“Telisa Ocikundi Cupange Wove”
“Telisa ocikundi cupange wove”—2 TIMOTEO 4:5.
1, 2. Akristão vosi va sukila oku kala vakuambili kupange woku kunda. Pole, nye ci kisikiwa vali enene kakulu vekongelo?
NDA ove ukundi wolondaka viwa Viusoma, o kuete esunga lioku pandula Yehova. Nda ukulu wekongelo, o kuetevo esunga lioku pandula Yehova. Momo ocikele caco ci tunda kokuaye. Elilongiso lio kosikola ale eloñoloho koku vangula, havioko vi tu lingisa okuti tu nõliwila ovikele viaco. Yehova eye o tu ĩha uloño woku linga upange waye. Pokati ketu alumue vamue va siata oku tambula ocikele coku kala akulu vekongelo. Pole, hamomoko okuti va lilongisa calua ale va loñoloha koku vangula. Puãi momo okuti, ovo va siata oku tẽlisa ovihandeleko Viembimbiliya vi kisikiwa komunu o yongola oku kala ukulu wekongelo.—2 Va Korindo 3:5, 6; 1 Timoteo 3:1-7.
2 Ukristão wosi wa litumbika ku Yehova, o sesamẽla oku kala ukuambili kupange woku kunda. Ca piãla enene akulu vekongelo. Ovo, va sesamẽla oku eca ongangu yiwa kupange woku kunda. Akulu vekongelo okuti va likolisilako ‘oku kunda loku longisa’ va letiwe la Yehova kuenda la Yesu Kristu. Ongangu yavo yiwa, yi letiwevo la vamanji vekongelo. (1 Timoteo 5:17; Va Efeso 5:23; Va Heveru 6:10-12) Elongiso liukulu wekongelo, otembo yosi te li vetiya vamanji oku pama kespiritu. Upostolo Paulu wa sapuilile ukulu wekongelo Timoteo hati: “Kuiya oloneke okuti omanu ka va tava kokulongisa kuocili, puãi, omo va kasi lovatui a yua, oco va liongoluila alongisi ndovipango viavo. Kuenje vopa ovatui koku yevelela ovina viocili ha va yapukila kolosapo viaño. Ove puãi, lilava kovina viosi. Pandikisa kohali. Linga ukundi wondaka yiwa. Telisa ocikundi cupange wove.”—2 Timoteo 4:3-5.
3. Nye akulu vekongelo va sukila oku linga oco vekongelo ka muka iñile alongiso esanda?
3 Oco akulu vekongelo ka va ka iñise alongiso esanda vekongelo, va sukila oku kapako elungulo lia eciwile lupostolo Paulu. Eye wa popisile Timoteo hati: “lilava kovina viosi. . . .Telisa ocikundi cupange wove.” (2 Timoteo 4:5) Ukulu wekongelo o tẽlisa ocikundi cupange waye, yuna okuti wa kapako ovikele viaye viosi, okuti kasiko lacimue. Eye o tẽlisa upange waye wosi ndaño kovina vitito.—Luka 12:48; 16:10.
4. Nye ci pondola oku tu kuatisa oku tẽlisa ocikundi cupange wetu woku kunda?
4 Oco tu tẽlise ocikundi cupange wetu woku kunda, tu sukila oku sokiya ciwa otembo yetu. Nda tua ci linga, ci tava okuti vosi yetu tu tẽlisa ocikundi cupange wetu. Ukulu wekongelo oco a kuate otembo yoku talavaya calua vupange woku kunda, o sukila oku sokiya ciwa ovopange aye. Pokati kovopange aye, ci tava okuti o nõlapo amue okuti o a eca ku vakuavo. (Va Heveru 13:17) Pole, eye muẽle o sukila oku likolisilako oku tẽlisa ovikele viaye, ndeci ca linga Nehemiya okuti wa litumbikilevo koku tunga ovimbaka vio Yerusalãi. (Nehemiya 5:16) Afendeli vosi va Yehova va sukila oku endaenda kupange woku kunda olonjanja viosi.—1 Va Korindo 9:16-18.
5. Upange wetu woku kunda tu sukila oku u tenda ndati?
5 Oku kunda olondaka viwa, ocikundi cimue ci sanjuisa. Momo ci tu ĩha epuluvi lioku sapuilako vakuetu okuti Usoma wa Suku wa tumbikiwa ale oko kilu. Kuenda ci tu ĩhavo epuluvi lioku kundila omanu kolofeka viosi, osimbu handi esulilo ka lieyile. (Mateo 24:14) Ndaño okuti ka tua lipuile, ci tava okuti tu vetiyiwa lolondaka viupostolo Paulu. Eye wa popele hati: “Ukuasi ulo [okuti ocikele cupange woku kunda] tu kasi lawo volombia viotuma, oku lekisa okuti unene wa piãla wa Suku, hawetuko.” (2 Va Korindo 4:7) Etu ci tava okuti tu linga upange u sanjuisa Suku. Pole, te lika longusu Yaye kuenda lolondunge viaye.—1 Va Korindo 1:26-31.
Tu Molẽhisi Ulamba wa Suku
6. Oku litepa kupi ku kasi pokati ka va Isareli yosimbu la va Isareli yespiritu?
6 Upostolo Paulu wa tiamisila olondaka viaye Kakristão olombuavekua poku popia hati: “[Suku] wa tu iha unene woku linga oloñuatisi viupange wocisila cokaliye.” Eye wa lekisa oku litepa ku kasi pokati kocisila cokaliye Yesu Kristu a linga la va Isareli yespiritu, kuenda ocisila Suku a lingile la va Isareli yosimbu, vonduko ya Mose. Upostolo Paulu wa popia hati, eci Mose a loka komunda Sinai lovawe mua sonehiwile Ovihandeleko Ekũi, ocipala caye ca nina calua. Kuenje va Isareli ka va tẽlele oku tulukila kocipala caye. Pole vokuenda kuotembo, ovitima via va Isareli vieya oku “tĩlisua.” Kuenje va wila vupeke wespiritu. Upostolo Paulu wamisako loku lombolola okuti, omunu o kasi vupeke wespiritu, ci tava okuti o litumbika ku Yehova. Kuenje ocipala caye ci sikulũha. Momo eye wa loñisa olondaka viaye kuava va tiamẽla kocisila cokaliye, loku popia hati: “Etu vosi, locipala ca sikũlũha, . . . tu molehisa ulamba wa [Yehova] ndeci olumuĩlo.” (2 Va Korindo 3:6-8, 14-18; Etundilo 34:29-35) “Olomeme vikuavo” via Yesu, vi kuetevo ocikele coku molẽhisa ulamba wa Yehova.—Yoano 10:16.
7. Etu tumanu vakuakandu tu molẽhisa ndati ulamba wa Suku?
7 Lomue omunu o tẽla oku mõla Suku. Oco hẽ, ndamupi etu tumanu vakuakandu tu pondola oku molẽhisa ulamba wa Suku? (Etundilo 33:20) Ocili okuti, Yehova ukuolamba. Kuenda ocipango caye catiamẽla Kusoma culambavo. Eli olio esunga lieci ondaka Yusoma ya kundiwa la vana va wavekiwile lespiritu sandu ko Pendekoste yunyamo 33, ya tukuiwila hati, “ovilinga vinene via Suku.” (Ovilinga 2:11) Longusu yespiritu sandu, ovo va tẽla oku tẽlisa ocikundi cavo cupange woku kunda.—Ovilinga 1:8.
8. Catiamẽla kupange woku kunda, upostolo Paulu wa likolisilako oku linga nye?
8 Upostolo Paulu wa likolisilako oku tẽlisa ocikundi caye coku kunda. Kuenje wa soneha hati: “Omo tu kasi lupange ulo lohenda ya Suku oco ka tu konyoha. Oku endisa upange wetu levi vi kutisa osõi levi viatutu ãvi, ka tu kuatako. Tu likala oku pengisa ondaka ya Suku. Puãi tu yongola oku koleliwa lomanu vosi kovaso a Suku omo tu kundila omanu vosi ondaka yocili.” (2 Va Korindo 4:1, 2) Upostolo Paulu wa sapula ocili poku linga ‘upange’ waye woku kunda. Kuenje omanu va kala vowelema veya vocinyi.
9, 10. Tu molẽhisa ndati ulamba wa Yehova?
9 Upostolo Paulu wa lekisa okuti Suku eye Ono yocinyi. Eye wa popia hati: “Suku, u wa linga hati, Vowelema mu tuile ocinyi, eye wa tuila vovitima vietu ha tuisa ukũlĩhiso wulamba wa Suku wokocipala ca Yesu Kristu.” (2 Va Korindo 4:6; Efetikilo 1:2-5) Etu tua tambula ocikele coku kala akundi vondaka ya Suku. Omo liaco, tu liyelisi kekalo lietu kuenda kovituwa vietu, oco tu molẽhise ciwa ulamba wa Suku, ndolumuĩlo.
10 Omanu va kasi vowelema wespiritu, ka va tẽla oku mola ulamba wa Yehova. Ka va tẽlavo oku u muila ku Yesu Kristu. Pole, etu Tulombangi via Yehova, tu tẽla oku molẽhisa ulamba Waye. Momo poku tanga Embimbiliya tu tambula ocinyi culamba waye. Kuenje tu molẽhisa ocinyi caco komanu tu kundila. Tu sukila oku va kundila omanu va kasi vowelema wespiritu oco veye vocinyi. Omo liaco, lombili kuenda esanju, tu molẽhisi ocinyi culamba wa Yehova komanu va kasi vowelema.
Oku Songola Alilongiso Embimbiliya
11. Nye Yesu a popia catiamẽla koku molẽhisa ocinyi cetu? Kuenda konepa yipi yupange wetu woku kunda tu sukila oku molẽhisa vali enene ocinyi cetu?
11 Ovilinga vietu viwa vi vetiya vakuetu oku eca esivayo ku Suku. (1 Petulu 2:12) Eli olio esunga lieci Yesu a popela hati: “Ene vucinyi coluali. Imbo lia tungiwa komunda ka li vundisiwa. Ndaño ondiyelo ka va yi miha ha va yi tuvika lonjongo, puãi va yi tumbika komesa kuenje yi taimila vosi va kasi vonjo. Ocinyi cene ci taimile ndoco kovaso omanu okuti va mola ovilinga viene viwa kuenje va sivaya Isiene o kasi kilu.” (Mateo 5:14-16) Upange wetu woku kunda u tu ĩha apuluvi alua voku molẽhisa ocinyi cetu. Pole, tu sukila oku molẽhisa vali ciwa ocinyi Condaka ya Suku poku songola alilongiso Embimbiliya. Eci oco ocimãho ca velapo coku tẽlisa ocikundi cupange wetu. Olonumbi vipi vi tu kuatisa oku vetiya ovitima viomanu poku songola alilongiso Embimbiliya?
12. Ohutililo yi tu kuatisa ndati kupange woku longisa omanu Embimbiliya?
12 Nda tu yongola oku sanga omunu umue oco tu u longise Embimbiliya, tu sukila oku pitiya onjongole yetu ku Yehova vohutililo. Nda tua ci linga, tu lekisa okuti tu kasi oku eca esilivilo koku kuatisa vakuetu oku lilongisa eci catiamẽla ku Suku. (Esekiele 33:7-9) Yehova oka tambulula ohutililo yetu. Kuenje oka sumũlũisa elikolisilo lietu kupange woku kunda. (1 Yoano 5:14, 15) Eci tu sanga omunu tu longisa, tu sukila oku amamako oku likutilila oco tu songole ciwa elilongiso liaco. Tu sukilavo oku konomuisa ciwa ekalo liondonge oco tu limbuke apa eye a sukila ekuatiso.—Va Roma 12:12.
13. Nye ci pondola oku tu kuatisa oku songola ciwa alilongiso Embimbiliya?
13 Oco tu songole ciwa alilongiso Embimbiliya, tete tu sukila oku lipongiya. Nda tu sima okuti ka tu ka tẽla oku songola elilongiso Liembimbiliya, tu sukila oku tala ndomo mitavaso Yelilongiso Lielivulu Vekongelo a songola. Ci tavavo okuti tu tunda lukundi una okuti wamia koku songola alilongiso Embimbiliya. Pole ongangu ya velapo tu sukila oku kuama, ya Yesu Kristu. Tu sukila oku longisa ndeci eye a longaisa omanu.
14. Tu pondola ndati oku vetiya utima womunu tu kasi oku longisa Embimbiliya?
14 Yesu wa sanjokaile poku linga ocipango ca Isiaye wokilu. Eye wa sanjokailevo poku sapuilako omanu eci catiamẽla ku Suku. (Osamo 40:8) Yesu wa liketisile, kuenje wa tẽla oku vetiya ovitima violonjeveleli viaye. (Mateo 11:28-30) Omo liaco, tu likolisilikovo oku vetiya ovitima violondonge vietu. Oco tu tẽle oku ci linga, poku pongiya tu sukila oku sokolola eci catiamẽla kekalo liondonge yetu. Nda ondonge yetu ka ya kũlĩhĩle lacimue catiamẽla Kembimbiliya, tu sukila oku u kuatisa oku limbuka okuti eci ci sangiwa Vembimbiliya ocili. Noke tu u tangela ovinimbu vimue Viembimbiliya kuenda oku vi lombolola.
Situlula Ciwa Alusapo
15, 16. (a) Tu kuatisa ndati ondonge yina okuti olusapo lumue lua tukuiwa Vembimbiliya ka luolombolokele? (b) Nye tu pondola oku linga nda olusapo lu sangiwa velivulu lua tĩla kondonge?
15 Omunu tu kasi oku longisa Embimbiliya pamue ka tẽla oku kuata elomboloko liolusapo lumue lu sangiwa Vembimbiliya. Eye pamue ka tẽla oku kuata elomboloko lieci Yesu a yonguile oku popia, poku tukula ‘ondiyelo lomesa’ volusapo luaye. (Marko 4:21, 22) Yesu wa kala loku tukula ondiyelo yimue ya enda loku tamisua lulela. Ondiyelo yaco ya enda oku kapiwa komesa oco yi taimile vonjo yosi. Oco tu tẽle oku situlula ciwa olusapo luaco, tu sukila oku konomuisa velivulu Estudos Perspicaz das Escrituras.a Ci sanjuisa calua okuiya konjo yondonge lolusapo lumue lua situluiwa ciwa.
16 Elivulu tu kasi oku songola lalio Embimbiliya, pamue li lekisa olusapo lumue okuti lua tĩla kondonge oku lomboloka. Tu sukila oku situlula ciwa olusapo luaco. Ale tu sukila oku ta olusapo lukuavo lua li setãhala, okuti lu lekisavo etosi limuamue leli li yonguiwa oku pitiyiwa. Elivulu tu kasi oku songola lalio elilongiso Liembimbiliya, pamue poku lekisa ndomo olohuela vi endisiwa ciwa, li ci sokisa lolonjimbi ndeci: Vakuakusika oñoma eci va fetika oku sika, noke onjimbi yiñilamo londaka yaye ya posoka. Kuenje pokati kavo pa tunda ocisungo cimue ciwa. Ale pamue, elivulu li ci sokisa lalume vavali va kasi oku tuta olosako via lema kilu liekalu. U o kasi kilu liekalu, imba osako kukuavo o kasi posi. U o kasi posi, o yi yakela lonjanga. Kuenje o kevelela vali yikuavo. Ovopange aco, komunu una okuti ka kongeliwilemo, a moleha soketi a leluka. Pole, nda upange waco omunu ka u lilongisile ciwa, kuenda ka kuete ukuavo wamiavo kupange waco, ka tẽla oku u linga. Cimuamue haico catiamẽla kolohuela. Oco olohuela vi ende ciwa, olohueli vi sukila oku kuama olonumbi via sunguluka kuenda oku likuata omunga.
17. Nye tu pondola oku lilongisila ku Yesu catiamẽla koku ta alusapo?
17 Nda tu yongola oku ta olusapo lukuavo tu sukila oku lipongiya ciwa. Eyi oyo onjila yoku lekisa okuti tua kapako ondonge yetu. Yesu wa taile alusapo a leluka poku situlula ovina via tatama. Vohundo yaye Yokomunda eye oco a linga. Embimbiliya li lekisa okuti, eye wa vetiya olonjeveleli viaye. (Mateo 5:1–7:29) Yesu lutate walua, wa situluila olonjeveleli viaye ovina via tatama. Eye wa ci lingila omo okuti wa kapeleko omanu a kundila.—Mateo 16:5-12.
18. Nye tu kasi oku vetiyiwa oku linga lovinimbu Viembimbiliya via tukuiwa valivulu etu?
18 Nda tua kapako vakuetu, cika tu vetiyavo oku va ‘situluila ovisonehua.’ (Ovilinga 17:2, 3) Omo liaco, tu sukila oku likutilila ku Yehova kuenda oku lilongisa lutate alivulu ana a sandekiwa la ‘kalei wa kolelua.’ (Luka 12:42-44) Velivulu Ukũlĩhĩso Utuala Komuenyo Ko Pui, mua tukuiwa ovinimbu vialua Viembimbiliya okuti ka via sonehiwile.b Omo liaco, ciwa okuti poku songola elilongiso Liembimbiliya tu tanga vimue pokati kovisonehua viaco, kuenda oku vi lombolola. Momo elongiso lietu liatiamẽla Vondaka ya Suku yi kuete unene. (Va Heveru 4:12) Kuatisa ondonge oku limbuka eci Embimbiliya lipopia catiamẽla kondaka yimue ale kelinga limue. Likolisilako oku u lekisa ndomo oku pokola ku Suku cu kuatisa.—Isaya 48:17, 18.
Linga Apulilo a Vetiya
19, 20. (a) Momo lie tu sukilila oku linga apulilo kondonge tu kasi oku longisa Embimbiliya? (b) Nye tu sukila oku linga nda ondaka yimue ka ya lombolokele ciwa kondonge.
19 Yesu wa lingaile apulilo oco a vetiye omanu oku sokolola eci ca popiwa. (Mateo 17:24-27) Nda tua linga apulilo a vetiya kondonge, ketambululo liaye tuka limbukilako ovisimĩlo viaye. Pamue tu limbuka okuti, eye handi wa kakatela kovisimĩlo vi pisiwa Vembimbiliya. Eye pamue handi wa kakatela kondotilina ya Suku umosi Muvatatu. Pole, ocipama 3 velivulu Ukũlĩhĩso, ci lekisa okuti ondotilina yaco ka yi sangiwa Vembimbiliya. Velivulu liaco, mua sonehiwavo ovinimbu Viembimbiliya vi lekisa okuti Yehova la Yesu ka va lisokele. Kuenda espiritu sandu hamunuko. Puãi, ongusu ya pama ya Suku. Oku tanga kuenda oku lombolola ovinimbu viaco, pamue ci tẽla. Pole nda wa limbuka okuti ondaka yaco ka ya lombolokele handi kondonge, ci tava okuti o konomuisa alivulu akuavo Olombangi via Yehova. Ndeci okalivulu ka kuete osapi ya linga hati, Deve se Crer na Trindade? Noke o tiukila vali velivulu Ukũlĩhĩso.
20 Ondonge pamue yeca etambululo limue okuti halioko wa lavokaile. Oco hẽ nye o sukila oku linga? Nda ondaka o kasi loku konomuisa ya tatama, okuti yatiamẽla koku sipa ale kocitangi cimue cikuavo, ciwa oku u sapuila okuti tuka konomuisa ondaka yaco keteke likuavo. Oku kũlĩha okuti ondonge handi yi kasi loku sipa, ci tu kuatisa oku sandiliya alomboluilo atiamẽlako oco tu u kuatise oku amamako kespiritu. Osimbu tu likolisilako oku vetiya utima wondonge, ciwa okuti tu likutililavo ku Yehova oco ondonge yamameko oku linga apongoloko.
21. Nye olondonge vietu vika limbuka nda tua kapako ekalo liavo?
21 Loku lipongiya ciwa kuenda lekuatiso lia Yehova, tuka tẽla oku longisa ondonge yetu loku kapako ekalo liaye. Vokuenda kuotembo ciwa okuti tu u kuatisa oco a pamise ocisola caye a kuetele Yehova. Tu sukilavo oku kuatisa ondonge yetu oco yi sumbile kuenda yi sanjukile ocisoko ca Yehova. Ci sanjuisa calua eci omanu tu kasi oku longisa Embimbiliya va limbuka okuti ‘Suku o kasi pokati ketu.’ (1 Va Korindo 14:24, 25) Omo liaco, tu likolisiliko oku songola alilongiso Embimbiliya oco tu kuatise omanu oku kala olondonge via Yesu.
Tu Soli Upange Wetu
22, 23. Nye tu sukila oku linga oco tu tẽlise ocikundi cupange wetu?
22 Oco tu tẽlise ocikundi cupange wetu, tu sukila oku kolela kongusu ya Suku. Catiamẽla kupange woku kunda, upostolo Paulu wa sonehela Akristão olombuavekua hati: “Ukuasi ulo puãi, tu kasi lawo volombia viotuma, oku lekisa okuti unene wa piãla wa Suku, hawetuko.”—2 Va Korindo 4:7.
23 Ci kale olombuavekua ci kale ava vatiamẽla kocimunga ‘colomeme vikuavo,’ vosi tu kasi ndocikuata ca leñela. (Yoano 10:16) Pole, ndaño lalambalalo ale lovitangi vimue vikuavo, Yehova o tu ĩha ongusu tu sukila oco tu tẽlise ocikundi cupange wetu. (Yoano 16:13; Va Filipoi 4:13) Omo liaco, tu koleli Yehova kovina viosi. Tu eci esilivilo kupange wetu woku kunda kuenda tu likolisiliko oku u tẽlisa.
[Atosi pombuelo yamẽla]
a Lia sandekiwa Lolombangi via Yehova.
b Lia sandekiwa Lolombangi via Yehova.
O Tambulula Ndati?
• Nye akulu vekongelo va sukila oku linga oco va tẽlise ocikundi cupange wavo?
• Tu pondola ndati oku songola ciwa alilongiso Embimbiliya?
• Nye tu sukila oku linga nda olusapo lumue ka lua lombolokele ciwa kondonge?
[Elitalatu kemẽla 18]
Akulu vekongelo, va longisa vekongelo pole va kuatisavo vamanji kupange woku kunda
[Elitalatu kemẽla 20]
Poku songola alilongiso Embimbiliya tu molẽhisa ocinyi cetu