ‘Ocitumãlo ci kola’ kuenda ociliatelo ‘colomãi via Yehova,’ ci lomboloka nye? Pole, ndamupi ca siata oku posuisiwa?

⁴ ‘Ocitumãlo ci kola’ kuenda ociliatelo ‘colomãi via Yehova,’ ci lomboloka nye ndomo ca lomboluiwa kelivulu lia Isaya 60:13? Ondaka yaco, yi lomboloka ocitali conembele yinene ya Yehova yespiritu, okuti eliangiliyo lioku amẽla kokuaye poku u fendela vonduko ya Yesu Kristu. (Va Heveru 8:​1-5; 9:​2-10, 23) Yehova wa siata oku posuisa onembele yaco yespiritu, poku nena omanu vokolofeka viosi oco veye vofendele. (Hagai 2:⁠7) Isaya, wa muĩle owiñi waco u tunda kolofeka viosi okuti wa kala loku lamana komunda yinene ya Yehova oco vo fendele. (Isaya 2:​1-4) Noke liovita vianyamo, upostolo Yoano vocinjonde caye, weya oku mõla “owiñi wakahandangala okuti, oku va tenda lomue o ci tẽla. Va tunda kolofeka viosi kuenda kapata osi, okuti omanu vakuapata osi kuenda vakualimi osi.” Owiñi waco, “wa talama kovaso yocalo ca Suku, . . . loku u vumba utanya luteke vonembele yaye.” (Esituluilo 7:​9, 15) Osimbu ocitumasuku eci camamako loku tẽlisiwa koloneke vilo, onjo ya Yehova ya siata oku posuisiwa.

5. Epongoloko lipi li komohĩsa omãla va Siono va pita lalio?

⁵ Hepongolokokuolio lia velapo lia siata oku pita la Siono! Yehova wa popia hati: “Ocili, [okuti] wa siwile, kuenda wa suvukiwile, okuti lomue wa pitapitamo, cilo puãi hu kemãlĩsa lulamba ko pui, hu lingisa onjolela yovitumbulukila via lua.” (Isaya 60:15) Kesulilo liuyaki watete wa pita voluali luosi, ‘Isareli ya Suku,’ wa pita votembo yimue yohali. (Va Galatia 6:16) Eye wa simĩle okuti ‘wa siwa’ otembo yosi kuenda omãla vaye kulo kilu lieve ka va kuatele elomboloko lia suapo liatiamẽla kueci Suku a va yonguilile. Kunyamo wo 1919, Yehova wa eca ekuatiso kolombuavekua viaye, kuenje tunde opo, eye wa siata oku va sumũlũisa oco va amameko kespiritu. Anga hẽ, ohuminyo yi sangiwa kovinimbu evi ka yi vetiya? Yehova oka kemãlĩsa Siono, ‘lulamba ko pui.’ Omãla va Siono kuenda muẽle Yehova, vaka kemãlisa Siono. Siono, ‘oka kaluka’ omo liesanju ka li pui. Kuenje, esanju liaco ka lika kala ño okatembo kamue katito. Ekalo lienda hũ lia Siono, ndomo lia lekisiwa lomãla vaye palo posi, lika kala otembo ka yi pui pokati ‘kovitumbulukila via lua.’ Omo liaco, lalimue eteke lika pua.

6. Ndamupi Akristão vocili va siata oku kuatisiwa lovokuasi olofeka?

⁶ Kaliye, yevelela ohuminyo yikuavo ya Suku. Yehova wa sapuila Siono hati: “O nyama asenjele olofeka, kuenje o tekuiwila kavele olosoma. O limbuka okuti ame Yehova Ndupopeli wove, haime Ndinjovoli yove, haime Ndukuangusu ya Yakoba.” (Isaya 60:16) Ndamupi Siono a siata oku nyama “asenjele olofeka” kuenda ‘oku tekuiwa lavele olosoma’? Akristão vaco olombuavekua kuenda “olomeme vikuavo,” va siata oku kuatisiwa lovokuasi a tunda volofeka oco efendelo liocili liamameko. (Yoano 10:16) Olomeme viaco vikuavo, via siata oku eca olombanjaile viavo oco viece ekuatiso lia velapo kupange woku kunda kuenda woku longisa voluali luosi. Ovo va siata oku talavaya lolomakina vi yayuisako koku panga alivulu a lombolola eci ci kasi Vembimbiliya, ana a kasi loku sandekiwa valimi alua. Koloneke vilo, ocili Cembimbiliya ci kasi loku yevalisiwa komanu valua okuti kosimbu ci sule. Omo liaco, omanu vo kolofeka viñi viñi va kasi oku lilongisa okuti, Yehova una wa yovola olombuavekua viaye kupika wespiritu, eye Upopeli.

Oku Amamako Kuocisoko

7. Oku amamako kupi ku komohĩsa kua siata oku pita lomãla va Siono?

⁷ Yehova o kasi loku kuatisa omanu vaye lonjila yimue yikuavo. Eye wa siata oku va sumũlũisa loku amasako ocisoko. Kelivulu lia Isaya 60:​17, tu tangako hati: ‘Posipi miñainyapo ulu, putale miñainyapo opalata, puti miñainyapo osipi, povawe miñainyapo utale. Ndika kapa ombembua ha yi lingi ovasongui vove, lesunga ha li lingi vakapatasi vove.’ Posipi oku piñainyapo ulu, ci lomboloka oku mioñolola ovina viosi, kuenda cimuamue haicovo ci pita lovina vikuavo via tukuiwa. Kuenje, Isareli ya Suku, wa siata oku linga apongoloko añi añi vocisoko, ca piãla vali enene koloneke vilo via sulako. Omo liaco, konomuisako ño handi apongoloko amue.

8-10. Lombolola apongoloko amue a lingiwa tunde kunyamo wo 1919.

⁸ Eci handi ka tua pitilile kunyamo wo 1919, akongelo omanu va Suku va enda loku songuiwa lakulu vekongelo kumue lolondiakono via enda loku nõliwa lomanu vakuekongelo. Kefetikilo liunyamo waco, “ukuenje wa kolelua haeye wa lunguka” wa fetika oku nõla umue usongui vekongelo lekongelo oco a kale mitavaso kupange woku kunda. (Mateo 24:​45-47) Pole, akulu vamue vekongelo va nõliwile, ka va endaile loku tava kolonumbi via mitavaso yupange woku kunda. Omo liaco, kunyamo wo 1932, akongelo a imbiwile onumbi yoku siapo oku nõla akulu vekongelo lolondiakono. Pole, kueya oku nõliwa ocisoko cimue cupange oco ci talavayele kumue la mitavaso yupange. Kuenje, eci ca sokisiwile ndoku piñainya “osipi’ pomangu ‘yuti.’ Kuenje, eci ca kala elivokiyo limue liocili.

⁹ Kunyamo wo 1938, akongelo koluali luosi eya oku tava keliangiliyo limue lia sokiyiwa okuti, liatiamẽla kovilongua viopiwa Vovisonehua. Ovina viosi viatiamẽla kekongelo, via kapiwile peka liakulu vekongelo vana va enda loku nõliwa okuti, va kuama olonumbi viocisoko cukuenje wa kolelua haeye wa lunguka. Omo liaco, ka kua kaile vali oku nõliwa lowiñi wekongelo, ndeci ca siata oku lingiwa voluali. Olomitavaso viosi vekongelo, via enda loku nõliwila veliangiliyo liuviali wa Suku. Kuenje, eci ca sokisiwile ndoku piñainya “ulu” pomangu ‘yosipi,’ ale pomangu ‘yopalata’ papiñayiwa ‘utale.’

¹⁰ Tunde opo, apongoloko eya oku amamako calua. Kunyamo wo 1972, kueya oku limbukiwa okuti, oco ekongelo liende ciwa, ca sukilile okuti lekuatiso lia Suku, ku nõliwa ocimunga cimue cakulu vekongelo oco va songuile ekongelo. Kuenje pokati kakulu vaco vekongelo, pa kala umue o kuata omoko yoku songuila vakuavo. Omo liaco, onjila yaco eyi, ya li setahãla leyi ya kuamiwile Lakristão kocita catate. Noke, eci pa pita anyamo avali, kua lingiwa epongoloko limue likuavo liatiamẽla kovisoko Violombangi via Yehova vina via kũlĩhĩwa Lombonge, oco vamanji vatiamẽla Kosungu Yakulu Volombangi via Yehova, va pitise vali kovaso upange woku kuatisa omanu va Suku kespiritu. Kuenje ka va lingi vali upange woku tetulula ovitangi viatiamẽla kovisoko Violombangi via Yehova via kũlĩhĩwa Lombonge.

11. Helie wa siata oku ecelela oco vocisoko comanu va Yehova mu lingiwe apongoloko? Pole, apongoloko aco a siata oku nena asumũlũho api?

¹¹ Helie o kasi konyima yapongoloko aco oku amako? Yehova Suku eye o kasi loku ci linga. Eye wa popele hati: ‘Ndika nena ulu.’ Kuenje wamisako loku popia hati: ‘Ndika kapa ombembua ha yi lingi ovasongui vove, lesunga ha li lingi vakapatasi vove.’ Yehova eye ukuacikele coku songuila omanu vaye. Oku amamako kuocisoko, oyo onjila yimue yikuavo eye a siata oku kuama oco a sumũlũise omanu vaye. Omo liaco, Olombangi via Yehova via siata oku sumũlũisiwa volonepa vialua. Kelivulu lia Isaya 60:​18, tu tangako hati: “Ungangala ka u yevala vali vofeka yove, ndaño oku kundula, pamue oku nyoliwa, volongave viove. O tukula ovimbaka viove huti, Eyovo, lolombundi viove huti, Esivayo.” Ocili okuti, olondaka viaco evi via posoka calua. Pole, ndamupi via siata oku tẽlisiwa?

12. Ndamupi ombembua yi pondola oku kala pokati Kakristão?

¹² Akristão vocili va kolela kelongiso lieciwa la Yehova okuti eye o va songuila, kuenje va tambula asumũlũho ndomo Isaya a ci popia okuti: “Omãla vove vosi va longisiwa la Yehova, kuenje oku salala kuomãla vove ku lua.” (Isaya 54:13) Ocili okuti, espiritu lia Yehova lia siata oku kuatisa omanu vaye, oco va lekise ombembua okuti oyo epako limue liespiritu. (Va Galatia 5:​22, 23) Ombembua omanu va Yehova va siata oku lekisa, oyo ya linga ocitililo cavo voluali lulo lueyuka to ungangala. Ombembua yavo, yatiamẽla kocisola cina Akristão vocili va likuetele pokati okuti, ocisola caco oco cika kala pokati kavo voluali luokaliye. (Yoano 15:17; Va Kolosai 3:14) Omo liaco, vosi yetu tu kuete esanju lialua lioku lekisa ombembua yina yi nena esanju kuenda esivayo ku Suku yetu okuti, yi pondola oku tu kuatisa kekalo lietu liwa kespiritu.​—⁠Isaya 11:⁠9.

Ocinyi ca Yehova Cika Amamako Loku Tua

13. Momo lie tu kuetele ekolelo liokuti, ocinyi ca Yehova lalimue eteke cika sulila oku tuila omanu vaye?

¹³ Anga hẽ, ocinyi ca Yehova ci kasi oku amamako loku tuila komanu vaye? Oco muẽle! Kelivulu lia Isaya 60:​19, 20, tu tangako okuti: “Ekumbi ka li lingi vali ocinyi cove co kutanya, ndaño osãi ka yi ku tuila vali uteke. Puãi Yehova o linga ocinyi cove ka ci pui. Suku yove o linga ulamba wove. Ekumbi liove ka liñila vali, ndaño osãi yove ka yi tepuluka; momo Yehova o linga ocinyi cove ka ci pui, loloneke viove vioku lila vi sulila.” Kunyamo wo 1919, eci ‘oku lila’ kuolomandekua kua sulila, ocinyi ca Yehova ca fetika oku tuila kokuavo. Tunde eci va liwekapo oku lila toke cilo, papita ale eci ci pitahãla 80 kanyamo, kuenje Yehova toke cilo, o kasi loku tuisila ocinyi caye kokuavo. Handi vali, ocinyi caco ka cika sulila. Omo okuti, Suku wa kapako afendeli vaye, eye kaka ‘iñila’ ndekumbi kuenda kaka “tepuluka” ndosãi, pole eye oka amamako loku tuisila ocinyi caye kokuavo otembo ka yi pui. Hekolisokuolio eci ceca kokuetu tu kasi ndeti koloneke vilo via sulako violuali lulo luowelema!

14, 15. (a) Ndamupi omanu vosi va Suku va tendiwa okuti ‘vakuesunga’? (b) Ndomo ca sonehiwa kelivulu lia Isaya 60:​21, nye olomeme vikuavo vi lavoka oku mõla okuti cika tẽlisiwa kovaso?

¹⁴ Kaliye, yevelela eci Yehova a likuminya catiamẽla ku Isareli ya Suku, okuti eye ocindekaise ca Siono palo posi. Kelivulu lia Isaya 60:​21, tu tangako okuti: “Omanu vove vosi va linga vakuesunga; va piñala ño hũ ofeka. Va linga ndomeko nda tuika, pamue ndupange wovaka ange okuti muĩsua ulamba.” Kunyamo wo 1919, eci Akristão olombuavekua va tumbulula upange wavo, ovo va kala okacimunga kamue ño katito. Ndaño okuti va kala voluali luevĩho, ovo ‘va tendiwa ndavakuesunga,’ omo liekolelo liavo kocilumba cocisembi ca Yesu Kristu. (Va Roma 3:24; 5:⁠1) Ovo va sokisiwa nda va Isareli cina va tunda kumandekua ko Bavulono okuti noke veya oku tambula ‘ofeka’ yavo. Omo liaco, eci va tunda kumandekua wespiritu, va fetika vali upange wavo woku kunda, una weya oku sanjuisa ekalo liavo kespiritu. (Isaya 66:⁠8), Eposo liofeka yaco kespiritu lalimue eteke lika tepuluka, momo Isareli ya Suku, kaka linga ukuesino ndeci va Isareli vo kosimbu va lingile. Handi vali, ekolelo liavo, epandi liavo, kuenda ombili yavo, lalimue eteke vika tepuluka koku sivaya onduko ya Suku.

¹⁵ Omanu vosi vatiamẽla kofeka yespiritu va kasi vocisila cokaliye. Ovihandeleko via Yehova via sonehiwa vovitima viavo kuenda Yehova wa siata oku ecela akandu avo omo liocilumba cocisembi ca Yesu. (Yeremiya 31:​31-34) Eye o va tenda okuti vakuesunga haivo ‘omãla’ vaye kuenje kovaso aye, va molẽha ndu okuti va li pua. (Va Roma 8:​15, 16, 29, 30) Akamba vavo okuti olomeme vikuavo, va kuetevo ongecelo yakandu avo omo liocilumba ca Yesu. Handi vali, ovo va siata oku tendiwavo okuti vakuesunga kuenda va sokisiwa la Avirahama una wa kala ekamba lia Suku omo liekolelo liaye. ‘Ovo va sukula olonanga viavo kuenda va vi yelisila vosonde ya Kameme.’ Handi vali, olomeme viaco evi vikuavo, vi sandiliya elomboloko likuavo liasumũlũho vaka kuata. Noke yoku puluka ‘kohali ya piãla,’ eci omanu vosi vaka pinduiwa, ovo vaka mõla oku tẽlisiwa kuolondaka vi sangiwa kelivulu lia Isaya 60:​21, eci oluali luosi luka kala ofeka yelau. (Esituluilo 7:14; Va Roma 4:​1-3) Kotembo yaco, ‘ambombe vaka piñala ofeka, kuenje vaka sanjukila okusalala kualua.’​—⁠Osamo 37:​11, 29.

Elivokiyo Liamamako

16. Ohuminyo yipi yi komohĩsa Yehova a linga? Pole, ndamupi ohuminyo yaco ya siata oku tẽlisiwa?

¹⁶ Kocinimbu ca sulako celivulu lia Isaya, kocipama 60, tu tangako ohuminyo ya Yehova. Eye wa sapuila Siono hati: ‘U o sule o linga epata, lu otito o linga ofeka ya pama. Ame ndi Yehova ndi ci yayuisako kotembo yaco.’ (Isaya 60:22) Koloneke vilo, Yehova wa siata oku tẽlisa ondaka yaye. Kunyamo wo 1919 eci Akristão olombuavekua va tumbulula upange wavo, ovo va kala ño ‘vatito.’ Etendelo liavo lieya oku livokiya eci kuongoluiwa va Isareli vakuavo yespiritu. Noke kueya oku vandeka ocunda colomeme vikuavo letendelo limue lia velapo. Ombembua yomanu va Suku okuti ekalo liwa li sangiwa pokati kavo, lia siata oku koka valua vakuotima wa sunguluka kuenje cilo, “u otito” o kasi loku linga “ofeka ya pama.” Koloneke vilo, “ofeka” yaco ya Isareli ya Suku, cilo ya pitahãla olohũlũkãi epandu komanu va litumbika, haivo “vakualofeka,” okuti owiñi waco wa velapo olofeka vimue vi sangiwa voluali. (Isaya 60:10) Omanu vaco ava, vosi yavo va siata oku tuisa ocinyi ca Yehova, kuenje Yehova wa siatavo oku va posuisa kovaso aye.

17. Ndamupi olondaka tua lilongisa kelivulu lia Isaya kocipama 60, vi pondola oku tu kuatisa?

¹⁷ Ocili okuti, oku konomuisa ovinimbu evi viocitumasuku celivulu lia Isaya kocipama 60, ci pamisa ekolelo lietu. Ci kuete esilivilo liocili oku limbuka okuti, Yehova wa kũlĩhĩle ale okuti, omanu vaye vaka tualiwa kumandekua kuenda noke vaka tiukila vali kofeka yavo. Eci ci tu ĩha elomboloko liokuti, ovina viosi Yehova a popele viatiamẽla kelivokiyo liafendeli vaye, li kasi loku tẽlisiwa koloneke vilo. Omo liaco, oku kũlĩha okuti Yehova lalimue eteke aka tu yanduluka, ci pamisa ekolelo lietu. Hesanjukuolio tu pondola oku kuata poku kũlĩha okuti olombundi ‘violupale’ luaco ka vika yikiwa oco mu iñile omanu vana “va noliwila omuenyo ko pui”! (Ovilinga 13:48) Yehova oka amamako loku tuisila ocinyi komanu vaye. Siono oka kuata esanju liocili, osimbu ocinyi comãla vaye cika amamako loku tua. (Mateo 5:16) Omo liaco, tu amamiko loku kuata ukamba wocili la Isareli ya Suku kuenda oku sola esumũlũho lietu lioku tuisa ocinyi ca Yehova.

O Tẽla Oku Lombolola?

• Ndaño okuti tu liyaka lelambalalo, ekolelo lipi tu pondola oku kuata?

• Ndamupi omãla va Siono va siata ‘oku nyama asenjele olofeka’?

• Ndamupi Yehova a siata ‘oku piñanya ulu pomangu yosipi’?

• Ovituwa vipi vivali via lomboluiwa kelivulu lia Isaya 60:​17, 21?

• Ndamupi u ‘o sule’ a siata oku linga ‘ofeka yapama’?

[Okakasia kemẽla 28]

PROFECIA DE ISAÍAS Uma Luz para Toda a Humanidade

Ulandu wosi tua lilongisa vocipama cilo, wopiwa vohundo Yohongole Yofeka ya lingiwa kunyamo wo 2001/02, ya kuata osapi ya linga hati: “Alongisi Vondaka ya Suku.” Kolonepa viosi violuali, manji wa linga ohundo ya sulako, wa lekisa elivulu liokaliye lia sandekiwa li kuete osapi ya linga hati: Profecia de Isaías​—⁠Uma Luz para Toda a Humanidade II. Kunyamo wo 2000, kua sandekiwile ale elivulu liatete lio Profecia de Isaías​—⁠Uma Luz para Toda a Humanidade I. Omo lioku sandekiwa kuelivulu eli liokaliye, cilo ca leluka oku konomuisa ovinimbu viosi vi sangiwa velivulu lia Isaya. Alivulu aco, a sandekiwila oku tu kuatisa oco tu kuate elomboloko lia suapo liondaka ya Suku, kuenda oku kuatela ekolelo kocitumasuku celivulu lia Isaya.

[Elitalatu kemẽla 25]

Ndaño okuti omanu va Yehova va liyaka lelambalalo, Eye “o va posuisa leyulo”

[Elitalatu kemẽla 26]

Omanu va Suku va kasi loku amamako kefendelo liocili lekuatiso liukuasi u tunda volofeka

[Elitalatu kemẽla 27]

Yehova wa siata oku sumũlũisa omanu vaye poku amasako ocisoko caye lombembua