Tu Lekisi Epokolo Kakulu Vekongelo
“Pokoli kasongui vene loku linga eci va tuma.”—VA HEVERU 13:17.
1, 2. Embimbiliya li lekisa ndati okuti Yehova kuenda Yesu, ovo Angombo vocisola?
YEHOVA SUKU kuenda Omõlaye Yesu Kristu, ovo Angombo vocisola. Uprofeto Isaya wa popia hati: “Tali, Yehova Suku iya lunene. Okuokuo kuaye ku u vialelako. . . . O lisa ocunda caye ndungombo, ongolola otumeme vovoko aye, o tu ambatela ponete. O songuila levando evi vi kasi lomãla.”—Isaya 40:10, 11.
2 Ocitumasuku eci ca tẽlisiwa kunyamo wo 537 eci va Yuda va tunda kumandekua loku tiukila kofeka yavo. (2 Asapulo 36:22, 23) Noke ceya oku tẽlisiwa vali kunyamo wo 1919 eci Akristão olombuavekua va yovuiwa “Kombavulono Yinene” lunene wa Kuru wavelapo, okuti Yesu Kristu. (Esituluilo 18:2; Isaya 44:28) Yesu eye “okuokuo” kua Yehova ku U vialelako loku ongolola olomeme kuenda oku vi tata locisola. Yesu wa popia hati: “Ame ndungombo uwa. Ñulĩha olomeme viange. Olomeme viange vi ñulĩha ame.”—Yoano 10:14.
3. Esakalalo lipi Yehova a lekisa koku tatiwa kuolomeme viaye?
3 Ocitumasuku ca Isaya 40:10, 11 ci lekisa ndomo Yehova a siata oku tata omanu vaye locisola. (Osamo 23:1-6) Yesu eci a kala palo posi, wa lekisa ocisola kolondonge viaye, kuenda komanu vakuavo. (Mateo 11:28-30; Marko. 6:34) Yehova la Yesu va suvukile ovilinga vĩvi viovitunda via va Isareli vana va enda oku tata lãvi omanu vavo loku va punda. (Esekiele 34:2-10; Mateo 23:3, 4, 15) Omo liaco, Yehova wa likuminyile hati: “Ame mopela olomeme viange okuti ka vi kuatiwa vali, kuenje netulula pokati kolomeme lolomeme. Ndi vi kapa ungombo umosi okuti ukuenje wange Daviti. Eye o vi lisa, o vi lisa kuenje o linga ungombo wavio.” (Esekiele. 34:22, 23) Koloneke vilo via sulako, Yesu Kristu eye “ungombo umosi” Yehova a nõla oco a tate omanu Vaye palo posi, okuti Akristão Olombuavekua kuenda “olomeme vikuavo”—Yoano 10:16.
Olombanjaile Yehova a Eca Kekongelo
4, 5. (a) Ombanjaile yipi Yehova a eca komanu vaye palo posi? (b) Ombanjaile yipi Yesu a eca kekongelo?
4 Yehova poku nõla Yesu Kristu ‘ungombo’ oco a songuile omanu vaye palo posi, wa eca ombanjaile ya velapo kekongelo Liakristão. Ombanjaile yaco ya lomboluiwa vocitumasuku ca Isaya 55:4 ci popia hati: “Tala, ndo tukula ombangi ya vakualofeka, haeye usongui wa vakualofeka, haeye kesongo liavo.” Akristão olombuavekua ‘lowiñi wakahandangala’ va tunda kolofeka viosi, kapata osi, kuenda kalimi osi. (Esit. 5:9, 10; 7:9) Ovo va linga ekongelo limosi voluali luosi loku tiamẽla ‘kocunda cimosi’ ci songuiwa ‘lugombo’ umuamue okuti Yesu Kristu.
5 Yesu wa ecavo ombanjaile yaye kekongelo. Eye wa nõla angombo va loñoloha kespiritu oco va kuame ongangu ya Yehova leyi yaye yoku tata olomeme locisola. Upostolo Paulu poku lombolola catiamẽla kombanjaile yaco, wa popia hati: “[Yesu] poku londa wambata owiñi wolohute, kuenje wa eca olongavelo komanu. . . . Wa va kapa okuti, vamue va linga ovapostolo, vamue ovaprofeto, vamue ovakundi vondaka yiwa, vamue ovangombo, vamue alongisi. Wa ci lingila oku kolisa olosandu viaye ha vi lingi upange woku longisa loku tunga etimba lia Kristu.”—Va Efeso 4:8, 11, 12.
6. Akulu vekongelo olombuavekua, va tukuiwa ndati kelivulu Liesituluilo 1:16, 20, kuenda nye ci popiwa kakulu vekongelo vatiamẽla kolomeme vikuavo?
6 ‘Olombanjaile via eciwa komanu,’ vi lomboloka akulu vekongelo vana va nõliwa la Yehova kuenda Omõlaye Yesu lekuatiso liespiritu sandu oco va songuile olomeme locisola. (Ovilinga 20:28, 29) Kocita catete akulu vaco vekongelo va kala Akristão olombuavekua. Kelivulu Liesituluilo 1:16, 20 va tukuiwa hati, “olombungululu” ale “ovangelo” va kasi peka liondio lia Kristu, okuti eye o va songuila. Koloneke vilo via sulako, etendelo Liakristão olombuavekua li kasi oku tepuluka calua palo posi. Omo liaco, onepa yalua yakulu vekongelo, vatiamẽla kolomeme vikuavo. Omo okuti akulu vaco vekongelo va nõliwa losungu Yolombangi via Yehova, lekuatiso liespiritu sandu, citava oku popia hati va kasivo peka Liungombo Uwa, Yesu Kristu. (Isaya 61:5, 6) Ocili okuti, akulu vekongelo va pokola ku Yesu Kristu Utue wekongelo. Omo liaco, tu sukila oku pokola kokuavo kuenda oku va sumbila.—Va Kolosai 1:18.
Oku Pokola Kuenda Oku Linga Eci Akulu Vekongelo va Tuma
7. Elungulo lipi Paulu a eca liatiamẽla kocituwa tu sukila oku lekisa kakulu vekongelo?
7 Angombo vetu Yehova Suku kuenda Yesu Kristu, va yongola okuti, tu pokola komanu vana ovo va nõla oco va songuile ekongelo. (1 Petulu 5:5) Upostolo Paulu wa popia hati: “Ivaloki asongui vene, ava vo sapuilili ondaka ya Suku. Sokololi esulilo liomuenyo wavo. Setukuli ekolelo liavo. Pokoli kasongui vene loku linga eci va tuma, momo va kasi loku lavulula ovimuenyo viene ndava va lombolola noke ndomo va vi tata. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla nda ka cu kuatisi.”—Va Heveru 13:7, 17.
8. Nye Paulu a tu vetiya oku “sokolola,” kuenda tu lekisa ndati ‘epokolo’?
8 Ivaluka okuti, Paulu wa tu vetiya oku “sokolola” esulilo liovilinga viwa viakulu vekongelo kuenda oku kuama ongangu yekolelo liavo. Eye wa tu vetiyavo oku pokola kokuavo loku kuama olonumbi viavo. Ulume umue ukuakukonomuisa Embimbiliya o tukuiwa hati, R. T. France wa lombolola okuti, ‘ondaka yo Helasi yoku popia hati, “pokoli,” ka yi lomboloka lika oku pokola. Pole, yi lomboloka oku vetiyiwa oku limbuka esunga lieci tu sukilila oku pokola kolonumbi viavo.’ Etu ka tu pokola lika kolonumbi viakulu vekongelo omo lioku vetiyiwa Londaka ya Suku. Pole, tu pokola kokuavo omo lioku kũlĩha okuti, va pitisa kovaso Usoma wa Suku kuenda va tu yonguila ekalo liwa konepa yespiritu. Omo liaco, nda tua likolisilako oku pokola kokuavo, tu kuata esanju.
9. Ndaño okuti tua siata oku lekisa epokolo, momo lie ci kuetele esilivilo oku linga ovina viosi akulu vekongelo va tuma?
9 Nye tu sukila oku linga nda tua limbuka okuti akulu vekongelo va eca olonumbi vimue okuti ka via sungulukile kokuetu? Apa opo tu lekisa uvangi wepokolo lietu. Ocili okuti, ca leluka oku pokola kondaka yimue ka ya sunguluka kokuetu. Pole, tu lekisa lika epokolo lia velapo nda tu linga ovina viosi va tu tuma, ndaño okuti ka via tu lombolokele ciwa. Petulu una weya oku linga upostolo, wa lekisa ocituwa caco coku tava kolonumbi.—Luka 5:4, 5.
Asunga Akuãla a tu Vetiya Oku Kuatisa Akulu Vekongelo
10, 11. Akulu vekongelo va siata oku sapula ndati “ondaka ya Suku” ku vamanjavo tunde kocita catete toke koloneke vilo?
10 Kelivulu lia Va Heveru 13:7, 17, upostolo Paulu wa lekisa asunga akuãla a tu vetiya oku pokola kolonumbi viakulu vekongelo kuenda oku linga cosi va tuma. Esunga liatete lieli okuti, ovo va “tu sapuila ondaka ya Suku.” Ivaluka okuti, Yesu poku “eca olongavelo komanu” wa ci lingila oku “kolisa ekongolo liolosandu.” (Va Efeso 4:11, 12) Eye lekuatiso liangombo vaco wa pengulula ovisimĩlo Viakristão vokocita catete kuenda ovituwa viavo. Vamue pokati kangombo vaco va soneha ovikanda lekuatiso liespiritu sandu kuenje via tumiwa kakongelo. Akulu vaco vekongelo va tambuile ocikele coku songuila Akristão kocita catete kuenda oku va pamisa kespiritu.—1 Va Korindo 16:15-18; 2 Timoteo 2:2; Tito 1:5.
11 Koloneke vilo, Yesu o tu songuila locisoko ‘cukuenje wa lunguka,’ kuenda lakulu vekongelo. (Mateo 24:45) Omo lioku sumbila Yesu “ungombo unene,” tu sukila oku pokola kolondaka viupostolo Paulu wa popia hati: ‘Sumbili ava va linga upange pokati kene, haivo vo songuili vu Ñala loku vu lungula.’—1 Petulu 5:4; 1 Va Tesalonike 5:12; 1 Timoteo 5:17.
12. Ndamupi akulu vekongelo va “lavulula ovimuenyo” vietu?
12 Esunga liavali lieci tu sukilila oku pokola kakulu vekongelo, lieli okuti ovo “va kasi loku lavulula ovimuenyo” vietu. Eci ovo va limbuka okuti tu kuete ocituwa cimue ci kapa kohele uhayele wetu kespiritu, va yayulako oku tu ĩha alungulo tu sukila oco tu pamise ekalo lietu kespiritu. (Va Galatia 6:1) Ondaka yo Helasi yoku popia hati, “oku lavulula,” yi lomboloka ‘oku yuvula oku pekela.’ Onoño yimue ya lombolola okuti, ondaka yaco ‘yi lekisa ndomo ungombo a pondola oku amamako oku lava ocunda.’ Akulu vekongelo ka va lavulula lika ekalo liavo kespiritu. Ovo, olonjanja vimue va pumba otulo omo lioku sakalala lekalo lietu kespiritu. Anga hẽ ovina evi ka vi tu vetiya oku pokola kangombo ava va likolisilako oku kuama ongangu ya Yesu Kristu, “ungombo unene wolomeme”?—Va Heveru 13:20.
13. Akulu vekongelo kuenda Akristão vosi vaka lilombolola kulie?
13 Esunga liatatu lieci tu sukilila oku kuatisa akulu vekongelo lieli okuti, ovo va tu lavulula ‘ndava vaka lombolola ku Suku ndomo va tu tata.’ Akulu vekongelo va ivaluka okuti, va kasi loku songuiwa la Yehova kuenda Yesu Kristu Angombo vokilu. (Esekiele 34:22-24) Yehova eye Cime colomeme vina ‘a landa losonde Yomõlaye.’ Kuenje akulu vekongelo va tambula ocikele Kokuaye coku kũlĩha ndomo va lava ocunda caco loku ci “kuatela ohenda.” (Ovilinga 20:28, 29) Pole, tu sukila oku ivaluka okuti vosi yetu tu ka li lombolola ku Yehova ndomo tua siata oku tenda olonumbi viaye. (Va Roma 14:10-12) Epokolo lietu kakulu vekongelo olio lieca uvangi woku sumbila olonumbi via Kristu, Utue wekongelo.—Va Kolosai 2:19.
14. Nye ci vetiya akulu vekongelo oku lava ocunda loku “lisiõsiõla,” kuenda nye ci yililako?
14 Paulu wa lekisa esunga lia kũala lieci tu sukilila oku lekisila epokolo liocili kakulu vekongelo. Eye wa popia hati: “Pokoli kokuavo okuti va ci linga lesanju, ha loku lisiõsiõlako, momo nda va ci linga loku lisiõsiõla nda ka cu kuatisi.” (Va Heveru 13:17) Akulu vekongelo va kuete ovikele vialua ndeci: Oku longisa, oku nyula vamanji, oku songuila upange woku kunda, oku tekula apata avo, kuenda oku tetulula ovitangi viekongelo. (2 Va Korindo 11:28, 29) Omo liaco, nda ka tu pokola kokuavo, tu vokiya ocilemo cavo, kuenje tu va sumuisa. Oku pembula olonumbi viavo, ci sumuisa Yehova, kuenje ci tu nenẽla ovitangi. Pole, eci tu pokola kokuavo lesumbilo tu va sanjuisa calua, kuenda tu kuatisa ekongelo oku likuata omunga, loku linga upange woku kunda locisola.—Va Roma 15:5, 6.
Tu Pokoli Kovina Viosi va Tuma
15. Ndamupi tu lekisa epokolo kuenda oku tava kovina viosi va tu tuma?
15 Kuli olonepa vialua tu pondola oku kuatisa akulu vekongelo. Olonjanja vimue ekalo liocikanjo tua siata oku kundila, li pongoloka. Noke akulu vekongelo va linga esokiyo lioku pongolola ateke kuenda alivala olohongele viupange woku kunda. Pole, olonjanja vimue esokiyo liaco ka li likuata lovopange etu. Nye tu sukila oku linga? Tu sukila oku likolisilako oku pokola kesokiyo liaco. Nda tua cilinga, tu tambula asumũlũho alua. Anga hẽ mitavaso ukuacikele cupange woku kunda o kasi oku nyula ocimunga cetu celilongiso lielivulu? Tu sukila oku likolisilako oku u kuatisa kupange woku kunda vokuenda kuosemana yaco. Nye tu sukila oku linga nda tua tambula onepa yimue Kosikola Yupange Wakristão? Tu sukila oku yi pongiya ciwa kuenda oku yi linga lesumbilo. Nda osemana yetu yoku yelisa Vonjango Yusoma ya pitila, tu sukila oku eca ekuatiso lietu toke apa uhayele wetu longusu yetu yecelela. Nda tua cilinga, tu lekisa epokolo komanu vana Yehova kuenda Omõlaye va nõla oco va songuile ekongelo.
16. Momo lie oku lueya kukulu umue wekongelo kaku tu ĩhila esunga lioku lekisa esino?
16 Olonjanja vimue, citava okuti ukulu umue wekongelo poku tẽlisa ovikele viaye, ka kuama olonumbi viukuenje walunguka. Nda eye wamamako lesino liaye, oka lilombolola ku Yehova ‘ungombo wovimuenyo vietu, una wa siata oku tu lava.’ (1 Petulu 2:25) Pole, oku lueya kukulu umue vekongelo ka citava okuti, ku tu ĩha esunga lioku lekisa esino. Yehova ka sumũluisa vakuesino ndaño vakuamanya.—Atendelo 12:1, 2, 9-11.
Yehova o Sumũluisa Ava va Eca Ekuatiso Liavo
17. Ocituwa cipi tu sukila oku lekisa kakulu vekongelo?
17 Yehova wa kũlĩha okuti alume a nõla oco va songuile akongelo, ka va lipuile. Pole, lekuatiso liespiritu liaye o va kuatisa oco va songuile omanu vaye palo posi. Momo vosi yetu tua siata oku kuatisiwa ‘lunene wa piãla wa Suku okuti wetu hawoko.’ (2 Va Korindo 4:7) Tu eca olopandu ku Yehova omo liovina a kasi oku linga lekuatiso liakulu vekongelo. Omo liaco, tu sukila oku pokola kokuavo.
18. Oku pokola kakulu vekongelo ci lomboloka oku pokola kulie?
18 Akulu vekongelo, va likolisilako oku lekisa ovituwa Yehova a yonguila kangombo va tata ocunda caye koloneke vilo via sulako, ndomo ca lekisiwa kelivuu lia Yeremiya 3:15 li popia hati: “Ndu wĩhi ovangombo vakuotima wange ha vo tekuli lolondunge kuenda ukũlĩhĩso.” Akulu vekongelo va kasi oku linga upange uwa woku longisa kuenda oku lava olomeme via Yehova. Etu tu eca olopandu vietu poku va kuatisa, loku pokola kokuavo, kuenda oku linga cosi va tu tuma. Nda tua ci linga, tu eca olopandu ku Yehova kuenda ku Yesu Kristu, Angombo vetu vokilu.
Oku Pitulula
• Ndamupi Yehova la Yesu va siata oku lekisa okuti Angombo vawa?
• Ndaño okuti tua siata oku lekisa epokolo, momo lie tu sukilila oku linga cosi va tu tuma?
• Kovina vipi tu lekisa epokolo lietu?
[Elitalatu kemẽla 29]
Akulu vekongelo va kuama olonumbi via Kristu
[Elitalatu kemẽla 31]
Kuli olonjila vialua tu lekisila epokolo kakulu vekongelo