Ove hẽ o Kuete Ocituwa COKU Sapela?

OCISOKO combango kofeka yo Japãu vokuenda kuanyamo apita, va linga olomapalo vimue losapi ya popia hati: ‘Ukanda wocisola, wa sonehiwa la umue o kuete akũi epandu kanyamo.’ Olomapalo viaco via vetiya omanu voko Japãu okupisa kuava va kuete 50 toke 60 kanyamo oco va lombolole eci va yevite vutima catiamẽla ku vakuanjo yavo. Ulume umue wa kala kolomapalo viaco, wa sonehela ukãi waye hati: ‘Ove citava okuti, o yola eci ndi vangula. Pole, nda sia vanguile ondaka yi kasi vutima wange, ndi sumua calua. Nda pandula omo tua likuela.’

Kolofeka vialua capiãla enene kutundilo, va kuete ocituwa coku sumuisa vakuavo eci va situlula ovisimĩlo vi kasi vutima wavo. Pole, ci soka 15.000 komanu va sola calua ukanda wocisola wa lingiwa kolomapalo. Olomapalo viaco vieya oku kũlĩhĩwa calua. Momo noke kua lingiwa vali olomapalo vikuavo. Kuenje kua sandekiwa alivulu a lombolola ulandu wukanda waco wocisola. Ulandu owu u lekisa okuti, valua va kuele, va yongola oku situluila kolohueli viavo ovisimĩlo vi kasi vutima wavo. Pole, ka va kuete utõi woku ci linga. Momo lie? Momo ka va kuete uloño woku ci linga. Omo liaco, va sukila oku likolisilako oco ukuanjo yavo a kuate elomboloko liovisimĩlo viaye.

Ulume umue o tukuiwa hati, Hitoshi Kato, wo kofeka yo Japãu, wa liwekapo oku talavaya omo lioku kuka. Eye, wa soneha elivulu limue li lombolola omuenyo wolohueli via kuka. Kuenda wa lombolola okuti, kofeka yo Japãu, oku litepa kuolohueli vialua via kuka, kua siata oku fetikila kakãi omo lioku seleka olonyeño. Noke wamisako hati: ‘Ocitangi caco ca siata oku tunda kekambo lioku sapela eci pokati kavo peya ovitangi.’

Ulume pamue noke yoku liwekapo oku talavaya omo lioku kuka, ukãi waye u sapuila hati, oyongola oku tepa olohuela viavo. Kuenje eye ka kuata elomboloko lieci ukãi a yonguila oku litepa. Citava okuti pamue, lalimue eteke va sapelele eci catiamẽla kovisimĩlo viavo. Pamue umue pokati kavo wa setekele oku situlula ovisimĩlo viaye. Pole, ka kuatele elianjo lioku sapela lukuanjo yaye. Omo okuti, ka va kuatele ukamba, va enda oku litatamisa lolondaka vĩvi.

Oco hẽ ulume lukãi waye, va pondola ndati oku tetulula ovitangi viavo lombembua kuenda oku kuata ocituwa coku sapela? Etambululo ka li sangiwa velivulu limue lia sandekiwa ndopo okuti li kuete olonumbi vioku kuatisa olohueli. Pole, li sangiwa Vembimbiliya.