Elomboloko Liembimbiliya Esumũlũho Limue Lia Eciwa Kokuove
EMBIMBILIYA li kuete olondaka viocili ci tunda ku Suku. Olio, li tu lomboluila eci catiamẽla kesilivilo liomuenyo, esunga lieci omanu va talela ohali kuenda ekalo liavo lio kovaso. Olio, li tu longisa ndomo tu pondola oku kuata esanju loku kuata akamba. Kuenda li lekisa ndomo tu tetulula ovitangi. Embimbiliya, li tu longisavo eci catiamẽla Kululiki wetu Yehova. Ukũlĩhĩso waco, u tu sanjuisa calua kuenda u tu ĩha elomboloko liomuenyo wetu.
Oku kuata ukũlũhĩso Wembimbiliya ku sokisiwa ndokulia. Yesu wa popia hati: “Omunu ka muila omuenyo kombolo lika, te kondaka yosi yi tunda vomẽla wa Suku.” (Mateo 4:4; Va Heveru 5:12-14) Oco tu amameko oku kala lomuenyo, tu sukila oku litekula ciwa. Cimuamue haico catiamẽla kukũlĩhĩso Wondaka ya Suku. Oku tanga Embimbiliya ku tu kuatisa oku kũlĩha olohuminyo via Yehova viatiamẽla komuenyo ko pui.
Etu tu sanjukila oku tekula etimba lietu, momo Yehova wa tu lulika lonjongole yaco. Pole, oco tu kuate esanju komuenyo, tu sukila oku tẽlisa onjongole yikuavo ya velapo. Yesu wa popia hati: “Vakuosuke wovutima va sumũlũha.” (Mateo 5:3) Onjongole yaco tu yi tẽlisa lika lelomboloko Liondaka ya Suku.
Omanu vamue, va siata oku sima hati, ka ca lelukile oku kuata elomboloko Liembimbiliya. Citava okuti, ove o sukila ekuatiso oco o kuate elomboloko liovinimbu Viembimbiliya vi lombolola ovituwa vimue kua kũlĩhĩle. Kuenda ovinimbu vimue vi lombolola upopi wocindekaise. Handi vali, kuli ovitumasuku vimue via sonehiwa vupopi wocindekaise okuti, vi tu lomboloka lika nda tua tanga ovinimbu vikuavo vi lombolola ulandu waco. (Daniele 7:1-7; Esituluilo 13:1, 2) Pole, o pondola oku kuata elomboloko Liembimbiliya. Oco hẽ nye ci ku kuatisa oku tava kondaka eyi?
Esumũlũho Liaco Lia Eciwa Komanu Vosi
Embimbiliya Ondaka ya Suku. Yehova poku tu sapuila ocipango caye, wa ci situluila Vembimbiliya. Eye, ka sokiyile elivulu limue lia tĩla oku kuata emboloko liaco. Kuenda ka sokiyile elivulu limue okuti, li tangiwa lika lomanu va lilongisa calua kosikola. Yesu wa popia hati: “Pokati kene isia yi pi o kasi lomõla, [okuti] nda o pinga olusi u wiha onyõha, olusi haluoko? Pamue nda o pinga esala, u wiha enyenya? . . . Nda ene wa tuwi ale oku linga cĩvi, wa kũlĩhĩ oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?” (Luka 11:11-13) Ivaluka okuti, o pondola oku kuata elomboloko Liembimbiliya. Nda wa pinga ku Yehova, eye oku kuatisa oco o kuate elomboloko Liondaka yaye. Cikale akulu ale omãla, vosi yavo va pondola oku kuata elomboloko Liembimbiliya.—2 Timoteo 3:15.
Ka ca lelukile oku kuata elomboloko Liembimbiliya. Pole, nda tua likolisilako oku lilongisa, tu kuata elomboloko liaco. Eci Yesu a pinduka, wa molẽha kolondonge viaye vivali. Kuenje, wa vi lomboluila ovitumasuku Viembimbiliya. Ulandu waco welivulu lia Luka u popia hati: “[Yesu] wa va lomboluila ovisonehua viosi via tiamẽla kokuaye, oku fetika levi via Mose kuenda evi viovaprofeto vosi.” Ekuatiso lie va tambula noke? Eteke liaco koñolosi, osimbu olondonge via kala oku sokolola ovina va yeva, va popia hati: “Ovitima vietu ka via tokotele hẽ osimbu [Yesu] a vangula letu vonjila, cina a tu situluila ovisonehua?” (Luka 24:13-32) Olondonge omo lioku kuata elomboloko Liondaka ya Suku, via kuata esanju lia piãla. Kuenje, ulandu waco wa pamisa ekolelo liavo kolohuminyo via Yehova kuenda elavoko liavo lio kovaso.
Oku kuata elomboloko Liondaka ya Suku, hacilemoko. Pole, ci kuatisa kuenda ci nena esanju ndokulia kumue kupepa. Oco hẽ nye tu sukila oku linga oco tu kuate elomboloko liaco? Ocipama ci kuãimo cika lekisa ndomo tu pondola oku sanjukila ‘ukũlĩhĩso Wondaka ya Suku.’—Olosapo 2:1-5.
[Elitalatu kemẽla 4]
Ndonjali yimue yocisola, Yehova o tu ĩha espiritu sandu oco li tu kuatise oku kuata elomboloko Liembimbiliya