Nye o Sukila Oku Linga Oco o Kuate Elomboloko Liembimbiliya?

Etambululo Liembimbiliya

Embimbiliya li lekisa eci o sukila oku linga oco o kuate elomboloko lialio. Ndaño okuti kua lilongisile calua, pole, ‘ka ca tĩlile oku kuata elomboloko liesapulo lia Suku li sangiwa Vembimbiliya kuenda ka li kasi ocipãla.’—Esinumuĩlo 30:11.

Ceci o sukila oku linga oco o kuate elomboloko Liembimbiliya

1. Kuata ovisimĩlo via sunguluka. Tava Kembimbiliya okuti Ondaka ya Suku. Lekisa umbombe, momo Suku ka sole vakuakulipanda. (1 Va Tesalonike 2:13; Tiago 4:6) Pole, yuvula oku kuata ekolelo liesanda. Suku o yongola okuti o talavaya ‘luloño wove woku sokolola.’—Va Roma 12:1, 2.

2. Likutilila oco o pinge olondunge. Embimbiliya kelivulu Liolosapo 3:5 ku popia hati: “Ku ka tiamẽle kolondunge viove muẽle.” Omo liaco, amamako oku pinga ‘olondunge ku Suku,’ oco o kuate elomboloko Liembimbiliya.—Tiago 1:5.

3. Lilongisa olonjanja viosi. O ka kuatisiwa calua lovina o lilongisa Vembimbiliya nda wa ci linga olonjanja viosi.—Yehosua 1:8.

4. Lilongisa onepa lonepa. Elilongiso liaco, li ku kuatisa oku kũlĩhĩsa lutate eci Embimbiliya li popia catiamẽla kondaka yimue, kuenda onjila yimue yiwa yoku lilongisa ovina vi sangiwa Vovisonehua. Fetikila kovipama viatete noke o pita kelongiso ‘liakulu,’ ale elongiso liondongosi. (Va Heveru 6:1, 2) Poku sokisa ovinimbu Viembimbiliya, o ka limbuka okuti olonepa vialua Viembimbiliya vi lombolola ovina vimuamue, ndaño vina okuti “via tĩla oku kuata elomboloko liavio.”—2 Petulu 3:16.

5. Sanda ekuatiso. Embimbiliya li tu vetiya oku tava ekuatiso liomanu va kuete elomboloko lialio. (Ovilinga 8:30, 31) Olombangi Via Yehova vi longisa Embimbiliya ocali. Ndeci Akristão vokocita catete va enda oku linga, ovo va talavaya lovinimbu Viovisonehua oco va kuatise omanu oku kuata elomboloko lieci Embimbiliya li longisa.—Ovilinga 17:2, 3.

Ceci ku sukila oku linga

1. Oku lilongisa calua kosikola. Olondonge via Yesu vi soka 12 va kuatele elomboloko Liovisonehua kuenda va enda oku longisa omanu vakuavo, ndaño omanu vamue va enda oku va tenda ‘ndomanu vaño.’—Ovilinga 4:13.

2. Olombongo. Oco o kũlĩhe ovina Embimbiliya li longisa, ku sukila oku feta cimue. Yesu wa sapuila olondonge viaye hati: “Omo wa tambuli ocali, ecivo ocali.”—Mateo 10:8.