‘Lekisa Olopandu Viove Muẽle’
“Tavi okuti ombembua ya Kristu yi viala vovitima viene, . . . [kuenda] lingi vakuakuimbaimba olopandu.”—VA KOLOSAI 3:15.
1. Oku litepa kupi ku sangiwa pokati kekongelo Liakristão kuenda oluali lulo lua vialiwa ndeti la Satana?
KUECI ci soka 94.600 kakongelo Olombangi via Yehova voluali luosi, omanu vosi va sangiwamo va siata oku lekisa ocituwa coku eca olopandu. Poku fetika kuenda poku malusula olohongele viosi, kua siata oku lingiwa olohutililo vina okuti mu kongela olondaka vioku eca olopandu ku Yehova. Olonjanja viosi tua siata oku yeva olondaka viokuti, “nda pandula,” kuenda “hacimueko,” vina vieciwa lamalẽhe, lakulu haivio vieciwavo lomanu vana va fetika ndopo oku endaenda kolohongele vietu viekongelo. Handi vali, olondaka viaco vi popiwavo Lolombangi via Yehova vina vi kasi osimbu vocili poku likongela kefendelo, loku lekisa esanju liavo ku vakuavo va fendelela kumuamue. (Osamo 133:1) Pole, eci ca litepa calua lomanu vana va yongola lika oku tẽlisa olonjongole viavo muẽle momo ‘ka va kũlĩhĩle Suku kuenda ka va yongola oku pokola kolondaka viwa.’ (2 Va Tesalonike 1:8) Etu tu kasi voluali lulo okuti omanu vaco ka va kuete ocituwa coku eca olopandu. Ocili okuti, eci ka ci tu komohĩsa momo Satana Eliapu osuku yoluali lulo, eye o kasi oku vetiya omanu oco va kuate ocituwa coku tẽlisa lika olonjongole ka via sungulukile, vakuepela haivo va kuete ovituwa vi lekisa esino lina lia siata voluali lulo!—Yoano 8:44; 2 Va Korindo 4:4; 1 Yoano 5:19.
2. Elungulo lipi tu sukila oku pokola kuenda apulilo api tuka konomuisa cilo?
2 Omo okuti tu kasi voluali lua Satana, tu sukila oku lavulula lutate oco ka tuka yapuisiwe lovituwa viavĩha violuali luaco. Kocita catete, upostolo Paulu wa ivaluisa Akristão vo ko Efeso hati: “[Olohole] vina wa ... endaili lavio eci wa kuami ovituwa violuali lulo loku pokola ku soma yolondele, ene muẽle Kristu [wo wĩhi] vali omuenyo. Soma yolondele haeye eliapu, lopo o kasi loku linga upange waye vovitima via vakuesino. Letuvo tua kaile vakuesino eci tua lingaile oloñeyi vietimba. Tua lingainga ocipango cetimba leci covisimilo viutima, okuti letuvo tua sesamelele onyeño ndomanu vakuavo.” (Va Efeso 2:2, 3) Ovituwa via tukuiwa ndeti, via siata calua komanu koloneke vilo. Ndamupi tu pondola oku amamako oku lekisa olopandu vietu? Ekuatiso lipi Yehova a siata oku eca? Olonjila vipi tu sukila oku kuama oco tu lekise okuti tua siata oku eca olopandu?
Esunga Lieci tu Sukilila Oku Eca Olopandu
3. Ovina vipi vi tu vetiya oku eca olopandu ku Yehova?
3 Etu tu sukila oku feta ofuka ku Yehova Suku, Ululiki wetu okuti eye o sesamẽla olopandu vietu, ca piãla vali enene eci tu limbuka olombanjaile vina eye a siata oku tu ĩha. (Tiago 1:17) Oloneke viosi tu eca eca olopandu ku Yehova omo tu kasi komuenyo. (Osamo 36:9) Etu tua ñualiwa lovina vialua vi eca uvangi wovopange a lingiwa la Yehova ndeci: ekumbi, osãi kuenda olombungululu. Voluali luetu muli ovina vialua vina vi sangiwa posi okuti vieca ekuatiso komuenyo womanu. Handi vali, ilu lia pangiwa luloño wocili, mu sangiwa ofela yi tu kuatisa komuenyo kuenda olotembo via litepa viecelela okuti voluali mu kala omuenyo, kuenje cosi eci ceca uvangi weci tu sukilila oku lekisa olopandu vietu ku Isietu wokilu haeye Ukuacisola. Soma Daviti wa imba ocisungo hati: “A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love. Nda nda sokele oku vi sapula loku vi vangula, nda ka ca tavele oku vi tenda, omo via lua enene.”—Osamo 40:5.
4. Momo lie tu sukilila oku eca olopandu vietu ku Yehova omo liukamba uwa u sangiwa vakongelo etu?
4 Ndaño okuti cilo omanu va Yehova ka va kasi handi vofeka yelau palo posi, pole, va sanjukila calua oku kala vulamba kespiritu. Volonjango vietu Viusoma lo kolohongele vietu viofeka kuenda olohongele vimbo, tua siata oku sanjuka calua omo lioku limbuka ndomo vamanji va siata oku lekisa apako espiritu lia Suku. Handi vali, poku kundila omanu vana ka va kũlĩhĩle calua catiamẽla ketavo ale vana ka va tava ketavo, olonjanja vimue Olombangi via Yehova via siata oku kuama olonumbi viukanda una upostolo Paulu a sonehela ku va Galatia. Ovo, tete va siata oku lombolola eci catiamẽla ‘kovilinga vietimba’ kuenda oku pulisa olonjeveleli viavo eci ovo va siata oku mõla catiamẽla kondaka eyi. (Va Galatia 5:19-23) Valua va siata oku tava okuti ovituwa vio kotembo ya va Galatia haivio vi letiwevo vovisoko viomanu koloneke vilo. Eci tu lekisa komanu apako espiritu sandu lia Suku kuenda noke va lalekiwa oco veye Vonjango Yusoma oku tala uvangi wapako vaco, omanu valua va siata oku popia lonjanga hati: “Ocili [okuti], Suku o kasi pokati kene.” (1 Va Korindo 14:25) Ovituwa viaco viwa ka vi sangiwa lika Vonjango Yusoma yo pocitumãlo. Pole, kolofeka viosi ove wenda, kueci ci pitahãla olohuluwa epandu Violombangi via Yehova, o limbuka okuti, vosi yavo va kasi oku lekisa esanju limuamue. Omo liaco, ukamba waco uwa, owo u tu vetiya oku eca olopandu vietu ku Yehova una o kasi oku tu kuatisa lespiritu liaye oco ukamba wetu wamameko.—Sakaria 3:9; Va Efeso 3:20, 21.
5, 6. Ndamupi tu pondola oku lekisa olopandu vietu ku Suku omo liombanjaile yocisembi a tu ĩha?
5 Yehova wa tuma Omõlaye Yesu okuti eye ombanjaile ya velapo haiyo yalipua yina ya eciwa ndocisembi. Upostolo Yoano wa soneha ndoco: “Omo Suku a tu sola ndomo, oco ca tu sesamelavo oku lisola pokati.” (1 Yoano 4:11) Ocili okuti, etu ka tueci lika olopandu vietu kocilumba cocisembi omo lioku lekisa ocisola cetu ku Yehova, pole tu ci lingila omo lioku ambata omuenyo umue u lekisa okuti tu kuetele ocisola vakuetu.—Mateo 22:37-39.
6 Tu pondola oku lilongisa calua catiamẽla koku eca olopandu vietu poku konomuisa ndomo Yehova a tata va Isareli kosimbu. Yehova wa tẽla oku longisa ovina vialua komanu lekuatiso Liocihandeleko cina a ecele ku Mose. Lekuatiso ‘liukũlĩhĩso watiamẽla kocili,’ tu pondola oku lilongisa ovina vialua vika tu kuatisa oku pokola kelungulo liupostolo Paulu wa popia hati: “Lingi vakuakuimbaimba olopandu.”—Va Roma 2:20; Va Kolosai 3:15.
Olonjila Vitatu tu Lilongisila Kocihandeleko ca Mose
7. Ndamupi eliangiliyo lioku eca ocilumba conepa yekũi lia kuatisa va Isareli oku eca olopandu viavo ku Yehova?
7 Vocihandeleko ca Mose Yehova wa lingile aliangiliyo atatu oku kuatisa va Isareli oco va lekise olopandu viavo omo liovina viwa Eye a va lingila. Tete, kua kala eliangiliyo lioku eca ocilumba conepa yekũi. Ocilumba caco conepa yekũi catiamẽlele koku eca ovikulia viovepia kumue ‘lonepa yekũi yolongombe leyi yolomeme,’ viosi yavio vieya ‘oku kola calua ku Yehova.’ (Ovisila 27:30-32) Eci va Isareli va enda oku pokola, Yehova wa enda oku va sumũlũisa calua. Embimbiliya li vetiya ndoco: “Neni vosila yange ovilumba viosi vionepa yekũi okuti vonjo yange mu kala okulia. Seteki ondaka yange nda siu yikuluili olonjanela viokilu loku u sukumuĩli esumũlũho lia piãla enene, liokuti apa li selekiwa ka pa molẽha! Oco ca popia Yehova Ukualohoka.”—Malakiya 3:10.
8. Oku litepa kupi ku sangiwa pokati kolombanjaile va Isareli va enda oku eca levi viatiamẽla kocilumba conepa yekũi?
8 Cavali, ndaño Yehova wa tumbikile ocihandeleko cokuti va Isaeli va eca ocilumba conepa yekũi, pole, wa vokiyileko vali eliangiliyo likuavo liolombanjaile vina omunu a yongola oku eca lutima waye muẽle ku Yehova. Eye wa imba onumbi ku Mose oco a sapuile va Isareli hati: “Eci wiñili vofeka omo ndu tuali, leci wu lia okulia kuovofeka, oco vu tepela Yehova onepa yaye.” Ovaima atete o vepia liavo ndeci ‘ekende liocitiva ca tete’ lia enda oku eciwa ‘ndocilumba ku Yehova’ toke kovitumbulukila vikuavo. Ocili okuti, ka kua tukuiwile yimue onjongo yeci catiamẽla kovilumba viaco. (Atendelo 15:18-21) Pole, eci va Isareli va enda oku eca ovilumba vioku lekisa olopandu viavo, ovo va enda oku tambula asumũlũho a tunda ku Yehova. Eliangiliyo liaco limuamue lia limbukiwilavo vocinjonde Esekiele a mõla catiamẽla konembele. Etu tu tanga ndoco: “Viatete kovaima osi, lovilumba viene viosi, cosi ci linga covitunda. Locitiva cene catete ... ceci kovitunda oco vi sumuluĩse onjo yene.”—Esekiele 44:30.
9. Nye Yehova a longisa catiamẽla keliangiliyo lioku pupulula vepia?
9 Catatu, Yehova wa sokiyile eliangiliyo liatiamẽla koku pupulula vepia. Eye wa popia hati: “Eci wunguli olomema viofeka yene, ku kongule pe kavindi epia liove, kuenda vali ku ka nolũle olomupuluila violomema viove. Ku ka pupulule vocumbo cove cayuva; ku kongolole epako liocumbo cove cayuva lia lokila posi, o vi silapo osuke ocingendeleyi. Ame ndi Yehova Suku yene.” (Ovisila 19:9, 10) Palo tua limbuka vali okuti, Yehova ka tukuile onjongo yovikulia omunu a sukilile oku sia vepia liaye pokungula. Pole, omunu lomunu pokati ka va Isareli, wa sukilile oku nõla eye muẽle eci a pondola oku sila olohukũi vepia liaye. Ukualondunge Soma Salomone wa lombolola hati: “U o linga olosuke ohenda wondika Yehova, kuenje Yehova u tiuwila oviali viaye.” (Olosapo 19:17) Yehova wa longisa oku lekisa ocikembe kuenda oku kapako olosuke.
10. Ovitangi vipi va Isareli veya oku pita lavio eci va liwekapo oku lekisa olopandu viavo?
10 Yehova wa sumũlũisile va Isareli eci vaenda oku pokola kocihandeleko coku eca ocilumba conepa yekũi, loku eca ovilumba lutima wavo wosi kuenda oku pokola keliangiliyo lioku pupulula vepia oco va kuatise olosuke. Pole, eci va Isareli veya oku liwekapo oku lekisa olopandu viavo, veya oku pumba ohenda ya Yehova. Eci ceya oku va nenela ovitangi vialua kuenda oku tualiwa kumandekua. (2 Asapulo 36:17-21) Nye tu pondola oku lilongisila kulandu owu?
Olondaka Vietu Violopandu
11. Onjila yipi ya velapo tu pondola oku kuama oco tu ece olopandu vietu ku Yehova?
11 Onjila ya velapo tu sukila oku kuama koku eca esivayo ku Yehova kuenda olopandu, mua kongelavo oku eca ‘ocilumba cimue.’ Etu Tuakristão vocili, ka tu kasi vali vemẽhi Liocihandeleko ca Mose cina ca enda oku kisika oku eca ovilumba viovinyama ale vina vi tunda vepia. (Va Kolosai 2:14) Pole, upostolo Paulu wa vetiya Akristão va Heveru hati: “Tu lumbi lumbi ku Suku ocilumba cesivayo haico epako liovimela via tava konduko yaye.” (Va Heveru 13:15) Poku talavaya luloño wetu kuenda ovokuasi etu, oco tu ece ocilumba cesivayo ku Yehova cikale kupange wetu woku kunda ale ‘vekongelo,’ Liakristão, tu eca olopandu vietu ku Yehova Suku ukuacisola okuti eye Isietu wokilu. (Osamo 26:12) Poku ci linga, nye tu pondola oku lilongisila kolonjila va Isareli va kuamẽle poku eca olopandu viavo ku Yehova?
12. Omo okuti etu Tuakristão tu sukila oku sakalala calua locikele cetu cupange, nye tu pondola oku lilongisila keliangiliyo lionepa yekũi?
12 Tete, eci tua konomuisa eliangilio liatiamẽla koku eca ocilumba conepa yekũi, tua limbuka okuti, ka kuakaile la umue u Isareli wa enda oku linõlela eci a yongola oku linga, momo vosi yavo va kisikiwile oku eca ocilumba caco. Etu Tuakristão tu kasi locikele coku kuata onepa kupange woku kunda kuenda oku endaenda kolohongele vietu viekongelo. Kueci catiamẽla kovikele evi ndeti, ka tu pondola oku liñolela eci tu yongola leci ka tu yongola oku linga, pole tu sukila oku tẽlisa ovikele viaco. Vocitumasuku ca velapo Yesu a tukula catiamẽla kotembo yesulilo, wa popia hati: “Olondaka evi viwa viusoma vikundiwila koluali luosi oco vilinge uvangi kolofeka viosi, noke kuiya esulilo.” (Mateo 24:14; 28:19, 20, NW) Upostolo Paulu wa popia eci catiamẽla kolohongele vietu viekongelo poku soneha ndoco: “Tu kakateli kelavoko lietu, oku tatãla lakamue, momo u wa likuminya wa kolelua. Tu sokololi ndomo tu tẽla oku livetiya pokati oku kala locisola lovilinga viwa. Ka tu ka liweki oku ongoloka ndomo [omanu] vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.” (Va Heveru 10:24, 25) Etu tu lekisa olopandu vietu ku Yehova poku tava lesanju liocili ocikele cetu cupange woku kunda loku longisa kuenda oku kuata ukamba wocili la vamanjetu volohongele viekongelo loku tenda ovikele viaco ndesumũlũho liocili kokuetu.
13. Nye tu pondola oku lilongisila keliangiliyo lioku eca olombanjaile lutima wosi kuenda kueci catiamẽla keliangiliyo lioku pupulula vepia?
13 Handi vali, tu pondolavo oku kuatisiwa poku konomuisa aliangiliyo avali ana a kuatisile va Isareli atiamẽla koku lekisa kuavo esanju ku Suku lolombanjaile kokuaye kuenda vioku pupulula vepia. Eci ca litepele calua lovilumba vioku eca onepa yekũi momo ovo va enda oku kisikiwa oku eca onjongo yohuminyo ya lingiwa, osimbu okuti kueci catiamẽla kaliangiliyo alo avali, omanu ka va kisikiwile oku eca onjongo yolombanjaile ovo muẽle va yongola oku eca ku Suku kuenda onjongo yeci va pondola okusia vepia. Ovo va eceliwile okuti onjongole yocili omunu a kuete yoku kala ondingupange ya Yehova, yi vetiyiwa lutima wosi woku eca eci omunu a kuete. Kuenje, cimuamue haico kueci catiamẽla kokuetu, momo tu sole calua oku kuata onepa kupange wetu woku kunda loku endaenda kolohongele viekongelo. Anga hẽ tua siata oku tẽlisa ovikele viaco lutima wetu wosi kumosi lonjongole yoku lieca olumue? Tua siata hẽ oku tenda ovopange aco ndepuluvi lioku eca olopandu lutima wetu wosi omo liovina Yehova a siata oku tu lingila? Anga hẽ tua siata oku lieca ocali kupange waco loku tala ndomo ekalo lietu liecelela oku linga upange waco? Tua siata hẽ oku tenda ovopange aco ndocina cimue tua kisikiwa, okuti tu sukila oku ci tẽlisa? Omunu lomunu pokati ketu o sukila oku tambulula eye muẽle apulilo aco vutima waye. Upostolo Paulu wa popia eci catiamẽla kondaka eyi hati: “Omunu omunu a kũlĩhise upange waye, oco a lipandiye eye muẽle, oku lipandiyila ukuavo hacoko.”—Va Galatia 6:4.
14. Nye Yehova a kevelela kokuetu catiamẽla kupange una tu u lingila?
14 Yehova Suku wa kũlĩha ciwa ovitangi vietu. Eye wa kũlĩhavo ekalo liomuenyo wetu. Handi vali, eye eca esilivilo kovilumba viosi tu eca kokuaye cikale vina vinene ale vievi vitito okuti tu vieca lutima wetu wosi. Eye ka kevelela okuti vosi yetu tu eca onjongo yimuamue ale pamue cimue ca velapo ka tu pondola oku linga. Eci upostolo Paulu a popia ondaka yatiamẽla koku eca eci omunu a kuete, wa sapuila Akristão vo ko Korindo hati: “Nda kuli utima woku lumba, omunu o panduiwa nda o lumba ndeci a kuete. Suku ka kisika eci omunu ka kuete.” (2 Va Korindo 8:12) Olondaka evi vi kuetevo esilivilo kueci catiamẽla kupange wetu tu lingila Suku. Upange wetu oku taviwa la Yehova, ka catiamẽlele konjongo, pole u taviwa lika Laye nda tu u linga lutima wetu wosi kuenda lesanju liocili.—Osamo 100:1-5; Va Kolosai 3:23.
Lekisa Ocituwa Coku Talavaya Ndukundi Wotembo Yosi
15, 16. (a) Elitokeko lipi li sangiwa pokati koku litumbika kupange wakundi votembo yosi kuenda koku eca olopandu? (b) Ndamupi vamanji vana okuti ekalo liavo ka liecelela oku litumbika kupange wakundi votembo yoci va pondola oku lekisa ocituwa caco?
15 Onjila yimue yoku lekisa olopandu vietu ku Yehova, oku litumbika kupange wakundi votembo yosi. Omo lioku vetiyiwa locisola kuenda ohenda Yehova a kuetele omanu, olondingupange vialua via litumbika kokuaye via siata oku linga apongoloko alua komuenyo wavo oco va sange vali otembo yalua yoku linga upange wa Yehova. Kuli vamanji vamue va siata oku talavaya ndakundi va velapo okuti vokuenda kuosãi va siata oku talavaya eci ci soka 70 kolowola kupange wavo woku kunda olondaka viwa kuenda oku longisa ocili komanu. Vakuavo okuti ekalo liomuenyo wavo ka liecelela otembo yalua, olonjanja vimue va siata oku litumbika kupange wakundi vasokamo poku talavaya kupange woku kunda eci ci soka 50 kolowola vokuenda kuosãi.
16 Oco hẽ nye ci popiwa kueci catiamẽla komanu vamue va Yehova okuti ka va pondola oku litumbika kupange wakundi va velapo ale wakundi vasokamo? Ovo va pondola oku eca olopandu viavo poku kuata ocituwa coku talavaya ndakundi votembo yosi. Ndamupi va pondola oku ci linga? Ci tava okuti va ci linga poku eca olondaka viekoliso ku vamanji vana va litumbika kupange waco, poku vetiya omãla vavo oco va kuate onjongole yoku litumbika kupange wakundi votembo yosi. Handi vali, ovo va pondolavo oku ci linga poku likolisilako kuavo kupange woku kunda ndomo ekalo liavo liecelela. Cosi tu linga kupange wetu woku kunda, tu pondola lika oku ci linga ciwa nda tu kuetele ocisola cimue condongosi kovina viosi Yehova a siata oku tu lingila, levi a kasi oku tu lingila cilo kuenda evi aka tu lingila kotembo yo kovaso.
Tu Eci Olopandu ‘Lovipako Vietu’
17, 18. (a) Ndamupi tu pondola oku lekisa olopandu vietu ‘lovipako’? (b) Ndamupi Yesu a tendele ocilumba combanjaile yukãi ocimbumba kuenda momo lie?
17 Elivulu Liolosapo 3:9, li popia ndoco: “Vumba Yehova lovipako viove, lelombolo lia tete kokungula kuove kuosi.” Omanu va Yehova, ka va sukila oku eca ocilumba conepa yekũi. Pole, upostolo Paulu wa sonehela ekongelo lia va Korindo ndoco: “Omunu omunu a ece ndeci a panga kutima waye; ha locikukuiko pamue omo a kisikiwa, momo Suku o sole u eca lesanju.” (2 Va Korindo 9:7) Etu tu pondola oku lekisa olopandu vietu poku eca olombanjaile ku Suku lutima wetu wosi oco vi kuatise kupange woku kunda Usoma voluali luosi. Olopandu vina tu lekisa lutima wetu wosi, vi pondola oku tu vetiya oku eca ekuatiso lietu olonjanja viosi, poku sokiya ombanjaile yimue yoku eca olosemana viosi ndeci Akristão vo kocita catete va enda oku linga.—1 Va Korindo 16:1, 2.
18 Olopandu vietu ka vi lekisiwila vonjongo yekuatiso liolombanjaile vina tu eca ku Yehova. Pole, ocina ca velapo ocituwa ci kasi vutima wetu koku eca olombanjaile viaco. Ocituwa caco Yesu wa ci limbukilevo eci a mõla omanu va kala oku imba ovilumba viavo vombango vonembele. Eci Yesu a mõla okuti ukãi umue osuke haiye ocimbumba wa kapa vombango ‘alusendu avali ka a kuete esilivilo lialua,’ eye wa popia hati: “Ndu sapuili siti, ocili ocimbumba eci, haico osuke, ca imbamo ca lua, vosi vakuavo ci sule. Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.”—Luka 21:1-4.
19. Momo lie tu sukilila oku konomuisa lutate olonjila tu kasi oku kuama poku eca olopandu vietu?
19 Poku lilongisa olonumbi evi viatiamẽla koku tala ndomo tu sukila oku lekisa olopandu vietu, ci pondola oku tu kuatisa oku likonomuisa etu muẽle oco tu limbuke ndomo tua siata oku lekisa olopandu vietu. Anga hẽ tu pondola oku vokiyako ovilumba vietu vioku sivaya Yehova osimbu tu amamako oku eca ekuatiso lieci tu kuete oco ci kuatise kupange woku kundila olondaka viwa voluali luosi? Osimbu tu likolisilako oku ci linga, tu sukila oku kũlĩha okuti, Isietu Yehova, oka sanjuka vali calua nda tua lekisa olopandu vietu kokuaye.
Handi Ocivaluka?
• Momo lie tu sukilila oku eca olopandu vietu ku Yehova?
• Nye tu pondola oku lilongisila kovilumba vionepa yekũi, levi tu eca etu muẽle lutima wetu wosi kuenda evi viatiamẽla koku pupulula vepia?
• Ndamupi tu pondola oku lekisa ocituwa coku talavaya ndukundi wotembo yosi?
• Ndamupi tu pondola oku eca olopandu vietu ku Yehova lekuatiso ‘liovipako vietu’?
[Elitalatu kemẽla 28]
“Ocali cosi ciwa longavelo yosi ya kanguka via tunda kilu”
[Elitalatu kemẽla 31]
Ovilumba vipi tu pondola oku eca?