Elomboloko Liembimbiliya li ku Kuatisa Ndati?
YESU wa popia hati: “[Ove] wa sitikila ovina evi kolonoño kuenda ku vakualondunge kuenje wa vi situluila koloñaña.” (Luka 10:21) Olondaka evi Yesu wa vi loñisa ku Isiaye wokilu. Ovio, vi lekisa okuti, nda tu yongola oku kuata elomboloko Liembimbiliya, tu sukila oku lekisa ocituwa ca sunguluka. Olondunge via Yehova via situluiwa Vembimbiliya. Kuenje, omanu vosi vakuavitima via sunguluka okuti va tava oku longisiwa, va pondola oku kuata elomboloko liaco.
Ka calelukile oku lekisa umbombe. Momo tua piñala ocituwa coku lekisa epela. Omo okuti tu kasi koloneke via sulako, onepa yalua yomanu va linga ‘vakuakulisola ovo muẽle, vakuacipango kuenda vakuepela.’ (2 Timoteo 3:1-4) Ovituwa evi vi tateka oku kuata elomboloko Liondaka ya Suku. Handi vali, olonjanja vimue tua siata oku vetiyiwa lovituwa vĩvi viomanu tu lisungue lavo. Oco hẽ ndamupi o kuata ocituwa ci sukiliwa koku kuata elomboloko Liembimbiliya?
Pongiya Utima Wove Lolondunge
Esera, una wa songuilile omanu va Suku kosimbu, wa pongiyile utima waye oco a konomuise ovihandeleko via Yehova. (Esera 7:10) Anga hẽ kuli eci ci pondola oku tu kuatisa oku pongiya utima wetu? Kuli. Tu pondola oku ci linga poku kuata ovisimĩlo via sunguluka viatiamẽla Kembimbiliya. Upostolo Paulu wa sonehela Akristão voko Tesalonike hati: “Eci wa tambuli ondaka ya Suku, yina wa yevi kokuetu, wa yi tambuli ndomo yi kasi . . . okuti, handaka yomanuko, puãi ondaka ya Suku.” (1 Va Tesalonike 2:13) Ndaño okuti, Yehova wa tuma omanu oco va sonehe Embimbiliya, olondaka vi sangiwamo via tunda Kokuaye. Oku kũlĩha ovina evi, ci tu kuatisa oku tava kolonumbi vi sangiwa Vembimbiliya.—2 Timoteo 3:16.
Onjila yikuavo yoku pongiya utima wetu, ohutililo. Omo okuti, Embimbiliya lia sonehiwa lunene wespiritu sandu, tu kuata lika elomboloko liaco lekuatiso liespiritu lia Yehova. Omo liaco, tu sukila oku likutilila ku Yehova oco a tu kuatise lespiritu sandu. Kũlĩhĩsa ndomo ukualosamo a lekisile onjongole yoku kuatisiwa la Yehova. Eye wa popia hati: “Nyihe olondunge oco mokole kovihandeleko viove, loku vi tata lutima wosi.” (Osamo 119:34) Tu sukila oku likutilila ku Yehova, oco tu kuate elomboloko liolonumbi Viembimbiliya. Tu sukilavo oku pinga kokuaye okuti, tu kuata ocituwa coku pokola kolonumbi viaco. Oco tu kuate elomboloko Liembimbiliya, tu sukila oku leluisa utima wetu.
Osimbu o sokolola ovina wa tanga Vembimbiliya, kũlĩhĩsa ndomo o kuatisiwa lovina viaco. Tu kuete esunga lioku konomuisa Ondaka ya Suku. Pole, oku kuata ukamba Laye olio esunga lia velapo li tuvetiya oku konomuisa Embimbiliya. (Tiago 4:8) Osimbu tu amamako oku tanga Embimbiliya, tu kuata elomboloko liovituwa via Yehova. Tu kũlĩha ndomo eye a tata omanu vana vo sole kuenda vana vo yanduluka. Onjongole yetu yoku tanga Embimbiliya, oku kũlĩha ciwa ekalo lia Suku. Kuenda oku pamisa ukamba wetu laye.
Ceci ci Tateka Oku Kuata Ocituwa ca Sunguluka
Ovina vipi vi tateka oku kuata elomboloko Liondaka ya Suku? Vimue pakati kavio oku sumbila ovisimĩlo viomanu vana tua kolela. Ove citava okuti, o kolela kovisimĩlo viomanu vamue va kemãla. Oco hẽ nye ci pita love nda omanu vaco ka va kapeleko ocili Condaka ya Suku? Omo liovitangi viaco, ka ci leluka oku kuata elomboloko lieci Embimbiliya li longisa. Pole, Embimbiliya li tu vetiya oku konomuisa lutate eci tua siata oku lilongisa.—1 Va Tesalonike 5:21.
Maria ina ya Yesu, wa liyakele locitangi caco. Eye wa kulila vepata limue okuti, va velisilepo calua oviholo via va Yudea. Eye wa enda loku pokola Kovihandeleko via Mose, loku endaenda ko sunangonga. Noke, wa limbuka okuti, efendelo lina olonjali viaye vio longisa, ka li taviwa la Suku. Omo liaco, wa tava oku longisiwa la Yesu. Kuenje, weya oku tiamẽla kekongelo Liakristão vatete. (Ovilinga 1:13, 14) Epongoloko liaco, ka li lekisa okuti, ka sumbilile olonjali viaye. Pole, ocisola a kuatela Suku, oco co vetiya oku siapo etavo liolonjali viaye. Nda tu yongola oku kuatisiwa lolonumbi Viembimbiliya, tu sukila oku kuama ongangu ya Maria. Momo oku sumbila Suku, oco ocina ca velapo okuti ukamba womanu ci sule.
Ci sumuisa calua omo okuti, omanu valua ka va kapeleko ocili Cembimbiliya. Vamue va sanjukila oku kuama oviholo vietavo lia va kukululu yavo. Vakuavo va siata oku lekisa etombo Kondaka ya Suku poku vangula kuavo kuenda kekalo liomuenyo wavo. Oco tu tave kocili Cembimbiliya, tu sukila oku likolisilako. Momo noke, tu suvukiwa lakamba, lomanu va kasi posongo yetu, vakuetu kupange kuenda epata lietu. (Yoano 17:14) Soma Salomone wa popia hati: “Landa esunga, kuka li landise vali.” (Olosapo 23:23) Nda ove wa sola ocili Condaka ya Suku, Yehova oka ku kuatisa oku kuata elomboloko liaco.
Ocitangi cikuavo coku kuata elomboloko Liembimbiliya, ekambo lionjongole yoku pokola kolonumbi viaco. Yesu wa sapuila olondonge viaye hati: “Ene wa ihiwi oku kũlĩha alumbu usoma wokilu, puãi ovo ka ca va ihiwile. Momo utima womanu ava wa siva. Va yeva naito lovatui avo [pole, ka va limbuka cimue].” (Mateo 13:11, 15) Valua pokati komanu vana Yesu a kundila ondaka ya Suku, ka va lekisile onjongole yoku pongoloka. Ocituwa cavo, ca litepa leci culume una wa endele koku fũla omota yondongo ya lomboluiwa volusapo lua Yesu. Eci a yi sanga, wa landisa ovina viaye viosi, kuenje wa yi landa. Etu tu sukilavo oku velisapo oku kuata elomboloko Liembimbiliya.—Mateo 13:45, 46.
Ocitangi Coku Longisiwa
Ocitangi cikuavo coku kuata elomboloko Liembimbiliya, oku tava oku longisiwa. Ka ca lelukile oku tava kovisimĩlo viomunu umue ka kuete ekemãlo. Ovapostolo va Yesu va kala ‘omanu vaño haivo ka va lilongisile calua.’ (Ovilinga 4:13) Paulu poku lombolola esunga lieci olondonge via Yesu via kalela omanu vaño haivo ka va lilongisile, wa popia hati: “A vamanji, sokololi oku kovongiwa kuene. Pokati kene, ka va luile vakualondunge ndeci oluali lu tenda olondunge, ka va luile vakuonene, ka va luile olombuale. Puãi Suku wa nola ovina viuveke violuali ha kutisa lavio osõi vakualondunge. Suku wa nola ovina via leñela violuali ha kutisa osõi evi via kola.” (1 Va Korindo 1:26, 27) Nda ove o kuete ocitangi coku liketisa poku longisiwa lomunu umue ka tangele calua kosikola, ivaluka okuti Yehova eye wo tuma kokuove oco aku longise. Oku longisiwa la Yehova, ci nena asumũlũho alua.—Isaya 30:20; 54:13.
Namana, kesongo kolohoka via va Asuria, wa kuatelevo ocitangi coku tava oku longisiwa lomunu umue ka lilongisile calua kosikola. Ocili okuti, Namana wa yonguile oku sakuiwa ovilundu viaye. Omo liaco, wa endele oku ka sanda Elisia uprofeto wa Yehova. Pole, onumbi ya Yehova yatiamẽla koku sakuiwa kua Namana, ya eciwa komunu umue wa kala upika. Kefetikilo Namana wa kuata ocitangi coku lekisa eliketiso lioku tava kondaka yuprofeto wa Yehova. Momo eye ka solele ndomo esapulo liaco lia eciwa kokuaye. Pole, noke wa pongolola ovisimĩlo viaye kuenje wa pokola kondaka yaco. (2 Olosoma 5:9-14) Etu tua siatavo oku liyaka lovitangi vimuamue poku tanga Embimbiliya. Pamue tu lilongisa okuti, oco tu kuatisiwe konepa yespiritu, tu sukila oku ambata omuenyo wokaliye. Anga hẽ tuka lekisa umbombe woku tava oku longisiwa oco tu kũlĩhe eci tu sukila oku linga? Omanu vana va lekisa onjongole yoku longisiwa, ovo lika va kuata elomboloko liovina vi sangiwa Vembimbiliya.
Ulume umue wa kemãla okuti wa kala kalei ka nasoma Kandake ko Etiopia, wa lekisile ovituwa viwa. Eci a kala oku tiukila vo Afrika lekãlu liaye, vonjila wa ñualehela la ndonge Filipu. Noke, Filipu wa pula ulume waco nda eci a kala oku tanga co lomboloka. Eye lumbombe wocili wa tambulula hati: “Ci ndomboloka ndati nda lomue o ndomboluila?” Noke lioku kuata elomboloko Liondaka ya Suku, ulume waco wa papatisiwa. Kuenje ‘wamamako lungende waye lesanju lialua.’—Ovilinga 8:27-39.
Valua pokati Kolombangi via Yehova, ka va lilongisile calua kosikola. Pole, vokuenda kuosemana, va siata oku longisa Ondaka ya Suku kolonjo viomanu valua. Embimbiliya li tu longisa ndomo tu ambata omuenyo wa sunguluka, kuenda li lombolola elavoko liomanu vosi. Handi vali, li tu sapuila ndomo tu pondola oku kuata ukamba la Yehova. Omo liaco, omanu valua va siata oku limbuka okuti, oku lilongisa Embimbiliya loku kuata elomboloko liovina vi sangiwamo, ci nena esanju komuenyo. Ove citava okuti, o kuatavo esanju liaco.
[Elitalatu kemẽla 7]
Namana, kefetikilo ka lekisile onjongole yoku longisiwa lomunu umue ka lilongisile calua kosikola
[Elitalatu kemẽla 7]
Oku kuata elomboloko liolonumbi Viembimbiliya, ci kavuluisa utima